Suro 4

Hi Peturuꞌ hante hi Yohanes i hinarona tadulako agama

1 Kolentuꞌara tene hi Peturuꞌ hante hi Yohanes mepoturuꞌ toaꞌ i Tambina Pueꞌ Ala, hupaꞌmohi haꞌumbora duo tadulako mpenomba hante toSaduki hei tadulakora topampodaꞌ Tambina Pueꞌ Ala mampohidupaꞌkihi. 2 Katoꞌo bukotahi pe hi Peturuꞌ hante pe hi Yohanes, alaꞌ iohi mampekarebaikihi pe toaꞌ to woriꞌ noniuꞌ i kotuwuꞌna huliꞌ hi Yesu ka komahia. Hei pepoturuꞌra tiꞌo, mampokonontokihi woꞌo kotuwuꞌna huliꞌ to mahi. 3 Iomo horiana suro to roduo tiꞌo nipangkuhi hante ropopekahi i lali petarungkuꞌa. Alaꞌ tempo tiꞌo winimo, io hina nitahahi itoꞌo wute mehoꞌolu. 4 Angkana toaꞌ-toaꞌ to mampehoromua pepoturuꞌra suro to meroduo tiꞌohi i Tambina Pueꞌ Ala, woriꞌ to mepoꞌohi pe hi Yesu, horiana terononihi koworiꞌre mewali 5.000 duo tomaꞌani.

5 Kopoꞌonina tadulakora toYahudi hei tomotodira toYahudi hante guru-guru agama morampuhi i Yerusale. 6 Uwaꞌhi woꞌo i pogomboa tiꞌo, Tadulako Mpenomba Ngkodeꞌ konaꞌna hi Hana hante tinona iomo hi Kaipa, hi Yohanes, hi Alesande hante tinona to ntaniꞌna. 7 Hirampuhi lekiꞌ-lekiꞌra, honiꞌi rorumbaꞌmo toaꞌ moroa hi Peturuꞌ hante hi Yohanes rokomi pe hinarora. I kohupaꞌra, haduo ka lumbura tadulako tiꞌo meꞌitanomo pe hi Peturuꞌ hante pe hi Yohanes, notiꞌi, “Hohumbo hinaꞌ nibiaꞌ mampokoꞌoriꞌ tokohu tiꞌo? Ka imbo rohomi, hei hihimo to mampaꞌanikei kuasaꞌ mowali tiꞌo?”

8 Mololitamo hi Peturuꞌ hante kuasaꞌna Inohaꞌ Mangkolehi, notiꞌi, “Tua-tua tadulako toaꞌ to woriꞌ hei tadulako agama! 9 Niparesaꞌka i ando hieꞌe alaꞌ pampokoꞌoriꞌki tokohu tiꞌo, hei ikodokoꞌikei woꞌo pobahaꞌ hohumbo komoꞌoriꞌne. 10 Kitiꞌikikei hante pe lekiꞌ-lekiꞌna halalinta toSareili, toaꞌ hieꞌe moꞌoriꞌmo hei nobiaꞌ metotiꞌi iseꞌe alaꞌ kuasaꞌna hi Yesu Kerisitu toNasareꞌ. Hi Yesu tiꞌo to ipakukei i loti momehulepe, angkana nopotuwuꞌ huliꞌ Pueꞌ Ala. 11 Iomo to notungkai i lolitane Suraꞌ Mangkolehi to mantiꞌi waheꞌe:

‘Uwaꞌ haꞌanu watu to notube topoꞌaro tambi,

hantaro watu tiꞌomola to mewali pahurahane tambi.’ ” \rq (Mas. 118:22)

12 Katoꞌo notiꞌi womo hi Peturuꞌ, “Hawaꞌi uwaꞌ lala ntaniꞌna to mepaꞌani kotuwuꞌ to wolaꞌ, bateꞌnalu moliu ka hi Yesu. Alaꞌ i humanele duniaꞌ hieꞌe, hawaꞌi uwaꞌ toaꞌ ntaniꞌna, bateꞌnalu hi Yesu to norumbaꞌmo Pueꞌ Ala, hante Iolu to nobiaꞌ mamposalamiꞌki ka pehuku dosanta.”

13 Hokomohi mpuꞌu tadulako tiꞌo pahori komapandera hi Peturuꞌ hante hi Yohanes mololita, alaꞌ hawaꞌhi motehuꞌ, hapo tene alaꞌ hi Peturuꞌ hante hi Yohanes toaꞌ biasalu to hawaꞌi mosikolaꞌ. Katoꞌo robahaꞌ tadulako tiꞌohi koꞌiora topeguruna hi Yesu hampiha. 14 Angkana tadulako tiꞌo hawaꞌi podehoꞌ mehoniꞌ, alaꞌ tokohu to nopokoꞌoriꞌ tiꞌo uwaꞌ woꞌo itoꞌo, metotiꞌi i hirira hi Peturuꞌ hante hi Yohanes. 15 Io hinaꞌ nipopesuwumohi surone Pueꞌ Yesu tiꞌo ka koniparesaꞌara, honiꞌhi mogombo, 16 rotiꞌi, “Hapo to hingkiꞌ towali pe toaꞌ to roduo tiꞌo? Alaꞌ lekiꞌ-lekiꞌna toaꞌ i Yerusale pobahaꞌ koꞌiora to mowali tandaꞌ kuasaꞌ to mekohohokoi tiꞌo. Hawaꞌi woꞌo wadi tosapuaka. 17 Angkana, hintoromoꞌi humalekiꞌna toaꞌ pahori, agina topototehuꞌhi hante toꞌopihi hingkeꞌna inioꞌhi mololita pe hihimolu noniuꞌ i hi Yesu.”

18 Uko tiꞌo, niwowoimohi hi Peturuꞌ hante hi Yohanes rotiꞌi, “Inioꞌkei mepoturuꞌ ba mantiꞌi konaꞌna hi Yesu.”

19 Mehoniꞌ hi Peturuꞌ hante hi Yohanes, rotiꞌi, “Ipekirikei hadoduomi umbona to nolei Pueꞌ Ala, motuntunika hawaꞌmi ba motuntunika hawaꞌna Pueꞌ Ala? 20 Alaꞌ hamboaꞌmoka mokobokia mampololita hapo to kiꞌokiꞌ hei to kihorimo.” 21 Katoꞌo makajamo kobukotare tadulako tiꞌo, honiꞌi mampototehuꞌhi hi Peturuꞌ hante hi Yohanes. Koꞌukoana nipolohoꞌmohi, alaꞌ hawaꞌi uwaꞌ kototuꞌuane hingkiꞌ mohukuhi, hei alaꞌ motehuꞌhi pe toaꞌ woriꞌ to mampokodeꞌ Pueꞌ Ala, alaꞌ tandaꞌ kuasaꞌ to rowali hi Peturuꞌ hante hi Yohanes. 22 Toaꞌ tiꞌo moꞌoriꞌ hante tandaꞌ kuasaꞌ to mepolomenia. Tinuwuꞌna tokohu tiꞌo lobimo iba mpuluꞌ ntoꞌana.

To mepoꞌohi pe hi Yesu merapiꞌ roho ka Pueꞌ Ala

23 Konipolohoꞌramo, hi Peturuꞌ hante hi Yohanes noloumohi mampohidupaꞌki awara, hei mampololitahi hapo to nitiꞌikihi tutuꞌ-tutuꞌ tadulako mpenomba hei tomotodira toYahudi. 24 Korohorina awara lolitare tiꞌo, mekokaemohi moꞌawa-awa pe Pueꞌ Ala, rotiꞌi, “Pueꞌ, Ingkomo to mowali laniꞌ hante woiꞌ hei tahiꞌ hante lekiꞌna ohina. 25 Moliu Inohaꞌ Mangkolehi Ingko to kahampiha mantiꞌi pe hi Daudi hawiꞌMu, tododulungki tiꞌo, honiꞌi io mololita, notiꞌi,

‘Mahamporeꞌi hinaꞌ bukota

toaꞌ to handoꞌio toYahudi?

Mahamporeꞌi hinaꞌ toaꞌ to woriꞌ

mowali tungkaiha to hawaꞌi modumbuꞌ?

26 Datu-datu i duniaꞌ mampatimomohi hingkiꞌ moponiꞌ.

Hatoꞌo woꞌo lekiꞌ-lekiꞌna topohawaꞌ,

hintuwuꞌhi hingkiꞌ moꞌewa Pueꞌ Ala

hante Datu Topohompoꞌ to Noꞌuwiꞌ.’ \rq (Mas. 2:1-2)

27 O Pueꞌ, tebuhoꞌimo mpuꞌu lolitane hi Daudi tiꞌo. Alaꞌ hampiha i lali kota hieꞌe, Datu Herode hante hi Pontius Pilatu hintuwuꞌhi moꞌawa-awa hante toaꞌ to woriꞌ, toSareili hei toaꞌ to handoꞌiohi toSareili. Pohintuwuꞌra tiꞌo, mangkodokoꞌi moꞌewa hi Yesu, hawiꞌMu to Mangkolehi to Iꞌuwiꞌ mewali Datu Topohompoꞌ. 28 Mobutusihi hingkeꞌna morokoꞌhi hi Yesu. Angkana to niwali tiꞌo mobuhoꞌi hapo to Ipokonontomo umbiꞌ, alana lekiꞌ-lekiꞌna mewali motuntuni kuasaꞌMu hante peleihaMu.

29 Pueꞌ, hinewowoꞌena Ihorimo lolitare toaꞌ to mampototehuꞌka! Mewaliꞌ kiperapiꞌ pe Ingko, ingka hawiꞌMu hieꞌe, hingkeꞌna Ipaꞌanika roho lali hingkeꞌna hawaꞌka motehuꞌ mampowute BooMu. 30 Pueꞌ, Iponoꞌokiꞌihi kuasaꞌMu, hei Ipaꞌanika kuasaꞌ ka hi Yesu, hawiꞌMu to Mangkolehi, hingkeꞌna kibiaꞌ mampokoꞌoriꞌ toaꞌ to mohakiꞌ hei mowali woriꞌ tandaꞌ to mepohele.”

31 Koꞌukonalu mekokae, mododua romo tambi to ropeꞌohaꞌi, hei nopekahihi Inohaꞌ Mangkolehi. Io hinaꞌ wuranimohi mpuꞌu mampowute Boona Pueꞌ Ala pe toaꞌ to woriꞌ.

To mepoꞌohi pe hi Yesu mohintuwuꞌ

32 Lekiꞌ-lekiꞌna toaꞌ to mepoꞌohi pe hi Yesu, mohintuwuꞌ hei hampekokirihi. Hawaꞌi uwaꞌ haduo to mantiꞌi, “Hituꞌe lumangka,” angkana lekiꞌ-lekiꞌna to uwaꞌ i iohi ropakeꞌ moꞌawa-awa. 33 I tempo tiꞌo surona Pueꞌ Yesu pahuamohi kuasaꞌ to kodeꞌ hingkeꞌna mampowutehi kotuwuꞌna huliꞌ Pueꞌ Yesu. Hei lekiꞌ-lekiꞌra pahuahi pebarakati to kodeꞌ mpololeke ka Pueꞌ Ala. 34 Hawaꞌi mpuꞌu uwaꞌ haduo to nokomakuraꞌi. Alaꞌ hihimolu to uwaꞌ woiꞌna ba tambina, mampobaluꞌ woiꞌ ba tambi tiꞌo, 35 hei doiꞌna rokomi nolou nipewei pe surona Pueꞌ Yesu, hingkeꞌna nidolaꞌ-dolaꞌkihi toaꞌ to mamparaluꞌi.

36-37 Watoꞌo woꞌo nowali hi Yusuf. Io mampobaluꞌmo woiꞌna, hante doiꞌ hilina nopaꞌaniki surona Pueꞌ Yesu. Hi Yusuf tiꞌo iomo haduo ka muleꞌna hi Lewi to meꞌohaꞌ i Siprus. Surona Pueꞌ Yesu mangkokoneꞌi woꞌo hi Baraba, palaihana: to mepododoli.