Èbérè Ɨ 8

Yésu, kòwánà kàdrɨ̀ tà tɨ́dhɨ́ Gìká dré bhàle ru yìzo móndɨ́ ɨ́be dhɨ nɨ tà sè dhɨ ꞌɨ

1 Tà kàdrɨ̀ mà dré adrélé tàle dhɨ, tà kònɨ̀dhɨ ꞌɨ: Àma kòwánà kàdrɨ̀ làsú be kònɨ̀nɨ nda ɨ́be. Akódhɨ nda lɨrɨ́ adrélé Gìká múrúngú dhɨ nɨ lɨrɨ́rà òpɨ̀ àdhya nɨ drɨ́ágó lésè bhù na. 2 Kònàle dhɨ, adré Gìká nɨ tà ꞌo àrà lólo adrézó akódhɨ nɨ lɨndrɨ̀ bha lána dhɨ na. Àrà nda, tàbèrènákolò tàndɨ Mírì dré ledélé nɨ̀, móndɨ́ ɨ̀ dré ledélé ko dhɨ ꞌɨ.

3 Kòwánà kàdrɨ̀ títí adrélé bhàle dhɨ ɨ, à adré àyɨ kɨ bha adrélé ngá fe ɨ̀ndɨ̀ mòbòmà fe Gìká dré. Adré dɨ lèá dhɨ, àma kɨ kòwánà kàdrɨ̀ kàdré kpà ngá ɨ́be fèle Gìká dré. 4 Kònò akódhɨ nda kàdré tá kònwa bvò dri dhɨ, kɨtswá tá ndɨ̀ndɨ̀ adrélé kòwánà ro ko. Tàko ko, kòwánà adrébhá ngá fe Gìká dré ngóró tátrɨ́trɨ́ kúlí dré adrélé tàle dhɨ tɨ́nɨ dhɨ ɨ be. 5 Àyɨ nda ɨ̀ adré àyɨ kɨ àzí ꞌo kòwánà ɨ ró ngá lɨ́ndrɨ́ adrébhá ngá tàndɨ bhù na dhɨ kɨ tadhá dhɨ ɨ sè. Ásà dhɨ, lókyá Mósè dré tá adréràꞌa ꞌòle tàbèrènákolò ledé dhɨ ꞌá dhɨ, Gìká lazí tá tà akódhɨ dri, tàzoá dhɨ: «Mɨ́ kònò dóro, mɨ́ kòledéró ngá títí dhɨ ɨ làsú be ngóró má dré tadhálé mɨ́ dré kòngó drìna dhɨ tɨ́nɨ.»^a 6 Dɨ, nyànomvá dhɨ, àzí Yésu dré kisúlé kòwánà àdhya ró dhɨ ɨ́na kàdrɨ̀ àyɨkya kɨ lavú byá. Tàko ko, akódhɨ adré áyɨ totó tà ꞌo móndɨ́ kɨ kòfalé ꞌá Gìká be, tà tɨ́dhɨ́ Gìká dré bhàle ru yìzo àyɨ ɨ́be dhɨ nɨ tà sè. Tà tɨ́dhɨ́ ru yìzo nda kpà kàdrɨ̀, tà àku ru yìzo dhɨ nɨ lavú. Kòdhɨ ɨ́be dhɨ, lazikúlí tà tɨ́dhɨ́ ru yìzo nda dré adrézó áyɨ totó drìá dhɨ ɨ kókpà kàdrɨ̀, lazikúlí àku dhɨ kɨ lavú.

7 Kònò tà àku Gìká dré tá bhàle ru yìzo móndɨ́ ɨ́be nda kàdré tá dóro kɨtswálé títí dhɨ, tà adrézó àzya nɨ nɨ bha àrà nɨ ꞌá dhɨ nɨ tá adré yókódhó. 8 Dɨ, Gìká kisú tá ɨ́na tà kònzɨ áyɨ móndyá ɨ véna gò, tàzoá dhɨ:

«Mírì tà dhɨ: Mɨ̀ yi rè ká! Lókyá adrélépi alɨ̀le dhɨ sè dhɨ,

má nɨ tà tɨ́dhɨ́ ru yìzo tódhyá Ɨ̀sèrélè ànzɨ ɨ́be, ɨ̀ndɨ̀ Yúdà ànzɨ ɨ́be dhɨ nɨ bha.

9 Tà tɨ́dhɨ́ ru yìzo nda kɨtswá adrélé ngóró tà àku má dré tá bhàle ru yìzo àyɨ kɨ tábhí ɨ́be dhɨ tɨ́nɨ ko.

Lókyá nda kònàdhɨ sè dhɨ, má ru tá àyɨ kɨ drɨ́gá gò, àyɨ kɨ adrìzo apfòle Èzèpétò lésè.

Dɨ, ɨ̀ kaꞌì tá àyɨkya tà má dré bhàle ru yìzo àyɨ ɨ́be nda nɨ lebèle ko.

Gò má dré gòzo vélé àyɨ kɨ tà kisù ko.

10 Dɨ, Mírì tà dhɨ: Lókyá adrélépi alɨ̀le dhɨ sè dhɨ,

tà tɨ́dhɨ́ má dré dra bhàle ru yìzo tódhyá Ɨ̀sèrélè ànzɨ ɨ́be nda, tà kònɨ̀dhɨ ꞌɨ:

Má nɨ áma tátrɨ́trɨ́ kúlí bha àyɨ drìna,

kúlí nda kɨ tɨsɨ̀zo àyɨ kɨ togó na.

Má nɨ mána adré àyɨ kɨ Gìká ro,

ɨ̀ndɨ̀ ɨ̀ nɨ àyɨkya adré áma móndyá ɨ ró.

11 Dhya àlo kɨtswá gòle áyɨ àzya ꞌɨ yà, kó ngalè áyɨ adrúpi ꞌɨ yà dhɨ nɨ tadhá,

tàzoá dhɨ ‹Mɨ́ kònì Mírì› dhɨ ko.

Tàko ko, àyɨ nda kɨ títí áma ni,

kɨdhólé móndɨ́ tàko lavúlé àyɨ kòfalé dhɨ rú, tsàle móndɨ́ kàdrɨ̀ lavúlé dhɨ rú.

12 Àngyá ko, má nɨ àyɨ kɨ tà kònzɨ kɨ tri.

Má kɨtswá gòle vélé àyɨ kɨ tàkonzɨ̀ kɨ tà kisù ko.»^b

13 Dɨ Gìká dré tà ru yìzo nda kòdhɨ nɨ zìle «tɨ́dhɨ́ ro» dhɨ sè dhɨ, kòdhɨ adré tadhá dhɨ, akódhɨ bhà tà àku ru yìzo nda gàrà dri dre. Tà bhàle gàrà dri adrélépi kpà agàle dhɨ, adré ꞌòle tavɨ̀le.