Nyaraga cĩ ẽhẽẽd
Judi
Thawinet cĩ aku ĩcĩ Judi
1
Nyaraga cĩ keheedi na Judi ticciannioiti cĩ Yesu Kiristoa coo, ĩthõng keeni na gõtõnĩ Jemith.bKẽhẽdacung na agiitia Nyaraga coo, eet wũk balna ũtũvvũwawung Nyekuci Baangietĩ cĩ amĩnannung agiitia, tũwaintia cĩ Yesu Kiristo.
2 Kalayyie na, kĩĩ katĩ kagatanung Nyekuci õrrõt tamatintia kĩ ganõna kĩ mĩnana.
Gerthetin cĩ limanniok cĩk ẽẽn volongnyiak
3 Gõõnõga cĩk kamĩnanung na wo, kabarriteei balna na õrrõt ngatĩ kẽhẽdacung agiitia thõõth cĩ elianĩt cĩ Nyekuco cĩ kõthõl naaga vẽlẽk wo. Ĩthõng thĩ, yoko kahada kĩthĩ ne, kidiima ngĩ kẽtẽhẽẽdawung thõõth ĩmma cĩ rẽẽng, kĩĩ katĩ ketherung na ilittõĩ leminit wũ balna aanyĩk Nyekuci eet cĩk callĩk. 4 Kẽhẽdacung na agiitia thõõth coo, nyatarka ĩnĩkta eeta gwuak cĩk athii cĩ ẽlẽmĩ Nyekuc kõrgẽna cĩ meelitin cĩ lemnyiowu, cĩk õthõõth athĩ ne, ẽlẽmacĩ Nyekuci ĩnõõgõ bũnnathĩta cĩnnĩ kĩdĩmanit thoothonniok cĩk ẽẽn riiriny. Ĩthõng ẽpẽkan balna nẽẽgẽ Yesu Kiristo cĩ ẽẽn Makayyioit cĩnac, ĩthõng ẽẽn Alaan cĩnac. Ẽtẽhẽẽdẽ balna ukwẽẽntĩ cĩ eet cĩk abũrĩ Nyekuc wo, baa reenu vẽlẽk.
5 Nyĩ anyiccu kerehewung thõõth cĩ eet wũk balna ẽẽla Makayyioiti Ijiba. Athii balna nẽẽgẽ gwuak cĩ ẽlẽmĩ Nyekuc, ngaatĩ arui balna nẽ ĩnõõgõ vurtia. 6 Ĩthõng agayyu niigia buu thõõth cĩ anjĩlẽt wũk balna athii cĩ adĩman tiic cĩnĩng,c ngaatĩ ũũngnĩcẽ ngĩtĩ tiic cĩnĩng. Ẽcẽb balna Nyekuci ĩnõõgõ ngarikonyay cĩk alna kũdũt, ĩthõng yoko ngaanĩ alna anyi Nyekuci ĩnõõgõ kaavutõ muwura kuumuc, gii katĩ kõr cĩ ditianẽt cĩ loocu, cĩ katĩ aku ẽtẽẽdĩ nẽ thoothonniok cĩk eet vẽlẽk. 7 Ĩthõng gõõla cĩ aduwõy thõng, nyĩ anyiccu kerehewung thõõth wũ balna kõrõõk cĩ gaalawu cĩ Thõdõmĩ kĩ Gõmõra,d kĩ korookjiok cĩk gaalawu õõgĩ wũk balna õjõõntĩ, kĩ ĩnõõgõ, atican balna eeta cĩkkõ vẽlẽk thoothonniok cĩk gerthek cĩk ẽẽn riiriny. Ngaatĩ aku atũũthĩ Nyekuci korookjiok cĩk gaalawu nĩĩkẽ guyyia, kĩĩ tĩrĩthẽnĩt cĩ uuki nẽ eet guyyia cĩ alna kũdũt.
8 Eeta cĩk kothoothi na wo, cĩk balna avvu kõrgẽna cunung wo, ongonothi nẽẽgẽ, ĩthõng ẽgẽrẽthanit eleeti cĩgĩk ngatĩ adĩmanĩ thoothonniok cĩk gerthek cĩk ẽẽn riiriny. Abũrĩ nẽẽgẽ makathĩt vẽlẽk, ĩthõng adaaccitõ anjĩlẽt cĩk arũgĩ tammuatiddina. 9 Kõdẽ woyyia Maĩkõlĩ alaanĩ cĩ anjĩletu buu, athii balna cĩ adaac alaan cĩ ririwanĩn cĩk gertheke wũ balna ẽpẽkanõnĩ nẽẽgẽ rammatuguan ẽlẽ cĩ Mutha.f Thõõth vẽlẽk cĩ balna õthõõth Maĩkõlĩ dõ cĩ athĩ ne, “Egerenyeci katĩ aniitia Makayyioiti!” 10 Adaac kẽggẽ eeta cĩkkõ kaal cĩk athii cĩ aga nẽẽgẽ. Õgõõn nẽẽgẽ kĩ kẽlẽgẽ cĩk athii cĩ ayak muwẽẽnĩt, atican nẽẽgẽ kaal cĩk aduwaai muwẽẽnĩtĩ cĩnĩng, kaal cĩk anyi ĩnõõgõ kadaaitõ cĩkkõ.
11 Ĩthõng thĩ, yoko ikiyyiak ĩnõõgõ pĩrnanẽtĩ cobbi õrrõt. Owobit nẽẽgẽ yelinit cĩ Keinig wũ balna aruk gõtõnĩ, ĩthõng ĩdĩmanit gerthetin wũ balna adĩman Balaamĩ,h ngatĩ adiim thõõth cĩ nyarobinyawu dõ. Ĩthõng naboo, ũtũbũrĩt Nyekuc buu kĩ balna ngĩ abũrĩ Kõõra.i Nyatarka thoothonniok cĩkkõ vẽlẽk, uuk katĩ Nyekuci ĩnõõgõ.
12 Ayak eeta cĩkkõ ooti cĩk gerthek, ĩthõng atharwacan rũmẽnĩt cĩ adaini lemnyiowa ngatĩ odoi, ĩthõng adakcie buth muruthẽta. Õgõõn nẽẽgẽ kĩ lorudo cĩ avungan ngõõtĩ, ĩthõng athii cĩ ayaha tammu buu. Õgõõn nẽẽgẽ kĩ kẽẽna cĩk athii cĩ ayak ballõk cĩk ubutantiay vẽlẽk. Õgõõn nẽẽgẽ kĩcĩ adaaitõ ngõnana ramma, ĩthõng athii cĩ aari nẽẽgẽ nyegerua. 13 Õgõõn nẽẽgẽ kĩ mugẽna cĩk tõwõn cĩ tiiri, cĩ ayaha tiicanẽ cĩgĩk ngawani cĩ gerthe. Õgõõn nẽẽgẽ kĩ mũnyũnya cĩk ithiicõ muwuratõ cobbi õrrõt ĩcĩ alna kũdũt.
14 Ẽẽn balna Ẽnõkĩj et cĩ ẽẽn vurut cĩ ẽẽn tũrgẽrẽm, cĩ õwõb Adam,k ĩthõng õthõõth balna nẽ thõõth cĩ adĩmanothi eet cĩkkõ athĩ ne, “Ĩcĩnĩt, aku katĩ Makayyioiti iriowa, kĩ vucciaknya cĩk anjĩlẽt cĩk dĩhĩmĩk cĩk meelĩk õrrõt, 15 aku katĩ ẽngẽr nẽ thoothonniok cĩk eet vẽlẽk. Uuk katĩ Makayyioiti gẽrẽthanniok cĩk athii cĩ ẽlẽmĩ ĩnõõnõ, nyatarka gerthetin cĩ adĩmanẽcĩ nẽẽgẽ Nyekuc, kĩ thõõth cĩ adaacĩ ĩnõõnõ.” 16 Õngõngõ balna eeta cĩkkõ kũdũt, ĩthõng angany eeta, ĩthõng aavutõ thoothiowẽy cĩk gerthek cĩk abarriteei nẽẽgẽ dõ. Ẽngẽrẽn nẽẽgẽ, ĩthõng õthõõth thoothonniok cĩk abũnna cĩk ĩgõõlĩ eet õõgĩ, kĩĩ katĩ kũrũbta thoothonniok cĩk adiim nẽẽgẽ.
Tĩrĩthẽnĩt ĩmma
17 Ĩthõng thĩ, gõõnõga cĩk kamĩnanung na wo, ahaddia tĩrĩthẽnĩt wũ balna aduwaccung tionniaha cĩk Makayyioit cĩnac Yesu Kiristol balna ĩcĩ owu. 18 Aduwaccung balna nẽẽgẽ athĩ ne, “Ma ngĩ õbõwẽ ditianẽtĩ cĩ loocu, aatĩ katĩ eeta cĩk arannĩ Nyekuc, ĩthõng ĩrĩcanta thoothonniok cĩk abarriteei eleeti cĩgĩk dõ rũgẽta cĩnĩng.” 19 Ĩthõng yoko, ẽẽn eeta cĩkkõ eet cĩk arumuththung agiit uuktõy nyaguana. Ahad nẽẽgẽ thoothonniok cĩk looc coo dõ, ĩthõng athii Ririwacĩ cĩ Nyekucom ĩcĩnĩng tõ.
20 Ĩthõng thĩ, gõõnõga cĩk kamĩnanung na wo, anycĩk leminit cunung kĩtĩlĩth, ĩthõng alayyiowu Ririwaca cĩ Dĩhĩmĩ. 21 Uthuutti eleeti cuguk mĩnana cĩ Nyekuco, kĩcĩ ngaanĩ ereyyu Makayyioit cĩnac Yesu Kiristo, kẽyẽla tamati cĩnnĩ ngatĩ anyung rũgẽt cĩ alna kũdũt.
22 Atamattik eet cĩk akidan thõõth cĩ leminit cĩnĩng. 23 Eelia eet utuguryia ngĩtĩvõrĩ guyyia. Ĩthõng tongolintia cĩ thinneti cuguk, atamattik eet cĩk adiim tamati cunung. Ĩthõng thĩ, ĩcĩnĩt jurrung, aaburyiek gerthetin cĩ ẽgẽrẽthan rũgẽt cĩnĩng.
Lawinit cĩ dĩhĩthẽntõ
24 Ĩthõng yoko, anycĩk niigia bulẽnĩt vẽlẽk kũũk Nyekuca, cĩ ũũlĩ ngatĩ athunnung agiitia gõõla cĩ woccia athii cĩ athiinu, ĩthõng ayahanung agiit talintia cobbi õrrõt, ivitia ngatĩ aavẽ nẽ bulẽnta cĩnnĩ, ĩcĩ athii gerthetini ĩmma ĩcunung tõ. 25 Ẽẽn bulẽnĩtĩ vẽlẽk cĩ Nyekuc codoi dõ cĩ ẽẽn Ellioit cĩnac, ĩthõng aku bulẽnĩtĩ ĩcĩ Yesu Kiristo Makayyioit cĩnac. Ĩthõng ẽẽn bulẽnĩtĩ, kĩ tiirthẽt, kĩ makathĩt vẽlẽk cĩgĩnĩk. Aavĩ balna Nyekuci terehianta ĩcĩ itinõ, kĩĩ kõr coo, kĩ dõõkĩthĩ kũdũt. Amẽn.