4
1 Mɛ̃ gɩ, ɩ̃ omisɔɔkɛ mɩ-n nanɩ, kɛ n kɔ mɩnɩ thue, nɛrkɛ dɔnɩ ɩ̃ kãkada na ɩ̃ məbida, nɩ tɛ kɩbɩ gɩrɛ Kɔ̃tɩnɩ hʋra, nɛrkɛ mɩ-n nanɩ.
2 Mɩ-n bɩɛlɛ Evodɩ, mɩ-n bɩɛlɛ Sɛ̃tɩsɩ dɩ wa 'li kha mɔ̃ wɩ donɩ Kɔ̃tɩnɩda.
3 Dɩ fɛrɛ dakha, kɛ dɔnɩ yʋ gbuu tibil thɔmana, mɩ-n bɩɛl fɛr dɩ fa bul wi, gɩdonɩ wɛr kɔɔ tɛrɔ tutugo bʋɔɔ thɩmɩɩ mɩɩrɛ nakha mɛrɛ, na Kilemã na wɩ̃ tibil ɩkhasɔɔkɛ kɔɔ dɔna mɩnɩ kha thɔma, kɛ awɩ i hanɩ yi sɛbɛra.
4 Na-n hana daʋ wire fɛʋ mɔ̃ nɩ donɩ Kɔ̃tɩnɩda, ɔɔ mɩ bire so wo na-n hana daʋ.
5 Dɔ tɩbɩla fɛʋ na-n yɩ mɔ̃ nɩ hananɩ hɛlɛlɛ fɩlɛ. Kɔ̃tɩn wɔrɔnɛ dɔdɔdɔ.
6 Na-n jẽ haar thɩ̃ bɩɛllalaka', sɩ thɩɛna fɛʋ na-n sɔ Thãgbara gɩrɛ n ɓɔra nɩnɩ na bɩɛlɛ, na phʋʋrɛ, na fʋɔrɛ.
7 Dɩ Thãgbaa ha ieekɛ kəəneni dɩ tibil na-n jɩ kɩrʋa', na-n bɛra anɩ ha na anɩ kpɩɛr mɔ̃ nɩ hanɩ Jeju Kirisitira.
8 Gɩrɛ sɛnɩ omɩna, nɩ dɔ gɩrɛ fɛʋʋkɛ dɔnɩ sobɔr, na gɩrɛ fɛʋʋkɛ teananɩ cʋʋr, na gɩrɛ fɛʋʋkɛ telenenɩ, na gɩrɛ fɛʋʋkɛ phonɩ, na gɩrɛ fɛʋʋkɛ dɔnɩ danananɛ, na gɩrɛ fɛʋʋkɛ thɛnɩ ire, na thɩ̃ɛ wo thɩ̃ɛɛkɛ thʋnanɩ ɓɔ̃ ka a teena khɩirɛ, n do anɩ kpɩɛrnɔ.
9 Gɩrɛɛkɛ nɩ kɔɔ dɩɩrnɩ, kɛ nɩ 'lɛnɩ ɩ̃ pa, na gɩrɛ nɩ kɔɔ nɩɛnɩ a yɩna gɩ ɩ̃ pa, na-n cʋɛ gɛr, dɩ Thãgbaakɛ ha ɩɩ n thernɩ na ha kha na nɛrɛ.
10 Mɩ-n khɩɩrɛ Kɔ̃tɩn na daʋ ka gɩrɛraakɛ nɩ birni a kpɩɛrna mɩ wo. Nɩ kɔɔ mãa kpɩɛrna gar wer, sɩɩ do fʋ paar ɓɔra nɩ.
11 Ga do ɩ̃ thɩ̃ ɓɔra dɔ nɔɔ dɩ ma-n mɩɩ thaka', gɩdonɩ a mɩ ha mɔ̃kɛ mɩ hanɩnakɛ, sɩ gɩ-n da marɛ.
12 Mɩ-n marrɛ dɩ ɩ̃ too na thɩ̃ 'leere, mɩ-n marrɛ dɩ ɩ̃ too ado mɩ hana thɩ̃ɛ jɔɔ; thɩ̃ɛ fɛʋra na paar fɛʋ, mɩ jɩrɛ thɩ̃ doo n dɔnɩ hiir na thɩ̃ doo n dɔnɩ kɔmɛr, a jɩ thɩ̃ jɔ hananɛ na thɩ̃ ɓɔrɛ.
13 Mɩ-n punone thɩ̃ɛ fɛʋʋ cʋʋ dɩ gɩ the fãgaraakɛ Kirisiti n pɛ marnɩ;
14 sɩ gɩ bɔrɛrakɛ nɩ kɔɔ bul mini ɩ̃ bɔ gaarra.
15 Nɛr Filipidara nɩ jɩrɛ bɔɔbɔɔ dɩ ɔbɔɔkɛ ma kɔɔ thenɩ Masedʋan caca bɔɔkɛ sɩ kɔɔ mɩɩnɩ tutugo bʋɔɔ thɩmɩɩ, nɛr dɔ we gbɛbɩdaraakɛ dɩbara kɔɔ bulo mini na war thɩmɩɩr.
16 Gɩdonɩ ɔbɔɔkɛ mɩ kɔɔ hanɩ Tesalonɩkɩ, nɩ kɔɔ thɔnanɛ khaardaa balanyɔsɔ a ha mɩ dɩɩ bul mi ɩ̃ thɩ̃ ɓɔrra.
17 Ga do khaardaa mɩ-n ƴaala', sɩ gɩrɛ mɩ-n ƴaalnɩ dʋɔn khorɩkɛ gelela n ɩna narnɩ.
18 Mɩ 'lɛr thɩɛna fɛʋ dɩ thɩ̃ jɔdaar ha mɩ, nyɔ̃korʋ hi mer phi na khaardaakɛ Epafʋrɔdɩtɩ kɔɔ thenanɩ anɩ pa a ɩna ha mɩ; thɩ̃ɛ gɩɩkɛ n hʋnanɩ Thãgba daʋ latɩkolo khaa, a dʋʋraa bonɩ ji thɩ̃ɛɛkɛ daaraanɩ haar dɩ tee.
19 Ɩ̃ Thãgba na ha nɛr thɩ̃ɛ fɛʋʋkɛ n ɓɔra nɩnɩ, mɔ̃kɛ ɔɔ leekɛ a lenɩ dɩɩ və̃vĩə hanɩ, gɩ do Jeju Kirisiti dɔ nɔɔ.
20 Thãgbaakɛ dɔnɩ asɩ Thɩ ɔɔ i n dʋbarɔ na jala waa khorr vʋ̃ʋ.
21 Nɩ fʋɔrɛ tɩɩ phuusɔ fɛʋ bɩɛlbɩɛl, kɛ dɔnɩ Jeju Kirisitii too. Omɩnaakɛ hanɩ kha na mɛrɛ wɩ fʋɔr nɛr.
22 Tɩɩ phuusɔ fɛʋ fʋɔr nɛr, sɩ cacara Sejaarɩ cɔdara wɛ.
23 Jeju Kirisiti Kɔ̃tɩn na-n jɛ nɩ fɛʋ bʋɔra.