Suraꞌna Hi Paulu
To Nopokatu Pe ToSarani I Woiꞌ
Galatia
Tabea
1
1-2 Suraꞌ hieꞌe ka aku hi Paulu, surona Pueꞌ Yesu. Kupokatu suraꞌ hieꞌe pe ingkei lekiꞌ-lekiꞌmi jumaꞌa-jumaꞌa i Galatia. Aku hante lekiꞌ-lekiꞌna halali hampepoꞌohingku to uwaꞌ iseꞌe mampowuteka tabeangki!Hingkeꞌna ibahaꞌkei, halali-halali, handoꞌio toaꞌ to morumbaꞌa, hei handoꞌio woꞌo toaꞌ to moꞌuwiꞌa mewali suro, angkana hi Yesu Kerisitu hante Pueꞌ Ala Umoꞌta to mampotuwuꞌ huliꞌ hi Yesu ka komahia, to moꞌuwiꞌa mewali suroNa.
3 Mekokaeꞌa pe Pueꞌ Ala Umoꞌta hante pe Pueꞌta Yesu Kerisitu hingkeꞌna Nobarakatikei hei mampaꞌanikei Romiꞌ Ngkotuwuꞌ. 4 Nokomi komadosanta, Pueꞌ Yesu mampewei wotaNa nirokoꞌ hingkeꞌna tepohenteki ka kuasaꞌ duniaꞌ to kodake hieꞌe. Nowali hatoꞌo alaꞌ tiꞌomo peleihane Pueꞌ Ala Umoꞌta. 5 Topokodeꞌ Pueꞌ Ala wute nantolou-louna. Amin.
Hi Paulu mokamoroki toGalatia
6 Kupowuli mpololeke, halali-halali! Handoaꞌkei tene morue nowowoi Pueꞌ Ala alaꞌ kopopuhiꞌna lalina Kerisitu hingkeꞌna mampoꞌohikei Kareba Moromiꞌ, angkana hinewowoꞌena tewolihi hamboaꞌmokei mengkoruꞌ pe Pueꞌ Ala, wuliha motuntunikei poturuꞌ to ntaniꞌna to rotiꞌi toaꞌ “Kareba Moromiꞌ” woꞌo. 7 Tiꞌo handoꞌio kareba moromiꞌ, alaꞌ mehupaꞌhi i lumbumi mampowulilukei moliu poturuꞌra to salaꞌ. Rokodokoꞌi mowolihi Kareba Moromiꞌ noniuꞌ i Kerisitu. 8 Angkana kutiꞌikikei, hihimolu to mampowute kareba moromiꞌ to mosisalaꞌ hante Kareba Moromiꞌ to kipowutekimokikei, hangangaa nohukuhi Pueꞌ Ala! Howeꞌlu ingka hante malaꞌeka ka suruga, bateꞌki nohuku Pueꞌ Ala! 9 Kitiꞌikimokikei hampiha i tempoki tene moꞌawa-awa hante ingkei, hei hinewowoꞌena kutiꞌikikei womo hampiha: ane uwaꞌ toaꞌ to mampowute kareba moromiꞌ to mosisalaꞌ hante to itorimomokei, bateꞌna nohukuhi Pueꞌ Ala!
10 Mewaliꞌ, halali-halali! Uwaꞌ to mantiꞌi hingkeꞌnalu noperenakiꞌa toaꞌ, hantaro kotuꞌuana, to kukodokoꞌi pepokodeꞌ ka Pueꞌ Ala. Uwaꞌ woꞌo to mantiꞌi hingkeꞌna mampomotanaꞌluꞌa lalira toaꞌ. Angkana ane tiꞌo peleihangku, palaihana, aku hieꞌe handoꞌio hawiꞌna Kerisitu.
Hi Paulu mantorimo Kareba Moromiꞌ ka Pueꞌ Yesu
11 Hingkeꞌ ibahaꞌkei, halali-halali, Kareba Moromiꞌ to kukomi handoꞌio ka pekirina toaꞌ. 12 Kareba Moromiꞌ tiꞌo, hawaꞌi kutorimo ka toaꞌ, hawaꞌi woꞌo uwaꞌ toaꞌ to mampoturuꞌkiꞌa, angkana hi Yesu Kerisitu hadoduona to mampokononto Kareba Moromiꞌ tiꞌo pe aku.
13-14 Ibahaꞌkei halali-halali, hohumbo kotuwuꞌka hampiha ikopetuntuku agama Yahudi. Wori' mpololeke awangka to motuntuni agama Yahudi, angkana akumo to maroho mpololeke metuntu i lekiꞌ-lekiꞌna atura agama, alaꞌ ka lalingku mpololeke mampetuntui adaꞌra tododulungkuhi.a Hei i tempo tiꞌo kupoperima-rimahi lekiꞌ-lekiꞌna toaꞌna Pueꞌ Ala, alaꞌ kukodokoꞌihi kuporopuꞌ.
15-16 Angkana i tempo tiꞌo, Pueꞌ Ala mampokonontokiꞌa kohihimona AnaꞌNe, hingkeꞌna kupowute kareba noniuꞌ i AnaꞌNa tiꞌo pe toaꞌ to handoꞌiohi toYahudi, alaꞌ Pueꞌ Ala moꞌuwiꞌa ikohandoaꞌangku tene nipoꞌanaꞌki, hei i tempo to Nopokonontomo, alaꞌ kopopuhiꞌna laliNa Nowowoimoꞌa hingkeꞌna mewaliꞌa suroNa. IkoNowowoingku, hawaꞌi uwaꞌ toaꞌ to mampoturuꞌa. 17 Hawaꞌa woꞌo nolou pe kota Yerusale meguru pe iohi to medulumohi mewali surona Pueꞌ Yesu, angkana nolouꞌa dulu pe woiꞌ Arab, honiꞌi mahuliꞌa nolou pe kota Damasi.
18 Tolu ntoꞌa katoꞌo, honiꞌa nolou pe Yerusale hingkeꞌna mampohidupaꞌkiꞌa hi Peturuꞌ. Meꞌohaꞌa moꞌawa hante io hampuluꞌ limo ando. 19 Tempo tiꞌo, kupohidupaꞌki woꞌo hi Yakobus hineeꞌna Pueꞌ Yesu.b Angkana surona Pueꞌ Yesu to ntaniꞌna, hawaꞌhi kupohidupaꞌki. To roduolu tiꞌo to kupohidupaꞌki. 20 Hapo to kuꞌukiꞌ hieꞌe bateꞌna tuꞌu. Pueꞌ Ala to pobahaꞌ lalingku! 21 Katoꞌo, nolouꞌa pe woiꞌ Siria hante woiꞌ kilikia. 22 Kolentuꞌangku inoꞌo, hawaꞌa kahampiha nolou pe woiꞌ Yudea; iomo hinaꞌ toSarani i jumaꞌa-jumaꞌa tiꞌo handoaꞌi tene kahampiha kiꞌokiꞌ. 23 Pahoriluhi lolitana awara to mantiꞌi, “Hampiha io mampoperima-rimaka hei hingkiꞌ mamporopuꞌ to mepoꞌohi pe Kerisitu. Angkana hinewowoꞌena io mampowutemo hapo to kipoꞌohi hampiha.” 24 Iomo hinaꞌ mampokodeꞌmohi Pueꞌ Ala, alaꞌ pahorihi hapo to mewali i aku.