Surona Pueꞌ Yesu i Yerusale mampoꞌioꞌ hi Paulu mewali suro
2
1 Hampuluꞌ iba ntoꞌa uko tiꞌo,a nolouꞌa pe Yerusale moꞌawa-awa hante hi Baranaba, hei hi Titus woꞌo metuntu. 2 Nolouꞌa pe Yerusale alaꞌ uwaꞌ lolita ka Pueꞌ Ala i aku to mantiꞌi hangangaa nolouꞌa. Kohupaꞌku i Yerusale, mampemehuakiꞌa tadulako-tadulakora toSarani. I tempo tiꞌo, to kukotehuꞌ, poturuꞌku hawaꞌi hingkiꞌ roponiuꞌ horiana hawaꞌi modumbuꞌ jamangka mampoturuꞌ toaꞌ noniuꞌ i Kareba Moromiꞌ, moromiꞌ to ukomo kujama, moromiꞌ to kolentuꞌana tene kujama. Iomo hinaꞌ kupowutekihi noniuꞌ i Kareba Moromiꞌ to kukomi pe toaꞌ to handoꞌiohi toYahudi. 3 Roponiuꞌ poturuꞌka hei koꞌukoana, hi Titus to metuntu i aku, hawaꞌi woꞌo niparuku nibulabaꞌ motuntuni aturana toYahudi, kehapoꞌi io handoꞌio toYahudi. 4 Angkana uwaꞌhi woꞌo toaꞌ toYahudi to hantoniꞌ metuntu pe hi Yesu, Mekahihi ngkanondiiꞌ i lumbungki alaꞌ uwaꞌ tungkaihare, iomo hingkeꞌna lekiꞌ-lekiꞌna toSarani hangangaa motuntuni aturana toYahudi. Angkana tepohentemoki ka atura-atura tiꞌo alaꞌ petuntuta pe Yesu Kerisitu. 5 Hawaꞌka motuntuni poturuꞌra to salaꞌ tiꞌo kehapoꞌi hangkiuꞌlu, hingkeꞌna Kareba Moromiꞌ to uwaꞌmo i lalimi inioꞌ nikalo hante poturuꞌra to salaꞌ.6 Mewaliꞌ, tadulakora tosarani i Yerusale to dingkaoꞌ pangkaꞌra, hawaꞌhi motambai hapolu noniuꞌ i poturuꞌku. (Kehapoꞌi dingkaoꞌ pangkaꞌre ba hawaꞌi, tiꞌo hawaꞌi paralu, alaꞌ Pueꞌ Ala hawaꞌi mampopoꞌoriꞌori toaꞌ.) 7 Angkana ropangakuꞌ koꞌakuna to nopoꞌohi Pueꞌ Ala mampowute Kareba Moromiꞌ pe toaꞌ to handoꞌiohi toYahudi. Hatoꞌo woꞌo hi Peturuꞌ nopoꞌohi Pueꞌ Ala mampowute Kareba Moromiꞌ pe toYahudihi, 8 alaꞌ Pueꞌ Ala mampaꞌani roho pe hi Peturuꞌ hingkeꞌna mewaliꞌi surona Pueꞌ Yesu i toYahudihi. Hei Pueꞌ Ala mampaꞌaniꞌa woꞌo roho hingkeꞌna mewaliꞌa suroNa i toaꞌ to handoꞌiohi toYahudi. 9 Mewaliꞌ hi Yakobus, hi Peturuꞌ hante hi Yohanes tiꞌo, to nitiꞌi tadulako lekiꞌ-lekiꞌna tosarani, mampetotuꞌu konowowoingkumo Pueꞌ Yesu mewali suroNa. Iomo hinaꞌ aku hante hi Baranaba rotorimoka moromiꞌ. Mometiko-tikomoka, tandaꞌ pohaꞌanungki. I tempo tiꞌo, hibobali lolitangki: iohi to mampowute Kareba Moromiꞌ pe toYahudihi, hei ingka to mampowute kareba tiꞌo pe toaꞌ to handoꞌiohi toYahudi. 10 To roperapiꞌ pe ingka, hingkeꞌna kiponindi nturusi mosulungi toaꞌ to merima-rima tuwuꞌra, hei tiꞌo woꞌo to kulei kuwali.
Hi Paulu mokamoroki hi Peturuꞌ i Antiokia
11 Hampiha tempo, ikohupaꞌna hi Peturuꞌb i kota Antiokia, hawaꞌa mohili mokamoroki i hinarona, alaꞌ waliana masalaꞌ mpololeke. 12 Uluꞌ-uluꞌna moromiꞌ waliane, alaꞌ io hawaꞌi mampopoꞌoriꞌori toaꞌ, moromiꞌ toYahudi moromiꞌ to handoꞌio toYahudi. Io poko mangka moꞌawa-awa hante halali hampepoꞌohina to handoꞌiohi toYahudi.c Angkana ikohupaꞌralu halali hampepoꞌohine hi Yakobus toYahudi,d hi Peturuꞌ mokoꞌelai halali hampepoꞌohina to handoꞌiohi toYahudi, hei hamboaꞌmo hiniꞌ mangka moꞌawa-awa hante iohi, alaꞌ nokotehuꞌi toYahudihi to hongkoꞌ mehupaꞌ tiꞌo hingkiꞌ moparuku toaꞌ to handoꞌio toYahudi mebulabaꞌ. 13 Hei uwaꞌhi woꞌo halali hampepoꞌohine toYahudi to mampetuntui waliana hi Peturuꞌ to hantotoniꞌlu, koꞌukoana hi Baranaba mampetuntui woꞌo waliara tiꞌo hei hamboaꞌmo hiniꞌ mangka moꞌawa-awa hante toaꞌ to handoꞌiohi toYahudi. 14 Kubahaꞌ mpololeke waliare tiꞌo hawaꞌi hintotoꞌ hante poturuꞌ to tuꞌu to tohua i Kareba Moromiꞌ. Iomo hinaꞌ kukamoroki hi Peturuꞌno i hinarona toaꞌ to woriꞌ to hirampu itoꞌo, kutiꞌikihi, “Ingko toYahudiko, angkana wadiko tuwuꞌ hibali toaꞌ to handoꞌio toYahudi. Hinewowoꞌena hamboaꞌmo paralu ipetuntui adaꞌre toYahudi. Mewaliꞌ, mahamporeꞌi hinaꞌ ikodokoꞌi mamparuku toSarani to handoꞌiohi toYahudi hingkeꞌna mampetuntuihi adaꞌra toYahudi?”
ToYahudi hante to handoꞌio toYahudi niposalamaꞌhi alaꞌ pepoꞌohira
15 Ingka toYahudi ka konipoꞌanaꞌangki, biasamoka mantiꞌi toaꞌ to handoꞌio toYahudi “to madosa” alaꞌ hawaꞌhi mampetuntui aturana hi Musa 16 Kehapoꞌi hatoꞌo, kibahaꞌ hawowaꞌ howeꞌ haduo to mewali mononto i pampeꞌelena Pueꞌ Ala alaꞌ pampetuntuina Aturana hi Musa. Iomo horiana hihimolu to nolei mewali mononto i pampeꞌelena Pueꞌ Ala, hangangaa mepoꞌohi mpololeke pe hi Yesu Kerisitu. Alaꞌ hawaꞌi uwaꞌ howeꞌ haduo toaꞌ to mewali mononto i pampeꞌelena Pueꞌ Ala nokomi pampetuntuina i Aturana hi Musa.
17 Mewaliꞌ, hieꞌemo to kipohinaru: nokomi pohaꞌanungki hante Kerisitu, iomo hinaꞌ mewalika mononto i pampeꞌelena Pueꞌ Ala. Angkana uwaꞌ toYahudi to mosalaꞌi pepoturuꞌki, rotiꞌi, “Ane mepoꞌohikei pe hi Yesu hei hamboaꞌmokei mengkoruꞌ i Poturuꞌna hi Musa, palaihana mewalimokei to madosa hibali hante toaꞌ to handoꞌio toYahudi. Mewaliꞌ madosakei alaꞌ petuntumi pe hi Yesu.” Hawaꞌi maniuꞌ lolita tiꞌo! 18 Angkana ane kupohenteꞌi petuntuka i aturana toYahudi, hei uko tiꞌo kutuntuni womo huliꞌ atura-atura tiꞌo alaꞌ kukodokoꞌi mewali mononto i pampeꞌelena Pueꞌ Ala, madosaꞌa mpololeke. 19 Hampiha aku woꞌo tehiluꞌa hante kuasaꞌ Aturana hi Musa, angkana ikohipohintekulu ka kuasaꞌ tiꞌo kubiaꞌmo tuwuꞌ motuntuni peleihana Pueꞌ Ala. I pampeꞌelena Pueꞌ Ala, hibali aku to nirokoꞌ moꞌawa hante Kerisitu, alaꞌ hi Yesu Kerisitu to mahi mosulewotaiꞌa. 20 Hei hinewowoꞌena handoꞌio aku to tuwuꞌ, angkana Kerisitumo to tuwuꞌ i lali kotuwuꞌku. Mewaliꞌ, kolentuꞌangku tene tuwuꞌ i duniaꞌ hieꞌe, bateꞌku mepoꞌohi pe Anaꞌna Pueꞌ Ala to mampokarimaꞌa hei mampewei wotaNa nirokoꞌ hingkeꞌna mewaliꞌa mononto i pampeꞌelena Pueꞌ Ala. 21 Pueꞌ Ala mampokonontoki i hukaꞌna kopopuhiꞌna laliNa. Mewaliꞌ, hawaꞌi moromiꞌ ane tosapuakaꞌi kopopuhiꞌne laliNa tiꞌo. Ane rapaꞌna, ingkiꞌ wadi mewali mononto i pampeꞌeleNa alaꞌ petuntuta i aturana toYahudi, hawaꞌi modumbuꞌ komahine Kerisitu.