16
1 Ado warraakɛ nɩ pɛnɩ tɩɩ phuusɔra gɩ, mɔ̃kɛ mɩ kɔɔ pɛrnɩ gɩ hana Galasɩ we gbɛbɩdarasɔɔ pa, nɛrɛ dakha nɩ cʋɛ ɔmɛ̃.
2 Nɛrɛ fɛʋ bɩɛlbɩɛl, caca wire fɛʋ wire makonyɔra, nɩ te gɩrɛ nɩ-n 'lɛnɩ a na thɩnɛ; ga-n too ɩ̃ pɔ dɩphã sɩ war n tea'.
3 Dɩ a mɩ pɔr tɩbɩlaakɛra na tini, wɛr ma ha sɛbɛ, wɩ jalana na anɩ khaardara Jerujalɛm.
4 Dɩ ado gɩ teenanɛ mɛrɛɛ thɛthɛ n jala dakha, wɩ cʋrna mɩ sɩ jal.
5 Ma pɔr anɩ pa sɩ Masedʋan ma kɔɔ the ɓo, gɩdonɩ Masedʋan ma kana.
6 Agakpaana ma toore anɩ pa gbe, anaa ma toorerakɛ dɩ ie bɔɔ na kana, dɩ mɛ̃ na thɔɔ mɩ ka ma-n jalnɩ.
7 Gɩdonɩ nɛnɛ̃ ma ƴaal ɩ̃ yɩ nɩ sɩ ɩ̃ kpãsa', sɩ mɩ pɛrɛ haar ma toona nɛr gɩ ma gbe ado Kɔ̃tɩn tu.
8 Sɩ Efɛjɩ ma too na dana fɛtɩɩkɛ wɩ-n wenɩ Pãtɩkotɩ,
9 gɩdonɩ lõfonɔ kɔ̃tɩ̃ɩ khɛr marɛ hoo, ɩ̃ puno ɩ̃ do le bɔ taa thɔma, sɩ lãlara jɔrɛ.
10 Ado Timothe pɔ, nɩ dɔ a toona nɩ sɩ maar na fʋʋa', gɩdonɩ ɩ̃ kha a-n do Kɔ̃tɩnɩ thɔ̃.
11 Na-n do tibil n 'lũə koe. Nɩ thɔgɔɔ na ha ɩɩ a bir a ɩ̃ ɩ̃ pa, gɩdonɩ mɩ-n pɩɛrʋʋrɛ nakha omɩna.
12 Sɩ ado Apolɔsɩɩkɛ dɔnɩ omine gɩ, mɩ kɔɔ bɩɛlʋʋlɛ ka dɩ a na pɔ anɩ pa, nakha omɩna, sɩ ɔɔ ƴaalla aa pɛr haar a pɔ nɛnã', sɩ ado a yɩ hʋɛ a na pɔr.
13 Na-n jʋrɛ, nɩ tɔɔ ha pɛrɛra kɩbɩ, nɩ hana kũu bɩnɛ, nɩ 'lɛ fãga na pɩɛr.
14 Dɔ thɩ̃ɛ fɛʋʋkɛ nɩ-n cʋʋnɩ na-n cʋʋ na naʋ.
15 Mɩ-n kpãkpãa narɛ gɩrɛ wo omɩna: Nɩ jɩrɛ Sɩtefanasɩ na ɔɔ cɔdara; caca tɩbɩla wɛɛkɛ 'lɛnɩ Akaɩ dɩɩra, a dona dakha wɩrɛ faanɩ dɩbara tɩɩ phuusɔɔ bul thɔmana.
16 Nɛrɛ dakha a nɩ jɩ nɩ wuro jɔ wa tibil casɔraale, na wɩrɛraakɛ n gbũgbuloneni kha thɔmana na wɛr.
17 Mɩ-n kãkarɛ Sɩtefanasɩ, na Fɔrtunatusi, na Akaɩkusii ɩna, wɛr lona anɩ ba mɛ̃.
18 Gɩdonɩ wɩ cʋʋrɛ dɩ ɩ̃ ha ie na anɩda dakha; nɩ gba wa tibil casɔɔle wɩ do nar tibil.
19 We gbɛbɩdaraakɛ hanɩ Ajɩ fʋɔr nɛr. Akɩlasɩ na Pirisika na we gbɛbɩdaraakɛ n gbɛbanɩ kha awɩ cɔ fʋɔr nɛr jɔɔ Thãgba bɩsã fʋɔrɛ.
20 Omɩna fɛʋ fʋɔr nɛr. Na-n fʋɔrɛ kha bɩɛlbɩɛl na ha lõ fʋɔrɛɛkɛ dʋɔnnɩ daphuu.
21 Mɛr Pol khera fʋɔrɛɛkɛ na ɩ̃ nyɛ̃.
22 Ado tibil yɩ, ɩna-n na Kɔ̃tɩna', dɔ sʋɔn n 'lii. Maranata: Ɩna ya asɩ Kɔ̃tɩ̃.
23 Jeju Kɔ̃tɩn na-n jɛ nɩ bʋɔra.
24 Mɩ na nɛr fɛʋ dɩɩ do Jeju Kirisitii pa gɩ the.