4
1 Dandina Pueꞌ Ala pe ingkiꞌ uwaꞌ tene hingkeꞌna wadiki pahua peꞌohaꞌa moꞌawa hante Io. Iomo horiana hangangaa majaga-jagaki mpololeke, hingkeꞌna hawaꞌi uwaꞌ haduo ka lumbunta to hawaꞌi pahua hapo to Nodandimo tiꞌo. 2 Alaꞌ ingkiꞌ hieꞌe, nipowutemokiki woꞌo Kareba Moromiꞌ, hibali toSaraeli hampiha. Angkana pohawaꞌna Pueꞌ Ala to rohori tiꞌo hawaꞌi mangkomi pebarakati pe iohi, hei hawaꞌi modumbuꞌ, alaꞌ hawaꞌhi mepoꞌohi. 3 Bateꞌnalu ingkiꞌ to mepoꞌohi to pahua peꞌohaꞌa moꞌawa hante Pueꞌ Ala. Ane toaꞌ to hawaꞌi mepoꞌohi, hawaꞌhi pahua peꞌohaꞌa tiꞌo. Tiꞌo tobahaꞌ ka Pohawaꞌna Pueꞌ Ala to mantiꞌi waheꞌe:“Nokomi kobukotangKu horiana Kudandi waheꞌe:
Hawaꞌhi mpuꞌu hingkiꞌ mekahi pe peꞌohaꞌangKu meꞌohaꞌ moꞌawa hante Aku.” \rq (Mas. 95:11)
Kehapoꞌi uwaꞌmo peꞌohaꞌa to nopatimomo Pueꞌ Ala ka Pewaliana duniaꞌ, alaꞌ ukomo jamaNe tiꞌo. 4 Uwaꞌ teꞌukiꞌ i lali Suraꞌ Mangkolehi noniuꞌ ando kapitu waheꞌe:
“I ando kapitu, Pueꞌ Ala meꞌohaꞌ ka lekiꞌ-lekiꞌna jamaNa.” \rq (Pwl. 2:2)
5 Hei uwaꞌ woꞌo teꞌukiꞌ i Pohawaꞌna Pueꞌ Ala to mantiꞌi waheꞌe:
“Hawaꞌhi mpuꞌu hingkiꞌ mekahi i peꞌohaꞌangKu hei meꞌohaꞌ moꞌawa hante Aku.” \rq (Mas. 95:11)
6 Mewaliꞌ iohi to uluꞌ-uluꞌna pahori Kareba Moromiꞌ, hawaꞌhi pahua peꞌohaꞌa moꞌawa hante Pueꞌ Ala, alaꞌ hawaꞌhi motuntuni hawaꞌNa. Ane hatoꞌoꞌi toaꞌ ntaniꞌna to pahua peꞌohaꞌa tiꞌo. 7 Iomo horiana Pueꞌ Ala mampokononto ando ntaniꞌ hingkeꞌna toaꞌ wadi pahua peꞌohaꞌa moꞌawa hante Io. Ando to Nopokononto iomo “Ando hieꞌe”. Haꞌumbora natu ntoꞌa mepongka toSaraeli uwaꞌ i popada lori, datu Daudi moꞌukiꞌ Pohawaꞌna Pueꞌ Ala to mantiꞌi waheꞌe:
“Ando hieꞌe, ane pahorikei loaꞌna Pueꞌ Ala,
inioꞌ ipomorintodikei lalimi.” \rq (Mas. 95:7-8)
8 Ane rapaꞌna hi Yosua mangkomimo toYahudi pe peꞌohaꞌa to nodandi Pueꞌ Ala, bateꞌna Pueꞌ Ala hamboaꞌmo mololita ando ntaniꞌ. 9 Mewaliꞌ, uwaꞌ tene koholangkoa i toaꞌna Pueꞌ Ala hingkeꞌna pahuahi peꞌohaꞌa moꞌawa hante Io. Peꞌohaꞌa tiꞌo, hibali hante Pueꞌ Ala meꞌohaꞌ i ando kapitu, 10 alaꞌ ane meꞌohaꞌki moꞌawa hante Pueꞌ Ala, palaihana, meꞌohaꞌki woꞌo ka jamanta hibali Pueꞌ Ala meꞌohaꞌ ka jamaNa i ando kapitu.
11 Mewaliꞌ halali-halali, hangangaa magegaki hingkeꞌna pahuaki peꞌohaꞌa moꞌawa hante Pueꞌ Ala, hante inioꞌki maꞌoruꞌ ka pepoꞌohinta, hibali toSaraeli hampiha to hawaꞌi mampetuntui hawaꞌNa.
12 Alaꞌ Pohawaꞌna Pueꞌ Ala iomo lolita to tuwuꞌ hante makuasaꞌ. Meliu komotarine ka piho to kemata mpotimali. Piho tiꞌo wadi metotohu wute i kololengkeꞌa wuku hante itiꞌ wuku. Angkana Pohawaꞌna Pueꞌ Ala metotohu wute pe lalinta. Hei PohawaꞌNa tiꞌo nopakeꞌ Pueꞌ Ala moparesaꞌ pekirinta hante tungkaihana lalinta. 13 Hawaꞌi uwaꞌ halangkaꞌ to tuwuꞌ to tewowuni i pampeꞌeleNa. Lekiꞌ-lekiꞌna to uwaꞌ mombaha hante mobaro i Io. Hei hangangaa topangakuꞌ i hinaroNa lekiꞌ-lekiꞌna walianta.
Hi Yesu iomo Tadulako Mpenomba Ngkodeꞌ
14 Uwaꞌmo haduo Tadulako Mpenomba Ngkode to mewali Tadulako Mpenomba Ngkodeꞌte: Iomo hi Yesu AnaꞌNa Pueꞌ Ala. Io mengkaꞌoreꞌmo mekahi pe lali suruga hante nolou pe hinarona Pueꞌ Ala. Iomo horiana hangangaa topoꞌohi hei topangakuꞌ nturusi kohiYesuna Pueꞌte. 15 Iomo Tadulako Mpenomba Ngkodeꞌte to pobahaꞌ hei mampolala komoledeꞌta. Nobahaꞌ mpololeke, alaꞌ Io nihohongkeꞌimo woꞌo i langkaꞌ-langkaꞌna hibali hante ingkiꞌ, angkana Io hawaꞌi madosa. 16 Iomo horiana, hawaꞌki paralu morokaꞌ mangkododungkui Pueꞌ Ala to meparenta hante kokodeꞌna rimaNa, hingkeꞌna tobahaꞌ mpololeke komarimaNa i ingkiꞌ, hante i tempo to toparalu, hingkiꞌ Nosulungiki ka kopopuhiꞌna laliNa.