Hi Paulu nolou pe Roma
27
1 Uko tiꞌo, ropokonontomo hangangaa molaika mekapalaꞌ tahiꞌ nolou pe woiꞌ Italia. Hi Paulu hante haꞌumbora duo toaꞌ ntaniꞌna to nitarungkuꞌ nipeserakaki pe hi Yuliu, tadulako surodadu toRoma, ka Surodaduna Datu Ngkodeꞌ. 2 Kapalaꞌ tahiꞌ to kipehendeꞌi, iomo haꞌanu kapalaꞌ tahiꞌ to kodeꞌ ka bolaꞌ Adaramitiu to ropatimomo ako monontohi bolaꞌ-bolaꞌ to i bota ntahiꞌ i poropensi Asia. Haduo awangki to metuntu i patengkaꞌangki iomo hi Aritaku, to ka kota Tesalonika i woiꞌ Makedonia. 3 Kopoꞌonina holampimoka i kota Sido. Moromiꞌ mpuꞌu laline hi Yuliu pe hi Paulu, iomo horiana hi Paulu nopaꞌani tempo moweoꞌi awana i lali kota, hingkeꞌna hapo to noparaluꞌi nipaꞌaniki. 4 Uko katoꞌo, kipololiumo patengkaꞌki. Alaꞌ komakajana parowo, iomo horiana kapalaꞌki mampebota dodungku i leowuta Siprus tinaꞌ i motoꞌando hingkeꞌna hawaꞌka noniuꞌ parowo to makaja. 5 Uko tiꞌo, mengkalimbamoka i tahiꞌ to nohinoroi woiꞌ Kilikia hante Pampilia, wute mehupaꞌka i kota Mira i woiꞌ Likia. 6 I Mira, tadulako surodadu pahua haꞌanu kapalaꞌ tahiꞌ ka kota Alesandaria to hingkiꞌ nolou pe woiꞌ Italia. Iomo horiana nopopengkaboliꞌka pe kapalaꞌ tahiꞌ tiꞌo.7 I lali haꞌumbora ando, maꞌeleꞌ patengkaꞌne kapalaꞌ tahiꞌ tiꞌo, hei hangkiuꞌ kehawaꞌka wute i kota Kinidu. Nokomi komakajana parowo ka hinarongki, hawaꞌi kipololiu patengkaꞌki pe tungkaihangki uluꞌna. Iomo horiana kapalaꞌki mampebotalu i leowuta Kreta moliu i wuntu Salamone, hingkeꞌna hawaꞌka noniuꞌ parowo. 8 Masusa mpololeke patengkaꞌki mampebota i leowuta Kreta tiꞌo. Koꞌukoana, hupaꞌmoka i paweoha to nitiꞌi Paweoha Moromiꞌ, to dodungku i bolaꞌ Lasea.
9 Alaꞌ komaꞌeleꞌna patengkaꞌki, hampakaꞌmo liu ando ngkodeꞌ posusaꞌara toYahudi, hei hingkiꞌ hupaꞌmo tempo mepoholeꞌ. [Biasana i tempo tiꞌo, lekiꞌ-lekiꞌna kapalaꞌ tahiꞌ meꞌohaꞌ alaꞌ hamboaꞌmo moromiꞌ ropatengkaꞌi i tahiꞌ.] Iomo horiana hi Paulu mampokolowoikihi, notiꞌi, 10 “Halali-halali, motuntuni pahuangku, hingkiꞌ masusaki ane topololiuꞌi patengkaꞌte. Hingkiꞌ woriꞌ komarugiꞌnte. Hawaꞌi podo kapalaꞌlu hei komianta to marugiꞌo, angkana inohaꞌta woꞌo hingkiꞌ moholi.” 11 Angkana tadulako surodadu tiꞌo hawaꞌi mampoꞌohi lolitana hi Paulu, alaꞌ nopoꞌohi tene lolitare topangkomi hante tumpu kapalaꞌ tahiꞌ. 12 Alaꞌ i paweoha tiꞌo hawaꞌi moromiꞌ nipeꞌohaꞌi mampekau koliuna tempo mepoholeꞌ, iomo hinaꞌ woriꞌ toaꞌ merapiꞌ hingkeꞌna hawaꞌhi rahi morue i paweoha tiꞌo alaꞌ hawaꞌi uwaꞌ to mohidaꞌi ka parawo. Katoꞌo kipehohongkeꞌ nolou pe bolaꞌ Peniꞌ. Tungkaihara hingkeꞌna mampekauka koliuna tempo mepoholeꞌ itoꞌo. I Peniꞌ tiꞌo iomo paweoha kapalaꞌ tahiꞌ to i woiꞌ Kreta to moromiꞌ nipaweohi i tempo mepoholeꞌ, alaꞌ tehidaꞌi hangkiuꞌ ka parowo.
Parowo to makaja i tahiꞌ
13 I tempo tiꞌo, moromiꞌ peparowone ka selata. Io horiana, motuntuni pahuara topajama i kapalaꞌ tahiꞌ, wadiluka mampololiu patengkaꞌki. Iomo hinaꞌ besi popotahana kapalaꞌ tahiꞌ a tiꞌo niꞌoreꞌmo, hei kapalaꞌki matengkaꞌ mampebota nturusi i leowuta Kreta. 14 Angkana, handoaꞌi tene morue katoꞌo, meparowomo to makaja ka tinaꞌ motoꞌando. Iomo horiana nikokeneꞌi parowo Mata ando. 15 Nokomi kohawaꞌna nobiaꞌ kapalaꞌ tahiꞌ mohinoroi parowo ngkodeꞌ, iomo horiana kipotedehi romo nopotio parowo. 16 Poliungki i leowuta to kokiuꞌ to nikokeneꞌi Kauda, tehidaka hangkiuꞌ ka parowo. I tempo tiꞌo, kipasimuku mobiniꞌ haꞌanu duanga to kokiuꞌ to biasana roruiꞌ kapalaꞌ tahiꞌ, to nitiꞌi sekoci. 17 Duanga to kokiuꞌ tiꞌo, kihinimo pe womboꞌna kapalaꞌ tahiꞌ hei kihiluꞌ maroho. Uko tiꞌo, kapalaꞌki rohiluꞌ hante koloroꞌ hingkeꞌna nomaroho. Morokaꞌhi topajama alaꞌ kapalaꞌ hingkiꞌ hiruntui i woꞌoni Sirti i koꞌohiana uwai to dodungku i woiꞌ Libia. Iomo horiana bambaruꞌna kapalaꞌki nipopengkohou hei ropotedehi noparowohi.
18 Nokomi parowo ngkodeꞌ hei ura, iomo horiana poꞌonina mampelukamohi motube komiana kapalaꞌ pe lali tahiꞌ, hingkeꞌna nomonangkoꞌ. 19 Kotolu andona womo, parewana kapalaꞌ ropelubaꞌ pe lali tahiꞌ. 20 Bahaꞌumbo andoꞌi, hawaꞌka pangkiꞌ wantana ando hante betueꞌ, hei hawaꞌi uwaꞌ kopodaꞌne ura. Horiana masusamo lalingki, hei kipekiri hingkiꞌ pahuaka komarugiꞌ.
21 Alaꞌ koworiꞌna jamara i lali kapalaꞌ tahiꞌ, hawaꞌhi hampaka' mangka. Mepongka katoꞌo, metotiꞌimo hi Paulu i lumbura, pampatiꞌikihi, “Halali-halali, ane keꞌipoꞌohikei lolitangka hampiha hingkeꞌna inioꞌki molai ka Kreta, kehawaꞌki waheꞌe. 22 Angkana hinewowoꞌena kutiꞌikikei, ipokarohokei lalimi! Alaꞌ ka lumbunta hawaꞌi howeꞌ haduo to hingkiꞌ mahi. Bateꞌnalu kapalaꞌ tahiꞌ hieꞌe to hingkiꞌ marugiꞌo. 23 Alaꞌ hiwowini, Pueꞌ Ala to kupenombai hei to morewahiꞌa, morumbaꞌmo malaꞌekana pe aku. 24 Notiꞌi malaꞌeka tiꞌo waheꞌe, ‘Paulu, inioꞌko morokaꞌ. Alaꞌ hangangaa bateꞌmu nolou pe Datu ngkodeꞌ. Hei nokomi komarimana Pueꞌ Ala pe ingko, lekiꞌ-lekiꞌna toaꞌ i lali kapalaꞌ tahiꞌ hieꞌe hingkiꞌ salamaꞌhi woꞌo.’ 25 Iomo hinaꞌ hangangaa ipokarohokei lalimi. Alaꞌ kupoꞌohi hapo to Notiꞌikiꞌa Pueꞌ Ala, bateꞌna hingkiꞌ mewali. 26 Angkana kapalaꞌ tahiꞌ hieꞌe monontomo kohingkiꞌ tetuhune i haꞌanu leowuta.”
27 Hampuluꞌ iba minimo, kapalaꞌki noparowohi nturusi parowo to makaja i tahiꞌ Adaria. Halumbu wini, topajamana kapalaꞌki pahorihi balumba mopalupaꞌ i botana. Robahaꞌmo kohawaꞌramo moꞌela ka lerina. 28 Iomo horiana haꞌanu watu popehukaꞌ roꞌulumo pe tahiꞌ hingkeꞌna robahaꞌi kokuladune. Kokuladuna tiꞌo, kira-kira iba mpuluꞌ meteꞌ. Uko tiꞌo, roꞌulu womo wute toꞌu, tolu mpuluꞌ meteꞌ romo kokuladune. 29 Motehuꞌmohi topajamane kapalaꞌki alaꞌ ropekiri hingkiꞌ moripoꞌka watu hante rangka. Iomo hinaꞌ iba onu besi popotaha roꞌulu pe lali uwai i tundu, hingkeꞌna notetaha kapalaꞌki, hei kikodokoꞌimo hingkeꞌna nohohiꞌ ando. 30 Mepongka katoꞌo, topajamahi i kapalaꞌki dokoꞌhi mehilai ngkawowuni ka kapalaꞌ. Hantoniꞌ nolouhi moꞌulu besi popotaha i tutuꞌ kapalaꞌ, hantaro mampopengkohouhi wora duanga to kokiuꞌ pe tahiꞌ. 31 Angkana noꞌokiꞌ hi Paulu hapo to rowali tiꞌo, iomo horiana notiꞌikihi tadulako hante surodaduna, “Ane topajama tiꞌo mampolihi kapalaꞌ tahiꞌ hieꞌe, hawaꞌkei hingkiꞌ tuwuꞌ!” 32 Katoꞌo surodadu tiꞌo mopudiꞌmo pohiluꞌna duangara to kokiuꞌ, koꞌukoana duanga tiꞌo monawuꞌ pe tahiꞌ.
33 Hingkiꞌ meluamo ando, hi Paulu mantiꞌi, “Hangangaa mangkakei lekiꞌ-lekiꞌmi! Hampuluꞌmo iba ando ipekaukei hapo to hingkiꞌ mewali. Handoaꞌkei mangka hapo-hapo. 34 Iomo hinaꞌ kutiꞌikikei, hangangaa mangkakei duluna, hingkeꞌna marohokei. Alaꞌ hawaꞌkei hingkiꞌ mahampo-hampo, hingkiꞌ salamaꞌkei lekiꞌ-lekiꞌmi.” 35 Koꞌukona hi Paulu mololita hatoꞌo, moroamo depa hei mekokae moꞌawerasiꞌ pe Pueꞌ Ala i hinarona lekiꞌ-lekiꞌna toaꞌ. Depa tiꞌo nohepoꞌ katoꞌo noꞌoka. 36 Korohorina toaꞌ tiꞌo lolitane, marohomo huliꞌ lalire, honiꞌi mangkamohi woꞌo. 37 Lekiꞌ-lekiꞌna toaꞌ to uwaꞌ i lali kapalaꞌ tahiꞌ tiꞌo, koworiꞌra 276 duo. 38 Koꞌukora mangka wute wohu, mampelubaꞌ womohi gandum pe tahiꞌ. Tungkaihara, hingkeꞌna mononangkoꞌi kapalaꞌ tiꞌo.
Kapalaꞌ tahiꞌ tetaha i woꞌoni
39 I koborongkokahanalu, topajamana kapalaꞌ tahiꞌ pangkiꞌmohi lorina, angkana hawaꞌi robahaꞌ konaꞌne woiꞌ tiꞌo hei pangkiꞌmohi woꞌo tahiꞌ to notuleliꞌi woiꞌ, hei botana hawaꞌi mowatu-watu. Iomo horiana uwaꞌ tungkaihare hingkeꞌna ane hohumboꞌi, ropetuhuki kapalaꞌre i koꞌohiana. 40 Lekiꞌ-lekiꞌna koloroꞌ, besi popotaha ropudiꞌmo, hei besi popotahana tiꞌo ropotedehi i lali tahiꞌ. I tempo tiꞌo woꞌo, koloroꞌ to mohiluꞌ poweona kapalaꞌ tahiꞌ roꞌuweꞌmo, hingkeꞌna kapalaꞌ tahiꞌ hohumbo roweo. Bambaruꞌna kapalaꞌki rohoimo i hinarona hingkeꞌna monontomo patengkaꞌki nolou pe lorina. 41 Angkana kapalaꞌki tetahamo i koꞌohiana, koꞌukoana lebaꞌmo. Tinaꞌ i lelona kapalaꞌki morutumo, nopolupaꞌ balumba tahiꞌ to kodeꞌ.
42 Tempo tiꞌo, uwaꞌ tungkaihare surodadu hingkiꞌ morokoꞌ lekiꞌ-lekiꞌna toaꞌ to nitarungkuꞌ to rokomi, hingkeꞌna hawaꞌhi uwaꞌ to meloluꞌu nolou pe lorina hei mehilai. 43 Angkana notahahi tadulakora, hingkeꞌna hi Paulu hawaꞌi ropoharokoꞌa. Iomo hinaꞌ norumbaꞌ toaꞌ to robahaꞌ meloluꞌu melihaꞌ medulu pe tahiꞌ hei meloluꞌu nolou pe lorina. 44 Uko tiꞌo, norumbaꞌmohi toaꞌ to hawaꞌi pobahaꞌ meloluꞌu moroa lobo ba kopiheꞌana kapalaꞌ tahiꞌ hingkeꞌna ropakeꞌi meloluꞌu nolou pe lorina. Iomo horiana lekiꞌ-lekiꞌra wutehi i lorina.