8
1 Ga bɔɔlera tibil jɔ bir gbɛbɩ wo, sɩ wa hana thɩ̃ɛ na khoa'; dɩ Jeju we ɔɔ kpãkpãadara a so war ayɩ:
2 Bʋɔ fʋ mɛr tɩbɩlalaakɛ, gɩdonɩ wire yẽther ha gɩrɛ wɩ hanɩ kha na mɛrɛ, sɩ wa hana thɩ̃ɛ na khoa'.
3 Ado mɩ bɩlã wɩ wɩ kɔna sɩ dɩ wa yɩ dɩkora', ga khabɩ wɛr hʋɛra, gɩdonɩ ɩkhasɔ wɛrra ther ƴɔɔ.
4 Dɩ ɔɔ kpãkpãadara sʋʋraa: Ka sa puno na yɩ dɩkɔ na ha tibil ca ƴɩrɛ kɩɛr bəənnə dɩ wa hi.
5 Dɩ Jeju bule wi: Buru yemɔ̃ nɩ hana? Dɩ wɩ tu: Makonyɔ gɩ.
6 Dɩ Jeju so tɩbɩlalaale wɩ dera, sa gba buru makonyɔra a fʋɔr Thãgba pɛr, sa kuur a ha ɔɔ kpãkpãadara, wɩ gba tɩnɛnɛ tibil jɔɔlera; dɩ wɩ gba tɩnɛ wɩ.
7 Sɩ wɩ hananɛ dakha dɩkhaa thʋ̃ bi, dɩ Jeju fʋɔr Thãgba a pɛr thʋmanaale, sa so wɩ tɩnɛnɛ wɩ dakha.
8 Wɛr fɛʋ bɩɛlbɩɛl kɔɔ khor a hi phi; dɩ kpãkpãadara gbaar dakurusɔɔkɛ sɛnɩ dɩɩ hi kpona makonyɔ.
9 Sɩ konaale kɔɔ thɔɔrɛ gbɩlanɩ yenã. Agɩpɩ Jeju bɩlã wɩ,
10 sa lõ dapaara gboroona na ɔɔ kpãkpãadara a jal Dalmanuta khʋra.
11 Jɔfʋ bʋ dʋdara wɛ, a pɔ a ma dɩ wa-n bana kha na Jeju wɩ pɩɛraa pheru, a bulee ayɩ, a nɛ nar na nɔ kpaa thɩ̃ bɩɛl dɩ ɔɔ punona thãgbara ƴũ gɩ the.
12 Dɩ Jeju 'wɩɩ na bɩnɛ sa so: Mɔ̃gɩdo dɩ nĩdara na-n ƴaal nɔ kpaa thɩ̃ɛ ya fɛ? Sobɔr mɩ so nar, wa nɩna wɩ nɔ kpaa thɩ̃ bɩɛllaka'.
13 Agɩpɩ dɩ faa wɩ, sa bir lõ gboroona a iir gɩ̃ iiro.
14 Sɩ kpãkpãadara kɔɔ diinəne buru gbaar, sɩɩ do bɩɛl dɩbara wɩ hana le gboroona.
15 Dɩ Jeju kpãkpãa warɛ ayɩ: Na-n jɩɛ dʋ bʋrɛ, na-n tɛ̃tɛna jɔfʋ bʋ dʋdara na Ɛrɔɔdɩɩ taba'.
16 Dɩ kpãkpãadara na-n mɩɩ kha bururaakɛ wa kɔɔ gbana'.
17 Dɩ Jeju jɩ mɔ̃ wɩ-n mɩɩnɩ kha a bule wi: Mɔ̃gɩdo dɩ na-n mɩɩ kha bururaakɛ na kɔɔ gbana? Na yɩ gaa, dɩ na jɩ kɩrʋ paa? Anɩdara khɩɩrɛ waa gel koe.
18 Yinəna nɩ hananɩ wo na-n yaa? A hanana nũu wo na-n naa? Dɩ na jɩna gaa?
19 Ɔbɔɔkɛ mɩ kɔɔ kuurni buru yemɔɩ a ha kona gbɩlanɩ yemɔɩ, kpona yemɔ̃ nɩ kɔɔ gba dakuruukɛ sɛnɩ dɩɩ hi? Dɩ wɩ tu: Kpona yʋɔr yenyɔ gɩ.
20 Dɩ ɔbɔɔkɛ mɩ kɔɔ kuurni buru makonyɔ a ha kona gbɩlanɩ yenã, kpona yemɔ̃ nɩ kɔɔ gba dakuruukɛ sɛnɩ dɩɩ hi? Dɩ wɩ tu: Makonyɔ gɩ.
21 Dɩ Jeju so war: Na yɩ gɩ a thʋ̃ jɩ kɩrʋ pɩrakɛ mãa?
22 Wɩ kɔɔ danɩ Bɛcaɩda le tɩbɩla kpa yaarʋ, a pɔna Jejura dɩ wa-n phʋʋrnaa a thaaraa.
23 Dɩ Jeju fʋrɛ yaarʋʋle nyɔ̃ɔ, a kpaa thena dɩ khuirə, a phii nyɔ̃thɩ̃ɩ pɩɛraa yinəna, a dɛɛnanaa nyɛ̃ɛ sa bulee: Fɩ yɩrɛ thɩ̃ɛ ya?
24 Dɩ yaarʋ gba ƴɩɛ ƴũ sa so: Mɩ yɩrɛ tɩbɩla, sɩ mɩ yɩ wɛr dɩ wɩ ho thɩra dɩ wa-n ɩɩr.
25 Sɩ Jeju bir thaaraa yinəna wo, dɩ dabɔɔkɛ yaarʋ kponɩ yinə, dɩɩ do a khɛrrɛ da-n yɩ thɩ̃ɛ fɛʋ wawawal.
26 Sɩ Jeju sʋʋraa: Kɔna, fa-n kɛr bir lõ dɩɩra sa kɔ̃a'.
27 Agɩpɩ Jeju na ɔɔ kpãkpãadara gba jal Sejare Filipi dɩ khʋra; dɩ le a bule ɔɔ kpãkpãadara hʋɛra: Amɛ tɩbɩla n yɩ mɩ dor?
28 Dɩ wɩ tu: Ɩkhasɔ n yɩ, Jã Batɩsɩtɩ fɩ do; wɛ n yɩ, Elɩ fɩ do; wɛ n yɩ wo, Thãgbaa bobon fɩ do.
29 Sɩ Jeju bule wi: Sɩ ner, amɛ nɩ-n yɩ mɩ dor? Dɩ Pɩɛr tu: Kirisiti fɩ do.
30 Sɩ Jeju kpãkpãa warɛ, wa-n so tibillə ga.
31 Agɩpɩ Jeju ma da-n dɩɩr ɔɔ kpãkpãadara, da-n sona war ayɩ: Dɔ mɛrkɛ dʋɔnnɩ tibili Bikuun n gaar bʋɔ jɔɔ; dɩ kɔ̃tɩna, na bonɩ jidaar kɔ̃tɩna, na jɔfʋ dɩɩrdarasɔ na bo mer, sɩ dakha wa kʋ mɛr, sɩ a wire yẽther ka ma ɩɩrɛ khirera.
32 Casɩ a-n mɩɩ wɩ gele. Sɩ Pɩɛr kpaa kana pa kpɩɩ da-n phaan.
33 Sɩ Jeju kɛr, da-n hɩɩn ɔɔ kpãkpãadara, sa phã Pɩɛr dɩɩ khɩɩr ka ayɩ: Hala mɩ ƴɔɔ Satã, gɩdonɩ fa-n kpɩɛr Thãgbaa kha ga, sɩ tibil khaa fɩ-n kpɩɛr.
34 Agɩpɩ Jeju we tibil jɔ na ɔɔ kpãkpãadara dɩ wɩ pʋɔraa dɩ so war: A ntɛ pɛr haar ɩna-n kpa mar, dɔ a faa dɩbara yɩrnanɛ, sɩ a gba ɔɔ kʋkʋ thɩr a na-n kpana mar.
35 Gɩdonɩ tibilikɛ n tɛbanɩ ɔɔ yi, ga ka na buurəəre; sɩ ʋrɛɛkɛ yi na bonɩ mɛrɛra, na Thãgbaa tutugo bʋɔɔ thɩmɩɩra, ɔr na lɛ waa gel.
36 Anyee bɔ ga taa tibil, ado a 'lɛ thɩ̃ɛ fɛʋ thɩɩraakɛ sɩɩ do ɔɔ yi buurəəre.
37 Anye haankɛ dɩ tibil na gba na debina ɔɔ yi?
38 A yicuru fʋ tibil mɛrɛra na ɩ̃ thɩmɩɩra nĩdaraakɛ thɩ̃thɩɩn, kɛ na telenenɩ Thãgbara ga, sɩ dɩ wa-n cʋʋ puure, yicuru na fʋrɛ mɛr tibili Bikuun dakha ntɛra, ɔbɔɔkɛ ma ɩnɩ na ɩ̃ Thɩɩ i dʋbɩ nakha thɔ̃thɔ̃daar thu phuusɔ.