13
1 Agɩpɩ mɩ kɔɔ yɩrɛ nʋm dɩ ɩɩr lanyʋɔnna da-n jʋʋn, a hana ʋma yʋɔr na yʋʋ makonyɔ, dɩ fãgadaar kpɛra yʋɔr hale ɔɔ ʋ̃sɔrara, dɩ i kʋɛ thɩmɩɩr hale ɔɔ yʋsɔrara dakha.
2 Dɩ nʋmɩlera mɩ yɩnɩ a-n honanɛ kpe, sɩ ɔɔ nɛ na-n hona sɩɓɛlɛ̃ nɛɛ, sɩ ɔɔ gbuokhu ho sidũ'ũ gbuokho. Dɩ gbakhoolera kɔɔ haarɛ ɔɔ fãga, na ɔɔ fãga too pa, na punone dɩɩ kɔ̃tĩ ka.
3 Dɩ mɩ yɩrɛ ɔɔ yʋsɔɔlera bɩɛl dɩɩ ho tɔmĩ sɛ khoo a 'lɛ, kɛ dɔnɩ khikhi khoo. Sɩ ɔɔ khikhi khoolera kɔɔ kpɛɛrɛ. Dɩ tɩbɩla thɩɩra koo n kɔɔ kpar nʋmɩnaale na nɔ kpaarɛ.
4 Dɩ wɩ-n gburõkure gbakhoraale gɩdonɩ a kɔɔ har nʋmɩle ɔɔ puno. Dɩ mɛ̃ wɩ-n gburõku nʋmɩnaalera dɩ wa-n sona ayɩ: Amɛ hale a ho nʋmɩle, dɩ amɛ na punone a na kɛ̃kɛrɛnaa?
5 Dɩ nʋmɩle 'lɛr hʋɛ da-n sona kuune, da-n mɩɩna dakha i kʋɛ thɩmɩa, a 'lɛr punone a na-n cʋʋna thĩɛ pora kpalanyɔ yenyɔ.
6 Dɩ a har ɔɔ nɔra da-n kpɛna Thãgba, da-n kʋɛna ɔɔ i, da-n sʋʋrna Thãgbaa pa na wɩrɛ hanɩ Thãgbaa dʋɔ.
7 A kɔɔ 'lɛr hʋɛ a kena tɩɩ phuusɔ kʋʋr a puno wi, a 'lɛr dakha punone caarra fɛʋ, na tɩbɩlala fɛʋ, na thɩmɩɩrra fɛʋ, na ca kpalala fɛʋ.
8 Dɩ tɩbɩla fɛʋ thɩɩra n gburõkuraarɛ, kɛ dɔnɩ wɩrɛ awɩ i na kherenɩ yi sɛbɛraakɛ dɔnɩ Bana biida ga, kɛ dɔnɩ ʋrɛ wɩ kɔɔ kʋnɩ sɩ thɩɩkɛ na kɔɔ ti pa'.
9 Ʋrɛɛkɛ hananɩ nũu, dɔ a na-n nɩɛ.
10 Ʋrɛɛkɛ ga teenanɩ a dɔ dee, deera a na do; dɩ ʋrɛɛkɛ n kɔnɩ tibil na bajɩna, bajɩnana wa kʋnaa phubi. Gɩrɛɛkɛra tɩɩ phuusɔ na nɩna awɩ ha fʋ na awɩ ha pɛ.
11 Agɩpɩ mɩ kɔɔ yɩrɛ nʋ̃ kpɩɩ wo da-n the thɩɩra, a hana ʋma yenyɔ dɩɩ ho Bana biida, sɩ da-n mɩɩ gbakhoo kha.
12 Dɩ a hananɛ caca nʋmɩ fãgara da-n dona thɔma ɔɔ ƴɛra; dɩ a cʋʋrɛ thɩɩ na wɩrɛ fɛʋʋkɛ harɔnɩ dɩ wa-n gburõku caca nʋmɩnaale, kɛ kɔɔ hananɩ tɔmɩ̃ sɛ khookɛ dɔnɩ khikhi khoo, sɩ dɩɩ kpɛɛ.
13 Dɩ a n cʋʋrɛ nɔ kpaa thɩ̃ kɔ̃tɩna, dɩ ba cʋʋnanakɛ dɔɔ dɩɩ the ƴũ a na ji thɩɩra dɩ tɩbɩla fɛʋ na-n yɩɛ.
14 Dɩ nɔ kpaa thɩ̃ɛsɔɔlera a kɔɔ 'lɛnɩ hʋɛ a na-n cʋʋ caca nʋmɩ ƴɛrara, gɛr a-n fɩɩlna tɩbɩla thɩɩra da-n so war dɩ yɩ, wɩ cʋɛ nʋmɩlera thɩl khaa gbelẽ gbelẽ, kɛ dɔnɩ nʋmɩkɛra wɩ kɔɔ cɩnɩ na bajɩna sɩ dɩ le.
15 Balanyɔ nʋmɩle 'lɛr punone da-n 'laana fesue thɩɛnaalera wɩ cʋʋnɩ dɩ ho caca nʋmna, dɩ mɛ̃ thɩ̃ɛɛlera wɩ kɔɔ cʋʋnɩ dɩ ho nʋm n mɩɩ nʋɔ, da-n kʋʋrna dakha wɩrɛ fɛʋʋkɛ na-n gburõkuneni thɩɛnaalera wɩ cʋʋnɩ dɩ ho nʋma'.
16 Dɩ a cʋʋrɛ tɩbɩla fɛʋ tɩɩ mɔlɔ a gbana kɔ̃tɩna, lɛ̃lɛ na bɔdara, waɩa na dea, wɩ pɛ war jɩɩn awɩ nyɔ̃bɔsɔra, na awɩ kobisɔra.
17 Dɩ tibil bɩɛllakɛ na puno na the thɩ̃ɛ, agɩbo a dolõ thɩ̃ɛ, sɩɩ do aa hana jɩɩnɩkɛ dɔnɩ nʋmɩlee i agɩbo ɔɔ i nɩmɔrɔaa ga.
18 Kɩɛr dʋɔn kpɛsɛ nɩna paar. Ʋrɛɛkɛ hananɩ yʋʋ a thera a jɛ nʋmɩlee nɩmɔrɔ kɩr, gɩdonɩ tibil nɩmɔrɔ gɩ, dɩ ga nɩmɔrɔ har taa maadõ na kpalãther maadõ.