14
1 Wire yenyɔ sɛra sɩɩ do Pakɩ ɓol bɔɔ na buruukɛ na hananɩ tabɩɩraa kho bɔ daan. Le bonɩ jidaar kɔ̃tɩna na jɔfʋ dɩɩrdara n ƴaal hʋɛ wɩ fʋ Jeju na fɩɩlɛ wɩ kʋ.
2 Gɩdonɩ wɩ n sor, ɩna fʋʋ ɓol bɔa', a mɛ̃ gaa khʋ̃ɛ na ɩɩrɛ tibil jɔɔ thɩ̃thɩɩn.
3 Ɔbɔɔkɛ Jeju hanɩ Betanɩ Sɩmɔ̃ gbuuluu cɔ dɩko kho paar, khɛ bɩɛl lʋʋn le, a fʋrɔ laaso ja bulabirikɛ hananɩ latɩkolookɛ n hʋnanɩ daʋ, a khɩɩr the nʋɔ ka; dɩ a cʋɔrɛ bulobirile a deer latɩkolo Jejuu yʋɔ.
4 Dɩ ɩkhasɔɔkɛ kɔɔ hanɩle nĩkhii fʋ wɛr dɩ wa-n so: Anyee latɩkolo kʋɛ ca ha gɩrɛ thakɛ?
5 Ga do wa kɔɔ dolonena gɩ dã wire tãatherɩɩ thɔ̃ lɩmɩ wɩ ha bɔdara gaa? Dɩ mɛ̃ wɩ cɩ̃cɩma khɛrraale.
6 Sɩ Jeju so: Nɩ sɩɛraa, mɔ̃gɩdo dɩ na-n vɔgʋʋ? Thɔ̃ bʋɔ a cʋʋ mar;
7 gɩdonɩ bɔdara n har wire fɛʋ anɩ pa, nɩ punone cʋʋ wɩ bɔɔ mɔ̃ nɩ-n ƴaalnɩ, sɩ mɛrɛ na hana mɩ khorra'.
8 Gɩrɛ a-n punoni ha gɩrɛ a cʋʋnɩ, a kɔɔ mãa a thir mi latɩkolo da-n gbɛbɩ mɩ mɔ̃ wa dʋ mɩnɩ.
9 Sobɔr mɩ so nar, paar fɛʋʋkɛ wa mɩɩnɩ Thãgbaa tutugo bʋɔɔ thɩmɩɩ thɩɩraakɛ fɛʋ, wa mɩɩrɛ dakha gɩrɛɛkɛ khɛrɩkɛ kɔɔ cʋʋnɩ dɩ wa jɩnaa.
10 Sɩ Judasɩɩkɛ thɛnɩ Karɩyɔtɩ dɩɩra, kɛ dʋɔnnɩ kpãkpãadaar bɩɛl yʋɔr yenyɔra, jaal bonɩ jidaar kɔ̃tɩnaa pa dɩ a na liirna Jeju.
11 Dɩɩ da war na sobɔr mɔ̃ a-n mɩɩ wɩnɩ dɩ wɩ yɩ, ɩɩɩa haarɛ war. Dɩ Judasɩ jɩɩ ma da-n ƴaal hʋɛ waa a liirnaa.
12 Buruukɛ na hananɩ tabɩɩraa caca ɓol wi, kɛ dʋɔnnɩ wireekɛ wɩ-n jinəni Pakɩ bana bire bonɩɛ, Jejuu kpãkpãadara buleele ayɩ: Ka fɩ-n ƴaal sɩ jala gbɛbɩrɛ Pakɩ dɩkor fɩ kho?
13 Dɩ a thʋɔn ɔɔ kpãkpãadara yenyɔ a so war ayɩ: Nɩ jala dɩɩra, kuunikɛ heenenɩ nyʋɔn na daa na caana nɛr, na-n kpaaraa,
14 dɩ ka a na lonɩ nɩ sɔ cɔdaar kuunna ayɛ: Dɩɩrdaar yɩ, ka duukɛ ɩna khoronɩ Pakɩ dɩkor na ɩnɩ kpãkpãadara ha?
15 Dɩ a na nɩ narɛ lɩ̃gã kɔ̃tɩ̃ɩkɛ wɩ thɩɩnɔnɩ thɩ̃ɛ, nɩ gbɛbɩrɛ le Pakɩ dɩkor.
16 Dɩ kpãkpãadara jaal a dã dɩɩra, a yɩ thɩ̃ɛ fɛʋ dɩɩ ha mɔna Jeju kɔɔ so warnɩ, dɩ mɛ̃ wɩ gbɛbɩ Pakɩ dɩkor.
17 A dɩɩ dʋɔr Jeju pɔr na yʋɔr yenyɔ.
18 Dɩ ɔbɔɔkɛ wɩ toonɩ dɩ wa-n kho dɩkor Jeju sor: Sobɔr mɩ so nar, tibil bɩɛl nɛrɛraakɛ sɩ-n khonanɩ kha dɩkor na liirna mɛr.
19 Dɩ wɩ ma dɩ wa-n gbobi, sɩ dɩ wɛr bɩɛlbɩɛl na-n bulee ɩnɛr gɩ kã?
20 Dɩ birse wi: Tibil bɩɛl nɛr yʋɔr yenyɔraakɛ n 'lɔɔnɩ tasa bɩɛl na mɛrɛ gɩ.
21 Mɛr tibili Bikuun n jaal mɔ̃kɛ gɩ khere marnɩ Thãgbaa sɛbɛra, sɩ ga puure ʋrɛraakɛ na lirenanɩ mɛr tibili Bikuun; a wa kɔɔ kɔ̃ tibil ca olelaka', gɩ ka baar.
22 Ɔbɔɔkɛ wɩ-n khonɩ dɩkor Jeju gbaar buru, dɩ ɔbɔɔkɛ a bɩɛlnɩ Thãgba pɛr pɩ, a kuure a ha wɩ sa so: Nɩ gba gɩrɛra ɩ̃ tomɩ gɩ.
23 Agɩpɩ dɩ gba thɩ̃ yɔnanɛ, ɔbɔɔkɛ a fʋɔrnɩ Thãgba pɛr pɩ, a ha wɛr, dɩ wɛr fɛʋ gba a yɔ.
24 Dɩ a so warɛ aa: Gɩrɛ dʋɔn ɩ̃ tɔmɩ̃, Thãgbaa nɔ bɩɛl ʋlfɛ tɔmɩ̃ gɩ, a na deer tɩbɩla bərəəm sora.
25 Sobɔr mɩ so nar, ma bir na yɔ dɩvɛ̃ɛkɛ bã, phaphapha gɩ dana wireekɛ ma birni na yɔ daphaa Thãgba fãgadaarɩ dʋɔ.
26 Ɔbɔɔkɛ wɩ khɩnɩ nɩɛ pɩ, wɩ ther jal gɔ̃gʋɔnaakɛ hananɩ olɩvɩ thɩra.
27 Dɩ Jeju so war: Nɛrɛ fɛʋ na kɛrnanɛ khiru, gɩdonɩ gɩ kherere Thãgbaa sɛbɛra ayɩ: «Mɛr Thãgba na bɩɩrɛ bana khedaar dɩ banaa na bɩ̃bɩlã paar fɛʋ.»
28 Sɩ ɔbɔɔkɛ ma ɩɩrnɩ na the khirera ma kʋʋl nɛr ƴɩɛ na jal Galile.
29 Dɩ Pɩɛr sʋʋraa: Ado tɩbɩla fɛʋrakɛ na kɛrnanɛ khiru, sɩ me wer ma kɛrna khiruə'.
30 Dɩ Jeju sʋʋraa: Sobɔr mɩ so far, fɛrɛ, nĩ dɩtɩnɔɔkɛ yɔl kʋʋ na khɩɩrakɛ balanyɔa', sɩ balãther fa bana nayɩ fa jɩ ma'.
31 Sɩ Pɩɛr bir tu na kheu: Adorakɛ wɩ yɩ sɩ khe kha, sɩ ma puno na bana nayɩ ma jɩ faa ga; dɩ mɛ̃ wɛr fɛʋ kɔɔ so dakha.
32 Agɩpɩ wɩ kɔɔ daan paarɩkɛ wɩ-n wenɩ Jɛcɛmanɛ, dɩ Jeju so ɔɔ kpãkpãadarara ayɩ: Nɩ tɔɔ kɩɛr ɔbɔɔkɛ ma hanɩ Thãgba bɩɛllɔ.
33 Dɩ a kpar Pɩɛr na Jakɩ na Jã, sɩ maar mar dɩ ga-n fʋʋ, dɩ haar haa kũkulõo.
34 Dɩ a so warɛ: Ɩ̃ ha gbobire khikhi gbobire waa gel, nɩ tɔɔ kɩɛr a na jʋrɛ.
35 Mɛ̃ a tɔ jal gbe, a ji thɩɩra da-n bɩɛl Thãgba adora hʋɛ hale gɩ dora bɔ̃ gaar bɔɔle khokhɩaraarɛ,
36 a sor aa: Aba (kɩrʋ dʋɔn Thɩrɛ), fɛr n punone thɩ̃ɛ fɛʋ, hʋnɔnɛ mar thɩ̃ yɔnanɛɛkɛ sɩ ga do mɔ̃ mɩ-n ƴaalnɩ ga, sɩ mɔ̃ fɛrɛ n pɛrnɩ haar gɩ hana.
37 Sɩ agɩpɩ dɩ kɛr pɔ war a yɩ wɩ dɩ wa-n daar, dɩ so Pɩɛrra: Sɩmɔ̃, fɛr n daarɛɛ? Fa kɔɔ puno toorakɛ gbe a jʋʋr hɩɩnaa?
38 Nɩ jʋrɛ a na bɩɛlna Thãgba dɩ mɛ̃ na lõ fifiləlela ga. Tuur wer n har haarra gel, sɩ tibili tibil do pa fãga 'lee.
39 Dɩ mɛ̃ a kɛr jal wo da-n bɩɛl Thãgba da-n 'loro mɔ̃kɛra a kɔɔ sonɩ.
40 Sɩ a bire pɔ wo, a yɩ wɩ dɩ wa-n daar, gɩdonɩ dayuur fʋ wɛr a kar, dɩ wa jɩ mɔ̃ wa sʋʋraana'.
41 Ɔbɔɔkɛ a pɔ warnɩ dɩɩ dã balãther, a so warɛ: Nɩ daarɛ dɩphã a hɩrɛ; gɩ daan dɩ bɔɔ daan. Nɩ hɩnɛ, wa liirnanɛ mɛr tibili Bikuun sopugodara.
42 Nɩ ɩrɛ sɩ jal, sɩ hɩnɛ ʋrɛɛkɛ lirena mɩnɩ n ɩnɛ.
43 Mɔ̃ a hanɩ mɩɩrɔ, dapaara Judasɩɩkɛ dʋɔnnɩ bɩɛl kpãkpãadara yʋɔr yenyɔra daan na tibil jɔɔkɛ fɔrɔnɩ bajɩnasɔ na gbolasɔ, kɛ bonɩ jidaar kɔ̃tɩna na jɔfʋ dɩɩrdarasɔ na kɔ̃tɩnasɔ kɔɔ thɔnɩ.
44 Sɩ lĩlir kɔɔ nɩ warɛ gɩrɛɛkɛ a na cʋʋnɩ aa, ʋrɛɛkɛ ɩna palnɩ, ɔr gɩ, wɩ fʋɔnɛɛ jalana sɩ wa-n do a yɩ fuu paara'.
45 Dɩ ɔbɔɔkɛ a danɩ, dapaara a tɔ wɔrɔ̃ Jeju sa so: Dɩɩrdaar; sa palʋʋ.
46 Sɩ wɩ kɔɔ fʋrɛ Jeju.
47 Sɩ tibil bɩɛl wɛrra pher bajɩna, a cɩna Thãgbaa gbõdaarɩ thɔ̃daar nũu a kur.
48 Dɩ Jeju so war: Nɩ ɩanɛ bajɩna na gbolasɔ nɩ fʋ mɩ mɔ̃kɛ wɩ-n fʋnɩ yu hɔ̃hʋɔldaar koe.
49 Mɩ-n kɔɔ har kha na nɛrɛ wire fɛʋ dɩ ma-n dɩɩr nɩ thɩ̃ɛ Thãgba fʋɔr cɔ kɔ̃tɩɩna, sɩ na kɔɔ fʋ ma'. Sɩ gɩ har thakɛ gɩ cʋʋ gɩrɛɛkɛ Thãgbaa sɛbɛ sonɩ gɩ dã.
50 Liir wɩ fuule fɛʋ sa fagʋʋ.
51 Sɩ daɓol bɩɛl gɩ da-n kɔɔ kpa Jejura, a par kẽkẽ nɩɩ, wɩ fʋʋrɛ,
52 dɩ for kelẽ nɩɩ pɛ war sa cana sãɓɔlɔ̃.
53 Dɩ wɩ kpar Jeju a jalna gbõdaarɩ pa ka bonɩ jidaar kɔ̃tɩnasɔ, na kɔ̃tɩnasɔ, na jɔfʋ dɩɩrdarasɔ n gbɛbɩnɩ kha.
54 Sɩ Pɩɛr n kpaar Jejura nɔ bɩɛl nɔ bɩɛl, a ba dana gbõdaarɩ gbaya, a lõ too le na thɔ̃dara da-n ɩɩr dɔɔ.
55 Bonɩ jidaar kɔ̃tɩnasɔ, na so gʋʋrdara fɛʋ, kɔɔ kpɛr sɔ dɩ wa-n pɛ Jeju wɩ yɩrɔ hʋɛ wɩ kʋʋ, sɩ wa kɔɔ yɩ ga.
56 Sɩ tibil jɔ kɔɔ pɔr a kuur sɔ̃sɔ dɩ wa-n pɛ Jejura, sɩ awɩ so jɩ na ma kha ga.
57 Dɩ ɩkhasɔ n ɩɩr dɩ wɩ sõso na pɩɛraa ayɩ,
58 ɩnɩ kɔɔ nɩɛrɛ dɩ so ayɩ, ɩna kʋɛrɛ Thãgba fʋɔr cɔ kɔ̃tɩ̃ɩkɛ tɩbɩla mɩnɩ, sɩ ɩnɩ-n bir ɩnɩ-n mɩ dakpɩɩ wire balãther, sɩ ga do tibil nyɛ̃ɛ ma'.
59 Sɩ gelelakɛ wɩ sonɩ awɩ so jɩ na ma kha ga.
60 Dɩ gbõdaar pal ɩɩr tɩbɩlaa thɩ̃thɩɩn a bule Jeju: Fa-n hana nʋɔ na birsena gaa? Anyee so ha gɩrɛ tɩbɩlaakɛ n pɛ farnɩ?
61 Sɩ Jeju pɩr pɔbɩ aa əl nʋɔa', dɩ gbõdaar bir bulee: Sɩɩ do fɛr dʋɔn Kirisiti, Thãgbaakɛ sɩ-n fʋɔrnɩɩ Bikuun bɛ?
62 Dɩ Jeju tu: Mɛrra gɩ, sɩ na yɩrɛ tibili Bikuun da too Thãgbaa nyɔ̃bɔra, a thena dakha thãgbara ƴũ a na-n ɩ̃ na ndɔlɔ̃pana.
63 Dɩ gbõdaar ɓəər ɔɔ kẽkẽsɔ sa so: Anye hale dɩ sa bir na 'lo dɩkha 'lo?
64 Nɩ nɩɛnɩ mɔ̃ a kʋɛnɩ Thãgbaa i; mɔ̃ nɩ-n kpɩɛr? Dɩ tɩbɩla fɛʋ pɩɛraa so kʋnanɛ.
65 Sɩ ɩkhasɔ wɛrra mar dɩ wa-n cɩɩraa nyɔ̃thɩ̃ɩ, sa thii ƴɩɛ sɩ dɩ wa-n thʋʋrʋʋ na nyɔ̃ po, sɩ wa-n sʋʋraa a jɛ ntɛ n bɩɛnɩ; sɩ thɔ̃dara gbaarɛ sɩ wa-n ɓaalɛ.
66 Mɔ̃ Pɩɛr hanɩ gbayara, gbõdaar thɔ̃daar khɛ bɩɛl pɔr
67 a yɩɩ da-n ɩɩr dɔɔ, dɩ hɩɩnʋʋ kirkirkɩr sa sʋʋraa. Fɛrɛ dakha mee fɩ-n kɔɔ ha kha na Najarɛtɩ Jeju.
68 Sɩ a bananɛ sa so: Ma ja', ma-n nɩ gɩrɛɛkɛ fɩ ƴaalnɩ fɩ soa'. Agɩpɩ Pɩɛr gba jal thena phel ko lõfonʋɔ.
69 Dɩ thɔ̃daar khɛrɩle yɩɩ, a bir ma da-n so wɩrɛraakɛ hanɩle aa: Kuunikɛ wa tibil cara bɩɛl gɩ.
70 Sɩ Pɩɛr bir da-n bana wo. Bɔɔ gbe dɩ wɩrɛɛkɛ kɔɔ hanɩle bir sʋʋraa: Sobɔr gɩ gel, wa tibil ca bɩɛl fɩ do gɩdonɩ Galiledaar ha fɩ.
71 Sɩ Pɩɛr mar a bana a ʋlfɛ da-n wɩɩrna thɩ̃ɛsɔ aa, ɩna jɩ kuunikɛ wɩ-n sona'.
72 Dɩ dapaara balanyɔ yɔl kʋʋ bir khɩɩ, dɩ Pɩɛr jɩna Jejuu thɩmɩɩkɛ a kɔɔ sʋʋraanɩ ayɩ, a yɔl kʋʋ na 'lɛ na khɩɩ balanyɔa', sɩ a na bananɛ balãther nayɩ, ɩna jɩ na'. Dɩ mɔ̃ Pɩɛr n kpɩɛrnɩ thale a-n khɩɩrɛ.