Hi Yesu nipandiriꞌ hibali hangkaru anggoroꞌ to tuꞌu
15
1 Kolentuꞌara matengkaꞌ, hi Yesu mampololiu womo lolitaNa, Notiꞌi, “Akumo hieꞌe hangkaru anggoroꞌ to tuꞌu, hei UmoꞌKu to morewahi. 2 Lekiꞌ-lekiꞌna daꞌangKu to hawaꞌi mowuaꞌ, Nopopolai, hei lekiꞌ-lekiꞌna daꞌangKu to mowuaꞌ, Noburehi hei Norewahi, hingkeꞌna tetambai powuaꞌne. 3 Ingkei, mobaromokei alaꞌ pahorikei poturuꞌ to Kupaꞌanikimokikei.4 Mohaꞌanumokei nturusi hante Aku. Ane iwalikei hatoꞌo, Aku woꞌo hingkiꞌ mohaꞌanu hante ingkei. Daꞌa to hawaꞌi medokiꞌ i karuna anggoroꞌ, hawaꞌi hohumbo mowuaꞌ. Bateꞌnalu daꞌa to medokiꞌ i karuna to hingkiꞌ mowuaꞌ. Hatoꞌo woꞌo ingkei: hawaꞌkei hohumbo mowali hapo-hapo ane hawaꞌkei mohaꞌanu hante Aku.
5 Akumola hieꞌe hangkaru anggoroꞌ, hei ingkeimo daꞌane. Toaꞌ to mohaꞌanu nturusi hante Aku, Aku woꞌo mohaꞌanu nturusi hante io, hei hingkiꞌ woriꞌ powuaꞌne. Angkana ane mekohelaꞌkei ka Aku, hawaꞌkei hohumbo mowali hapo-hapo. 6 Himo to hawaꞌi mohaꞌanu hante Aku bate'na nitube, hibali konitubena daꞌa to nipopolai wute mobani. Daꞌana tiꞌo nirampu hei nitube pe lali api. 7 Ane mohaꞌanukei nturusi hante Aku, hei lolitangKu lebaꞌ i lalimi, wadi iperapiꞌkei pe Pueꞌ Ala hapo peleimi, hei bateꞌna hingkiꞌ itorimokei. 8 Ane woriꞌ powuaꞌmi, UmoꞌKu nipokodeꞌmo hei mombahamo topeguruKukei mpuꞌu. 9 Aku mampokarimakei hibali hante komarimaNa UmoꞌKu pe Aku. Hei hinamo tuwuꞌkei mohaꞌanu hante Aku hingkeꞌna Kupokarimakei. 10 Kupetuntui hawaꞌne UmoꞌKu hei tuwuꞌA i lali komarimaNa. Hatoꞌo woꞌo, ane ipetuntuikei lekiꞌ-lekiꞌne hawaꞌKu, hingkiꞌ tuwuꞌkei woꞌo i lali komarimangKu.
11 Lekiꞌ-lekiꞌna hieꞌe Kutiꞌikikei, hingkeꞌna komotanaꞌKu uwaꞌ i lalimi, hei hingkiꞌ buhaꞌ komotanaꞌmi.
12 Hieꞌemo hawaꞌKa: momepokarimamokei, hibali woꞌo Aku mampokarimakei. 13 Hawaꞌi uwaꞌ rima to meliu kokodeꞌne ka rimana haduo toaꞌ to mampewei tuwuꞌna hingkeꞌna mohompoꞌ awanahi. 14 AwangKukei mpuꞌu, ane iwalikei hapo to Kuhawaꞌkikei. 15 Hamboaꞌmokei kutiꞌi hawiꞌKu, alaꞌ haduo hawiꞌ hawaꞌi pobahaꞌ hapo to i lali pekirina uweꞌna. Hinewowoꞌena, ingkeimo mpuꞌu awangKa, alaꞌ lekiꞌ-lekiꞌna to notiꞌikiꞌA UmoꞌKu Kupowutekimokikei. 16 Handoꞌio ingkei to moꞌuwiꞌA, angkana Aku to moꞌuwiꞌkei, hei Kupokonontomo hingkeꞌna akokei mampopatengkaꞌ jamangKu: hei wuaꞌ pajamami tiꞌo hingkiꞌ modumbuꞌ wute nantolou-louna. Hingkeꞌna hapo to iperapiꞌkei pe UmoꞌKu i lali konaꞌKu, bateꞌna mpuꞌu hingkiꞌ Nopaꞌanikikei. 17 Hampiha tene Kutiꞌikikei: Momepokarimamokei!”
Hi Yesu hante topeguruna nikabiriꞌhi
18 “Ane rokabiriꞌkei toaꞌ to hawaꞌi mepoꞌohi pe Aku, ikolowoikei: Akumo to medulu-dulu rokabiriꞌ. 19 Ane rapaꞌna mampoꞌawakei toaꞌ to hawaꞌi mepoꞌohi, bateꞌna ropokarimakei, alaꞌ awarakei. Angkana Kuꞌuwiꞌmokei hei Kupohohidamokei ka lumbura, hingkeꞌna hamboaꞌmokei ropoꞌawa, iomo horiana rokabiriꞌkei. 20 Iponindikei hapo to Kutiꞌikikei hingkenia: haduo topajama hawaꞌi meliu koniꞌadaꞌine ka tuana. Palaihana: alaꞌ Aku Pueꞌmi ropoperima-rimaꞌA, hapona tene ingkei. Ane iohi motuntuni lolitangKu, bateꞌra mampetuntui woꞌo lolitami. 21 Lekiꞌ-lekiꞌna tiꞌo hingkiꞌ rowali pe ingkei alaꞌ petuntumi pe Aku alaꞌ hawaꞌhi pobahaꞌ Pueꞌ Ala to morumbaꞌA. 22 Ane kehawaꞌA hupaꞌ hei mampoturuꞌhi, kehawaꞌhi woꞌo masalaꞌ alaꞌ korosapuakangKu. Angkana, alaꞌ hupaꞌmoꞌA mpuꞌu hei mampoturuꞌhi, iomo horiana hamboaꞌmo uwaꞌ lala mosapuaka komasalaꞌra. 23 Toaꞌ to mokabiriꞌA, hibalihi woꞌo mokabiriꞌ UmoꞌKu.
24 I lumbura toaꞌ to woriꞌ, Kuwali tandaꞌ kuasaꞌ to hawaꞌi tene rowali toaꞌ ntaniꞌna. Ane kehawaꞌi Kuwali hatoꞌo, kehawaꞌhi masalaꞌ alaꞌ korosapuakangKu. Angkana kehapoꞌi roꞌokiꞌ hapo to Kuwali, tontona rokabiriꞌA palaihana UmoꞌKu woꞌo rokabiriꞌ. 25 Angkana bateꞌna hatoꞌo, hingkeꞌna tebuhoꞌi hapo to teꞌukiꞌ i lali Suraꞌ Aturura to mantiꞌi: ‘Kehapoꞌi hawaꞌi uwaꞌ salaꞌKa, bateꞌna rokabiriꞌA.’
26 Hingkiꞌ humei Topesulungi, iomo Inohaꞌ to mesuwu ka Pueꞌ Ala to hingkiꞌ morandakei hingkeꞌna ibahaꞌkei poturuꞌ to tuꞌu. Iomo Topesulungi to hingkiꞌ Kurumbaꞌ humei pe ingkei to ka UmoꞌKu. Ane hupaꞌi humei, Iomo to hingkiꞌ mampokonontokikei noniuꞌ Aku. 27 Hei ingkei hangangaa mampololitakei woꞌo noniuꞌ Aku, alaꞌ ingkeimo to moꞌawa hante Aku mepongka ka uluꞌna pajamangKu i duniaꞌ hieꞌe.”