Suraꞌna Hi Paulu To Uluꞌ-uluꞌna
Pe ToSarani I Kota
Korintus
Tabea
1
1-2 Halali-halali, suraꞌ hieꞌe ka aku hi Paulu hei ka halali hampepoꞌohinta hi Sostene, kipokatu pe ingkei, jumaꞌa to uwaꞌ i kota Korintus. Pueꞌ Ala moꞌuwiꞌmokei mewali toaꞌNa, hei Iomo to mampomangkolehimokei alaꞌ pohintuwuꞌmi hante Yesu Kerisitu moꞌawa hante lekiꞌ-lekiꞌna toaꞌ to meꞌohaꞌ i imbo-imbolu to mekokae pe Yesu Kerisitu, Pueꞌra hei Pueꞌta woꞌo. Aku hieꞌe, noꞌuwiꞌa Pueꞌ Ala mewali surona hi Yesu Kerisitu motuntuni peleihaNa. 3 Mekokaeꞌa pe Pueꞌ Ala Umoꞌta hante pe Pueꞌ Yesu Kerisitu hingkeꞌna Nobarakatikei ka kopopuhiꞌna laliNa hei Nopaꞌanikei Romiꞌ Ngkotuwuꞌ.Hi Paulu mantiꞌi woriꞌ komoromiꞌ i Pueꞌ Ala
4 Halali-halali, hawaꞌa luleꞌ mantiꞌi woriꞌ komoromiꞌ i Pueꞌ Ala noniuꞌ ingkei, alaꞌ ka kopopuhiꞌna laliNa, Io mampaꞌanikei pebarakati nokomi pohintuwuꞌmi hante Yesu Kerisitu. 5 Alaꞌ pohintuwuꞌmi tiꞌo, Nopaꞌanimokei lekiꞌna pebarakati to modumbuꞌ i kotuwuꞌmi: iomo hinaꞌ Noponobahaꞌimokei poturuꞌ to tuꞌu, hei Nopaꞌanimokei komapande mampowute poturuꞌ tiꞌo. 6 Lekiꞌ-lekiꞌna tiꞌo mampokononto komarohona pepoꞌohimi i kareba noniuꞌ i Kerisitu to kipowutekikei. 7 Iomo horiana hamboaꞌmo uwaꞌ komakuraꞌna pebarakati to ihuakei, alaꞌ ihuamokei woriꞌ langkaꞌ kopebahaꞌ ka Inohaꞌ Mangkolehi, hei mampekaukei kohupaꞌana huliꞌ Pueꞌta Yesu Kerisitu. 8 Io hingkiꞌ mampokaroho pepoꞌohimi wute i kotutuana duniaꞌ, hingkeꞌna ikohupaꞌna huliꞌ Pueꞌta Yesu Kerisitu, hamboaꞌmo hingkiꞌ uwaꞌ komasalaꞌmi. 9 Hei Pueꞌ Ala bateꞌna topoꞌohi mobuhoꞌi dandiNa i ingkiꞌ, alaꞌ Io to moꞌuwiꞌmokei hingkeꞌna mohaꞌanukei moꞌawa hante AnaꞌNa iomo Yesu Kerisitu Pueꞌta.
Hi Paulu mokamorokihi alaꞌ hawaꞌhi mohintuwuꞌ
10 Halali-halali, ka kuasaꞌ to nopaꞌanikiꞌa Pueꞌta Yesu Kerisitu, kuperapiꞌ hingkeꞌna mohintuwuꞌkei lekiꞌ, hei inioꞌkei mampoꞌuwaꞌ posisalaꞌ. Hangangaa mohintuwuꞌkei hante hampekokirikei. 11 Halali-halali, tungkaihangku mantiꞌi hatoꞌo, alaꞌ uwaꞌhi halalinta hi Kloe hantambi to mampowute pe aku koꞌuwaꞌne posisalaꞌmi. 12 Kupololita hatoꞌo alaꞌ uwaꞌ ka ingkei to mantiꞌi, “Aku metuntuꞌa pe hi Paulu.” Uwaꞌ to mantiꞌi, “Aku metuntuꞌa pe hi Apolo.” To ntaniꞌna woꞌo mantiꞌi, “Aku metuntuꞌa pe hi Peturuꞌ.” Hei uwaꞌ woꞌo to mantiꞌi, “Aku metuntuꞌa pe Kerisitu.” 13 Uwaꞌreꞌi Kerisitu woriꞌ dolaꞌa? Ba akureꞌi to mahi nipaku i loti momehulepe mampohawa dosami? Ba niriukei hingkeꞌna mewalikei topegurungku? Hawaꞌi! 14 Morasiꞌ, alaꞌ ka lumbumi hawaꞌi uwaꞌ to ntaniꞌna to kuriu, bateꞌralu hi Kirisipu hante hi Gaiu, 15 horiana hawaꞌi uwaꞌ to wadi mantiꞌi kuriukei mewali topetuntuku. 16 (Uwaꞌ tene to kuponindi: hi Stepanu hantambi, aku to moriuhi. Angkana i huwali ka iohi, ane kupekiri hamboaꞌmo uwaꞌ toaꞌ ntaniꞌna to kuriu.) 17 Hawaꞌa norumbaꞌ Kerisitu mewali suroNa hingkeꞌna moriuꞌa toaꞌ, angkana hingkeꞌna mangkomiꞌa Kareba Moromiꞌ. Ikokupowutena Kareba Moromiꞌ, kutungkai kupakeꞌ lolita to hawaꞌi dingkaoꞌ, hingkeꞌna toaꞌ mepoꞌohi handoꞌio alaꞌ komapandengku mololita, angkana mampoꞌohihi kuasaꞌ komahina Kerisitu i loti momehulepe. Hawaꞌi kulei ane komahiNa tiꞌo hamboaꞌmo modumbuꞌ alaꞌ komapandengku mololita.
Ka Kareba Moromiꞌ, tobahaꞌ kuasaꞌNe
18 Kipowute kareba to mantiꞌi Kerisitu mohompoꞌ toaꞌ ka pehuku dosa i konirokoꞌNa i loti momehulepe. Ane toaꞌ to hawaꞌi hingkiꞌ salamaꞌ pahori kareba tiꞌo, rotiꞌi, “Tiꞌo hawaꞌi mekahi akala.” Angkana ane ingkiꞌ to nohompoꞌmoki Pueꞌ Ala ka pehuku dosanta pahori kareba tiꞌo, totiꞌi, “Tiꞌomo lalane Pueꞌ Ala mampotongawa kuasaꞌNa!” 19 I lali Suraꞌ Mangkolehi, Pueꞌ Ala mantiꞌi:
“Hingkiꞌ Kupoꞌuko komapandene toaꞌ to pobahaꞌ,
hei hawaꞌi hingkiꞌ Kupakeꞌ pekirine toaꞌ to mapande.”
20 Hapo dumbuꞌre toaꞌ to mapande? Hapo dumbuꞌre guru agama toYahudi? Hapo dumbuꞌre toaꞌ to mapande mololita i duniaꞌ hieꞌe? I pampeꞌelena Pueꞌ Ala, lekiꞌ-lekiꞌna komapandena toaꞌ Norekeꞌlu hawaꞌi modumbuꞌ, 21 alaꞌ ka komapandena toaꞌ, hawaꞌki pobahaꞌ Pueꞌ Ala. Angkana alaꞌ komapandena Pueꞌ Ala, Nobutusimo umbiꞌ hingkeꞌna hihimo to mepoꞌohi pe Kareba Moromiꞌ to kipowute, hingkiꞌ Nohompoꞌhi ka pehuku dosara. Angkana ane kipowute Kareba Moromiꞌ, toaꞌ to hawaꞌi mepoꞌohi mantiꞌi, “Tiꞌo hawaꞌi mekahi akala.” 22 ToYahudihi, hawaꞌhi mepoꞌohi ane handoaꞌhi kiponoꞌokiꞌi tandaꞌ kuasaꞌ. Hei toYunanihi, hawaꞌhi mepoꞌohi ane hawaꞌhi kipokonontoki hante komapandena toaꞌ. 23 Angkana ingka mampowuteka komahina Kerisitu i loti momehulepe. Kareba tiꞌo ropomolalo pekirira toYahudihi, ane pe toaꞌ to handoꞌio toYahudi, kareba tiꞌo rorekeꞌlu lolita to hawaꞌi mekahi akala. 24 Angkana pe hihimolu to noꞌuwiꞌmo Pueꞌ Ala mewali toaꞌNa, moromiꞌ toYahudi ba to handoꞌio toYahudi, Kerisitu to mampotongawa kuasaꞌNa hante komapandena Pueꞌ Ala. 25 Ane toaꞌ to hawaꞌi mepoꞌohi, komahina Kerisitu i loti momehulepe hawaꞌi mekahi i akalara, hantaroreꞌi meliu tene komapandena Pueꞌ Ala ka komapandena toaꞌ. Motuntuni pahuana toaꞌ to hawaꞌi mepoꞌohi, Pueꞌ Ala hawaꞌi makuasaꞌ. Hantaro kotuꞌuana meliu tene kuasaꞌNe ka kuasaꞌna toaꞌ.
26 Halali-halali, ikolowoikei tene hohumbo kotuwuꞌmi ikohandoaꞌanakei tene nowowoi Pueꞌ Ala mewali toaꞌNa. I tempo tiꞌo, hawaꞌkei woriꞌ to mapande ba makuasaꞌ ba tepoꞌiwombo i pampeꞌelena toaꞌ, 27 alaꞌ Pueꞌ Ala moꞌuwiꞌ toaꞌ to hawaꞌi mapande i pampeꞌelena toaꞌ ntaniꞌna, hingkeꞌna to mapande hingkiꞌ nipokohili. Notungkai moꞌuwiꞌhi to moledeꞌ, hingkeꞌna toaꞌ to maroho hingkiꞌ nipokohili. 28 Notungkai moꞌuwiꞌhi to i wowoiꞌ kotuwuꞌna, to hawaꞌi niꞌadaꞌi, hante to hawaꞌi modumbuꞌ i pampeꞌelena toaꞌ, hingkeꞌna tongawa to nopokodeꞌ toaꞌ kotuꞌuana hawaꞌi modumbuꞌ. 29 Mewaliꞌ, iomo horiana hawaꞌi uwaꞌ howeꞌ haduo toaꞌ to wadi mampokokodeꞌ. 30 Ukonareꞌi, Pueꞌ Ala hadoduoNa to mampohintuwuꞌki hante Yesu Kerisitu, alaꞌ Iolu to mampaꞌaniki lala kotehompoꞌa. Moliu pohaꞌanunta hante Yesu Kerisitu, tobahaꞌmo komapandene Pueꞌ Ala: Kerisitu to mampomodameki hante Pueꞌ Ala, hei mampopewaliki toaꞌNa, hei mohompoꞌki ka pehuku dosanta. 31 Iomo horiana hintotoꞌ mpololeke hapo to teꞌukiꞌ i lali Suraꞌ Mangkolehi:
“Himo to mampokokodeꞌ,
hangangaa mampokokodeꞌ alaꞌ to nowali Pueꞌ.”