Hi Paulu mampololita noniuꞌ i kotuwuꞌna hi Yesu ka komahia
15
1 Hinewowoꞌena, halali-halali, kukodokoꞌi mampopangkolowoikei Kareba Moromiꞌ to kupowutekimokei. Kareba Moromiꞌ tiꞌo itorimokei hei ipoꞌohikei mpololeke.a 2 Pahuamokei kotehompoꞌa, ane mepoꞌohikei nturusi pe Kareba Moromiꞌ to kupowutekimokei. Ane hawaꞌkei mampoꞌohi Kareba tiꞌo, pepoꞌohimi hawaꞌi modumbuꞌ.3 Kareba Moromiꞌ tiꞌo, kutorimo ka Kerisitu, hei tiꞌo woꞌo to kupowutekimokei. Iomo Kerisitu mahi alaꞌ dosa-dosanta hibali to teꞌukiꞌ i lali Suraꞌ Mangkolehi. 4 Io nitawu, hei ikotolu andona, nipopeꞌaro huliꞌ, hibali to teꞌukiꞌ i lali Suraꞌ Mangkolehi. 5 I kotuwuꞌna huliꞌ, Io mampomombaha wotaNa pe topeguruNa: uluꞌ-uluꞌna pe hi Peturuꞌ, hei uko tiꞌo pe topeguruNa to ntaniꞌna. 6 Uko tiꞌo nolou mampemombaha womo i hinarora topetuntuNa to limo natu lobi. Koworiꞌara toaꞌ tiꞌo, tuwuꞌluhi tene hinewowoꞌena, angkana uwaꞌmohi haꞌumbora duo to mahi. 7 Uko tiꞌo, Nopomombaha womo wotaNe pe hi Yakobus hineeꞌNa hante pe lekiꞌ-lekiꞌna suroNa. 8 Koꞌukoana, Io mampemombaha pe aku. Hawaꞌa masipatoꞌ Noꞌuwiꞌa mewali suroNa, hibaliꞌa haduo oꞌanaꞌ to nipoꞌanaꞌki, handoaꞌi tene wulana 9 alaꞌ aku hieꞌe surona Pueꞌ Yesu to i wowoiꞌ ka lekiꞌ-lekiꞌna suroNa. Kotuꞌuana, hawaꞌa masipatoꞌ nitiꞌi suro, alaꞌ hampiha kupoperima-rimahi toaꞌ to mepoꞌohi pe Pueꞌ Yesu. 10 Angkana alaꞌ kopopuhiꞌna lalina Pueꞌ Ala hei alaꞌ pesulungiNa pe aku, iomo horiana mewaliꞌa suroNa wute hinewowoꞌena. Hei modumbuꞌ mpololeke kopopuhiꞌne laliNa hei pesulungiNa pe aku, alaꞌ mepongka ikoNoꞌuwiꞌku mewali suroNa, komadorina pajamangku i Pueꞌ meloliu ka lekiꞌ-lekiꞌna surona Pueꞌ Yesu to ntaniꞌna. Ane ka rohongku hadoduongku, hawaꞌi kubiaꞌ mampopatengkaꞌ jama tiꞌo, angkana alaꞌ kopopuhiꞌna lalina Pueꞌ Ala hei alaꞌ pesulungiNa pe aku, iomo horiana kubiaꞌ. 11 Uwaꞌkei to kupaturuꞌ, uwaꞌkei woꞌo to nopoturuꞌ surona Pueꞌ Yesu to ntaniꞌna, angkana handoꞌio topangkomi to paralu mpololeke. To paralu mpololeke iomo Kareba Moromiꞌ hante pepoꞌohimi pe Kareba Moromiꞌ tiꞌo.
Kotuwuꞌna toSarani ka komahia
12 Mewaliꞌ, ane kupekarebaiki kotuwuꞌne huliꞌ Kerisitu ka komahia, mahamporeꞌi hinaꞌ uwaꞌ toaꞌ i lumbumi to mosapuaka kotuwuꞌra huliꞌ toaꞌ to mahi? 13 Ane rapaꞌna hawaꞌhi tuwuꞌ huliꞌ toaꞌ to mahi, mononto woꞌo Kerisitu handoaꞌi tuwuꞌ huliꞌ. 14 Ane rapaꞌna Kerisitu hawaꞌi tuwuꞌ huliꞌ, hawaꞌi uwaꞌ dumbuꞌne pajamangki mampowute Kareba Moromiꞌ, hei hawaꞌi woꞌo uwaꞌ dumbuꞌna pepoꞌohimi. Alaꞌ ane Kerisitu hawaꞌi tuwuꞌ huliꞌ, mampoꞌohikei kareba to hawaꞌi tuꞌu. 15 Meliu ka tiꞌo, hingkiꞌ rorekeꞌka sabiꞌ wuti noniuꞌ Pueꞌ Ala, alaꞌ kipowute kareba to mantiꞌi: Pueꞌ Ala mampotuwuꞌ huliꞌ Kerisitu. Angkana ane rapaꞌna toaꞌ to mahi hawaꞌi hingkiꞌ nipotuwuꞌ huliꞌ, hawaꞌi tuꞌu lolitangki, 16 alaꞌ ane toaꞌ hawaꞌi nipotuwuꞌ huliꞌ ka komahia, palaihana Kerisitu woꞌo hawaꞌi nipotuwuꞌ huliꞌ. 17 Hei ane Kerisitu hawaꞌi nipotuwuꞌ huliꞌ, hawaꞌi modumbuꞌ pepoꞌohimi, hei hawaꞌkei tepohente ka kuasaꞌ dosa. 18 Hei ane watoꞌoꞌi, toSarani to mahimohi, mononto hawaꞌi uwaꞌ pepohinaruara kohingkiꞌ nipatuwuꞌra huliꞌ. 19 Ane pepohinaruanta pe Kerisitu Noposalamaꞌluki itempotalu tuwuꞌ i duniaꞌ hieꞌe, angkana hawaꞌi wute i kotuwuꞌta pe nantolou-louna, palaihana, ka lekiꞌ-lekiꞌna toaꞌ i duniaꞌ hieꞌe, ingkiꞌmo to merima-rima mpololeke tuwuꞌte.
Alaꞌ kotuwuꞌna huliꞌ Kerisitu, hingkiꞌ nipotuwuꞌki woꞌo huliꞌ
20 Angkana hieꞌemo poturuꞌ to kotuꞌu-tuꞌuana: Kerisitu nipotuwuꞌmo huliꞌ. Io to uluꞌ-uluꞌna tuwuꞌ huliꞌ ka komahia. Hei konipatuwuꞌNa huliꞌ mewali hibali dandiNa pe ingkiꞌ kohingkiꞌ nipatuwuꞌra huliꞌ woꞌo lekiꞌ-lekiꞌna toaꞌ to mahi to mepoꞌohi pe Io. 21 Komahia mokuasaꞌi manusiaꞌ moliu haduo toaꞌ, iomo hi Adama, iomo horiana lekiꞌ-lekiꞌna toaꞌ hangangaa mahi. Hatoꞌo woꞌo, moliu haduo toaꞌ, iomo hi Yesu, iomo horiana toaꞌ to mahi hingkiꞌ nipotuwuꞌhi huliꞌ. 22 Lekiꞌ-lekiꞌna muleꞌna hi Adama hangangaa mahi. Angkana lekiꞌ-lekiꞌna toaꞌ to mohaꞌanu hante Kerisitu hingkiꞌ pahuahi kotuwuꞌ to wolaꞌ to hawaꞌi mokoꞌukoa. 23 Angkana lekiꞌ-lekiꞌna toaꞌ hingkiꞌ nipotuwuꞌ huliꞌ motuntuni tempona: to uluꞌ-uluꞌna iomo Kerisitu. Uko tiꞌo ikohupaꞌna huliꞌ i duniaꞌ hieꞌe, lekiꞌ-lekiꞌna toaꞌ to metuntu pe Io hingkiꞌ nipotuwuꞌ huliꞌ. 24 Ukohi nipotuwuꞌ huliꞌ, honiꞌiwae hingkiꞌ hupaꞌ kotutuane duniaꞌ hieꞌe. I tempo tiꞌo, Kerisitu hingkiꞌ monani lekiꞌ-lekiꞌna topoparenta, lekiꞌ-lekiꞌna tadulako, hei lekiꞌ-lekiꞌna to makuasaꞌ. Hei uko tiꞌo, Io hingkiꞌ mampewei kodatuaNa tiꞌo pe Pueꞌ Ala Umoꞌta. 25 Alaꞌ Kerisitu hangangaa meparenta hibali datu wute Pueꞌ Ala mampopengkoruꞌ lekiꞌ-lekiꞌna poniꞌna pe Io, 26 hei poniꞌna to koꞌukoana to hingkiꞌ Nonani, iomo komahia. 27 Uwaꞌ teꞌukiꞌ i lali Suraꞌ Mangkolehi to mantiꞌi:
“Pueꞌ Ala mampopengkoruꞌ lekiꞌna pe Io.”
Mewaliꞌ tobahaꞌ mpololeke: lekiꞌna to uwaꞌ hingkiꞌ nipopengkoruꞌ pe Kerisitu. Bateꞌna romo Pueꞌ Ala to hawaꞌi mengkoruꞌ pe Io, alaꞌ Iomo to mampopengkoruꞌ lekiꞌna pe Kerisitu. 28 Mewaliꞌ, ane lekiꞌna nipopengkoruꞌ pe Anaꞌna Pueꞌ Ala iomo Kerisitu, Kerisitu hingkiꞌ mengkoruꞌ pe UmoꞌNa hingkeꞌna tongawa komakuasaꞌna Pueꞌ Ala pe lekiꞌ-lekiꞌna.
Toaꞌ to mahi hingkiꞌ nipotuwuꞌ huliꞌ
29 Hohumbomo? Ane toaꞌ to mahi hawaꞌi hingkiꞌ nipotuwuꞌ huliꞌ, hapomo dumbuꞌna ane uwaꞌhi toaꞌ to niriu mosulewotai awara to mahi?b Ane to mahi hawaꞌi hingkiꞌ nipotuwuꞌ huliꞌ, mahamporeꞌi hinaꞌ adaꞌ tiꞌo niwali? 30 Ingka hieꞌe nipoperima-rimaka nturusi alaꞌ pajamangki mampowute Kareba Moromiꞌ. Angkana ane to mahi hawaꞌi hingkiꞌ nipotuwuꞌ huliꞌ, hapo dumbuꞌna komaporiꞌ tiꞌo to kirii nturusi? 31 Nokomi pajamangku mampowute Kareba Moromiꞌ ando-ando, hingkiꞌ kupomahi.c Tuꞌu mpololeke lolitangka tiꞌo, hei tuꞌu woꞌo komotanaꞌka alaꞌ koꞌingkeina halalingku, alaꞌ mepoꞌohikei pe Pueꞌta Yesu Kerisitu. 32 Kolentuꞌangku iseꞌe i kota Epesu, moriiꞌa komaporiꞌ, hibali to noꞌewa pinatuwuꞌ to meꞌoꞌoka. Ane motuntuniluꞌa pekirina toaꞌ hapo dumbuꞌne lekiꞌ-lekiꞌna tiꞌo kurii? Ane rapaꞌna to mahi hawaꞌi hingkiꞌ nipotuwuꞌ huliꞌ, aginamo totuntuni lolita hieꞌe: “Humeiki mangka hei maꞌinu, alaꞌ poꞌonina hingkiꞌ mahimoki”.
33 Inioꞌkei nopokonawuꞌ toaꞌ to mantiꞌi hatoꞌo! Ane mampoꞌawakei toaꞌ to kodake waliara, hingkiꞌ tewolihi woꞌo waliami mewali kodake. 34 Iomo horiana hangangaa ipekirikei moromiꞌ noniuꞌ i hapo to moromiꞌ iwalikei, hei hangangaa ipohentekei lekiꞌ-lekiꞌna dosami, alaꞌ uwaꞌkei to handoaꞌi tene pobahaꞌ Pueꞌ Ala. Kupowute hatoꞌo hingkeꞌna ipohilikei.
Hi Paulu mampokonontokihi
35 Mononto uwaꞌhi to hingkiꞌ meꞌitano, “Hohumbo kotuꞌuana toaꞌ to mahi hingkiꞌ nipotuwuꞌ huliꞌ? Wota to hohumbo hingkiꞌ nipaꞌanikihi?” 36 Bebe mpololeke toaꞌ to meꞌitano hatoꞌo! Ane mantudaꞌki ba hapolu, tinudaꞌ tiꞌo hawaꞌi hingkiꞌ tuwuꞌ ane hawaꞌi nitawu hei nimongkohi dulu woiꞌ hibali toaꞌ to mahi. 37 Hei lentena tinudaꞌ to tohuꞌa tiꞌo, hawaꞌi hibali hante lentena kotuwuꞌna. Tiꞌomo tinudaꞌlu, moromiꞌ kina ba tinudaꞌ to ntaniꞌna. 38 Uko tiꞌo, Pueꞌ Ala mampotuwuꞌ hei mepaꞌani lente to wolaꞌ, wute mehupaꞌ kina ba tiwo ba hapolu motuntuni langkaꞌ-langkaꞌna. Hei lente to wolaꞌ tiꞌo hintotoꞌ hante peleihana Pueꞌ Ala.
39 Ane topekiri lekiꞌ-lekiꞌna pinatuwuꞌ to tuwuꞌ i womboꞌ duniaꞌ hieꞌe, hawaꞌi hibali-bali lentere. Lente toaꞌ hawaꞌi hibali lente tinti. Lente bouꞌ moꞌoriꞌ woꞌo. Molangkaꞌ-langkaꞌ pinatuwuꞌ, moꞌoriꞌ-ori lentere. 40 Hatoꞌo woꞌo i laniꞌ: uwaꞌ ando, wula hei betueꞌ, angkana lekiꞌ-lekiꞌna tiꞌo hawaꞌi hibali hante hapo to uwaꞌ i duniaꞌ. Komarangana ando, wula hante betueꞌ, hawaꞌi hibali hante komarangana hapo to uwaꞌ i duniaꞌ hieꞌe. 41 Pewantana ando hawaꞌi hibali hante pewanta wula. Pewantana betueꞌ, moꞌoriꞌ woꞌo. Hingkoweꞌ betueꞌ to woriꞌ, moꞌoriꞌ-ori pewantare.
42-43 Hatoꞌo woꞌo poꞌoriane toaꞌ to mahi ane tuwuꞌhi huliꞌ. Alaꞌ ane mahimoki, rohonta hamboaꞌmo uwaꞌ hei wotalokaꞌta hingkiꞌ nitawu hei hingkiꞌ morere. Angkana ane nipotuwuꞌki huliꞌ, wotanta hieꞌe hingkiꞌ niwolihi mewali wota to wolaꞌ, to moromiꞌ hei maroho, hei hamboaꞌmo hingkiꞌ mahi ba morere.
44 To nitawu, iomo wotalokaꞌ to masipatoꞌ tuwuꞌ i duniaꞌ hieꞌe. Angkana ane nipotuwuꞌki huliꞌ i ando to hingkiꞌ dongkaꞌ alaꞌ kuasaꞌna Inohaꞌ Mangkolehi, wotanta hieꞌe hingkiꞌ niwolihi mewali wota to masipatoꞌ meꞌohaꞌ i suruga. 45 Uwaꞌ teꞌukiꞌ i lali Suraꞌ Mangkolehi to mantiꞌi: toaꞌ to uluꞌ-uluꞌna nowali hante nopotuwuꞌ Pueꞌ Ala iomo hi Adama. Angkana Kerisitu wadi nitiꞌi hi Adama to kotutuana. Iomo to mampaꞌaniki kotuwuꞌ to wolaꞌ to hawaꞌi mokoꞌukoa. 46 Pueꞌ Ala hawaꞌi kaliuꞌ mowolihi wotanta. Uluꞌ-uluꞌna Io mampaꞌaniki wotanta hieꞌe to hintotoꞌ meꞌohaꞌ i duniaꞌ hieꞌe. I ando to hingkiꞌ dongkaꞌ, honiꞌki Nopaꞌani wota to masipatoꞌ meꞌohaꞌ i suruga. 47 Hi Adama iomo manusiaꞌ to uluꞌ-uluꞌna meꞌohaꞌ i womboꞌ duniaꞌ hieꞌe, to niwali ka woiꞌ. Angkana Kerisitu wadi nitiꞌi hi Adama to kadua, hei Io ka suruga. 48-49 Hatoꞌo woꞌo ingkiꞌ hibaliki toaꞌ i duniaꞌ uwaꞌ wota to hibali wotana hi Adama, toaꞌ to uluꞌ-uluꞌna to nowali Pueꞌ Ala ka woiꞌ. Angkana i ando to hingkiꞌ dongkaꞌ, ingkiꞌ to mepoꞌohi hingkiꞌ pahuaki wota to hibali hante wotana Kerisitu to ka suruga.d
Ane hupaꞌi huliꞌ Kerisitu,
50 Tungkaihangku, halali-halali, iomo waheꞌe: wotanta iomo ohi hante raꞌa, hawaꞌi hohumbo mekahi pe duniaꞌ to wolaꞌ iomo poparentana Pueꞌ Ala i suruga. Hei wotanta hieꞌe to hingkiꞌ mahi, hawaꞌi hohumbo tuwuꞌ wute nantolou-louna.
51 Mewaliꞌ, hingkeꞌna ibahaꞌkei, kupowutekikei poturuꞌ to tewuni hampiha, angkana hinewowoꞌena nopokonontokiki Pueꞌ Ala, hawaꞌki hingkiꞌ mahi lekiꞌ wute ikohupaꞌna huliꞌ Pueꞌ Yesu, angkana ingkiꞌ lekiꞌ-lekiꞌta hingkiꞌ niwolihi, moromiꞌ to tuwuꞌ tene, moromiꞌ to mahimo. 52 Ane nitowuiꞌi torompeꞌ to kotutuana, lekiꞌ-lekiꞌna tiꞌo hingkiꞌ mewali i lali hampiro matalu. Alaꞌ ane nitowuiꞌ torompeꞌ tiꞌo, Pueꞌ Ala hingkiꞌ mampotuwuꞌ huliꞌ toaꞌ to mahi, hei hingkiꞌ Nopaꞌanihi wota to wolaꞌ to hamboaꞌmo hingkiꞌ mahi. Hei ingkiꞌ to tuwuꞌ tene, hingkiꞌ niwolihiki woꞌo, 53 alaꞌ wotanta hieꞌe wota to mahi hei morere. Iomo horiana wotanta hangangaa niwolihi mewali wota to hamboaꞌmo hingkiꞌ mahi. 54 Hei ane tewolihiꞌi wotante to moledeꞌ mewali wota to hawaꞌi mokoꞌukoa, hingkiꞌ tebuhoꞌi hapo to teꞌukiꞌ hampiha i lali Suraꞌ Mangkolehi to mantiꞌi waheꞌe:
“Pueꞌ Ala monanimo komahia.”
55 “O komahia, i imboꞌi kuasaꞌma?
O komahia, i imboꞌi komarohoma mepokolalo?”
56 Kuasaꞌ komahia iomo dosa, hei to mampotongawa dosa iomo aturana Pueꞌ Ala. 57 Angkana nopohintemoki Pueꞌ Ala ka dosa hei komahia alaꞌ pohintuwuꞌta hante Pueꞌta Yesu Kerisitu. Topokodeꞌ Pueꞌ Ala!
58 Mewaliꞌ halali-halali to kupokarima, inioꞌ bata-bata lalimi. Hangangaa ipokarohokei pepoꞌohimi. Hangangaa nipopatengkaꞌ nturusi jamane Pueꞌ, alaꞌ ibahaꞌkei hapo to ijamakei i Pueꞌ hingkiꞌ modumbuꞌ.