4
1 Ingkei to ropotua, hawiꞌmi ipaꞌanikei hapo to moromiꞌ hei to masipatoꞌ, alaꞌ ibahaꞌkei uwaꞌ woꞌo Tuami to i suruga.Poturuꞌ noniuꞌ pekokae hei walianta
2 Mekokaekei nturusi, hei i lali pekokaemi hangangaa majaga-jagakei hei itiꞌikei woriꞌ komoromiꞌ i Pueꞌ Ala. 3 Hei ipekokaekika woꞌo, hingkeꞌna Pueꞌ Ala mampaꞌanika lala mampowute kareba to mampololita tungkaihaNa to nobuhoꞌi Kerisitu. Hampiha tungkaihaNa tiꞌo tewuni tene, angkana hinewowoꞌena kipowutemo kareba noniuꞌ Kerisitu. Iomo hinaꞌ nitarungkuꞌmoꞌa. 4 Hei kuperapiꞌ hingkeꞌna ipekokaekiꞌakei, hingkeꞌna kubiaꞌ mampokononto kareba noniuꞌ i Kerisitu, ala iomo to hangangaa kuwali.
5 Ane uwaꞌkei moꞌawa hante toaꞌ to handoꞌio hampepoꞌohimi, hangangaa timomo lalimi hante moromiꞌ hingkeꞌna modumbuꞌ mpololeke tempomi tiꞌo mampowutekikei lala mepoꞌohi pe Pueꞌ. 6 Ane mololitakei moꞌawa hante toaꞌ to hawaꞌi mepoꞌohi, hangangaa ipomaꞌalusuꞌkei lolitami hei ipololitakei moromiꞌ hingkeꞌna teruiꞌ lalire. Hei ipekiri moromiꞌ hapo to hingkiꞌ ipowutekikei hingkeꞌna ibahaꞌkei mohoniꞌ peꞌitanore.
Tabea koꞌukoana
7 Kurumbaꞌmo halalinta hi Tikiku nolou pe ingkei, hingkeꞌna nopowutekikei hapo to mewali i aku iseꞌe. Hi Tikiku tiꞌo iomo halalinta to topokarima hei awangku majama to nipoꞌohi mampopatengkaꞌ jamana Pueꞌ. 8 Tungkaihangku morumbaꞌ hi Tikiku nolou mololoꞌokei, hingkeꞌna ibahaꞌkei hohumbo kotuwuꞌki hei hingkeꞌna maroho lalimi. 9 Kurumbaꞌmo woꞌo hi Tikiku nolou moꞌawa hante hi Onesimua halalinta ka lumbumi. Hi Onesimu tiꞌo to topokarima hei to nipoꞌohi. Iohi hingkiꞌ mampatiꞌikikei lekiꞌ-lekiꞌna to mewali iseꞌe.
10 Hi Aritaku, to moꞌawa hante aku i lali tarungkuꞌ, mampowute tabeana pe ingkei. Hi Markus, halalina hi Baranaba, mampowute woꞌo tabeana. (Ipondindikei hapo to kuperapiꞌ hampiha hingkeꞌna ane mehupaꞌi hi Markus, itorimokei moromiꞌ!) 11 Tabea woꞌo ka hi Yesu, to nikokeneꞌi woꞌo hi Yustu. Totoluhi hieꞌe hamoloꞌ toYahudihi. Hawaꞌi uwaꞌ toYahudi ntaniꞌna to majama moꞌawa hante aku mampowute kareba noniuꞌ i poparentana Pueꞌ Ala, hei poko mampokarohohi lalingku.
12 Tabea woꞌo ka hi Epara, rumbaꞌana Yesu Kerisitu to ka lumbumi. Poko nopekokaekikei, hingkeꞌna maroho pepoꞌohimi hei hingkeꞌna ibahaꞌkei mpololeke hapo peleihana Pueꞌ Ala. 13 Kubahaꞌ mpololeke komodotone hi Epara mampekokaekikei hei mampekokaeki woꞌo halalinta to i kota Laodikia hei i kota Hierapoli. 14 Tabea woꞌo ka Sando hi Lukas to topokarima, hei ka hi Demaꞌ.
15 Ipowutekei woꞌo tabeangki pe halali hampepoꞌohinta to i kota Laodikia. Tabeangki woꞌo pe hi Nimpa hei pe toSarani to menomba i lali tambina. 16 Ane ukomoꞌi ibasakei suraꞌ hieꞌe, kuperapiꞌ hingkeꞌna nipakatukihi jumaꞌa-jumaꞌa to uwaꞌ i Laodikia hingkeꞌna robasaꞌi woꞌo i lumbura. Hei suraꞌku to kupakatukihi toLaodikia, ibasakei woꞌo i lumbumi. 17 Ipowutekei pe hi Akipu hingkeꞌna io mampotutuha jama to nopaꞌaniki Pueꞌ!
18 Tabea to kotutuana hieꞌe, kuꞌukiꞌ hante korawengku hadoduongku. Kuperapiꞌ hingkeꞌna ikolowoiꞌakei wokaia alaꞌ nitarungkuꞌa tene. Pueꞌ Ala mobarakatikei lekiꞌ-lekiꞌmi.