Hi Paulu mololita i hinarora toYahudi
22
1 Notiꞌi hi Paulu, “Umoꞌ-umoꞌ, halali-halali kupemai, Ipehoromuaꞌakei! Hingkiꞌ mololitaꞌa hante to totuꞌuna.”2 Korohorinalu toaꞌ to woriꞌ hi Paulu mololita i lali wiharora, monondiiꞌhi. Katoꞌo nopololiumo hi Paulu lolitane notiꞌi, 3 “Aku hieꞌe to Yahudiꞌa. Bolaꞌ konipoꞌanaꞌangkiku, i Tasu i woiꞌ Kilikia, angkana ka kokokiuꞌangku tene, meꞌohaꞌmoꞌa i hieꞌe i Yerusale. Mosikolaꞌa iseꞌe, nopaguruꞌa moromiꞌ haduo guru to niꞌadaꞌi mpololeke. Konaꞌna hi Gamalie. Io mampoturuꞌa lekiꞌ-lekiꞌna hawaꞌ to nopaꞌaniki hi Musa i tododulunta hampiha. Modotoꞌa mpololeke mampetuntui lekiꞌ-lekiꞌna aturana Pueꞌ Ala, hibali woꞌo ingkei. 4 Hampiha kupoperima-rimahi toaꞌ to mampetuntui poturuꞌna hi Yesu. Uwaꞌ to kurokoꞌo. Uwaꞌhi woꞌo to kuhokiꞌ hei to kutarungkuꞌ, moromiꞌ tomaꞌani moromiꞌ towoweꞌe. 5 Tadulako Mpenomba ngkodeꞌ hei lekiꞌ-lekiꞌna tadulako agama, robahaꞌ komaniuꞌne lolitangku hieꞌe. Hawaꞌa mowuti, alaꞌ hampiha iomohi to mampaꞌaniꞌa suraꞌ kuasaꞌ to mampoliuꞌa nolou pe halalinta toYahudi i kota Damasi. Alaꞌ tungkaihana suraꞌ tiꞌo horiana nolouꞌa pe Damasi, ako mohokiꞌ tosarani to uwaꞌ itoꞌo, hei kukomihi pe Yerusale hingkeꞌna nihukuhi.”
Hi Paulu mampowute hohumbo
6 I ando patengkaꞌangku, pasi pohoꞌando dodungku i kota Damasi, hangkaꞌ-hangkaꞌ romo uwaꞌ to mewanta ka laniꞌ to motuleliꞌiꞌa. 7 Modungkaꞌa, hei pahoriꞌa loaꞌ to mantiꞌi, “Saulu, Saulu, mahamporeꞌi hinaꞌ ipoperima-rimaꞌA?”
8 Katoꞌo meꞌitanoꞌa, “Himoko, Pueꞌ?”
Nohoniꞌa, “Akumola hi Yesu toNasareꞌ to ipoperima-rima.” 9 Awangku pangkiꞌhi woꞌo to mewanta tiꞌo, angkana hawaꞌi robahaꞌ hapo to notiꞌi loaꞌ tiꞌo.
10 Uko tiꞌo, Kutiꞌi, “Pueꞌ, hapo to hangangaa kuwali?”
Nohoniꞌa Pueꞌ, “Meꞌaromoko hei nolouko pe kota Damasi. Itoꞌo hingkiꞌ nipowutekiko lekiꞌ-lekiꞌna hapo to Nokodokoꞌi Pueꞌ Ala hingkiꞌ iwaliꞌi.” 11 Alaꞌ wanta to hingkenia, mokorindimo peꞌoꞌelengka. Iomo horiana rorandaꞌa awangku wute i kota Damasi.
12 I Damasi, uwaꞌ haduo tomaꞌani to nikokeneꞌi hi Anania. Io toaꞌ to mononto, hei maroho petuntune i hawaꞌna hi Musa. Io roꞌadaꞌi lekiꞌ-lekiꞌna toYahudi to meꞌohaꞌ i Damasi. 13 Humeimo hi Anania metotiꞌi i hiringku, notiꞌi, “Halalingku Saulu, pangkiꞌmoko huliꞌ!” I tempo tiꞌo woꞌo, pangkiꞌmoꞌa mpuꞌu, hei hi Anania kuꞌokiꞌmo. 14 Uko tiꞌo notiꞌi womo hi Anania, “Pueꞌ Ala to ropenombai tododulunta hampiha moꞌuwiꞌko hingkeꞌna ibahaꞌi hapo peleihaNe. Noꞌuwiꞌko hingkeꞌna iꞌokiꞌi hi Yesu, surona Pueꞌ Ala to moromiꞌ, hei hingkeꞌna ihoriꞌi loaꞌna Yesu. 15 Ingkomo to hingkiꞌ mewali sabiꞌNe hingkeꞌna ipowutekihi pe lekiꞌ-lekiꞌna toaꞌ hapo to iꞌokiꞌi hei to ihorimo noniuꞌ Aku. 16 Mewaliꞌ, hapo tene to ipekauno? Metotiꞌimoko hei noloumoko niriu. Mekokaemoko pe Pueꞌ Yesu hingkeꞌna dosamu Noꞌampunikiko.”
Hi Paulu mampowute Boona Pueꞌ pe to handoꞌiohi toYahudi
17 “Katoꞌo, mahuliꞌmoꞌa humei pe Yerusale, hei kolentuꞌangku mekokae i tambina Pueꞌ Ala, kuꞌokiꞌmo halangkaꞌ peponoꞌokiꞌi. 18 Kuꞌokiꞌ Pueꞌ Yesu, Nopantiꞌikiꞌa, ‘Hohiꞌmoko molai ka Yerusale, alaꞌ tumpu bolaꞌ Yerusale hawaꞌhi mantorimo hapo to ipowutekihi noniuꞌ Aku.’
19 Mehoniꞌa: ‘Pueꞌ, robahaꞌlu waliangka hampiha. Robahaꞌlu hohumbo pekahingka pe tambi penombaha mohokiꞌ hei mokondo-kondohi toaꞌ to mepoꞌohi pe Ingko. 20 Hatoꞌo woꞌo, i tempona sabiꞌMu hi Stepanu rorokoꞌ, uwaꞌa woꞌo itoꞌo hei kupotanaꞌ kororokoꞌne. Akumo to mampoꞌodaꞌ baduꞌre to merorokoꞌ.’
21 Uko tiꞌo, Pueꞌ mampatiꞌikiꞌa womo, ‘Hangangaa molaiko, alaꞌ Kurumbaꞌko nolou pe woiꞌ to moꞌela, pe toaꞌ to handoꞌiohi toYahudi.’ ”
22 Mondiiꞌhi toaꞌ to woriꞌ mampehoromua hi Paulu mololita. Angkana konotiꞌina hingkiꞌ nolou pe toaꞌ to handoꞌiohi toYahudi, moloaꞌ-loaꞌmohi ropokobue rotiꞌi, “Nirokoꞌmolu! Hawaꞌi uwaꞌ dumbuꞌne tuwuꞌ!” 23 Moloaꞌ-loaꞌmohi hei mampelubaꞌhi kumbara. Mampehoworihi awu pe raoha nokomi kobukotara. 24 Iomo horiana tutuꞌ tadulakona surodadu tiꞌo morumbaꞌmo surodaduna mangkomi hi Paulu mekahi pe lali tambina surodadu Roma, hingkeꞌna kolentuꞌana roparesaꞌ rokondo woꞌo hingkeꞌna robahaꞌi pongkane hapo to ropokoiꞌkihi toYahudi.
25 Dongkaꞌmohi itoꞌo, rohiluꞌmo hi Paulu hingkeꞌna rokohiaꞌi uko tiꞌo, mololitamo hi Paulu pe haduo tadulako surodadu to uwaꞌ i hirina, notiꞌi, “Wadireꞌi haduo toRoma nikohiaꞌ ane handoaꞌi tene niparesaꞌ hei nibutusi kara-karane?”a
26 Konohorina surodadu lolitane tiꞌo, noloumo pe tutuꞌ tadulakona surodadu mantiꞌi, “Tua, mahamporeꞌi hinaꞌ irumbaꞌka mokohiaꞌ toaꞌ tiꞌo? Toaꞌ tiꞌo iomo toRoma!”
27 Katoꞌo, tutuꞌ tadulakona surodadu tiꞌo nolou pe hi Paulu, nopeꞌitanoki, “Itiꞌikiꞌa, ba tuꞌu mpuꞌu to Romako?”
Mehoniꞌ hi Paulu, “Tuꞌu mpololeke.”
28 Notiꞌi tutuꞌ tadulakone surodadu tiꞌo, “Masuliꞌ kokubaiarine i topoparenta, hingkeꞌna mewaliꞌa toRoma.”
Mehoniꞌ Hi Paulu, “Angkana aku hieꞌe, mewaliꞌa toRoma mepongka ka konipoꞌanaꞌangkiku.”
29 Uko tiꞌo, surodadu to hingkiꞌ moparesaꞌ hi Paulu maꞌoruꞌmohi, hei morokaꞌmo woꞌo tutuꞌ tadulakone surodadu tiꞌo, alaꞌ io to morumbaꞌhi mohiluꞌ hi Paulu, hantarowae hi Paulu tiꞌo toRoma.
Hi Paulu i hinarora Ampiꞌ-Ampiꞌna Topotiko Atura Agama Yahudi
30 Tutuꞌ tadulako surodadu tiꞌo dokoꞌ pobahaꞌ ba hapo mpuꞌu salaꞌne hi Paulu horiana rosalaꞌi toYahudi. Iomo horiana poꞌonina, nowowoihi lekiꞌ-lekiꞌna tutuꞌ-tutuꞌ tadulako mpenomba hante Ampiꞌ-ampiꞌna Topotiko Atura Agama Yahudi ntaniꞌna hingkeꞌna morampuhi. Uko tiꞌo, hi Paulu nipasuwumo ka petarungkuꞌa hei rokomi nolou pe hinarora.