7
1 A gele pɩ Jeju n kɔɔ kpaarɛ Galile; aa kɔɔ ƴaal a kpaar Judea', gɩdonɩ Juifisɔ n ƴaalɛ hʋɛ wɩ kʋʋ.
2 Mɔ̃kɛ Juifisɔɔ fɛtɩɩkɛ wɩ-n wenɩ Wa fɛtɩ n danɩ,
3 Jejuu õkũu bɩnɔsɔ sʋʋraarɛ aa: Thɛ kɩɛr a jala Jude, dɩ mɛ̃ afɩ kpãkpãadara na yɩ dakha thɔmaakɛ fɩ-n cʋʋnɩ.
4 Ado tibil ƴaal wɩ jɩɛnɛɛ, aa-n ker gɩrɛɛkɛ a-n cʋʋna'. Ado fɩ-n cʋʋrɛ thɔmaakɛ gel, cʋɛ tɩbɩla fɛʋ n yɩ fɩ.
5 Gɩdonɩ ɔɔ õkũu bɩnɔsɔ dakharakɛ na-n pɩɛ haara'.
6 Dɩ Jeju so war: Ɩ̃ bɔ na dã pa', sɩ ne wer, anɩ bɔ n daan bɔɔ fɛʋ.
7 Tɩbɩla thɩɩra na puno na laar na', sɩ mɛr wɩ-n laar gɩdonɩ easɩ mer n mɩɩ dɩ ɩ̃ yɩ, awɩ thɔ̃ puurore ka.
8 Nɩ jala fɛtɩraale anɩ ha. Me wer ma jal ga fɛtɩraala', gɩdonɩ ɩ̃ bɔ na jɩɩ dã pa'.
9 Ɔbɔɔkɛ a so warnɩ gele pɩ, a toore Galile.
10 Ɔbɔɔkɛ Jejuu õkũu bɩnɔsɔ kɔɔ jalnɩ fɛtɩraale pɩ, a kpaanɛ dakha, sɩ a wolone gɩdonɩ aa ƴaal tɩbɩla n ja'.
11 Dɩ Juifisɔ na-n ƴaalʋʋ le fɛtɩraalera dɩ wa-n so: Ka kuunna ba ha ya fɛ?
12 Dɩ tibil jɔɔle n hũhuune kha ɔɔdara dɩ wɛ n yɩ: Tɩɩ bʋɔ gɩ; wɛ n yɩ: Kpei, a-n fɩɩlɛ tɩbɩla.
13 Sɩ tɩbɩla na-n cã dɩ wɩ mɩɩ ɔɔda ga, gɩdonɩ maar n fɔ wɩ Juifisɔra.
14 Mɔ̃ wɩ-n cʋʋnɩ fɛtɩ a ha thɩ̃thɩɩn, gɛr Jeju jaal Thãgba fʋɔr cɔ kɔ̃tɩɩna a ma da-n dɩɩr tɩbɩla thɩ̃ɛ.
15 Dɩ nʋɔ kpaa Juifisɔ dɩ wa-n so: Mɔ̃ kuunikɛ fʋ sa jɩ Thãgbaa sɛbɛ thakɛ, aa kɔɔ dɩɩrnɩ sɛba?
16 Dɩ Jeju birse wi: Dɩɩrɛɛkɛ mɩ-n dɩɩrnɩ tɩbɩla ga the ɩ̃ thɛthɛɛ pa ga, sɩ Thãgbaakɛ thɔna mɩnɩɩ pa gɩ the.
17 Ado tibil ƴaalɛ a cʋʋ Thãgbaa tuur, a na jɩrɛ ado dɩɩrɛɛkɛ mɩ-n dɩɩrnɩ tɩbɩla Thãgbaa pa gɩ the, agɩbo ɩ̃ thɛthɛɛ pa ɩ̃ thɩmɩɩ the.
18 Tibilikɛ n mɩanɩ thɩmɩaakɛ thɛnɩ ɔɔ thɛthɛɛ pa, ɔɔ thɛthɛɛ i a-n ƴaal, sɩ ʋrɛɛkɛ n ƴaalɛnɩ ʋrɛɛkɛ thɔnaanɩɩ i n dʋbarɔ, sobɔdaar a do, fɩl gõgolõ na haaraa ga.
19 Mʋɩjɩ na kɔɔ ha nɩ jɔfʋaa? Sɩ tibil bɩɛl anɩ thɩ̃thɩɩnnakɛ na kɔɔ nɩ gɩrɛ jɔfʋ sonɩ nũə'. Mɔ̃gɩdo dɩ na-n ƴaal hʋɛ nɩ kʋ mɩ?
20 Dɩ tibil jɔɔle birsee: Kɔ̃tɛɛbuu ha farɛ. Amɛ n ƴaalɛ fɩ yʋʋ?
21 Dɩ Jeju birse wer: Thɩ̃ bɩɛl dɩbara mɩ kɔɔ cʋʋ sɩ dɩ nʋɔ kpaa nɩ fɛʋ.
22 Mʋɩjɩ kɔɔ ha nɛr jɔfʋ nɩ kuro bɩsana khʋ̃ʋ, sɩrakɛ ga do Mʋɩjɩɩ thɛthɛɛ pa jɔfʋʋlera tha', sɩ anɩ mama thɩ kɔ̃tɩ̃sɔɔ pa gɩ the, dɩ nɩ-n kurre tibil khʋ̃ʋ hɩɩr wire.
23 Dɩ mɔ̃ nɩ-n kurni tibil khʋ̃ʋ hɩɩr wire dɩ Mʋɩjɩɩ jɔfʋ na-n kʋɛa', mɔ̃gɩdo dɩ nĩkhii n fʋ nɩ mɛrɛra gɩrɛraakɛ mɩ kpɛɛnɩ kũu bɩɛl khoo fɛʋ hɩɩr wire?
24 Na-n kɔɔ jɩ gɩ na yinə a 'laa na yɩ tibili da', sɩ nɩ dɔ gɩ hana hʋɛ sɩ na-n so.
25 Dɩ wɩ̃ Jerujalɛmdara n sor ayɩ: Ga do ɔr dɔ ʋrɛ wɩ-n kɔɔ ƴaalnɩna wɩ kʋaa?
26 Nɩ yɛ mɔ̃ a-n mɩɩnɩ dɩphã casɩ, sɩ wa-n cʋgʋʋ thɩ̃a'. Asɩ kɔ̃tɩ̃sɔ jɩrɛ gel dɩ ɔr dʋɔn Kirisiti bɛ?
27 Sɩ ado Kirisiti na ɩ̃, tibil na jɩ kana a na thena', sɩ ʋrɛ sɩ jɩrɛ ka a thenɩ.
28 Dɩ ɔbɔɔkɛ Jeju n dɩɩrnɩ tɩbɩla Thãgba fʋɔr cɔ kɔ̃tɩɩna, gɛr a huleno ayɩ: Nɩ jɩ mɛr, dɩ nɩ jɩrɛ dakha ka mɩ thenɩ. Sɩ nɩ jɛ, ga do mɛr jɛ gɩ dɩbara a ɩ̃a', sɩ ʋrɛɛkɛ thɔna mɩnɩ sobɔdaar gɩ sɩ na jɩa'.
29 Sɩ mɛrɛ, mɩ jɩɩrɛ gɩdonɩ ɔɔ̃ pa mɩ the dɩ ɔr thɔna mɩ.
30 Dɩ le wɩ kɔɔ ƴaal wɩ fʋʋra, sɩ tibil na thaaraa nyɔ̃a', gɩdonɩ ɔɔ bɔ na kɔɔ dã pa'.
31 Sɩ jɔjʋɔ tibil jɔɔlee thɩ̃thɩɩn kɔɔ pɩɛrɛ haar, sɩ dɩ wa-n so: Ɔbɔɔkɛ Kirisiti na ɩnɩ, a na cʋʋrɛ nɔ kpaa thɩ̃ɛsɔ na jɔ kuunikɛ woo?
32 Dɩ jɔfʋ bʋ dʋdarasɔ kɔɔ nɩɛrɛ mɔ̃ tibil jɔ n hũhuunni Jejuu sora. Dɩ bonɩ jidaar kɔ̃tɩna na jɔfʋ bʋ dʋdara kɔɔ thʋɔn gardɛ wɩ fʋɔnɛɛ.
33 Dɩ Jeju so: Mɩ har kha na nɛrɛ wo gɩ dana bɔɔ gbe, sɩ ɩ̃ jal ʋrɛraakɛ thɔna mɩnɩ.
34 Na ƴaal mɛr sɩ na yɩ ma', dɩ ka ma hanɩ na puno na pɔa'.
35 Dɩ Juifisɔ na-n mɩɩ kha awɩ ha ayɩ: Kana a na jal dɩ sa puno na yɩa ya fɛ? Juifisɔraakɛ bɩ̃bɩlanɛnɩ a ha Gɩrɛkɩsɔɔ thɩ̃thɩɩn a na ba jal a na-n dɩɩr Gɩrɛkɩsɔ ya?
36 Anye dɔ thɩmɩɩrɩkɛɛ kɩr a sonɩ: Na ƴaal mɛr sɩ na yɩ ma', dɩ wo, na puno na pɔ ka mɩ hana'.
37 Fɛtɩɩ pɩpɩɩ wiikɛ dɔnɩ wi kɔ̃tɩ̃ɩ, dawiilera Jeju ɩɩr tɩbɩlaa ƴɛ thɩ̃thɩɩn a hulẽ ayɩ, ado yɔlkhaa fʋ tibil, a pɔ ɩnɛrɛra a yɔ.
38 Ʋrɛɛkɛ pɛ nɩnɩ haar, mɩɩr yɔ yire na celle ɔɔ bɩnɔ ga-n the mɔ̃kɛ Thãgbaa sɛbɛ sonɩ.
39 Thu Phuukɛ tɩbɩla na pɛrnɩ haar na 'lɛ, gɛr Jeju mɩɩ; gɩdonɩ Thãgba na kɔɔ 'laa Thu Phɩm pa', gɩdonɩ Jeju na kɔɔ bir jʋʋn ɔɔ Thɩɩ dʋɔ pa'.
40 Ɔbɔɔkɛ tibil ɩkha tibil jɔraale nɩnɩ ga thɩmɩɩsɔɔle pɩ, wɩ sor: Thãgbaa bobonɩlera kuunikɛ do waa gel.
41 Dɩ ɩkhasɔ so: Kirisiti gɩ; dɩ ɩkhasɔ n yɩ: Mɔ̃ ga fʋ sɩ dɩ Kirisiti na the Galile?
42 Thãgbaa sɛbɛ sor ayɩ: Davɩdɩɩ məllə Kirisiti na the Bɛtɩlɛhɛm dɩɩra, ka Davɩdɩ kɔɔ hanɩ.
43 Dɩ gɛr gɩ dɩ tibil jɔɔle kɔɔ lee kha Jejuu sora.
44 Dɩ ɩkhasɔ wɛrra kɔɔ ƴaalɛ wɩ fʋʋ, sɩ tibil bɩɛllakɛ na kɔɔ thaaraa nyɔ̃a'.
45 Dɩ gardɛsɔ kɛrrɛ bir bonɩ jidaar kɔ̃tɩna na jɔfʋ bʋ dʋdarasɔɔ pa, dɩ wɩ bule wi: Mɔ̃gɩdo dɩ na fʋʋ ɩna ga?
46 Dɩ gardɛsɔ birse wi: Tibil bɩɛl na kɔɔ mɩɩ thɩmɩɩr kpɩɩrakɛ kuuni khaakɛ pa'.
47 Dɩ jɔfʋ bʋ dʋdara bir bule wi: Dɩ nɛrɛ dakha, wɩ fɩɩl nɛr wo koe?
48 Asɩ kɔ̃tɩ̃sɔ, agɩbo jɔfʋ bʋ dʋdarasɔ bɩɛl ʋkha kɔɔ pɩɛrɛ haar ya?
49 Sɩ tibil jɔɔle na jɛnɩ Mʋɩjɩɩ jɔfʋa', wɛr dɔ tɩbɩlaakɛ wɩ sonɩ nʋɔ pɛ.
50 Nɩkɔdɛmɩkɛ dɔnɩ bɩɛl jɔfʋ bʋ dʋdarara hale, kɛ kɔɔ jalanɩ mamara a yɩ Jeju, a bule wer:
51 Ado asɩ jɔfʋra gɩ, hʋɛ hale dɩ sa heen tibil sor ɓo, sɩ sɩ pɩɩrɔ sɩ nɩɛ na asɩ nũ gɩrɛ a sonɩ sɩ jɩna gɩrɛ a cʋʋnɩ ya?
52 Dɩ wɩ birsee: Fɛrɛ dakha, Galile fɩ the ya? Jɩɛ 'lo Thãgbaa sɛbɛ a hɩnɛ, fa yɩɛ dɩ ga so kpɩɩrakɛ nayɩ: Thãgbaa bobon bɩɛllakɛ na the Galile dɩɩra ga.
53 [Agɩpɩ wɛr fɛʋ bɩɛlbɩɛl bɩlanɛ a kɔ̃ awɩ cɔnanɔ.