27
1 A dɩɩ wɩl duuro phiphi, bonɩ jidaar kɔ̃tɩnasɔ fɛʋ na tɩbɩlaa kɔ̃tɩ̃sɔ kpar kha a gʋʋr sɩ wɩ kʋ Jeju.
2 Ɔbɔɔkɛ wɩ liini pɩ, wɩ kpaarɛ jalna a ha Pɩlatɩɩkɛ dɔnɩ gobanɛr.
3 Ɔbɔɔkɛ Judasɩɩkɛ lirenaanɩ yɩnɩ mɔ̃ wɩ pɩɛraanɩ so kʋnanɛ, ɔɔ ha fɛʋ kʋɛrɛ, dɩ gba wire kpelẽ yʋɔr thɔ̃ lɩmɩnɛɛ warɩle, a jalna bonɩ jidaar kɔ̃tɩnaa pa na tɩbɩlaa kɔ̃tɩ̃sɔɔ pa a so ayɩ:
4 Sopugo mɩ cʋʋ, mɔ̃ mɩ liirnanɩ tibilikɛra na hananɩ dɩ paara' a pɛ khirrə. Dɩ wɩ sʋʋraa: Ga ba sa', fɛr gɩ ba.
5 Dɩ Judasɩ gba warɩle a jalna dʋna Thãgba fʋɔr cɔ kɔ̃tɩɩna, sa gba jal a ju pɔ̃ɔ.
6 Dɩ bonɩ jidaar kɔ̃tɩna gbaar warɩle sa so: Ga tee kha dɩ sa gba warɩkɛra na pɛ Thãgba mũsumona ga, gɩdonɩ tibil tɔmɩ̃ the nʋɔ gɩ;
7 ɔbɔɔkɛ wɩ gʋʋrnɩ khasɔ pɩ, wɩ gbaar warra a thena bʋla mɩdaarra lɩɛ gɩ do kpakpal khi dʋ paar.
8 Gɛr dɔ nɔɔ dɩ wa-n we lɩɛɛle tɔmɩ̃ lɩɛ a dana nĩkɛ.
9 Le gɩrɛɛkɛ Thãgbaa bobon Jeremɩ kɔɔ sonɩ dã ayɩ: «Wɩ gbaar wire kpelẽ yʋɔr thɔ̃ lɩmɩnɛɛ war, kɛ dɔnɩ lɩmɩ nʋɔɔkɛ ɩjɩrayɛl bɩsana gʋʋrnɩ kha dɩ wa thenaa;
10 Wɩ kɔɔ gba gɛr a thena bʋla mɩdaarra lɩɛ, mɔ̃kɛra Kɔ̃tɩn kɔɔ so marnɩ.»
11 Dɩ Jeju jɩɩlɛ gobanɛrɩ ƴɛra, dɩ gobanɛr bulee thakɛ ayɩwɔɔ: Fɛr dʋɔn Juifi fãgadaarɩ? Dɩ Jeju birsee: Gɛrra ha gele fɩ sonɩ.
12 Sɩ bonɩ jidaar kɔ̃tɩnasɔ na kɔ̃tɩnasɔɔ sookɛ wɩ-n pɩɛraanɩ, aa dee war nʋɔa'.
13 Dɩ Pɩlatɩ sʋʋraa: Fa nɩɛ sɔsɔɔkɛra fɛʋ wɩ-n pɛ farnaa?
14 Sɩ Jeju na deeraarakɛ nʋɔ thɩ̃ bɩɛlla ga, dɩ gɩ kɔɔ kpaarɛ gobanɛr nʋɔ ka.
15 Sɩ fɛtɩra fɛʋ gobanɛr mɩlna gɛr dɩ faa khaɩdaar dɔɔkɛ tibil jɔ n ƴaalnɩ.
16 Sɩ kũu ca ʋkha gɩ a kɔɔ hale khaɩra, kɛ wɩ-n wenɩ Barabasɩ.
17 Mɔ̃ tibil jɔ kpanɩ kha a jɛ, Pɩlatɩ bule wer ayɩ: Ʋmɔ̃ nɩ-n ƴaal gɩrɛra ɩ̃ faa, Barabasɩ gɩ yaa, Jejuukɛ wɩ-n wenɩ Kirisiti gɩ?
18 Gɩdonɩ a jɩrɛ dɩ gbugi dɔ kɩrʋ dɩ wɩ fʋ Jeju a haa.
19 Dɩ ɔbɔɔkɛ a toonɩ ɔɔ kɩɩl too pa, ɔɔ khɛr thʋɔn sʋʋraa: Fa-n lõ tɩɩ sarʋʋlee sora ga, gɩdonɩ ɔɔda dor nɔɔ nĩkɛ dɩ ɩ̃ yɩ gaarɛ dəəlela ka.
20 Dɩ bonɩ jidaar kɔ̃tɩna na kɔ̃tɩnasɔ n yɩrnanɛ tibil jɔɔle wɩ bɩɛlnɛɛ a faa Barabasɩ sa kɔ Jeju.
21 Dɩ gobanɛr bire ɩɩrna gɩ wo a bule wi: Wɛr yenyɔraakɛ, ʋmɔ̃ nɩ-n ƴaal ɩ̃ faa ha nɩ? Dɩ wɩ birsee, Barabasɩ ɩnɩ-n ƴaal.
22 Dɩ Pɩlatɩ bir bule wi: Sɩ anye ma cʋʋna Jejuukɛ wɩ-n wenɩ Kirisiti? Dɩ wɛr fɛʋ so ayɩ: Gbanɛɛ kpa kʋkʋ thɩrʋra.
23 Dɩ gobanɛr bir bule wi: Anyee puu ca a cʋʋ? Dɩ wɩ bir jɩɩ hulẽ wo dɩɩ khɩɩr ka a jɔ mɛ̃ ayɩ: Gbanɛɛ kpa kʋkʋ thɩrʋra.
24 Mɔ̃ Pɩlatɩ yɩɛnɩ dɩɩ do aa-n ma gara' sɩ dɩ khʋ̃ɛ bo dɩ ga-n jɔr ka, a gbaar nyʋɔn a hul nyɛ̃ɛ tibil jɔɔlee ƴɛra fɛʋ, sa so ayɩ: Aɩ, tɩɩ sarʋʋ tɔmɩ̃ɩkɛ na-n ma maa koe, nɛr gɩ ba.
25 Dɩ tɩbɩlaale fɛʋ so: Ɔɔ, ɔɔ khi thɩmɩɩra n 'le sɩ le na asɩ bɩsãsɔ.
26 Le Pɩlatɩ faa Barabasɩ a ha wɩ, sɩ ɔbɔɔkɛ a ciilni Jeju na khasa pɩ, a fagʋʋrɛ wɩ gbaanɛɛ a kpa kʋkʋ thɩrʋra.
27 Dɩ gobanɛr sɔrasɩsɔ kpar Jeju a lona gobanɛrɩ cɔ, dɩ sɔrasɛsɔ fɛʋ jɛ a kpalalaa.
28 Dɩ wɩ thʋbʋʋrɛ ɔɔ kẽkẽsɔ sa gba darã sɩɛ kpɩ̃kpɩ̃kpɩ̃ a tʋʋ,
29 sa gba uu a kɛr dɩɩ ho fãgadaar kpɩɛr dɩ wɩ subuu yʋɔ, sa gba ɓalʋʋ a haa dɩ fʋrɔ na nyɔ̃bɔɔ. Sɩ agɩpɩ dɩ wɩ gulẽga ɔɔ ƴɛ thɩ̃thɩɩn sɩ wa-n maanʋʋ ayɩ: Gba fʋɔrɛ Juifi fãgadaar.
30 Sɩ dɩ wɩ cɩɩrna nyɔ̃thɩ̃ɩ a na pɩɛraa sa tee ɓalʋʋlera dɩ wa-n bɩɩrnaa yʋʋ.
31 Ɔbɔɔkɛ wɩ maanʋʋnɩ pɩ, wɩ thʋbʋʋrɛ daraana, sa bir gba ɔɔ kẽkẽsɔ a tʋʋ, sa kpaa dɩphã wa-n jalna wɩ kpa kʋkʋ thɩrʋra.
32 Mɔ̃ wɩ-n thenɩ, wɩ caananɛ kũu bɩɛlɩkɛ thɛnɩ Sɩrɛn, ɔɔ i n dʋɔn Sɩmɔ̃. Dɩ wɩ cʋgʋʋrɛ na fãga dɩ gba Jejuu kʋkʋ thɩr a heen.
33 Dɩ mɔ̃ wɩ danɩ paarɩkɛ wɩ-n wenɩ Gɔlgɔta, kɩrʋ dʋɔn Yʋ khubu,
34 wɩ gbaar dɩvɛ̃ a nyanyaana tomɩ dibi thɩɩ a haa a yɔ. Sɩ ɔbɔɔkɛ a 'lɛnɩ hɩɩn, a bor yʋɔr.
35 Dɩ ɔbɔɔkɛ wɩ gbaanɩ a kpa kʋkʋ thɩrʋra pɩ, wɩ gbaar ɔɔ kẽkẽsɔ a tɩnɛ na lɩ lɩr.
36 Agɩpɩ wɩ toore le dɩ wa-n bɛrʋʋ.
37 Sɩ wɩ kɔɔ kherere sɛbɛ a ɓã le kʋkʋ thɩrʋra ƴũ ɔɔ yʋɔ, gɩ nɩna ɔɔ so heen kɩr, gɩ sor aa: Ʋrɛɛkɛra dʋɔn Juifi fãgadaar.
38 Yu hɔ̃hɔla yenyɔ kɔɔ hale dɩ wɩ kpa kʋkʋ thɩrʋra nakha Jejura, bɩɛl ɔɔ nyɔ̃bɔra, bɩɛl ɔɔ nyɔ̃bɩlana.
39 Wɩrɛ n thɛnɩ le sɩ dɩ wa-n ka, wɩ-n nɩɩrʋʋrɛ, dɩ wa-n didiəna yʋʋ, sɩ dɩ wa-n so aa:
40 Fɛrkɛra kɔɔ yɛnɩ, fa wɩɛrɛ Thãgba fʋɔr cɔ kɔ̃tɩ̃ɩ sɩ fɩ bir fɩ mɩ wire balãther, taa afɩbara bɛɛ. Ado Thãgbaa Bikuun fɩ do, gbuno kʋkʋ thɩrʋrara.
41 Mɛ̃ dakha bonɩ jidaar kɔ̃tɩna na jɔfʋ dɩɩrdarasɔ n ɓoɓororaa, dɩ wa-n sona ayɩ:
42 A kɔɔ taarɛ wɩ̃ tibilsɔ, sɩ aa puno na taa dɩbara ga. Dɔ ɔrkɛ dɔnɩ Ɩjɩrayɛldaraa fãgadaar n gbũ nɛnɛ̃ kʋkʋ thɩrʋra sɩ pɩɛ haar.
43 Mee Thãgba ayɩ, ɩnɩ faarɔrɛ ɩnɩbara, dɩ Thãgbara ado a naarɛ a tagaa nɛnɛ̃ bɛɛ. Gɩdonɩ a-n sor dɩ yɩ: Ɩnɛr dʋɔn Thãgbaa Bikuun.
44 Dɩ yu hɔ̃hɔlaakɛ wɩ kpanaanɩ kha n nɩɩrʋʋrɛ dakha wer.
45 A fʋna ʋlkhɔɔ a dana dʋɔrɔ, dɩɩ koo kɔɔ birəre tĩtĩtĩ.
46 Dɩ dʋɔr khʋra Jeju hulene nʋɔ dɩɩ khɩɩr ka ayɩ: Elɩ, Elɩ lama sabakɩtanɩ, kɩrʋ dʋɔn: Ɩ̃ Thãgba, ɩ̃ Thãgba, mɔ̃gɩdo dɩ fɩ bo mɩ faa?
47 Dɩ ɩkhasɔɔkɛ kɔɔ hanɩle a nɩɛ, wɩ sor aa: Elɩ a-n we.
48 Dɩ dapaara tibil bɩɛl wɛrra ca, a gba thɩ̃ɛɛkɛ hɔnɩ tabɩhʋɛ, a mʋʋ ta ƴʋɔna, a gar ɓalʋʋ a 'laaraa a yɔ.
49 Sɩ ɩkhasɔ so ayɩ: Nɩ dɔ sɩ hɩɩn, ado Elɩra na ɩnɛ na tagʋʋ.
50 Sɩ Jeju bire hulẽ wo dɩɩ khɩɩr ka, sa gba ɔɔ thu a ha Thãgba.
51 Dɩ hɩnɛ, kẽkẽ nɩɩkɛ varanɩ le Thãgba fʋɔr cɔ kɔ̃tɩɩna ɓəəre a tɩnɛ yenyɔ a fʋ ƴũ a ba dana thɩɩ; dɩ dakha thɩɩ jɩɩn kɔɔ hale, dɩ boka kɔ̃tɩnasɔ lɩɛr;
52 dɩ kaasɔ dakha khɛr, dɩ tɩɩ phuusɔ jɔɔkɛ kɔɔ khireni ɩɩr a thɩɩr khirera.
53 Dɩ ɔbɔɔkɛ Jeju kɔɔ ɩɩrnɩ a the khirera pɩ, wɩ thɩɩrɛ kaʋ, a lõ dɩ phuurə a nɩna awɩbara tibil jɔjʋɔ.
54 Dɩ sɔrasɛ tamaa kɔ̃tɩ̃ na wɩrɛ kɔɔ hanaanɩ kha, kɛ jɩlɛnɩ le dɩ wa-n bɛr Jejura, mɔ̃ wɩ yɩnɩ mɔ̃ thɩɩ jenɩ na gɩrɛ dananɩ, maar fʋlɛ wɛr ka dɩ wɩ so: Sobɔr gɩ, kuunikɛra Thãgbaa Bikuun a do ger.
55 Dɩ khɛra jɔɔ kɔɔ hale dakha a jɩɩl ƴɔɔ dɩ wa-n hɩɩn. Wɛr dɔ khɛraakɛ n kɔɔ kpaannɩ Jejura dɩ wa-n buluu, a fʋna Galile.
56 Khɛrasɔraale, Magɩdala Marɩ kɔɔ hale na Marɩ ʋrɛ dɔnɩ Jakɩ na Jojɛfɩɩ nɩ, na Jebedee bikuunsɔɔ nɩ.
57 A dɩɩ dʋɔr lẽle kũu bɩɛlɩkɛ wɩ-n wenɩ Jojɛfɩ, kɛ thɛnɩ Arɩmate pɔr. Jejuu kpãkpãadaar a do dakha.
58 Dɩ a kɔɔ jaal Pɩlatɩɩ pa a bɩɛlaa Jejuu for, dɩ Pɩlatɩ 'laa hʋɛ wɩ hanaa.
59 Dɩ Jojɛfɩ gbaar Jejuu for a parna kẽkẽ ɓɔ̃ bulo phaa,
60 a jalna dʋ ɔɔ thɛthɛɛ ka phaaraakɛ wɩ kɔɔ thelnɩ gɔ̃gʋɔna. Agɩpɩ dɩ kpuro boka kɔ̃tɩ̃ɩ tə̃ə a khaanna ka nʋɔ sa jal kɔ̃.
61 Marɩɩkɛ thɛnɩ Magɩdala, na Marɩ kpɩɩ hale a too ka nʋɔra.
62 A dɩɩ wɩl a thɩɛna gaa gbɛbɩ cɔ wire, bonɩ jidaar kɔ̃tɩnasɔ na jɔfʋ bʋ dʋdarasɔ kpar kha a jɛ Pɩlatɩɩ pa,
63 a sʋʋraa ayɩ: Kɔ̃tɩn, sɩ jɩnanɛ fɩfɩɩldaarɩkɛra mɔ̃ a kɔɔ sonɩ, ɔbɔɔkɛ a kɔɔ hananɩ yire ayɩ, a wire yẽther ka, ɩna ɩɩrɛ na the khirera.
64 Gɛr gɩ, sɔ wa-n bɛr kaa gɩ dana wire yẽther wireelera, a mɛ̃ gaa ɔɔ kpãkpãadara na jaal na yu Jejuu forra na ti, sɩ na so tɩbɩlala nayɩ: A ɩɩrɛ a the khirera. Dɩ pɩpɩɩ fɩɩlɛɛkɛ na puurore na jɔ cacadaa.
65 Dɩ Pɩlatɩ so war: Mee mɩ ha nɛr bɛbɛra, nɩ jala na bɛra mɔna nɩ yɩɛnɩ dɩɩ ha.
66 Dɩ mɛ̃ wɩ jal a pɛr dɩ wa-n bɛr kaa, sɩ jɩɩn wɩ pɛr ka nʋɔra, sɩ dɩ bɛbɛra jɩɩl dɩ wa-n bɛr.