5
1 Wa dʋʋrra Kirisiti kɔɔ birse si, gɛr gɩ nɩ fɔ gɩ ma, na-n do dee dʋʋr n bir gɩ 'li ni bã.
2 Nɩ hɩnɛ mɛr Pol mɩ so narɛ ayɩ, ado na kur khʋ̃ʋ ga dor Kirisiti na taa nɩ bʋɔ bã.
3 Dɩ mɩ-n kpãkpãa narɛ wo ayɩ, ado tibil kur khʋ̃ʋ, jɔfʋ ntɛ yɩ ɩna-n hɩɩnɛ fɛʋ.
4 Nɩ leere na Kirisiti nɛrɛ fɛʋʋkɛ n ƴaalɛnɩ sor n hɛla nar jɔfʋ cʋʋrɛra, nɩ 'leere dakha Thãgbaa bɔ jɩ.
5 Ado se wer so hɛl nũ pɛrɛ sɩ-n pɩɛr, kɛ Thu Phuu na cʋʋnɩ dɩ sa 'lɛ ha pɛrɛra.
6 Gɩdonɩ a fɩ ha Jeju Kirisitira a fɩ kurre khʋ̃ʋ yo, a fa kur khʋ̃a yo, ga-n cʋʋ thɩ̃a', sɩ ha pɛrɛɛkɛ hananɩ naʋʋkɛ n cʋɛnɩ thɩ̃ɛ, gɛr dɔ thɩ̃ɛ.
7 Nɩ kɔɔ car waa gel, sɩ amɛ jɩlɛ nɩ a pɩɛr nɩ na-n nɩ sobɔr nũə?
8 Kpɩɛr ca gele na the ʋrɛraakɛ kɔɔ wɛ nɩna'.
9 Tabɩɩr fɩɩʋ n cʋʋrɛ buru mɩ̃ boloo fɛʋ dɩɩ bʋ̃.
10 Mɩ hana narɛ ha pɛrɛ Kɔ̃tɩnna, dɩ na hana kpɩɛr kpɩa', sɩ ʋrɛɛkɛ nyanyaanɛ nɩnɩ ado a ha mɔnakɛ, sɩ sor na heenuune.
11 Sɩ ado me wer omɩna, ado ɩ̃ Thãgba thɩmɩɩ mɩɩra mɩ yɩ wa-n kuro khʋ̃ʋ, anyera ma-n yɩ kpoore 'lo? Gɩdonɩ Kirisitii kʋkʋ thɩr thɩmɩɩkɛ n dɔnɩ nɛ baradaa, gɩ bure mɛ̃.
12 Dɩ wɩrɛra n pɩɛrnɩ nyanyaanɛ anɩ thɩ̃thɩɩn wɩ yɩra kuro kpɔ khorr.
13 Omɩna wei, wa dʋʋrra Thãgba kɔɔ we nɩ, sɩ na-n gba wa dʋʋrra a phiro sɩ na cʋʋ gɩrɛɛkɛ anɩ tibil do pa n ƴaalna', sɩ nɩ ka dɔ kha dea bɩɛlbɩɛl naʋra.
14 Gɩdonɩ jɔfʋ fɛʋ, thɩmɩɩ nɔ bɩɛllaakɛ gɩ ha ayɩ: «Fa-n na afɩ 'walãkha tibil mɔ̃kɛ fɩ-n nanɩ afɩbara.»
15 Sɩ ado nɩ-n dʋɔnɛ kha a na phʋʋna khasɔ, na-n jɩɛ hɩɩn na-n kʋɛ khasɔa koe.
16 Gɛr gɩ dɩ ɩ̃ so nar ayɩ: Na-n jala mɔ̃kɛ Thu Phuu n so narnɩ, ga cʋʋ nɛr dɩ na cʋʋ gɩrɛ anɩ tibil do pa n ƴaalna'.
17 Gɩdonɩ gɩrɛ tibili tibil do pa n ƴaalnɩ, ga-n 'li kha fɩɩʋrakɛ na gɩrɛ Thu Phuu n ƴaalna'; dɩ gɩrɛɛkɛ Thu Phuu n ƴaalnɩ, ga-n 'li kha fɩɩʋrakɛ na gɩrɛ tibili tibil do pa n ƴaalna'; wɛr yenyɔ wɩ-n kɛ̃kɛrɛnɛ kha, dɩ gɛr gɩ na-n puno na cʋʋ gɩrɛɛkɛ nɩ pɛrnɩ haara'.
18 Sɩ ado Thu Phuuda nɩ-n pɛ nũu jɔfʋ na puno na'.
19 Dɩ gɩrɛra tibili tibil do pa n cʋʋnɩ gɩ yɩrrɛ gbelẽ gbelẽ, gɛr ha gɩrɛ: Bɔdɛl cʋʋrɛ, thɩ̃ bise cʋʋrɛ, dakhaba cʋʋrɛ,
20 thɩl jir, dɔɔrɛ, tɩɩ laarɛ, kɩla, gbugi, nĩkhii, dɩbara na kɛ̃kɛrɛnɛ, dɩɩdɩɩ leere, thʋ̃ kha,
21 ha pɩɛrɛ, ta laarɛ, gbõgolõ dɩko khor, na yɛ̃ thĩsɔɔkɛ n hɔnɩ kha na gɩrɛra. Mɩ maanɛ dɩ ma-n so nar gɩrɛ mɔ̃kɛra mɩ kɔɔ sonɩ, dɩ wɩrɛ n cʋɛnɩ ga thɩ̃sɔɔkɛ wa lõ Thãgba fãgadaarɩ dʋɔa'.
22 Sɩ beekɛ Thu Phuu n senɩ dʋɔn: Naʋ, daʋ, ha ɩɩ, ha fʋrɛ, ha bulo fɩlɛ, bɔ cʋʋrɛ, sobɔ cʋʋrɛ,
23 hɛlɛlɛ fɩlɛ, dɩbara fʋrɛ; jɔfʋ na hale dɩɩ pɩɛr ga thɩ̃sɔɔka'.
24 Dɩ wɩrɛ hanɩ Jeju Kirisitira wɩ gbaar tibili tibil do pa na gɩrɛ na-n kʋɔnɩ thue kpãkpalã ga, na dakha ɔɔ ƴaal a kpa kʋkʋ thɩrʋra.
25 Dɩ Thu Phuu donɩ ʋrɛ n hana sɩnɩ yire, sa-n ɩrɛ mɔ̃kɛ Thu Phuurə n so sarnɩ.
26 Sa-n ƴaal mɔlɔ i ka thɩ̃ɛ ga-n ɩna sar nãbɛɛrɛ, sa-n gba kha gbugisɔa'.