13
1 Mɔ̃kɛ Jeju n thenɩ Thãgba fʋɔr cɔ kɔ̃tɩɩna, ɔɔ kpãkpãadaar bɩɛl sʋʋraarɛ: Dɩɩrdaar, yɛ boka ɓɔnanakɛ, dɩ hɩnɛ mɔ̃ wɩ thʋnɩ mɩ gʋʋsɔ ɓoɓo.
2 Dɩ Jeju birsee ayɩ: Fa yɩ mɔ̃ wɩ thʋnɩ mɩ go kɔ̃tɩnasɔɔkɛ ɓoɓoaa? Boka bɩɛl na bir na sɩ kɩɛr na dɛ̃ɛ ʋ̃ bokara ƴũ bã, fɛʋ na derre.
3 Mɔ̃ Jeju toonɩ gɔ̃gʋɔnaakɛ hananɩ olɩvɩ thɩra a pɛ ƴɩɛ Thãgba fʋɔr cɔ kɔ̃tɩɩna, Pɩɛr na Jakɩ na Jã na Ãdire kɔɔ buleele hɛllɩ:
4 Sɔ sar bɔɔkɛ gelela na danɩ, dɩ anye dɔ jɩɩnɩkɛ na nɛnanɩ bɔɔkɛ gelesɔra na-n danɩ.
5 Dɩ Jeju ma da-n so war ayɩ: Na-n jɩɛ dʋ bʋrɛ, na-n do tibil n fɩɩl na'.
6 Gɩdonɩ tɩbɩla bərəəm na gbaar ɩ̃ i na ɩna wa-n so, ɩnɛr dʋɔn mɛrɛ; dɩ mɛ̃ wa fɩɩl tɩbɩla jɔɔ.
7 Ɔbɔɔkɛ nɩ nɩɛnɩ kʋʋr hale na mɔ̃ na-n nɩɛnɩ ko thɩmɩasɔ, na-n do maar n fʋ na', dɔ gele n kɔɔ dã sɩ ga do thɩ pɩ paar pa'.
8 Ʋ ca na ɩɩrɛ a na-n kena ʋ̃ ca, ʋ̃ fãgadaarɩ dɩ bɩɛl n ɩɩr a na-n kena ʋ̃ fãgadaarɩ dɩ kpɩɩ. Thɩ jɩɩnsɔ na har paar dɩɩdɩɩ, kɔmɛ kɔ̃tɩ̃ɩ na jire dakha; sɩ gɩrɛ wallɛɛ tɔ̃tʋ̃ɔ pa gɩ.
9 Sɩ na-n jɩɛ dʋ bʋrɛ dɩbara, gɩdonɩ tɩbɩla na fʋ nɛr na jalna kɩɩl paar; wa bɩɩr nɛr dakha Juifisɔɔ Thãgba fʋɔr cɔnanɔ; wa kpa nɛr na jalna dɩ na jɩɩl gobanɛrsɔ na fãgadarasɔɔ ƴɛra, gɩ do mɛr dɔ nɔɔ, dɩ ga mɩɩ warɛ anɩ ha pɛda.
10 Dɔ tutugo bʋɔɔ thɩmɩɩ n kɔɔ mɩɩ tibil caarra fɛʋ ɓo.
11 Sɩ ɔbɔɔkɛ wɩ fʋ nɩnɩ a jalna kɩɩl paar, na-n kɔɔ ma na dɛ anye na so yaa ga, sɩ dawiilera thɩmɩɩr na the ner nɔɔ dɩ na so, gɩdonɩ ga do anɩ pa ga tha', sɩ Thu Phʋʋ na hana nɩ.
12 Õkuun na liirnanɛ ɔɔ õkũu bɩnɔ dɩ wa kʋ, ɔmɛ̃ thɩrɛ na cʋʋ na ɔɔ bɩsã; bɩsana na ɩɩrɛ na lã thɩrɛ na nɩrɛra.
13 Tɩbɩla fɛʋ na laar nɛr gɩ do ɩ̃ i dɔ nɔɔ, sɩ ʋrɛɛkɛ na yɩranɩ a na dana khu paar, ɔr na 'lɛ taarɛ.
14 Ɔbɔɔkɛ na yɩnɩ thɩ̃ thuurnəneekɛ na kʋɛanɩ thɩ̃ɛ da ha kãkɛ na teananɩ a hana ga (dɔ ʋrɛɛkɛ n hɩnɛnɩ sɛbɛɛkɛ n dʋ gar bʋrɛ), le wɩrɛ hanɩ Jude n fuo ca jala gɔ̃gʋɔna;
15 ʋrɛɛkɛ na hanɩ nãsʋrɔ a na-n gbũ lõ cʋɔrɔ ɩnɩ-n gba thɩ̃a';
16 dɩ ʋrɛɛkɛ dakha na hanɩ lɔɔ a na-n kɛr bir ɩnɩ-n gba ɩnɩ kẽkẽ kɔ̃tɩ̃ bã.
17 Ga wisɔɔle ga puurore khɛ pɛmɛdarara na wɩrɛ n mamanɩ bibɔrɔsɔ.
18 Na-n bɩɛlnɛ Thãgba dɩ thɩ̃ɛ thale na-n dã yʋʋrɔa'.
19 Ga wisɔɔle bɔ gaarɛ na jɔrɛ na ka, bɔ gaar caale na kɔɔ hale ɔbɔɔkɛ Thãgba kɔɔ tini thɩ̃ɛ dɩɩ dana nɛnɛ̃ka', dɩ ga bir na halerakɛ kpɩɩ bã.
20 Ado Kɔ̃tɩn na kɔɔ tɔ ga bɔɔle dɩɩ gburoə', tibil na mar na ta ga, sɩ tɩbɩlaakɛ a kɔɔ phiirni wɩ dɔ ɩnɩ too dɔ kɩrʋ dɩ tɔ ga bɔɔle dɩɩ gburo.
21 Liir ado tibil na so nar: Nɩ hɩnɛ Kirisiti har kɩɛr, agɩbo: Nɩ hɩnɛ pal a ha, na-n pɛr haara'.
22 Gɩdonɩ wɩrɛ n sõsonenɩ dɩ wɩ yɩ Kirisiti ha nɩ, agɩbo bobona ha nɩ, na ɩɩrɛ wa-n nɩna tɩbɩla nɔ kpaa thɩ̃ɛsɔ na ma kʋ thɩ̃ɛsɔ, wa-n fɩɩlnanakɛ tɩbɩlaakɛ Thãgba kɔɔ phiirni adora wa punone.
23 Sɩ nɛrɛ, na-n jɩɛ dʋ bʋrɛ koe; mɩ kɔɔ maanɛ dɩ ma-n so nar gɩrɛ fɛʋ.
24 Ga bɔɔlera a bɔ gaarɛ ka na pɩ, wire na birəre, por dakha na hɩrɛ bã.
25 Yepələ̃be na ther thãgbara ƴũ ga-n jiir thɩɩra, dɩ gɩrɛ dɔnɩ fãgaakɛ hanɩ thãgbara ƴũ ga gbugbuyore.
26 Le wa yɩ tibili Bikuun a na-n ɩ̃ na ndɔlɔ̃pana na fãga jɔɔ ka na carbararɛ jɔɔ.
27 Le a na thɔ̃ ɔɔ thɔ̃thɔ̃daar thusɔ dɩ wa kpa wɩrɛ a phiirni, kɛ hanɩ kɩrrɔ, na gananɔ, na gɛla yenyɔra, na ka thãgbara ƴũ na thɩɩ khuni.
28 Nɩ dɔ sokpaa thɩr khonanɛdara n dɩɩrnɩ thɩ̃ɛ; ɔbɔɔkɛ nɩ yɩnɩ ɔɔ jɛ̃ dɩɩ ɓol a na thɔɔ fa ƴolo, nɩ jɩrɛ ubulo n wɩla.
29 Mɛ̃ gɩ, nɛrɛ dakha a nɩ yɩ thɩ̃ɛsɔɔkɛ dɩ a dã, nɩ jɛ tibili Bikuuni ɩ̃ bɔ n daan, dɩ lõfonɔɔ a ha.
30 Sobɔr mɩ so nar, nĩdaraakɛ na khiir koo sɩ thɩ̃ɛsɔɔkɛ fɛʋ n dã ga.
31 Thãgbara ƴũ na thɩɩ na phor na ka, sɩ ɩ̃ thɩmɩɩsɔ na pho na ka kpɩɩraka'.
32 Ado wi jɩɩrra gɩ, na bɔɔkɛ ga thɩ̃ɩkɛ na danɩ, tibil bɩɛl na ja', thɔ̃thɔ̃daar thusɔrakɛ le Thãgbaa dʋɔ wa ja', mɛr Bikuunnakɛ na ja', sɩ Thɩrɛ dɩbara jɩɛn.
33 Na-n jɩɛ dʋ bʋrɛ a na jʋrɛna, gɩdonɩ na jɩ bɔɔkɛ ga dana'.
34 Ga hʋrɛ mɔ̃ tibil n pɛrnɩ haar ɩna jaal dɩkhãa pa, dɩ faa cʋɔr sɩ dɩ 'laa ɔɔ thɔ̃daarsɔra bɩɛlbɩɛl hʋɛ thɔmanaakɛ wa-n donɩ, sɩ dɩ so lo bɛrdaarra, a na-n jɩɛ jʋʋr.
35 Na-n jʋrɛ mɛ̃, gɩdonɩ na jɩ bɔɔkɛ cɔdaar kuun na birni na ɩ̃a'; agakpaana dʋɔrɔ ga do, agɩbo dɩnɩrɔ, a mɛ̃ gaa yɔl ko khɩɩ bɔɔ, agɩbo duuro.
36 Ado a phuro a ɩ̃ na-n do a fʋ nɩ daanɔa'.
37 Gɩrɛ mɩ so narnɩ, tɩbɩlala fɛʋ mɩ so: A nɩ jɩ na-n jʋrɛ.