Hi Peturuꞌ mampopangkolowoiki
3
1 Halalingku to kupokarima! Hieꞌemo suraꞌka to korompihana pe ingkei. I lali suraꞌku to uluꞌ-uluꞌna hante to korompihana hieꞌe, kuluke lalimi hei kupopangkolowoikei hingkeꞌna ikolowoikei huliꞌ poturuꞌ to tuꞌu, hingkeꞌna mononto pekirimi. 2 Tungkaihangku hingkeꞌna ikolowoikei hapo to ropowute nabi-nabi to norumbaꞌ Pueꞌ Ala hampiha, hei hingkeꞌna ikolowoikei woꞌo hawaꞌne Pueꞌta Pueꞌ Yesu to mamposalamaꞌki. HawaꞌNa tiꞌo ihorimokei ka suroNahi.3 Uwaꞌ to hangangaa ikolowoikei mpololeke: i ando-ando to kotutuana hieꞌe, hingkiꞌ uwaꞌhi toaꞌ to nokuasaꞌi peleihana lalira to kodake. Toaꞌ tiꞌohi hingkiꞌ mampononaꞌakei, 4 hingkiꞌ rotiꞌi, “Hi Yesu modandi hingkiꞌ hupaꞌ huliꞌ, angkana imbomoꞌi hinewowoꞌena? Hawaꞌi kipoꞌohi, alaꞌ tododulunta hampiha mahimohi, hei mepongka ka Pewaliana duniaꞌ wute hinewowoꞌena, hawaꞌi uwaꞌ kotewolihiane.” 5 Toaꞌ to mololita hatoꞌo, salaꞌhi mpololeke alaꞌ rotungkai mohobiꞌi pekirira. Hawaꞌi rolei mampekiri Pueꞌ Ala to mowali laniꞌ hante woiꞌ hei lekiꞌ-lekiꞌna ohina moliu booNa hampiha. Duniaꞌ hieꞌe Nopohohida ka uwai, hei lorina mehupaꞌ ka uwai, 6 hei uwai woꞌo to nopakeꞌ Pueꞌ Ala molobuꞌi duniaꞌ hampiha. 7 Laniꞌ hante woiꞌ uwaꞌ wute hinewowoꞌena, alaꞌ nopoꞌodaꞌ nturusi Pueꞌ Ala moliu booNa wute tempona ando pobutusi. I tempo tiꞌo, laniꞌ hante woiꞌ hieꞌe bateꞌna hingkiꞌ nokero Pueꞌ Ala hante api, hei lekiꞌ-lekiꞌna toaꞌ to hawaꞌi mengkoruꞌ pe Io hingkiꞌ Nohuku.
8-9 Uwaꞌhi toaꞌ to mantiꞌi, “Morue rahi kopehupaꞌane huliꞌ Pueꞌ Yesu.” Angkana ingkei halalingku to kupokarima, halangkaꞌlu, inioꞌ mpuꞌu nikolembulihaki, iomo, i lali peꞌelena Pueꞌ, hasabu ntoꞌa hibalilu hante haꞌando, hei haꞌando hibalilu hante hasabu ntoꞌa.a Kotuꞌuana, handoꞌio komaꞌeleꞌna Pueꞌ mobuhoꞌi dandiNa hibali to nopekiri toaꞌ. Angkana Io sabaraꞌ tene i ingkei alaꞌ hawaꞌi nolei Pueꞌ ane uwaꞌi tene haduo toaꞌ to pahua pehuku nokomi dosana. PeleihaNa hingkeꞌna lekiꞌ-lekiꞌna toaꞌ nohohoꞌ ka dosara. 10 Angkana bateꞌna hingkiꞌ hupaꞌ mpuꞌu Pueꞌ, hei pehupaꞌNa tiꞌo hingkiꞌ hibali pehupaꞌna topanako. I ando tiꞌo hingkiꞌ rohori boburuꞌ to mekororokaꞌi, laniꞌ hingkiꞌ moholi, hei lekiꞌ-lekiꞌna to uwaꞌ hingkiꞌ noꞌoka api. Duniaꞌ hieꞌe moꞌawa hante ohina hingkiꞌ tituꞌ.
11 Mewaliꞌ, halali-halali, ane hatoꞌo kohingkiꞌ ropuꞌne lekiꞌ-lekiꞌna to uwaꞌ, hohumbomo lala kotuwuꞌmi hinewowoꞌena? Hangangaa ipomangkolehikei waliami hei mengkoruꞌkei pe Pueꞌ Ala, 12 alaꞌ ingkiꞌ hieꞌe mampekauki ando pehupaꞌana huliꞌ Pueꞌ. Aginamo topokaroho petuntute i Pueꞌ Ala hingkeꞌna nipohohiꞌ ando pehupaꞌaNe tiꞌo. I ando tiꞌo, laniꞌ hingkiꞌ noꞌoka api, hei lekiꞌ-lekiꞌna to uwaꞌ i laniꞌ hingkiꞌ moꞌeneꞌ. 13 Angkana ingkiꞌ mepohinaruki i hapo to nodandikiki Pueꞌ Ala, iomo laniꞌ hante duniaꞌ to wolaꞌ to hingkiꞌ ropeꞌohaꞌi toaꞌ to motuntuniluhi peleihana Pueꞌ Ala.
Koꞌukoana lolita
14 Mewaliꞌ, halali-halali to kupokarima, kolentuꞌami mampekau ando tiꞌo, ipokarohokei mpololeke petuntumi i Pueꞌ, hingkeꞌna moromiꞌ pohintuwuꞌmi hante Io, hei hawaꞌi uwaꞌ komasalaꞌmi ba komakuraꞌmi ane metotiꞌikei i hinarona Pueꞌ Ala. 15 Hangangaa toponindi hapo tungkaihane kosabaraꞌna Pueꞌ. Lekiꞌ-lekiꞌna toaꞌ nopaꞌanihi Pueꞌ Ala tempo mengkatobaꞌ ka waliara, hingkeꞌna niposalamaꞌhi ka pehuku dosara. Poturuꞌ hieꞌe noꞌukiꞌkikei woꞌo hi Paulu, iomo haduo halalinta to topokarima. Hei hapo to noꞌukiꞌ hi Paulu i lali suraꞌna noꞌukiꞌ motuntuni kononto lali to ka Pueꞌ. 16 I lali lekiꞌ-lekiꞌna suraꞌna, noꞌukiꞌ woꞌo noniuꞌ i pehupaꞌana huliꞌ Pueꞌ Yesu, hibali hante hapo to kupowutemokikei, angkana uwaꞌ woꞌo poturuꞌne hi Paulu to masusa palaihane. Hei poturuꞌ tiꞌo rowolihi toaꞌ to hawaꞌi mononto pekirira hei to hawaꞌi maroho pepoꞌohira. Hatoꞌo woꞌo, poturuꞌ ntaniꞌna ka Suraꞌ Mangkolehi rowolihi woꞌo toaꞌ. Mewaliꞌ ka waliara tiꞌo, hingkiꞌ nohukuhi Pueꞌ Ala.
17 Angkana ingkei halalingku to kupokarima, ibahaꞌmokei lekiꞌ-lekiꞌna tiꞌo. Iomo horiana hangangaa majaga-jagakei i toaꞌ to mepokonawuꞌ hingkeꞌna hawaꞌkei motuntuni poturuꞌra hante waliara to salaꞌ, horiana maꞌoruꞌkei ka pepoꞌohimi. 18 Kuperapiꞌ hingkeꞌna pedeꞌ ipokarohokei petuntumi pe Pueꞌta Yesu Kerisitu hingkeꞌna ihorikikei mpololeke kokodeꞌne rimaNa i ingkei, hei pedeꞌ ibahaꞌmokei koꞌIonamo Tomeposalamaꞌ tiꞌo. Topokodeꞌ konaꞌNe mepongka hinewowoꞌena wute nantolou-louna. Amin.