Hi Paulu surona Pueꞌ Ala
4
1 Aku hante hi Apolo hei awangkuhi irekeꞌkei mpuꞌu tadulakomi, aginamo itiꞌikakei rumbaꞌanaka. Alaꞌ rumbaꞌanaka woꞌo Kerisitu. Ingka to mampowute karebane Pueꞌ Ala, hei hampiha kareba tiꞌo tewuni tene pe toaꞌ i duniaꞌ. 2 Toaꞌ to mewali rumbaꞌa, iomohi toaꞌ to nipoꞌohi mampopatengkaꞌ jamana. 3 Mewaliꞌ, ane uwaꞌkei to mosalaꞌi pajamangku, hawaꞌi mahampo. Hatoꞌo woꞌo ane pajamangku niparesaꞌ, hawaꞌi woꞌo mahampo. Hawaꞌi woꞌo kupokononto ba moromiꞌi pajamangku ba hawaꞌi. 4 Kubahaꞌ kopopuhiꞌne lalingku hei hawaꞌa masalaꞌ, angkana handoꞌio tiꞌo to mampokononto kohawaꞌka masalaꞌ. Pueꞌ to hingkiꞌ moparesaꞌ lalingku, ba moromiꞌ ba hawaꞌi. 5 Iomo horiana kutiꞌi, inioꞌkei mosalaꞌi jamara hangko awami ane handoaꞌi tene tempona. Ipekaukei dulu kohupaꞌna huliꞌ Pueꞌ. Iomo to hingkiꞌ mobungkahi lekiꞌ-lekiꞌna to tewuni tene i lali komokorindiana. Io to hingkiꞌ mampotongawa lekiꞌ-lekiꞌna tungkaihana lalira toaꞌ. I tempo tiꞌo, haduo-haduo toaꞌ hingkiꞌ pahua pepokodeꞌ ka Pueꞌ Ala, hintotoꞌ hante waliana.Hi Paulu mokamoroki tokorintus
6 Halali-halali, hapo to kutiꞌi hingkonia noniuꞌ i hi Apolo hante aku hadoduongku. Ingka roduo mewalika pandiriꞌ, hingkeꞌna mampetuntuikei hawaꞌ to mantiꞌi, “Nitiko nturusi hapo to teꞌukiꞌ i lali hawaꞌna Pueꞌ.” Tungkaihangku hingkeꞌna inioꞌkei mampokokodeꞌ alaꞌ petuntumi i haduo tadulakomi. Inioꞌkei mamperenaki haduo tadulakomi hei mampononaꞌa to haduona. 7 Ba itiꞌikeireꞌi, moromiꞌkei tene ka hangko awami? Haporeꞌi to uwaꞌ i ingkei to hawaꞌi itorimokei ka Pueꞌ Ala? Mahamporeꞌi hinaꞌ mampokokodeꞌkei, hantaro hapo to uwaꞌ i ingkei lekiꞌ-lekiꞌna to nopaꞌanikilukei Pueꞌ Ala?
8 Ba ipekirikei hamboaꞌmo uwaꞌ to iparaluꞌikei? Ba ipekirikei marohomo pepoꞌohimi pe Pueꞌ? Ba itiꞌikei moparentakei hibali datu, hei ingka surona Pueꞌ Yesu hamboaꞌmo iparaluꞌikei? Kemoromiꞌ mpololeke ane mewalikei datu i poparentana Pueꞌ Ala, hingkeꞌna ingka woꞌo moparentaka moꞌawa hante ingkei. 9 Angkana motuntuni pahuangku, ingka suronaka Pueꞌ Yesu, nopopewalimoka Pueꞌ Ala toaꞌ to nipariwoiꞌ tuwuꞌki ka lekiꞌ-lekiꞌna toaꞌ. Ingka ropohibalika hante toaꞌ to nihuku mahi i hinarora toaꞌ to woriꞌ, to roꞌoꞌele toaꞌ hante malaꞌeka. 10 Ingka rorekeꞌka tobebe alaꞌ mampowuteka kareba noniuꞌ i Kerisitu, angkana itiꞌikei ingkei toSarani to mapande! Ingka, moledeꞌka, angkana itiꞌikei maroho pepoꞌohimi! Ingkei to roꞌadaꞌi toaꞌ i duniaꞌ, angkana ingka, nisalaꞌ-salaꞌika! 11 Wute hinewowoꞌena, hawaꞌi ganaꞌ kopongkonangki, hawaꞌi ganaꞌ paꞌinungki, hei hawaꞌi woꞌo ganaꞌ pebaduꞌki. Ropoperima-rimaka nturusi. Hawaꞌi uwaꞌ peꞌohaꞌangki. 12 Ingka majamaka madori mampaliꞌ kotuwuꞌangki. Ane uwaꞌhi to motundaꞌka, kihowonihi hante pebarakati. Ane uwaꞌhi to mampoperima-rimaka, kiriilu. 13 Ane uwaꞌhi to mampasuwu lolita to kodake i ingka, kihoniꞌluhi hante lolita to maꞌalusuꞌ. Wute hinewowoꞌena, nirekeꞌka hibali kora to nitube to hawaꞌi uwaꞌ podumbuꞌana.
14 Halali-halali! Tungkaihangku hieꞌe hawaꞌkei kupokohili, angkana moliu lolitangku hieꞌe, kupoturuꞌkei alaꞌ kurekeꞌmokei hibali anaꞌku hadoduongku to kupokarima. 15 Kehapoꞌi i sabuna gurumi to mampoturuꞌkei i petuntumi pe Kerisitu, angkana akulu to nipoꞌumoꞌ, alaꞌ akumo to uluꞌ-uluꞌna mampowute Kareba Moromiꞌ, wute mepoꞌohikei i Yesu Kerisitu. 16 Iomo horiana kuperapiꞌ mpololeke, halali-halali, hingkeꞌna ipetuntuikei waliangka. 17 Mewaliꞌ, kurumbaꞌ hi Timotius nolou mangkohidupaꞌkikei. Hi Timotius tiꞌo kupoꞌohi mampopatengkaꞌ jamana Pueꞌ, hei hibalimo anaꞌku to kupokarima. Ane hupaꞌi i ingkei, hingkiꞌ nopopangkolowoikei huliꞌ hohumbo petuntuku pe Kerisitu, hei kotuwuꞌku hintotoꞌ hante poturuꞌ to kupowute pe lekiꞌ-lekiꞌna jumaꞌa.
18 I lumbumi uwaꞌ to mewali mampokokodeꞌ, alaꞌ ropekiri hamboaꞌmoꞌa hingkiꞌ nolou mangkohidupaꞌkikei. 19 Angkana hingkiꞌ nolouluꞌa. Ane noponiuꞌi Pueꞌ, hamboaꞌmo morue hingkiꞌ mehupaꞌa. I tempo tiꞌo, hingkiꞌ kuꞌokiꞌ hapo to rowali toaꞌ to mampokokodeꞌ tiꞌo, hei hingkiꞌ kubahaꞌ ba uwaꞌ kuasaꞌna Pueꞌ Ala i iohi, ba lolitaralu. 20 Alaꞌ ane Pueꞌ Ala meparenta i lalinta, hangangaa topetuntui peleiNe, handoꞌiolu i pololitanta, angkana i walianta woꞌo. 21 Mewaliꞌ, imboꞌina to ileikei: ane mehupaꞌa mampoturuꞌkei hei handoaꞌi tene ipohentekei waliami to kodake, hingkiꞌ makaja pololitangka. Angkana ane tewolihiꞌi waliami, hingkiꞌ maꞌalusuꞌ pololitangka hei marima lalingka.