22
1 Fɛtɩɩkɛ wɩ-n wenɩ Pakɩ, kɛ dʋɔnnɩ buruukɛ na hananɩ tabɩɩraada n wɔrɔnɛ.
2 Le bonɩ jidaar kɔ̃tɩna na jɔfʋ dɩɩrdara n kɔɔ ƴaal hʋɛ mɔ̃ wa cʋʋnɩ sɩ wɩ kʋ Jeju, gɩdonɩ maar n fʋɔn wɩ tɩbɩlala.
3 Dɩ Satã lõ Judasɩraakɛ thɛnɩ Karɩyɔtɩ, ʋrɛɛkɛ dɔnɩ kpãkpãadaar bɩɛl yʋɔr yenyɔra.
4 Dɩ a jaal a gʋʋrna bonɩ jidaar kɔ̃tɩna na Thãgba fʋɔr cɔ kɔ̃tɩ̃ gardɛɛ kʋmãdasɔ mɔ̃ a na cʋʋnɩ sɩ na liirna Jeju na ha wɩ.
5 Dɩɩ da war na sobɔr dɩ wɩ yɩ, ɩna haarɛ war.
6 Dɩ tu a jɩɩ ma da-n ƴaal hʋɛ waa a liirna wɩ Jeju, sɩ tibil jɔ na ja'.
7 Dɩ buruukɛ na hananɩ tabɩɩraa fɛtɩ wi dã, kɛ dʋɔnnɩ wireekɛ wɩ-n jinəni Pakɩ bana bire bonɩɛ.
8 Dɩ Jeju thɔ̃ Pɩɛr na Jã a so war ayɩ: Nɩ jala a gbɛbɩrɛ sar Pakɩ dɩkor dɩ sa kho.
9 Dɩ wɩ bulee: Kana fɩ-n ƴaal dɩ sa gbɛbɩ?
10 Dɩ birse wi: Nɩ hɩnɛ, ɔbɔɔkɛ na lonɩ dɩɩra, kuunikɛ heenenɩ nyʋɔn na daa na caana nɛr. Na-n kpaaraa cʋɔrraakɛ a na lonɩ;
11 dɩ nɩ sɔ cɔdaar kuunna: Dɩɩrdaar n bule fer aa, kana duu na ha dɩ ɩna khoro Pakɩ dɩkor na ɩnɩ kpãkpãadara ya?
12 Dɩ a na nɩ narɛ lɩ̃gã kɔ̃tɩ̃ɩkɛ wɩ thɩɩnɔnɩ thɩ̃ɛ. Le na gbɛbɩrɩ Pakɩ dɩkor.
13 Dɩ wɩ jaal a yɩ thɩ̃ɛ fɛʋ dɩɩ ha mɔna Jeju kɔɔ so warnɩ, dɩ mɛ̃ wɩ gbɛbɩ Pakɩ dɩkor.
14 Ɔbɔɔkɛ bɔɔ danɩ, Jeju toore dɩko kho paar na ɔɔ thɔ̃thɔnaakɛ wɩ hananɩ kha.
15 Dɩ a so warɛ ayɩ: Mɩ kɔɔ ƴaalɛ na ɩ̃ ha fɛʋ dɩ ma kho Pakɩ dɩkorɩkɛ na nɛrɛ ɓo sɩ bɔ gaarɛ n dã mɩ.
16 Gɩdonɩ mɩ so narɛ: Ma bir na kho Pakɩ dɩkorɩkɛ kpɩɩ bã, phaphapha gɩrɛ gelela ƴaalnɩ gɩ so n yɩr casɩ Thãgba fãgadaarɩ dɩra.
17 Dɩ a gbaar thɩ̃ yɔnanɛ a bɩɛl Thãgba pɛr sa so: Nɩ gba thɩ̃ yɔnanɛɛkɛ a tɩnɛnɛ anɩ ha.
18 Gɩdonɩ mɩ so narɛ: Ma bir na yɔ dɩvɛ̃ bã, phaphapha Thãgba n gba fãga.
19 Agɩpɩ dɩ gba buru. Ɔbɔɔkɛ a bɩɛlnɩ Thãgba pɛr pɩ, a kuure a ha wɩ sa so: Gɩrɛ dʋɔn ɩ̃ tomɩɩkɛ [mɩ 'laanɩ ha nɩ, na-n cʋɛ thakɛ a na jɛna mɩ.
20 Dɩ mɛ̃ a cʋʋ na thɩ̃ yɔnanɛ dakha. Ɔbɔɔkɛ wɩ khonɩ dɩkor pɩ, a ha wɛr sa so: Thɩ̃ yɔnanɛɛkɛ dʋɔn nɔ bɩɛl ʋlfɛ phaakɛ thɛnɩ ɩ̃ tɔmɩnaakɛ na deerenɩ nɛrɛɛ sora.]
21 Sɩ nɩ hɩnɛ, ʋrɛɛkɛ na lirena mɩnɩ hakɛ dɩko kho paar na mɛrɛ.
22 Mɛr tibili Bikuun n jaal mɔ̃kɛ Thãgba pɛrnɩ gɩ hana. Sɩ ga puure tibilləəkɛ na lirena mɩnɩ.
23 Dɩ wɩ ma dɩ wa-n bule kha bɩɛlbɩɛl awɩ ha ayɩ, amɛ ɩnɛrɛɛ thɩ̃thɩɩn na cʋɛ ga thɩ̃ɩkɛ?
24 Thɩ̃ banaa kɔɔ ɩɩrɛ dakha awɩ thɩ̃thɩɩn, dɩ wa-n bana kha awɩ ha aa: Amɛ asɩ thɩ̃thɩɩn teana gɩrɛra a dɔ kɔ̃tɩn ya fɛ?
25 Dɩ Jeju so war: Ca kpalaa fãgadara n ʋʋnɛ tɩbɩlala kpɛ, dɩ wɩrɛɛkɛ hananɩ fãga wɛrra n cʋʋrɛ dɩ wa-n we wɩ bɔ cʋʋdara.
26 Sɩ ga teena gɩ hana mɛ̃ anɩ thɩ̃thɩɩnaa koe; sɩ tibilikɛ kanɩ do kɔ̃tɩn anɩ thɩ̃thɩɩn, dɔ ɔr n ka a do dabuu, dɩ ʋrɛɛkɛ dʋɔnnɩ yʋʋ, dɔ ɔr n ka a do thɔ̃daar.
27 Gɩdonɩ ʋmɔ̃ n dɔ kɔ̃tɩn, ʋrɛɛkɛ n tɔɔnɩ dɩko kho paar gɩ yaa, agɩbo ʋrɛɛkɛ n tɩnɛnɛnɩ gɩ? Ga do ʋrɛɛkɛ n tɔɔnɩ dɩko kho paar gaa? Sɩ mɛrɛ, mɩ ka har anɩ thɩ̃thɩɩn a ho thɔ̃daar.
28 Nɛrɛ, nɛr dʋɔn wɩrɛɛkɛ jɩlɛ marnɩ kɩbɩ ɩ̃ bɔ gaarra.
29 Gɛr gɩ dɩ ɩ̃ thɩɩn Thãgba fãgadaarɩ dɩ anɩ thɩɩn, mɔ̃kɛ ɩ̃ Thɩ kɔɔ thɩɩn gɩnɩ ɩ̃ thɩɩn;
30 dɩ mɛ̃ na kho na-n yɔna ɩ̃ dɩko kho para ɩ̃ fãgadaarɩ dɩra, nɩ too dakha fãga too paarsɔ na-n kɩɩlna Ɩjɩrayɛl ca yʋɔr yenyɔ.
31 Dɩ Kɔ̃tɩn so aa: Sɩmɔ̃, Sɩmɔ̃, hɩnɛ Satã n kɔɔ luure ka ɩnɩ-n jɛ nɩ jʋ khaa.
32 Sɩ mɩ kɔɔ bɩɛlɛ Thãgba a pɛ far dɩ afɩ ha pɛ na-n buə', sɩ fɛrɛ ɔbɔɔkɛ fa kɛrnɩ na bir Thãgbara, cʋɛ afɩ omisɔ wɩ tɩ.
33 Dɩ Pɩɛr sʋʋraa: Kɔ̃tɩn, mɩ gbɛbɩrɛ pɩ dɩ sa lõ kha khaɩra, dɩ ma khi dakha na fɛrɛ.
34 Sɩ Jeju sʋʋraa: Pɩɛr, mɩ so farɛ yɔl kʋʋ na khɩɩ nĩkɛ pa', sɩ balãther fa bana nayɩ fa jɩ ma'.
35 Dɩ Jeju bule wer wo ayɩwɔɔ: Ɔbɔɔkɛ mɩ kɔɔ thɔ̃ nɩnɩ sɩ na kɔɔ hana pɔtɩma, dɩ lokaar gɩ dɩ nɛfaa ga, thɩ̃ɛ kɔɔ ɓɔr nɛr ya? Dɩ wɩ birsee: Thɩ̃ bɩɛllakɛ na kɔɔ ɓɔr sa'.
36 Dɩ so war: Sɩ nɛnɛ̃kɛ ga ha mã'. Tibilikɛ hananɩ pɔtɩma, dɔ a gba a fʋrɔ, mɛna gɩ na tibilikɛ hananɩ lokaar. Dɩ ʋrɛɛkɛ na hananɩ bajɩna ga, dɔ a dolõ ɔɔ kẽkẽ a thena bajɩna.
37 Gɩdonɩ mɩ so narɛ, gɩrɛɛkɛ kɔɔ kherenenɩ Thãgbaa sɛbɛra teenanɛ gɩ dã mɩ, gɩ sor: «Wɩ kɔɔ theruure a ɓã puu cʋʋdarara.» Dɩ gɩrɛɛkɛ ba mɩnɩɩ bɔɔ n daan.
38 Dɩ wɩ so: Kɔ̃tɩn hɩnɛ, bajɩna yenyɔ hakɛ; dɩ birse wi: Gɩ daan.
39 Ɔbɔɔkɛ Jeju kɔɔ thenɩ, a jaal olɩvɩ thɩr gɔ̃gʋɔna mɔ̃kɛ a mɩlna gɩnɩ. Ɔɔ kpãkpãadara kpaaraarɛ.
40 Dɩ ɔbɔɔkɛ a kɔɔ danɩ paarɩle, a so warɛ ayɩ: Nɩ bɩɛlnɛ Thãgba dɩ mɛ̃ na lõ fifiləlela ga.
41 Agɩpɩ Jeju tɔ jal ƴɔɔ gbe dɩɩ mãkha na mɔ̃kɛ tibil n dʋnanɩ bokaar dɩɩ dã, a gburõku da-n bɩɛl Thãgba da-n sona:
42 Thɩrɛ, ado fɩ-n ƴaalɛ hʋnɔnɛ mar thɩ̃ yɔnanɛɛkɛ, sɩ ga do mɔ̃ mɩ-n ƴaalnɩ ga, sɩ mɔ̃ fɛrɛ n pɛrnɩ haar gɩ hana.
43 [Dɩ Thãgbaa thɔ̃thɔ̃daar thu bɩɛl ther Thãgbaa dʋɔ a pɔ a haa fãga.
44 Sɩ mɔ̃ Jeju hanɩ da-n 'wãga, a yɩrrɛ a jɩɩ bɩɛl Thãgba dɩ ga-n pɛr; dɩ ɔɔ hʋ̃ʋsɛɛkɛ a hʋ̃ʋsɛnɩ thʋ̃ debi a ho tɔmɩn dɩ ga-n 'lũ thɩɩra.]
45 Dɩ ɔbɔɔkɛ Jeju bɩɛlnɩ Thãgba pɩ, a ɩɩrɛ a bir pɔ kpãkpãadaraa pa, a yɩ wɩ dɩ wa-n daar gɩdonɩ wɩ gbobire.
46 Dɩ bule wi: Mɔ̃gɩdo dɩ na-n daar? Nɩ ɩrɛ a na bɩɛlnɛ Thãgba dɩ mɛ̃ na lõ fifiləlela ga.
47 Mɔ̃ Jeju hanɩ mɩɩrɔ, hɩnɛ tibil jɔ kɔɔ daan. Dɩ ʋrɛɛkɛ wɩ-n wenɩ Judasɩɩkɛ dʋɔnnɩ bɩɛl kpãkpãadara yʋɔr yenyɔra kʋlɛ wɩ ƴɩɛ, a tɔ pɔ Jejura a palʋʋ.
48 Dɩ Jeju bulee: Judasɩ, pallɛla fɩ liirna mɛr tibili Bikuun bɛɛ?
49 Dɩ ɔbɔɔkɛ wɩrɛɛkɛ hanɩ kha na Jeju kɔɔ yɩnɩ gɩrɛɛkɛ n dananɩ, wɩ buleele: Kɔ̃tɩn, sɩ cɛna bajɩna ya?
50 Dɩ bɩɛl wɛrra cɩrɛ gbõdaarɩ thɔ̃daar nyɔ̃bɔ nũu a kʋr.
51 Sɩ Jeju bir so: Na-n cʋʋ thakɛ bã, sa thar kuuni nunəəle dɩɩ ba.
52 Agɩpɩ Jeju so bonɩ jida kɔ̃tɩnasɔra, na Thãgba fʋɔr cɔ kɔ̃tɩ̃ gardɛɛ kʋmãdasɔra, na kɔ̃tɩnasɔraakɛ kɔɔ pʋɔnnɩ wɩ fʋʋ ayɩ: Nɩ ɩnanɛ bajɩna na gbolasɔ nɩ fʋ mɩ, mɔ̃kɛ wɩ-n fʋnɩ yu hɔ̃hʋɔldaar koe.
53 Mɩ-n kɔɔ har kha na nɛrɛ wire fɛʋ Thãgba fʋɔr cɔ kɔ̃tɩɩna, sɩ na kɔɔ tha mar nyɔ̃a'. Sɩ nɛnɛ̃ dʋɔn anɩ bɔ dã pa, na dabirəə fãga bɔ.
54 Ɔbɔɔkɛ wɩ fʋnɩ Jeju pɩ, wɩ kpaarɛ jalna gbõdaarɩ cɔ, sɩ Pɩɛr n kpar Jejura nɔ bɩɛl nɔ bɩɛl.
55 Dɩ tɩbɩla kɔɔ gbɔɔrɛ dɔɔ gbaya thɩ̃thɩɩn a tooro, dɩ Pɩɛr kɔɔ toore kha na wɛr.
56 Dɩ thɔ̃daar khɛ bɩɛl yɩɩ dɩ too a wɔrɔ̃ dɔɔ, dɩ hɩɩnʋʋ kirkirkir sa so aa: Kuunikɛ dakha kɔɔ har kha na ɔr.
57 Sɩ a bananɛ da-n sona ayɩ: Khɛr, ma jɩa'.
58 Bɔɔ gbe tibil kpɩɩ yɩɩ a so: Fɛrɛ dakha, wa tibil ca bɩɛl fɩ do. Dɩ Pɩɛr birsee: Kuun, ma do wa tibil ca ga.
59 A lɩɛr bɩɛl ka wo, tibil kpɩɩ borrakɛ da-n ɩɩraa ayɩ: Sobɔr gɩ gel, kuunikɛ kɔɔ har kha na Jeju gɩdonɩ Galiledaar a do.
60 Sɩ Pɩɛr sʋʋraa: Kuun, ma jɩ gɩrɛɛkɛ fɩ-n ƴaalnɩ fɩ soa'. Dɩ mɔna a hanɩ mɩɩrɔ 'lo, dapaara yɔl kʋʋ khɩɩrɛ.
61 Dɩ Kɔ̃tɩn kɩɩl a hɩɩnʋʋ. Dɩ Pɩɛr jɩna thɩmɩɩrɩkɛ Kɔ̃tɩn kɔɔ sʋʋraanɩ ayɩ: Yɔl kʋʋ na 'lɛ na khɩɩ nĩkɛ pa', sɩ fa bananɛ balãther nayɩ fa jɩ ma'.
62 Dɩ Pɩɛr the khuirə da-n bɩ sɔsɔsɔ.
63 Tɩbɩlaakɛ n bɛranɩ Jeju wɩ-n maanʋʋnɛ dɩ wa-n bɩɩrnaa,
64 a thii ƴɩɛ, sɩ wa-n bulee: Jɛ ntɛɛkɛ n bɛ fɩnɩ.
65 Dɩ wɩ kɔɔ mɩɩrɛ i kʋɛ thɩmɩa jɔɔjɔɔ a pɩɛraa.
66 A dɩɩ wɩl, tibil kɔ̃tɩnasɔ, na bonɩ jidaar kɔ̃tɩna, na jɔfʋ dɩɩrdarasɔ kɔɔ kpar kha jɛ, sɩ dɩ wɩ kpa Jeju a pɔna awɩ so gʋʋrdarasɔɔ ƴɛra.
67 Dɩ wa-n bulee: Ado fɛr dʋɔn Kirisiti, sɔ sar. Dɩ Jeju birse wi: A mɩ so narrakɛ na pɛ gɩ haara'.
68 Dɩ a mɩ bule ni thɩ̃ɛ na tuə'.
69 Sɩ a fʋna nɛnɛ̃kɛ dɩphã, mɛr tibili Bikuun na toore Thãgbaa fãga nyɔ̃bɔra.
70 Dɩ wɛr fɛʋ bulee: A thɩɛna ga, Thãgbaa Bikuun ha fɩ bɛɛ? Dɩ Jeju birse wi: Sobɔr nɩ so, gɛr mɩ do ger.
71 Dɩ wɩ so: Dɩ anye hale dɩ sa bir na 'lo dɩkha 'lo, gɩdonɩ asɩ thɛthɛ nɩɛrɛ dɩ mɩɩna ɔɔ nɔ.