Fìlìpóyìbhá Ɨ i

Wárágà Pólò dré tɨsɨ̀le Fìlìpóyìbhá ɨ dré dhɨ

Wárágà kònɨ̀dhɨ nɨ tà àndu ngɨ̀le drìdrì dhɨ

Kònɨ̀dhɨ wárágà Pólò dré tɨsɨ̀le móndyá kaꞌìbhá Fìlìpóyì na dhɨ ɨ dré dhɨ ꞌɨ. Fìlìpóyì nda tá bhàandre kàdrɨ̀ Rómà kɨ òpɨ̀ nɨ bvò Màkèdònɨ́yà àdhya drìle dhɨ ꞌɨ. Pólò longó tá Rúbí Tanɨ gò Èkèlézyà bhàzo kònàle, dré tá adréràꞌa áyɨ atsí andre nɨ rì to dhɨ ꞌá (Tà ꞌòle dhɨ ɨ 16:12-40).

Pólò adré wárágà kònɨ̀dhɨ nɨ tɨsɨ̀, dré adréràꞌa bǎdzó na dhɨ ꞌá. Adré tɨsɨ̀á àwoyà tàzo Fìlìpóyìbhá ɨ dré, ngá ɨ̀ dré adzílé áyɨ ledézó dhɨ kɨ tà sè. Adré kpà àyɨ kɨ togó tɨmbà, adrézó tàá dhɨ, kɨzà ɨ́ dré adrélé nyàle dhɨ adré vélé Rúbí Tanɨ ꞌo lɨ̀le drìdrì lavúlé. Adré tàá dhɨ, Gìká fè àma adrélé ngbà ꞌí Krísto nɨ kaꞌì ko, fè kókpà àma adrélé kɨzà nya akódhɨ nɨ tà sè (1:12-30). Adré kpà Fìlìpóyìbhá nda kɨ kodzó, ɨ̀ kàdréró tà kisù Krísto àdhya tɨ́nɨ, adrézó àyɨ kɨ tà bha kìní mi, adrézó kɨzà kaꞌì nyàle Krísto àdhya tɨ́nɨ (2:1-30). Adré kpà àyɨ kɨ kodzó, ɨ̀ kàdréró mì bha tà adrélé ꞌòle rúbhá sè dhɨ ɨ dri ko. Be ró dhɨ, ɨ̀ kònì dɨ tàle dhɨ, Gìká bhà àyɨ gyǎgya ɨ́ kandrá ɨ̀ dré Krísto nɨ kaꞌìle dhɨ sè (3:1-11). Kùdù ro dhɨ, Pólò adré àyɨ kɨ kodzó, ɨ̀ kàdréró tà ꞌo ɨ́na tɨ́nɨ, adrézó lɨ̀le ába drìdrì, adrézó lenzélé, adrézó kpà tà zi Gìká tí tà títí ɨ sè (3:12–4:9).

Tà kàdrɨ̀kàdrɨ̀ wárágà kònɨ̀dhɨ léna dhɨ kɨ atìma

1) Pólò nɨ mòdo fèma, ɨ̀ndɨ̀ tà dré zìle Gìká tí Fìlìpóyìbhá ɨ dré dhɨ (1:1-11)

2) Pólò nɨ kɨzà nyàma Rúbí Tanɨ nɨ tà sè dhɨ (1:12-30)

3) Àma kɨ tà bhàma kìní mi Yésu Krísto àdhya tɨ́nɨ dhɨ (2:1-18)

4) Àzí Tìmòtéyò kya Èpàfùròdítò be dhɨ (2:19-30)

5) Àma kɨ atsama gyǎgya Gìká kandrá Krísto nɨ kaꞌìma sè dhɨ, ɨ̀ndɨ̀ tà ꞌòma Pólò àdhya tɨ́nɨ dhɨ (3:1–4:9)

6) Pólò nɨ àwoyà tàma ngá fèle drá dhɨ sè dhɨ, ɨ̀ndɨ̀ mòdo kùdù (4:10-23)