Hi Peturuꞌ hante hi Kornelius
10
1 I kota Kaisarea, uwaꞌ haduo tomaꞌani to nikokeneꞌi hi Kornelius. Hi Kornelius tiꞌo, haduo tadulako surodadu to motadulakoi hanatu surodadu Italia. 2 Io handoꞌio toYahudi, angkana kehapoꞌi watoꞌo, mengkoruꞌ mpuꞌu pe Pueꞌ Ala, hei lekiꞌ-lekiꞌna toaꞌ to uwaꞌ i tambina menombahi woꞌo pe Pueꞌ Ala. Woriꞌ doiꞌne hi Kornelius nopepaꞌaniki pe toYahudi to merima-rima, hei io mekokae nturusi pe Pueꞌ Ala. 3 I hampiha tempo, kira-kira tenteꞌ tolu kononewa, uwaꞌ to noꞌoki i lali peponoꞌokiꞌi. To noꞌoki iomo haduo malaꞌekana Pueꞌ hupaꞌ hei mowowoi, notiꞌi, “Kornelius!”4 Hi Kornelius morokaꞌ mampeꞌele malaꞌeka tiꞌo, notiꞌi, “Mahamporeꞌi Pueꞌ?”
Mehoniꞌ malaꞌeka tiꞌo, “Nohorimo Pueꞌ Ala pekokaemu, hei Nobahaꞌ kopopuhiꞌna lalimu mosulungi toaꞌ to merima-rima. Hei Noponindiko nturusi. 5 Hinewowoꞌena, irumbaꞌmohi bahaꞌumbo duo nolou pe Yope mowowoi humei haduo toaꞌ to rokokeneꞌi hi Simo Peturuꞌ. 6 Peꞌohaꞌana dodungku i bota ntahiꞌ i tambina haduo toaꞌ to rokokeneꞌi woꞌo hi Simo. Jamana toaꞌ tiꞌo, mowali mampopengaa ka koliꞌ pinatuwuꞌ.”
7 Kopolainalu malaꞌeka tiꞌo, hi Kornelius liu mowowoi roduo surona hante haduo surodadu to nopoꞌohi. Surodadu tiꞌo mengkoruꞌ woꞌo pe Pueꞌ Ala. 8 Hi Kornelius mampowute pe iohi hapo to ka noꞌoki hei Nohori, honiꞌi norumbaꞌmohi nolou pe kota Yope.
9 Poꞌonina, kira-kira pohoꞌando, kolentuꞌara matengkaꞌ dodungku i Yope, hi Peturuꞌ meponeꞌ pe womboꞌ tambi to marante dopiꞌna, ako mekokae. 10 Hawaꞌi morue katoꞌo, hi Peturuꞌ dokoꞌmo mangka alaꞌ biloramoꞌi. Angkana, kolentuꞌana mampekau kolehaꞌna pangka, hangkaꞌ-hangkaꞌ romo niponoꞌokiꞌi. 11 I lali peponoꞌokiꞌi tiꞌo, noꞌokiꞌmo laniꞌ teweaꞌ hei uwaꞌ to hibali wida to koroba. Wida to koroba tiꞌo mengkalohohoi iba mpolohu, mengkaraꞌulu wute i woiꞌ. 12 I lali wida tiꞌo, molangkaꞌ-langkaꞌ pinatuwuꞌ: uwaꞌ to mokapuꞌ iba, to menondae, hei uwaꞌ woꞌo tinti-tinti to moꞌilo. 13 Uko tiꞌo, nohorimo loaꞌ to mantiꞌi, “Peturuꞌ! Metotiꞌimoko, irereꞌmo pinatuwuꞌ tiꞌo hingkeꞌna iꞌokaꞌi.”
14 Angkana mehoniꞌ hi Peturuꞌ, “Hawaꞌi Pueꞌ! Pinatuwuꞌ to uwaꞌ i wida tiꞌo hawaꞌi kono kiꞌoka motuntuni adaꞌ agamangki. Hapona lekemo handoaꞌi howeꞌ hampiha kuꞌoka pinatuwuꞌ to nikobinteꞌ ba nikopalia motuntuni adaꞌ agamangki.”
15 Notiꞌi womo loaꞌ tiꞌo korompihana pe hi Peturuꞌ, “Hapo to notiꞌi Pueꞌ Ala wadi iꞌoka, inioꞌ ikopaliꞌi.” 16 Peponoꞌokiꞌi tiꞌo tolu mpiha mewali, hei uko tiꞌo, teꞌoreꞌmo huliꞌ wida tiꞌo pe laniꞌ.
17 Katoꞌo nopowulimo hi Peturuꞌ hapo palaihane peponoꞌokiꞌi tiꞌo. Kolentuꞌana mampekiri hampale hupaꞌhi surone hi Kornelius ka kota Yope. Iohi mampeꞌitanoki tambina hi Simo. 18 Katoꞌo rowowoi haduo rotenei, “Uwaꞌreꞌi iseꞌe haduo tolori to nikokeneꞌi hi Simo Peturuꞌ?”
19 Katoꞌo, kolentuꞌana hi Peturuꞌ mampekiri hapo palaihane peponoꞌokiꞌi tiꞌo, Inohaꞌ Mangkolehi mampokononto pe io, “Pehoromua, uwaꞌhi tolu tomaꞌani to humei mampaliꞌko. 20 Hohiꞌko mengkohou. Inioꞌko motehuꞌ metuntu pe iohi, alaꞌ Aku to morumbaꞌhi.” 21 Katoꞌo hi Peturuꞌ mengkohoumo ka tambi tiꞌo, hei nopetiꞌiki pe to hongkoꞌ hupaꞌ tiꞌo, “Akumola to ipaliꞌkei. Hapo tungkaihamio?”
22 Mehoniꞌhi, “Tua Kornelius to morumbaꞌka humei iseꞌe. Io toaꞌ to moromiꞌ lalina. Io mengkoruꞌ pe Pueꞌ Ala, hei noꞌadaꞌi woꞌo lekiꞌ-lekiꞌna toYahudi. Haduo malaꞌekana Pueꞌ morumbaꞌi mowowoiko nolou pe tambina, hingkeꞌna nopehoromuaꞌi hapo to hingkiꞌ ipowutekiꞌi.”
23 Uko tiꞌo, hi Peturuꞌ mokonto surona hi Kornelius mohamini itoꞌo. Katoꞌo Haminimohi mpuꞌu itoꞌo.
Poꞌonina mihoꞌolu, mangkolodohimo hi Peturuꞌ honiꞌi molai moꞌawa-awa hante iohi nolou pe bolaꞌ Kaisarea. Hei uwaꞌ woꞌo haꞌumbora duo halali hampepoꞌohira ka Yope to nolouhi moꞌawa-awa. 24 I haꞌandona honiꞌhi hupaꞌ i Kaisarea. Kohupaꞌnalu i tambina hi Kornelius morampumohi mampekauꞌi. Uwaꞌ woꞌo tinora hante bolena to nowowoi hi Kornelius hingkeꞌna morampuhi i tambina. 25 Ikohupaꞌna hi Peturuꞌ i tambina, hi Kornelius nolou mampohidupaꞌkiꞌi, katoꞌo liu melingkotuꞌ hei metoungkaꞌ i kapuꞌna hi Peturuꞌ menomba pe io. 26 Angkana hi Peturuꞌ mampopetotiꞌi honiꞌi notiꞌiki, “Metotiꞌimoko. Aku hieꞌe toaꞌ biasaluꞌa, hibali hante ingko.” 27 Kolentuꞌara mololita, io mekahimo pe lali tambi. Noꞌele hi Peturuꞌ woriꞌmo toaꞌ to morampu itoꞌo. 28 Notiꞌikihi hi Peturuꞌ, “Ibahaꞌlukei, motuntuni atura agamangki, ingka toYahudi hawaꞌka wadi mampohintuwuꞌki toaꞌ to handoꞌiohi toYahudi ba mekahi i lali tambira. Angkana uwaꞌ to nopetidoꞌki Pueꞌ Ala pe aku hampiha to mampokonontokiꞌa hawaꞌi wadi mampopoꞌoriꞌori toaꞌ to mewali awanta. 29 Iomo horiana koꞌiwowoingku hawaꞌi kulewai. Hinewowoꞌena kupehupaꞌi, alaꞌ kukodokoꞌi kubahaꞌ hapo tungkaihama mowowoiꞌa humei.”
30 Mehoniꞌmo hi Kornelius, notiꞌi, “Iba ando to liu, kira-kira i tempo to hibali hante hieꞌe, kolentuꞌaku mekokae i tambingku tenteꞌ tolu kononewa, hangkaꞌ-hangkaꞌ romo uwaꞌ haduo tomaꞌani to metotiꞌi i hinarongku. Baduꞌna manakiꞌ-nakiꞌ. 31 Notiꞌi toaꞌ tiꞌo, ‘Kornelius, Pueꞌ Ala mampehoromuamo pekokaemu hei Noꞌokiꞌmo kopopuhiꞌna lalimu. 32 Irumbaꞌmo toaꞌmu nolou pe kota Yope mowowoi haduo toaꞌ to nikokeneꞌi hi Simo Peturuꞌ. Peꞌohaꞌana dodungku i bota ntahiꞌ i tambina hi Simo to mowali mampopengaa ka koliꞌ pinatuwuꞌ.’ 33 Iomo hinaꞌ hohiꞌ kurumbaꞌ toaꞌ nolou mowowoiko. Hei moromiꞌ mpuꞌu lalima, alaꞌ humeiko iseꞌe i ingka. Iomo hinaꞌ morampumoka iseꞌe i hinarona Pueꞌ Ala, alaꞌ kikodokoꞌi kipehoromua lekiꞌ-lekiꞌna to norumbaꞌkiko Pueꞌ Ala hingkeꞌna ipowuteꞌi.”
Lolitana hi Peturuꞌ pe hi Kornelius
34 Mepongkamo hi Peturuꞌ mololita notiꞌi, “Hinewowoꞌena kubahaꞌmo Pueꞌ Ala hawaꞌi mampopontaniꞌ toaꞌ. 35 Himolu to mengkoruꞌ pe Pueꞌ Ala hei to mononto waliara, bateꞌna notorimo Pueꞌ Ala, hei hawaꞌi mpuꞌu Nopopoꞌori-ori kehapoꞌi ba to ka imbolu. 36 Mononto ibahaꞌmokei mpololeke Kareba Moromiꞌ to nopowute Pueꞌ Ala pe ingka toSareili, Kareba Moromiꞌ to mampohintuwuꞌki hante Pueꞌ Ala moliu i Yesu Kerisitu. Hi Yesu tiꞌo iomo Pueꞌna lekiꞌna toaꞌ. 37 Ibahaꞌmokei mpololeke hapo to mewali i humanele woiꞌ Yudea mepongka ka Galilea ikoꞌukona hi Yohanes moriu toaꞌ to mengkatobaꞌ ka dosara. 38 Ibahaꞌmokei hi Yesu toNasareꞌ, Iomo to noꞌuwiꞌ Pueꞌ Ala hei Nopaꞌani Inohaꞌ Mangkolehi hante kuasaꞌ. I umbo-umbolu patengkaꞌana i woiꞌra toYahudi, Io mowali hapo to moromiꞌ, hei Io mampokoꞌoriꞌ lekiꞌ-lekiꞌna toaꞌ to nopoperima-rima Belisiꞌ alaꞌ Io nopoꞌowoni Pueꞌ Ala. 39 Ingkamo hieꞌe to mewali sabiꞌ lekiꞌ-lekiꞌna to Nowali i woiꞌra toYahudi wute i kota Yerusale. Koꞌukoana, hi Yesu tiꞌo nirokoꞌ hei mahi hante lala nipaku i loti momehulepe. 40 Angkana i ando katolu, Pueꞌ Ala mampopeꞌaroꞌI huliꞌ ka komahia, hei Nopotongawa wotaNe pe toaꞌ. 41 Hi Yesu hawaꞌi mampomombaha wotaNa pe lekiꞌ-lekiꞌna toaꞌ, bateꞌnalu ingka topeguruNaka to umbiꞌ noꞌuwiꞌmo Pueꞌ Ala mewali sabiꞌNa. Hei i kotuwuꞌna huliꞌ hi Yesu, maꞌinu hei mangkaka moꞌawa-awa hante Io. 42 Hei Norumbaꞌka mampowute Kareba Moromiꞌ pe lekiꞌ-lekiꞌna toaꞌ, hei mampololita koꞌIona mpuꞌu to noꞌuwiꞌ Pueꞌ Ala mewali Topobutusi lekiꞌ-lekiꞌna toaꞌ, moromiꞌ to tuwuꞌ tene, moromiꞌ to mahimo. 43 Lekiꞌ-lekiꞌna nabi hampiha mampololita noniuꞌ hi Yesu, rotiꞌi: hihimolu to mepoꞌohi pe Io, dosara hingkiꞌ teꞌampuni moliu i kuasaꞌNa.”
Toaꞌ to handoꞌio toYahudi pahuahi woꞌo Inohaꞌ Mangkolehi
44 I tempona hi Peturuꞌ mololita, mengkohoumo Inohaꞌ Mangkolehi pe lekiꞌ-lekiꞌna toaꞌ to mampehoromua lolitana. 45 Ropohoko lekiꞌ-lekiꞌna toYahudi to mepoꞌohi pe hi Yesu to mampoꞌawa hi Peturuꞌ ka Yope, alaꞌ toaꞌ to handoꞌiohi toYahudi pahuahi woꞌo Inohaꞌ Mangkolehi. 46 Monontomo kopahuara Inohaꞌ Mangkolehi, alaꞌ mololitahi i wiharo to Nopaꞌanikihi Inohaꞌ Mangkolehi hei mampokodeꞌmohi Pueꞌ Ala. Katoꞌo, notiꞌimo hi Peturuꞌ, 47 “Ele! Toaꞌ hieꞌe nokuasaꞌihi Inohaꞌ Mangkolehi hibali to mewali i ingkiꞌ. Mewaliꞌ, hangangaa niriuhi woꞌo.” 48 Iomo hinaꞌ norumbaꞌhi hi Peturuꞌ hingkeꞌna niriuhi i lali konaꞌna hi Yesu Kerisitu. Uko tiꞌo, hi Kornelius hante awana mamperapiꞌ pe hi Peturuꞌ hingkeꞌna holampiꞌi dulu moꞌawa-awa hante iohi bahaꞌumbo mini.