Hangangaa majaga-jagakei i guru-guru agama to mepomonawuꞌ
2
1 Hampiha, uwaꞌhi nabi to mepomonawuꞌ i lumbura toaꞌna Pueꞌ Ala. Hatoꞌo woꞌo hinewowoꞌena, hingkiꞌ uwaꞌhi woꞌo i lumbumi guru-guru agama to mampowute poturuꞌ to salaꞌ. Toaꞌ tiꞌohi hingkiꞌ mampowute pohawaꞌna Pueꞌ, angkana rototambai woꞌo hante poturuꞌ to hawaꞌi tuꞌu. Iohi hingkiꞌ mosapuakahi Yesu iomo Pueꞌra hei to mohompoꞌmohi, hei nokomi pesapuakara tiꞌo, Pueꞌ Ala hingkiꞌ mampohohiꞌ kohurewuꞌara. 2 Angkana kehapoꞌi hatoꞌo, bateꞌna woriꞌ toaꞌ hingkiꞌ motuntuni waliara to mekokomaꞌi. Nokomi waliara to kodake tiꞌo, woriꞌ toaꞌ hingkiꞌ mosalaꞌi poturuꞌ noniuꞌ i Lala to Tuꞌu to morandaki pe Pueꞌ Ala. 3 Guru-guru to mepokonawuꞌ tiꞌo mampaliꞌluhi porasiꞌara, hei iohi hingkiꞌ mampowutekikei lolita to rowowalilu hadoduora, hingkeꞌna pahuahi rasiꞌ ka ingkei. Angkana uwaꞌ pehuku to moruemo nopatimomokihi Pueꞌ Ala, hei konihukura tiꞌo bateꞌna hingkiꞌ mewali.Pueꞌ Ala hingkiꞌ mohuku toaꞌ to kodake waliara
4 Hingkoweꞌ malaꞌeka to madosa hampiha, hawaꞌhi nopolohoꞌ Pueꞌ Ala ka konihukura. Malaꞌeka tiꞌo bateꞌra Notube i lali naraka, nirantehi i tua to mokorindi wute hupaꞌ ando pobutusi. 5 Hatoꞌo woꞌo toaꞌ to kodake waliara hampiha, hawaꞌhi nopolohoꞌ Pueꞌ Ala ka konihukura. Pueꞌ Ala molobuꞌi duniaꞌ hante uwai. Hi Nohoꞌ hampoꞌanaꞌa to noposalamaꞌ Pueꞌ Ala alaꞌ mampowuteꞌi kareba noniuꞌ i Lala to Tuꞌu to nopomotanaꞌ Pueꞌ Ala. 6 Hatoꞌo woꞌo hampiha Pueꞌ Ala mohuku toSodomo hante toGomora alaꞌ madosahi mpololeke, hei kota tiꞌo Nohunu, hingkeꞌna koNohukuna kota tiꞌo mewali pepakaꞌingaꞌi i toaꞌ to tuwuꞌ hinewowoꞌena to hawaꞌi mengkoruꞌ pe Io. 7 Angkana uwaꞌ haduo toaꞌ to nikokeneꞌi hi Lot to noposalamaꞌ Pueꞌ Ala. Hi Lot tiꞌo Noranda mesuwu ka kota Sodomo, alaꞌ iomo toaꞌ to motuntuni peleihana Pueꞌ. I tempona hi Lot meꞌohaꞌ i kota tiꞌo, maporiꞌ mpololeke nohori nokomi waliara toaꞌ to meꞌohaꞌ itoꞌo. 8 I tempo tiꞌo, nopomasusa mpololeke laline, alaꞌ io toaꞌ to mononto, alaꞌ ando-ando noꞌokiꞌ hante nohori waliare to kodake. 9 Mewaliꞌ, ka lekiꞌ-lekiꞌna pandiri' to kupowute tiꞌo, Nobahaꞌlu Pueꞌ Ala hohumbo lalana mamposalamaꞌ toaꞌ to mengkoruꞌ pe Io ka komaporiꞌ to morumpahi. Hei bateꞌna toaꞌ to hawaꞌi mengkoruꞌ pe Io hingkiꞌ nipoperima-rimahi wute ikonihukuara i ando pobutusi, 10 pelumbuꞌna tene toaꞌ to notungkai motuntuni peleihana lalira hadoduo mowali walia to mekokomaꞌi, hei to mampononaꞌahi komakuasaꞌna Pueꞌ Ala.
Guru-guru to mepomonawuꞌ tiꞌo, wuranihi hei mampokokodeꞌhi, hawaꞌhi morokaꞌ mampononaꞌa to manobaꞌhi i suruga. 11 Hingkoweꞌ malaꞌeka to meliu komakuasaꞌra ka guru-guru tiꞌo, hawaꞌhi podehoꞌ mampononaꞌa ba mosalaꞌi hapo to manobaꞌ tiꞌo i hinarona Pueꞌ Ala. 12 Angkana guru-guru to mepomonawuꞌ tiꞌo, hawaꞌi mononto pekirire. Mampononaꞌahi hapo to hawaꞌi robahaꞌ. Pekirira toaꞌ tiꞌohi hibali pekirina pinatuwuꞌ to moꞌilo. Hingkiꞌ nipangkuhi hei nirokoꞌ. Nokomi waliara to kodake, koꞌukoana hingkiꞌ nohukuhi Pueꞌ Ala. 13 Hingkiꞌ pahuahi pehuku to hintotoꞌ hante waliara.
Waliara toaꞌ tiꞌo mepokohili mpololeke. Hingkoweꞌ pohoꞌando, mowalihi walia to kodake hei maꞌinu-inuhi wute malanu. Ane mangkahi moꞌawa hante ingkei i posusaꞌami, mepokohilihi alaꞌ motuntuniluhi peleihana lalira to kodake. 14 Ane pangkiꞌhi towoweꞌe, dokoꞌlumohi mowali walia to mekokomaꞌi. Hawaꞌi nohehaꞌ mowali dosa. Ane uwaꞌ toaꞌ to moledeꞌ pepoꞌohire, roruiꞌ mpololeke lalire hingkeꞌna metuntuhi pe iohi. Mangkohokahi nturusi luma toaꞌ ntaniꞌna, alaꞌ ropobiasamo mowali to kodake. Buntoꞌmohi! 15 Maweomohi ka lala to tuꞌu, iomo horiana kodake waliare. Motuntunihi lala to nopolala hi Bilea anaꞌna hi Beoꞌ hampiha. Hi Bilea dokoꞌlu pahua doiꞌ ka waliana to kodake. 16 Pueꞌ Ala mampaꞌani kuasaꞌ i kalidena mololita hibali toaꞌ, hingkeꞌna mokamoroki hi Bilea, horiana tungkaihana to kodake hawaꞌi mewali.
17 Ane guru-guru to mepomonawuꞌ tiꞌo, nopatimomokimohi Pueꞌ Ala peꞌohaꞌa to makaja komokorindine, alaꞌ Iohi hibali bubu to ohi, hei kini to noparowohi makaja, angkana hawaꞌi mampoꞌuwaꞌ ura. 18 Pololitara langkoꞌ, hei hawaꞌi modumbuꞌ. Moruiꞌhi lalira toaꞌ moliu peleihana lalira to mekokomaꞌi, horiana toaꞌ tiꞌo nipokonawuꞌ, hantaro toaꞌ to nipokonawuꞌ tiꞌo handoaꞌi tene morue mampohinte waliara to kodake tiꞌo. 19 Rotiꞌi guru-guru tiꞌo, “Ane ipetuntuikei poturuꞌki, hingkiꞌ himpolohoꞌkei ka atura-atura, hei wadi mpololekekei mowali hapolu motuntuni peleihami.” Hantarowae, tuwuꞌra hibali hawiꞌ, alaꞌ nokuasaꞌihi peleihana lalira to kodake, hei himo to nokuasaꞌi peleihana lalina to kodake, palaihana, io nopohawiꞌ peleihana lalina tiꞌo. 20 Pobahaꞌmohi Pueꞌta Yesu Kerisitu Tomamposalamaꞌ, wute tepohentehi ka walia to kodake i duniaꞌ hieꞌe, angkana uko tiꞌo mahuliꞌhi huliꞌ pe waliara to kodake. Koꞌukoana makaja komarugiꞌre ka uluꞌ-uluꞌna i tempora handoaꞌi tene mepoꞌohi. 21 Aginamo handoaꞌhi kahampiha pobahaꞌ Lala to Tuꞌu, hintina pobahaꞌhi Lala to Tuꞌu angkana hawaꞌhi motuntuni hawaꞌna Pueꞌ Ala to mangkolehi to nipowutekimohi. 22 Noniuꞌ i toaꞌ tiꞌohi, uwaꞌ pandiri' to mantiꞌi waheꞌe: “Ahu mangka huliꞌ luaꞌna, hei boeꞌ to nindiumo ako metumba huliꞌ i laneꞌ.”