9
1 Dɩ so war wo ayɩ: Sobɔr mɩ so nar, ɩkhasɔɔkɛ hanɩ kɩɛr na khiir sɩɩ do wa yɩ Thãgbaa fãgadaar do dɩɩ ɩ̃ na fãga gaaga.
2 A wire maadõ ka pɩ, Jeju kpar Pɩɛr na Jakɩ na Jã a jʋʋnna gɔ̃gɔ̃ gbaana, dɩ wɩ ha kha le dɩbara; dɩ Jejuu tomɩ debi awɩ ƴɛ thɩ̃thɩɩn.
3 Dɩ ɔɔ kẽkẽsɔ debi dɩ a-n hɩl phalphalphal, a bulololakɛ dakha dɩɩ ka, a jɔ mɔ̃kɛ ga donɩ tibil thɩɩraakɛ na punone na cʋʋ dɩ a buloloa'.
4 Dɩ Elɩ na Mʋɩjɩ the warɛ sɩ Jeju wɩ-n khʋɛna.
5 Dɩ Pɩɛr so Jejura: Dɩɩrdaar, gɩ bɔrɛ sɩ hanɩ kɩɛr; sa dʋrɛ waa yẽther, bɩɛl n do afɩda, bɩɛl n do Mʋɩjɩɩda, bɩɛl n do Elɩɩda.
6 Aa jɩ mɔ̃ a na sona', gɩdonɩ maar fʋɔn wɛr kpãkpãadara.
7 Dɩ ndɔlɔ̃paar gbune a thi war, dɩ nʋɔ the ndɔlɔ̃paarra ayɩ: Ʋrɛɛkɛ dʋɔn ɩ̃ Bikuunikɛ mɩ-n nanɩ, na-n pɩɛ nũu.
8 Dɩ dapaara kpãkpãadara hɩɩnɛ khʋʋkhʋʋ, sɩ wa kɔɔ yɩ tibil saagado Jeju gɩ dɩbara na wɛraa ga.
9 Dɩ mɔ̃kɛ wɩ gbuni gɔ̃gʋɔna, Jeju kpãkpãa warɛ na sobɔr dɩ wa-n so tibillə gɩrɛɛkɛ wɩ kɔɔ yɩna', phaphapha ɩnɛr tibili Bikuun n ɩɩr khirera.
10 Dɩ wɩ kɔɔ fʋrɛ thɩmɩɩrɩle awɩ bɩnɔ, sɩ wa-n bule khasɔ aa: Anye n dɔ khi ɩɩrɛ?
11 Sɩ kpãkpãadara kɔɔ buleele thakɛ ayɩ: Mɔ̃ gɩ ha dɩ jɔfʋ dɩɩrdarasɔ na-n so ayɩ: Dɔ Elɩ n kɔɔ ɩ̃ caca.
12 Dɩ tu: Elɩ na kɔɔ ɩna wer eaca na wɛbɩ thɩ̃ɛ fɛʋ. Sɩ mɔ̃gɩdo dɩɩ khere Thãgbaa sɛbɛra mɛr tibili Bikuunidara ayɩ: Dɔ ɩ̃ gaar bʋɔ jɔɔ dɩ wa therna ma?
13 Sɩ mɩ so narɛ, Elɩ kɔɔ ɩnɛ sɩ wɩ kɔɔ cʋgʋʋrɛ mɔ̃ wɩ pɛrnɩ haar, dɩɩ ha mɔna gɩ kɔɔ khereraanɩ.
14 Sɩ ɔbɔɔkɛ wɩ kɔɔ danɩ wɩ̃ kpãkpãadara, wɩ kɔɔ yɩrɛ tibil jɔ dɩ wɩ dii war na jɔfʋ dɩɩrdarasɔɔkɛ n bananɛnanɩ kpãkpãadaraale thɩ̃ banaa.
15 Sɩ ɔbɔɔkɛ tibil jɔɔle yɩnɩ Jeju, gɩ phuro wer dɩ wɩ ca pɔ a fʋɔrʋʋ.
16 Dɩ bule wi: Anye nɩ-n bana kha na wɛr?
17 Dɩ kũu bɩɛl tibil jɔraale tu: Dɩɩrdaar, mɩ kɔɔ kpar ɩ̃ bikuunikɛ hananɩ nɔ ma kɔ̃tɛɛbuu a ɩna far;
18 pa dɔɔkɛ a-n fʋʋnɩ thɩɩra a-n kpɛgʋʋ, dɩ bɩsaan na-n the nyɔ̃thɩ̃ khɔrɔ̃ɔ, da-n khona nyɩma, sɩ dɩ tã gõgorõo; dɩ mɩ kɔɔ bɩɛlɛ afɩ kpãkpãadara wɩ wea kɔ̃tɛɛbuurə, sɩ wa kɔɔ punoə'.
19 Dɩ Jeju so war: Nɛr nĩ babalaakɛɛ; ʋmɔ̃ bɔɔ ma thʋ̃ na toona nɩ gɩ dana? Ʋmɔ̃ bɔɔ ma thʋ̃ na fʋ nar haarrarakɛ gɩ dana? Nɩ kpaa ɛna mar.
20 Dɩ wɩ kpaa a pɔna; dɩ ɔbɔɔkɛ kɔ̃tɛɛbuu na yɩnɩ Jeju, a gbʋ̃gbʋnyanɛ bɩsaan dɩ ji thʋnɔ da-n laan, da-n thena nyɔ̃thɩ̃ khɔrɔ̃ɔ.
21 Dɩ Jeju bule thɩrɛ: A fʋna ʋmɔ̃ bɔɔrakɛ gekɛra wer kɔɔ hanaa? Dɩ thɩrɛ tu: Ɔɔ bɩsã bu bɔɔ gɩ.
22 Dɩ wire wire kɔ̃tɛɛbuule n tʋɔrɛ da-n kpɛɛ dɔɔ na nyʋɔnɔ ɩnɩ-n kʋʋra; sɩ ado fa punone na cʋʋ dɩkha, jɛ sɩ bʋɔra sa bulo si.
23 Dɩ Jeju birsee: Fɩ yɩ, ado ma punone ya? Thɩ̃ɛ fɛʋ n punone ʋrɛraakɛ pɩɛrnɩ Thãgba haar.
24 Dapaara bɩsaanɩlee thɩ hulẽ ayɩ: Mɩ pɛrɛ haar, bulo mi ɩ̃ baallala.
25 Mɔ̃ Jeju yɩnɩ tɩbɩla dɩ wɩ ca pɔ wa-n jɔr, le a mana kɔ̃tɛɛbuu ayɩ: Fɛr nʋʋr nɔ ma kɔ̃tɛɛbuu, mɛr sɔ far: A fɩ jɩ thɛ bɩsaannaakɛ, fa-n lʋʋnaa yuu bã.
26 Dɩ mɔ̃kɛ a-n thenɩ a hulene sa gbʋ̃gbʋnyã bɩsaan na fãga, dɩ bɩsaan debi a ho a khire pɔɩ; wɩrɛ wer hanɩlerakɛ yɩ: A khire.
27 Sɩ Jeju fʋʋ nyɔ̃ɔ a khəi dɩ pal ɩɩr.
28 Dɩ ɔbɔɔkɛ Jeju lonɩ cʋɔrɔ dɩ wɩ ha kha na kpãkpãadara dɩbara, wɩ buleele aa: Mɔ̃ gɩ fʋna dɩ ser na kɔɔ puno a wee kɔ̃tɛɛbuule a fa ga?
29 Dɩ so war: Agado Thãgba bɩɛlɛ ga, kɔ̃tɛɛbu ca ʋrɛ na hana ther na tha'.
30 Sɩ wɩ kɔɔ ther le a jal a kpãsɛ Galile, sɩ Jeju na kɔɔ ƴaal wɩ jɛ ka a hana';
31 gɩdonɩ a-n dɩɩrɛ ɔɔ kpãkpãadara, da-n sona war ayɩ, wa fʋrɛ ɩnɛrkɛ dɔnɩ tibili Bikuun na ha tɩbɩla dɩ wa kʋ nɩ, sɩ a ɩnɩ khi dɩ wire yẽther ka, ɩna ɩɩrɛ khirera.
32 Sɩ kpãkpãadara na jɩ thɩmɩɩrɩle kɩrʋa', dɩ maar kɔɔ fʋlɛ wɛr dɩ wa 'la na bulea'.
33 Dɩ wɩ kɔɔ daan Kapɛrnayʋm; dɩ ɔbɔɔkɛ wɩ kɔɔ hanɩ cʋɔrɔ, gɛr Jeju bulelo ɔɔ kpãkpãadara ayɩ: Anye nɩ-n kɔɔ bana kha hʋɛrara?
34 Dɩ wɩ pɩr pɔɔpɔɔ, gɩdonɩ wɩ kɔɔ ƴaalɛ wɩ jɩ ʋrɛ 'lɛnɩ kɔ̃tɩɩnɛ, gɛr gɩ dɩ wɩ kɔɔ bana kha hʋɛra.
35 Dɩ mɛ̃ Jeju too sa we kpãkpãadara yʋɔr yenyɔ, dɩ wɩ pɔ dɩ so war ayɩ: Ntɛɛkɛ n ƴaalɛnɩ ɩnɩ-n dɔ ƴɛ kʋl, dɔ a do pɩpɩr tɩbɩlala fɛʋ na tɩbɩla fɛʋʋ thɔ̃daar.
36 Agɩpɩ dɩ kpa bɩsã buu a pɔna awɩ thɩ̃thɩɩn, sa gbaa fʋrɔ sa so war:
37 Ntɛɛkɛ na teanɩ bɩsaan thakɛ a na-n hɩɩn, gɩ do ɩ̃ i dɔ nɔɔ, mɛrɛɛ thɛthɛ a tee. Dɩ ntɛɛkɛ tea mɩnɩ, ga do mɛr a tea', sɩ ʋrɛɛkɛ thɔna mɩnɩ a tee.
38 Jã so Jejura: Dɩɩrdaar, sɩ kɔɔ yɩrɛ tibilikɛ na dɔnɩ asɩ kpakpaara', dɩ gba afɩ i dɩ weena kɔ̃tɛɛbii da-n faa, dɩ sa-n kɔɔ pɩɛrʋʋ gɩdonɩ aa do asɩ kpakpaara'.
39 Dɩ Jeju tu: Na-n ha na pɩɛrʋa', gɩdonɩ tibil na puno na gba ɩ̃ i na cʋʋna nɔ kpaa thɩ̃ɛ, saa kɛr dapaara wo a mɩɩ ɩ̃da puə'.
40 Gɩdonɩ ʋrɛɛkɛ na-n ƴaalɛ sɩnɩ sʋa', sɛrra a-n pɛ.
41 Dɩ ʋrɛɛkɛ ɩ̃ i na donɩ nɔɔ dɩ na cɛ nyʋɔn na ha nɩ nɩ yɔ, gɩdonɩ Kirisitii too nɩ do, sobɔr mɩ so nar gel, thɩ̃ɛ na hale na pɩɛrʋʋ lɩmɩ 'lɛrra ga.
42 Nã kɔ̃tɩ̃ tə̃ə lir tibillə fʋɔrɔ wɩ dʋnanaa lanyʋɔnɔ, baar gɩrɛɛkɛ a na kanɩ na cʋʋ dɩ bɩsã biikɛ pɛ mɩnɩ haar dɩ bɩɛl na bara.
43 Ado afɩ nyɔ̃ do far baradaa, kuro faa. A fɩ 'lɛ yire na nyɔ̃ bɩɛl, gɩ baar nyɛ̃ɛ yenyɔɔkɛ fa hananɩ sɩ wɩ dʋna fɩ bu paar dɔɔraakɛ na dɔnɩ thɩ̃ khiirnənə'.
44 [Le dɔ na-n khə', dɩ dɔɔ dakha na-n khiir kpɩɩa'.]
45 Ado afɩ nɔ do far baradaa, kuro faa. A fɩ 'lɛ yire na nɔ bɩɛl, gɩ baar nɛɛ yenyɔɔkɛ fa hananɩ sɩ wɩ dʋna fɩ bu paar dɔɔra.
46 [Le dɔ na-n khə', dɩ dɔɔ dakha na-n khiir kpɩɩa'.]
47 Ado afɩ yi do far baradaa, te faa. A fɩ lõ Thãgba fãgadaarɩ dʋɔ na yi khoroo, gɩ baar yinə yenyɔɔkɛ fa hananɩ sɩ wɩ dʋna fɩ bu paar dɔɔra.
48 Le dɔ na-n khə', dɩ dɔɔ dakha na-n khiir kpɩɩa'.
49 Gɩdonɩ dɔɔ na cʋʋrɛ thɩ̃ɛ fɛʋ dɩ ga hana laanɩ mɩla.
50 Thɩ̃ bʋɔ laan do, sɩ a laan bir dasɩ a mɩla bã, mɔ̃ wa fʋ sɩ na cʋʋ dɩ a bir na hana mɩlalɛ?
51 Nɩ hanana laan anɩ bɩnɔ, dɩ nɩ hanana kha ha ɩɩ bɩɛlbɩɛl.