Hangangaa topohente walia to kodake
3
1 Ingkei toaꞌ to mantorimomo kotuwuꞌ to wolaꞌ, hibalikei nipotuwuꞌ huliꞌ moꞌawa hante Kerisitu. Iomo horiana hangangaa ikodokoꞌikei hapo to Nopatimomo Pueꞌ Ala i suruga pe ingkei, ikoꞌuwaꞌana Kerisitu mahura tinaꞌ i kuanana Pueꞌ Ala. 2 Hei hapo to i suruga tiꞌo to hangangaa ipekirikei. Inioꞌkei mampekiri hapo to i duniaꞌ hieꞌe. 3 Alaꞌ hibalikei toaꞌ to mahi moꞌawa hante Kerisitu, hei ihuamokei kotuwuꞌ to wolaꞌ to tewuni moꞌawa hante Kerisitu i lali Pueꞌ Ala i suruga. 4 Kerisitu tiꞌo pongkane kotuwuꞌmi to wolaꞌ. I tempona mehupaꞌ huliꞌ, Io hingkiꞌ nipotongawa pe duniaꞌ. Hei ingkei woꞌo hingkiꞌ nipotongawa moꞌawa hante Io i lali komanobaꞌNa.5 Iomo hinaꞌ hangangaa ipohentekei waliami hante kotuwuꞌmi to hampiha:
Inioꞌkei mohantambi ba momaꞌani deleꞌ.
Inioꞌkei mowali walia to mekokomaꞌi.
Inioꞌkei mowali walia tota masipatoꞌ.
Inioꞌkei motuntuni peleihana lalimi to kodake.
Hei hawaꞌi mampohampaꞌ luma.
Alaꞌ hihimo to hawaꞌi mampohampaꞌ lumana, waliana hibalilu to menomba pe luma duniaꞌ. 6 Pueꞌ Ala hingkiꞌ bukota mpolokeke pe toaꞌ to molungkaꞌi hawaꞌNa, hei hingkiꞌ Nohukuhi. 7 Hei ingkei woꞌo hampiha, ikohandoaꞌami tene mengkoruꞌ pe Pueꞌ Ala, hatoꞌo woꞌo waliami. 8 Angkana hinewowoꞌena hangangaa ipohentekei lekiꞌ-lekiꞌna walia to kodake:
Inioꞌkei bukota.
Inioꞌkei marontaꞌ.
Inioꞌkei momekabiriꞌ.
Inioꞌkei mampowute lolita to hawaꞌi tuꞌu noniuꞌ i toaꞌ ntaniꞌna.
Inioꞌkei mantiꞌi lolita to kodake.
9 Inioꞌkei mowuti pe hangko awami,
alaꞌ ipohentemokei lekiꞌ-lekiꞌna walia to hatoꞌo. Himpolohoꞌmokei ka kotuwuꞌmi hante waliami hampiha to ipetuntuikei ikohandoaꞌami tene mepoꞌohi pe Pueꞌ Yesu. 10 Hei hinewowoꞌena pahuamokei kotuwuꞌ to wolaꞌ, alaꞌ Pueꞌ Ala nopopewalimokei toaꞌ to wolaꞌ. Nopowolaꞌ nturusi lalimi hingkeꞌna mampetuntuikei waliaNa, hei hingkeꞌna pobahaꞌkei hapo to tuꞌu noniuꞌ Io. 11 Mewaliꞌ, nokomi koNopopewalimi toaꞌ to wolaꞌ, Pueꞌ Ala hawaꞌi mampopoꞌoriꞌori toYahudi hante toaꞌ to handoꞌiohi toYahudi, to nibulabaꞌ hei toaꞌ to hawaꞌi nibulabaꞌ, to mosikolaꞌ hei to hawaꞌi mosikolaꞌ, tokeiꞌ ba hawiꞌ. Kerisitu iomo to himpodulu. Io to uwaꞌ i lalira lekiꞌ-lekiꞌna toaꞌ to mepoꞌohi.
12 Pueꞌ Ala mampokarimakei hei moꞌuwiꞌmokei mewali toaꞌNa to Mangkolehi. Iomo hinaꞌ:
hangangaa momesulungikei,
hangangaa moromiꞌ lalimi haduo hei haduo,
mengkaꞌiwowoikei,
ipomaꞌalusuꞌkei pambiarami,
hei sabaraꞌkei pe hangko awami.
13 Inioꞌ ipoꞌilalikei salaꞌne hangko awami, hangangaa momeꞌampunikei, hibali Pueꞌ moꞌampunimo salaꞌmi.
14 To paralu mpololeke, hangangaa momepokarimakei,
alaꞌ ane momepokarimakei,
pohintuwuꞌmi mewali maroho.
15 Pueꞌ Ala mowowoimokei hei mampopewalikei hawowota hingkeꞌna mohintuwuꞌkei i lali kolebaꞌ lali. Mewaliꞌ, ipokarohokei pohintuwuꞌmi hei kolebaꞌna lali to ka Kerisitu. Hei hangangaa itiꞌikei nturusi woriꞌ komoromiꞌne Pueꞌ Ala. 16 Hangangaa ipoꞌilalikei mpololeke hawaꞌNe Kerisitu. Momepokaroho lalimokei hei momepoturuꞌkei motuntuni kopebahaꞌmi to ka Pueꞌ. Mampolingakei linga mpenomba, linga pepokodeꞌ hei linga ntaniꞌna to nopaꞌanikikei Inohaꞌ Mangkolehi. Ka lalimi mpololeke, molingakei hante mantiꞌi woriꞌ komoromiꞌne Pueꞌ Ala. 17 Hapolu to iwalikei ba to ipololitakei, hangangaa iwalikei hintotoꞌ hante peleihana Pueꞌ Yesu. Hei itiꞌikei woriꞌ komoromiꞌ i Pueꞌ Ala Umoꞌta i lali konaꞌna Pueꞌ Yesu.
Poturuꞌ pe tohamoko, pe oꞌanaꞌ hei pe tomotodi,
18 Ingkei towoweꞌe to hamokomo, mengkoruꞌkei pe maꞌanimi. Iomo to hintotoꞌ i toaꞌ to metuntu pe Pueꞌ. 19 Hei ingkei woꞌo tomaꞌani to hamokomo, hangangaa ipokarimakei hantambimi, inioꞌkei makasaraꞌ pe iohi.
20 Ingkei to oꞌanaꞌ tene, hangangaa ipetuntuikei lekiꞌ-lekiꞌna hawaꞌne tomotodimi, alaꞌ tiꞌo to nolei Pueꞌ Ala. 21 Hei ingkei to nipoꞌumoꞌ, inioꞌ mampomahakiꞌ lalina anaꞌmi hingkeꞌna hawaꞌi masusa lalire.
22 Ingkei to mewali hawiꞌ, hangangaa ipetuntuikei lekiꞌ-lekiꞌna hawaꞌne tuami to i duniaꞌ hieꞌe. Inioꞌ ipetuntuikei hawaꞌre tuami i temponalu uwaꞌ itoꞌo hingkeꞌna niperenakikei. Angkana ipetuntuikei hawaꞌre ka kopopuhiꞌna lalimi, hibali pengkoruꞌmi pe Pueꞌ Ala. 23 Jama hapolu to rorumbakikei, hangangaa ijamakei ka lalimi mpololeke. Ijamakei jama tiꞌo hibalikei majama i Pueꞌ, hawaꞌi hibali pajamami i toaꞌ. 24 Hei ipoꞌilalikei lolita hieꞌe: Pueꞌ hingkiꞌ mampaꞌanikei haromi motuntuni hapo to Nodandi i lekiꞌ-lekiꞌna toaꞌ to Nopoꞌanaꞌ. Alaꞌ Kerisitu iomo tuami to ipajamaikei. 25 Himolu to mowali salaꞌ hingkiꞌ pahua woꞌo howonina, alaꞌ Pueꞌ Ala hawaꞌi mampopoꞌori-ori toaꞌ.