3
1 Nɛr Galasɩ də̃bələ amɛ ka li ninakɛ tɔr? Nɛrɛɛkɛ wɩ mɩɛnɩ casɩ Jeju Kirisitii thɩr kpa dɩɩ ho nɛr tʋɔr yire.
2 Thĩ bɩɛl dɩbara hale mɩ-n ƴaalnɩ ɩ̃ jɩ nar: Jɔfʋ thɔ̃ cʋʋrɛra nɩ kɔɔ 'lɛ Thu Phuu yaa, ha pɛ thɩmɩɩrraakɛ nɩ kɔɔ nɩnɩ gɩ?
3 Ãyaal dɩ nɩ thʋ̃ də̃bəəl mɛ̃, a ka 'li fʋʋr na Thu Phuu sɩ na-n ƴaal nɛnɛ̃ nɩ pɩɩr na anɩ thɛthɛɛ fãgaa?
4 Gɩ do khaar nɩ thʋ̃ gaar bʋɔ thale bɛɛ? Dɩ gɩ hor khaar khʋʋra gɩ-n jalna.
5 Dɩ ʋrɛɛkɛ n hana nɩnɩ Thu Phuu, kɛ n cʋɛnɩ dakha nɔ kpaa thɩ̃ɛ anɩ thɩ̃thɩɩn, jɔfʋ thɔ̃ cʋʋrɛra gɩ the yaa, ha pɛ thɩmɩɩ nɩɩrra gɩ?
6 Mee gɩ kherere Thãgbaa sɛbɛra ayɩ: «Abɩraham kɔɔ pɛr Thãgba haar dɩɩ do gɛr Thãgba hɩɩn sa wɩɩ tɩɩ sarʋ.»
7 Nɩ jɛ gɩ do wɩrɛ hananɩ ha pɛrɛ Thãgbara wɛr dɔ Abɩrahamɩ bɩsãsɔ.
8 Mɔ̃ Thãgbaa sɛbɛ kɔɔ 'laanɩ yɩɛ dɩ Thãgba na cʋʋrɛ sor dɩ ga-n hɛl ca kpalala ha pɛrɛra, gɛr gɩ dɩɩ kɔɔ mãa mɩɩrɛ tutugo bʋɔ Abɩrahamna ayɩ: «Fɛr na dɔ nɔɔ dɩ tibil caar fɛʋ na 'lɛ bɔnanɛ.»
9 Dɩ mɛ̃ wɩrɛ fɛʋʋkɛ n pɩɛrnɩ haar n 'lɛ bɔnanɛ na Abɩraham ha pɛdaar.
10 Gɩdonɩ wɩrɛ fɛʋʋkɛ n bɔnɩ dɩ wa-n yɩrna jɔfʋ thɔ̃ cʋʋrɛ, sʋɔn n 'li wer; gɩdonɩ gɩ kherere Thãgbaa sɛbɛra ayɩ: «Sʋɔn n 'le tibil wo tibilikɛ na-n hɩnɛnɩ da-n nɩna nũu gɩrɛra fɛʋʋkɛ sɔnɩ jɔfʋ sɛbɛra ga.»
11 Wo, tibil bɩɛllakɛ na 'lɛ so hɛllɛ Thãgbaa ƴɛra jɔfʋra ga, dɩ sobɔr gɩ, gɩdonɩ gɩ kherere wo ayɩ: «Ʋrɛ Thãgba hɛllɔnɩ sor dɩɩ do ha pɛrɛ dɔ nɔɔ, ɔr na hana yire.»
12 Dɩ jɔfʋ na ha kha dɩkha na ha pɛra', sɩ Thãgbaa sɛbɛ sor ayɩ: «Ʋrɛɛkɛ na-n cʋɛnɩ gɩrɛ jɔfʋ sonɩ, a na hana garɛ yire.»
13 Kirisiti birse ser sɔ̃ 'lirrə jɔfʋra, gɩdonɩ sɛr dɔ nɔɔ dɩ firo 'lɛ sʋɔn, gɩdonɩ gɩ kherere Thãgbaa sɛbɛra ayɩ: «Sʋɔn gɩ do tibil wo tibilləəkɛ wɩ-n juni kʋkʋ thɩrʋra.»
14 Dɩ mɛ̃ bɔnanɛɛkɛ Abɩraham kɔɔ 'lɛnɩ na do dakha ca kpalaada, dɩ Jeju Kirisitira gɩ-n the, dɩ dakha ha pɛrɛra sa 'lɛ Thu Phuukɛ Thãgba kɔɔ ʋlfɛna sɩnɩ.
15 Omɩna wei, tibiile mɩ-n mɩɩ gɩrɛ, a tɩbɩla ƴɛrɛrakɛ ʋlfɛ ʋlfɛrɛ, tibil na hale na puno na phii agɩbo a dɛbɩrɔ dɩkha ga.
16 Sɩ Abɩraham ʋlfɛrɛɛle kɔɔ telẽ na ɔɔ məl, ga so ɔɔ məlsɔ dɩɩ ho wɩ jɔra', sɩ bɩɛl gɩ so, gɩdonɩ Thãgbaa sɛbɛ sor ayɩ: «afɩ məl», a thɩɛna gaa Kirisiti gɩ.
17 Nɩ yɛ gɩrɛ mɩ-n ƴaalnɩ ɩ̃ so: Nɔ bɩɛl ʋlfɛrɛɛkɛ Thãgba kɔɔ 'lini ʋlfɛrɛ, jɔfʋʋkɛ pɩrɔnɩ kpaan yɛna taanã na kpelẽ yʋɔr na puno gi na phii, gɩ do gɛr cʋɛ ʋlfɛrɛɛle dɩɩ kʋkʋʋla'.
18 Gɩdonɩ ado jɔfʋ hɩɩnɛ na dɔ nɔɔ dɩ sa 'lɛ gɩrɛ Thãgba thɩɩn sarnɩ, ga do ʋlfɛrɛra gɩ the bã, sɩ mee Thãgba kɔɔ ha gɛr Abɩraham dɩɩ do ʋlfɛrɛ dɔ nɔɔ.
19 Sɩ jɔfʋ anyera gɩ hale? Wɩ pɩrɔrɛ 'laa dɩɩ do sopugo cʋʋrɛ dɔ nɔɔ, phaphapha məlleele n ɩ̃, ʋrɛɛkɛ ʋlfɛrɛɛle kɔɔ telenɩ; dɩ jɔfʋʋle thɔ̃thɔ̃daar thusɔ kɔɔ gbaan a dʋ thɩmɩɩ gʋʋrdaar nyɔ̃kɔɔ.
20 Dɩ thɩmɩɩ gʋʋrdaar na-n hale tɩɩ bɩɛlla ga, sɩ ado Thãgba wer gɩ, ɔr bɩɛl gɩ.
21 Dɩ jɔfʋ n ba kɛ̃kɛrɛnanɛ Thãgbaa ʋlfɛsɔ yaa? Kpɩɩraka'. Ado jɔfʋ kɔɔ hale dɩ wɩ 'laa dɩɩ 'laa yire, ga dor jɔfʋra so hɛllɛ na the bɔɔbɔɔ.
22 Sɩ Thãgbaa sɛbɛ n nɩnanɛ dɩ tɩbɩla fɛʋ sopugoo nyɔ̃kɔɔ wɩ ha, dɩ mɛ̃ ga dor wɩrɛɛkɛ n pɩɛrnɩ haar n 'lɛr ʋlfɛrɛ, ga-n the ha pɛrɛraakɛ wɩ hananɩ Jeju Kirisitira.
23 Ɔbɔɔkɛ ha pɛrɛ na kɔɔ ɩnɩ pa', jɔfʋ khaɩdara sɩ kɔɔ do, sa-n pɩɛrna ha pɛrɛɛkɛ na yɩranɩ phubi.
24 Mɛ̃ jɔfʋ kɔɔ do thɔthɔɔkɛ na thɔɔ sɩnɩ na dana Kirisiti, sor n puno gɩ hɛl sar ha pɛrɛra.
25 Dɩ ha pɛrɛ ɩnɩ sa ha kha dɩkha na thɔthɔɔdaarɩle 'lo bã.
26 Gɩdonɩ nɛrɛ fɛʋ Thãgbaa bikona nɩ do ha pɛrɛraakɛ nɩ hananɩ Jeju Kirisitira;
27 nɛrɛ fɛʋʋkɛ wɩ kpɛɛnɩ nyʋɔnɔ bɩɛl dʋʋrra nakha Kirisiti, Kirisitira nɩ to.
28 Juifi dʋʋr na hale dɩ wɩrɛ na dɔnɩ Juifisɔ waa ga; dee na hale dɩ waɩ ga; kuun na hale dɩ khɛr ga; gɩdonɩ nɛrɛ fɛʋ bɩɛl nɩ do Jeju Kirisitira.
29 Dɩ ado Kirisitiida nɩ do, ga dor nɛr dʋɔn Abɩrahamɩ məlsɔ, dɩ thɩ̃ hɩna hanɩ mɔ̃kɛ ʋlfɛrɛ sonɩ.