6
1 Omɩna wei, ado nɩ yɩ tibilikɛ hanɩ sopugo cʋʋrɔ, nɛrɛɛkɛ dʋɔnnɩ Thu Phuudara nɩ naarɛɛ na hɛlɛlɛ fɩlɛ, sɩ jɩɛ hɩɩn afɩbara a mɛ̃ gaa fa 'lɛr fifiləle fer.
2 Na-n dea kha heendaasɔ, thale dɔ Kirisitii jɔfʋ hɩɩnɛ.
3 Ado tibil na kpɩɛr dɩ ɩnɩ dor thɩ̃ɛ sɩɩ do aa do thɩ̃a', dɩbara a-n fɩɩl.
4 Tɩbɩla fɛʋ bɩɛlbɩɛl n jʋrɛ awɩ thɛthɛɛ thɔ̃ a na hɩnɛ, dɩ mɛ̃ tibil na hana ɔɔ thɛthɛɛ məbida dɩbara, sɩ a na-n too na barana haanɩda ga;
5 gɩdonɩ gɩrɛ telenenɩ tibil, dɔ a na-n hɩɩn gɛr.
6 Dɔ ʋrɛ wɩ-n dɩɩrnɩ Thãgbaa thɩmɩɩ na-n bɔna ʋrɛ n dɩrɛɛnɩ na ɔɔ thɩ̃sɔ fɛʋʋkɛ a hananɩ.
7 Na-n fɩɩl dɩbara ga; wa-n ɓoɓoro Thãgbara ga, gɩrɛ tibil n diirni gɛrra a na kha.
8 Ʋrɛɛkɛ direni dɩɩ ha mɔ̃kɛ tibili tibil do pa n ƴaalnɩ, tibili tibil do padara a na kha gɩ do kʋɛrɛ, sɩ ʋrɛɛkɛ direni dɩɩ do Thu Phuudaa gɩ, Thu Phuudaara a na kha gɩ do yire khorr.
9 Sa-n do nyɛ̃ɛ n khiir si bɔ cʋʋrɛra ga, gɩdonɩ ado bɔɔ dã sa khar ado sa kɔɔ pɛr dokhʋʋra'.
10 Mɛ̃ gɩ nɛnɛ̃ bɔɔkɛ sɩ yɩnɩ hʋɛ, sa-n cʋɛ tɩbɩla fɛʋ bɔɔ, sɩ cacaca wɩrɛ dɔnɩ ha pɛdara.
11 Nɩ hɩnɛ mɛrɛɛ thɛthɛ khera nar sɛbɛ beekɛ gbõgbõo na ɩ̃ nyɛ̃.
12 Wɩrɛ n ƴaalɛnɩ i bɔ wer gɩrɛraakɛ tibil yinə n yɩnɩ, wɛr n yɩrana nɩ nɩ kuro khʋ̃ʋ, kɩrʋ dʋɔn kpoore wa-n ƴaal Kirisitii kʋkʋ thɩrdara ga.
13 Gɩdonɩ welela yɛnɩnakɛ khʋ̃ʋ ɩnɩ kur, sɩ wa-n hɩɩn jɔfʋa', sɩ wɩ-n ƴaalɛ nɩ kuro khʋ̃ʋ wɩ yɩ hʋɛ wa-n məbi jɩɩnnaale wɩ pɛ narnɩ tomɩrra.
14 Sɩ ado merra wer, thɩ̃ kpɩɩ na hale ma-n məbironi saagado asɩ Kɔ̃tɩ̃ Jeju Kirisitii kʋkʋ thɩrdara gaaga. Kʋkʋ thɩrʋra dʋɔn gɩrɛ cʋɛnɩ dɩɩ do thɩɩkɛɛda do marɛ thɩ̃ khire dɩ mɛrɛ dakha mɩ khire gɩrɛraakɛ dɔnɩ thɩɩkɛɛda.
15 Gɩdonɩ a fɩ kurre khʋ̃ʋ yo, a fa kur khʋ̃a yo, ga-n cʋʋ thɩ̃a', gɩrɛ dɔnɩ thɩ̃ɛ gɛr dʋɔn tɩɩ pha dʋʋr.
16 Wɩrɛ fɛʋʋkɛ na tuonni dɩɩrɛɛkɛ kɛ dɔnɩ Thãgbaa Ɩjɩrayɛlɩda, Thãgba na-n hana wɩ ha ɩɩ a na-n dɔna wɩ dakha bʋɔ.
17 Nɛnɛ̃ dɩphã tibil na-n thʋ̃ na pɛ mar nɩwɛra bã, Jejuu i dɔ nɔɔ mɩ 'lɛrɔnɩ pɔnaakɛ ɩ̃ tomɩra.
18 Omɩna wei, asɩ Kɔ̃tɩ̃ Jeju Kirisiti na-n jɛ nɛrɛ fɛʋ bʋɔra. Amɛn.