3
1 Gɩrɛ sɛnɩ ɩ̃ omisɔ, na-n hana daʋ mɔ̃ nɩ donɩ Kɔ̃tɩnɩda. Ga-n yaa mɩ fɩɩʋrakɛ dɩ ma bir na 'loro gɩrɛ mɩ kɔɔ khere narnɩ mamara ga, dɩ gelela anɩ bulda gɩ do.
2 Na-n jɩɛ hɩɩn benasɔ, na-n jɩɛ hɩɩn thɔ̃daar puusɔɔlera, na-n jɩɛ hɩɩn wɩrɛɛkɛ n ƴaalɛnɩ na-n liirene tomɩr.
3 Gɩdonɩ wɩrɛ n kuroni khʋ̃ kur bʋɔ, sɛr wɛ, kɛ n fʋɔrɛnɩ Thãgba dɩɩ do Thu Phuu pa gɩ-n the, kɛ Jeju Kirisiti donɩ nɔɔ dɩ sa-n məbi, a dona wɩrɛ na-n bɔnɩ dɩ wa-n ɩɩ gɩrɛraakɛ tibil yinə n yɩna'.
4 Mɛrɛ dakha mɩ punone pɛr haar mer gɩrɛraakɛ tibil yinə n yɩnɩ, dɩ ado gɩrɛ tibil yinə n yɩnɩ wɩ yɩ wɩ bɔ na ɩarɔ, ga dor mɛr ka jɔ:
5 Wɩ kɔɔ kur mer khʋ̃ʋ wire makõther wirera, Ɩjɩrayɛl bire ha mɩ, dɩ ɩ̃ do Bɛ̃jamɛ̃ɛ ca, Ebirə kɔna mɩ dɩ ɩ̃ do Ebirə bʋɔ; ado jɔfʋ hɩɩnɛna gɩ, jɔfʋ bʋ dʋdaar ha mɩ,
6 ado gbɛ̃gbɛrɛ̃daara gɩ, we gbɛbɩdaraa kpoodaar ha mɩ, ado fɩl sar 'lɛrra gɩ jɔfʋ hɩɩnɛna, sɩ paar na ha mar gɛrra ga.
7 Sɩ ga thɩ̃sɔɔlera kɔɔ dɔ marnɩ khor, mɔlɔ thɩ̃ɛ mɩ-n hɩɩn gɩ gɩrɛ dɩɩ do, dɩɩ do Kirisiti dɔ nɔɔ.
8 Thɩ̃ɛ fɛʋrakɛ mɩ-n hɩɩn dɩɩ do mɔlɔ thɩ̃ɛ, gɩ do gɩrɛ baannɩ fĩi, kɛ dɔnɩ jɩɩrɩkɛ ma jɩnɩ Jeju Kirisiti ɩ̃ Kɔ̃tɩ̃ ma-n pɛr, dɔ nɔɔ; ʋrɛra dɔnɩ nɔɔ dɩ ɩ̃ faarɔ thɩ̃ɛ fɛʋʋlera. Mɩ-n hɩɩn gɛr dɩɩ do puuyʋ thɩn ɩ̃ puno ɩ̃ 'lɛ Kirisiti,
9 ɩ̃ haaraa sɩ ga do na ɩ̃ thɛthɛɛ fɩl sarɩkɛ mɩ 'lɛnɩ jɔfʋ hɩɩnɛna gɩ tha', sɩ gɩ do gɩrɛ mɩ 'lɛnɩ ha pɛrɛraakɛ mɩ hananɩ Kirisitira gɩ, kɛ dɔnɩ fɩl sarʋʋkɛ thɛnɩ Thãgbara, kɛ tibil n 'lɛnɩ ha pɛrɛra.
10 Mɩ-n ƴaalɛ ɩ̃ jɩ Kirisiti na mɔ̃ ɔɔ khi ɩɩr fãga hanɩ, ɩ̃ bul kha dakha na ɔɔ bɔ gaar, ma-n khinə khirikɛ dɔnɩ ɔɔda,
11 ma-n pɛna nũu ado ma punone a na 'lɛ khi ɩɩrɛ.
12 Ga do mɩ yɩ mɩ 'lɛr pa', dɩ agɩbo mɩ bɔrɛ ka pa', sɩ mɩ-n yɩrrɛ ɩ̃ 'lɛ gɩ, gɩdonɩ gɛrra Jeju Kirisiti kɔɔ 'lɛ mɩ.
13 Omɩna, ado mɛrra gɩ, ma-n kpɩɛr mɩ 'lɛr pa'; sɩ thɩ̃ bɩɛlɩkɛ mɩ-n cʋʋnɩ dʋɔn: Mɩ-n diinəne gɩrɛ hanɩ khiro, sɩ dɩ ma-n yɩrna gɩrɛ hanɩ ƴɛbʋrɔ.
14 Khu paar mɩ-n yɩr ɩ̃ ca ɩ̃ dã ɩ̃ 'lɛ khorɩkɛ Thãgba n we mɩnɩ ɩ̃ 'lɛ Thãgbaa dʋɔ, gɩ do Jeju Kirisiti dɔ nɔɔ.
15 Sɛrɛ fɛʋʋkɛ khɔnanɩ pɩ a bɩ̃, sɩ hanana ga kpɩɛr caalera, sɩ ado anɩ kpɩɛr har kpɩɩ, Thãgba na cʋɛ gɩ dɩ ga hɩrɛ nar.
16 Sɩ ka sɩ danɩ gɩrɛ, sɩ fɔ ɔmɛna a ɩrɛ na jalana.
17 Omɩna, nɛrɛ fɛʋ nɩ dɔ ɩ̃ phɛldara, na-n hɩnɛ dakha bɔɔbɔɔ wɩrɛɛkɛ n ɩrɛnɩ mɔ̃kɛ asɩ fɩl hanɩ.
18 Gɩdonɩ tibil jɔjʋɔ hale awɩ ɩɩr para wɩ dor Kirisitii kʋkʋ thɩr lãlaardara; mɩ-n kɔɔ mɩɛ nɛr bɔɔ jɔɔjɔɔ awɩda, na nɛnɛ̃kɛrakɛ mɩ-n mɩɩ gɛr 'lo na bɩwɛ dɩ ɩ̃ yɩ:
19 Awɩ khu pa na dor bũburone, gɩrɛ n danɩ awɩ tomɩra dɔrɔɔm dʋɔn awɩ thãgba, awɩ yicur cʋʋ wɩ-n khɩɩ, wa-n kpɩɛrna thɩ̃ɛ saagado thɩɩkɛɛ thɩ̃ gaaga.
20 Sɩ se wer, asɩ dɩ Thãgbaa dʋɔ gɩ ha, le Taadaarɩkɛ dɔnɩ Jeju Kirisiti Kɔ̃tɩnɩkɛ sɩ-n pɩɛrnɩ na the na ɩ̃.
21 Ɔr na deba asɩ tomɩɩkɛ yɔɔnɩ a cʋʋ gɩ hona ɔɔ tomɩɩkɛ ɓɔnanɩ, gɩ the ɔɔ fãgaraakɛ a hananɩ a cʋʋna thɩ̃ɛ fɛʋ dɩ gɩ jʋʋraa.