Èfésòbhá Ɨ i

Wárágà Pólò dré tɨsɨ̀le Èfésòbhá ɨ dré dhɨ

Wárágà kònɨ̀dhɨ nɨ tà àndu ngɨ̀le drìdrì dhɨ

Kònɨ̀dhɨ wárágà Pólò dré tɨsɨ̀le móndyá kaꞌìbhá Èfésò na dhɨ ɨ dré dhɨ ꞌɨ. Èfésò nda tá bhàandre kàdrɨ̀ bvò Àsɨ́yà àdhya na dhɨ ꞌɨ. Pólò longó tá Rúbí Tanɨ kònàle gò, Gìká nɨ tà tadházó Èfésòbhá ɨ dré kóná rì tàlí sè, dré tá adréràꞌa áyɨ atsí andre nɨ na to dhɨ ꞌá (Tà ꞌòle dhɨ ɨ 19:1–20:1).

Pólò adré wárágà kònɨ̀dhɨ nɨ tɨsɨ̀ tà kàdrɨ̀kàdrɨ̀ rì dhɨ ɨ sè. Àlo nɨ, adré Rúbí Tanɨ nɨ tà àndu ngɨ mìbhalé tí, adrézó Gìká zɨ̀ móndɨ́ ɨ adrélé ɨ́na ró gò, àyɨ kɨ apázó tàkonzɨ̀ lésè Yésu Krísto sè ngɨ́nɨ ya dhɨ nɨ tà tadhá. Adré tà lùzu ró Gìká dré kisùle ꞌòle kɨ́nó lésè dhɨ nɨ tadhá kònɨ̀nɨ: «A nɨ tà títí bhù na ɨ̀ndɨ̀ bvò dri dhɨ kɨ amú bhàle adrélé ópɨ́ kàdrɨ̀ àlo, Krísto zàle» (1:10). Pólò adré kpà Gìká amú móndyá súrú twá ro dhɨ ɨ Yúdà ànzɨ ɨ́be adrélé súrú àlo ró Krísto na ngɨ́nɨ ya dhɨ nɨ tà tadhá (2:11-22).

Rì nɨ, Pólò adré Yésu nɨ kaꞌìbhá ɨ̀ kàdré atsílé ngɨ́nɨ ya dhɨ nɨ tà tadhá. Adré tàá dhɨ, mà kòtɨngá àma kɨ lɨ́drɨ̀ àku àma rúsè, lɨ́drɨ̀ tɨ́dhɨ́ Gìká dré bhàle adrélé ɨ́na tɨ́nɨ dhɨ nɨ asózó àma rú (4:20-24). Adré kpà tà tadhá àgo kɨ tà àyɨ kɨ tòkó ɨ́be dhɨ dri, ànzɨmvá kɨ tà àyɨ kɨ tibhá ɨ́be dhɨ dri, ɨ̀ndɨ̀ màrábà kɨ tà àyɨ kɨ mírì ɨ́be dhɨ dri. Kùdù ro dhɨ, adré móndyá kaꞌìbhá dhɨ kɨ kodzó, ɨ̀ kàdréró àdzú ngá Gìká àdhya kɨ tosó àyɨ rú àdzú tɨrɨ́ kònzɨ ɨ́be dhɨ nɨ tà sè (6:10-20).

Tà kàdrɨ̀kàdrɨ̀ wárágà kònɨ̀dhɨ léna dhɨ kɨ atìma

1) Pólò nɨ mòdo fèma (1:1-2)

2) Krísto nɨ Rúbí Tanɨ nɨ tà àndu ngɨ̀ma (1:3–3:21)

3) Lɨ́drɨ̀ tɨ́dhɨ́ ro Krísto na dhɨ (4:1–6:20)

4) Pólò nɨ kúlí kùdù (6:21-24)