Hi Yesu tuwuꞌ huliꞌ
24
1 Mehoꞌolu-olu i ando Minggu, noloumohi towoweꞌe tiꞌo pe petowua mangkomi rampa-rampa petomahi hante minyaꞌ-minyaꞌ to mewowau to ropatimomomo umbiꞌ. 2 Dongkaꞌmohi itoꞌo, roꞌokiꞌ mengkalolimo watu potutuꞌine wambaꞌ petowua. 3 Hei mekahimohi pe lali petowua, angkana wotana lokaꞌna hi Yesu hamboaꞌmo uwaꞌ. 4 Kolentuꞌara metotiꞌi itoꞌo alaꞌ lemeniahi mampeꞌele tiꞌo, hampale roꞌokiꞌ meroduo toaꞌ meparewa to mekokiro metotiꞌi dodungku iohi. 5 Katoꞌo morokaꞌhi mpololeke towoweꞌe tiꞌo, hei metoungkaꞌhi pe woiꞌ. Angkana roduo toaꞌ tiꞌohi mampatiꞌikihi, “Mahamporeꞌi hinaꞌ ipaliꞌkei toaꞌ to tuwuꞌ i lumbura to mahi? 6 Io hawaꞌi uwaꞌ iseꞌe, alaꞌ Io tuwuꞌmo huliꞌ. Ipondindikei hapo to Notiꞌikikei hampiha i tempomi tene i woiꞌ Galilea, 7 ‘Anaꞌ Manusiaꞌ hangangaa nipewei pe toaꞌ to madosa hingkeꞌna nipakuꞌI i loti momehulepe, angkana ikotolu andona hingkiꞌ tuwuꞌ huliꞌ.’ ”8 Katoꞌo hongkoꞌ rokolowoi lolitane hi Yesu hampiha. 9 Ipahuliꞌralu ka petowua ropowutemo hapo to mewali pe topeguruna Yesu to hampuluꞌ haduo hante pe lekiꞌ-lekiꞌna topetuntuNa ntaniꞌna. 10 Towoweꞌe tiꞌo, iomo hi Maria Madalena, hi Yohana, hante hi Maria inoꞌna hi Yakobus, hante uwaꞌhi woꞌo towoweꞌe to ntaniꞌne to moꞌawa-awa hante iohi. 11 Angkana korohorinalu topeguruNa lolitare tiꞌo, hawaꞌi ropoꞌohi, rorekeꞌlu lolita to hawaꞌi tuꞌu.
12 Angkana hi Peturuꞌ metotiꞌi kaliuꞌ mehilai nolou pe petowua. Kohupaꞌnalu itoꞌo, liu mehahiro pe lali petowua, noꞌokiꞌlu wida poputuꞌna romo to uwaꞌ itoꞌo. Hi Peturuꞌ lomenia mpololeke hei mahuliꞌ hante woriꞌ peꞌitano i lali pekirina noniuꞌ hapo to mewali.
I lumbu lala pe Emaus
13 I ando tiꞌo woꞌo, uwaꞌ roduo toaꞌ topetuntuna hi Yesu to nolou pe bolaꞌ Emaus. Komoꞌelana bolaꞌ Emaus tiꞌo, hampuluꞌ hakilo hilakoꞌi komoꞌelane ka Yerusale. 14 Kolentuꞌara matengkaꞌ, mololitamohi hapo to mewali tempo tiꞌo. 15 Kolentuꞌara mololita, hi Yesu mehupaꞌ moꞌawa hante iohi matengkaꞌ. 16 Roꞌokiꞌmo hi Yesu, angkana Pueꞌ mamporeroꞌhi horiana hawaꞌi robahaꞌ koꞌIonamo hi Yesu. 17 Kolentuꞌara matengkaꞌ, hi Yesu mampatiꞌikihi, “Haporeꞌi to ipololitakei i kolentuꞌami matengkaꞌ?”
Katoꞌo meꞌohaꞌhi hante handondoiha. 18 Katoꞌo haduo to nikokeneꞌi hi Kelopa meꞌitano pe Yesu, notiꞌi, “Ka umboluKoreꞌi hinaꞌ hawaꞌi Ibahaꞌ hapo to mewali i Yerusale haꞌumbora ando to liu?”
19 Hi Yesu meꞌitano, “Haporeꞌi to mewalio?”
Rotiꞌi, “To mewali tiꞌo noniuꞌ hi Yesu toNasareꞌ! Io haduo nabi to makuasaꞌ i pajamaNa hei i pololitaNa, moromiꞌ i hinarona Pueꞌ Ala moromiꞌ i hinarona toaꞌ. 20 Tutuꞌ-tutuꞌ tadulako mpenomba hante tomotodi-tomotodi mampeserakakiꞌI pe topoparenta hingkeꞌna nihukuꞌI mahi. Iomo horiana hi Yesu nipakumo i loti momehulepe. 21 Kotuꞌuana, Iomo to kipohinaru hingkiꞌ mampolohoꞌki toSaraeli ka poniꞌta. Hei hinewoꞌena, kotolu andonamo ka konirokoꞌaNa. 22-23 Uwaꞌhi towoweꞌe to moꞌawa-awa ingka noloumohi pe petowua mehoꞌolu-olu, angkana wota lokaꞌNa hamboaꞌmo uwaꞌ roꞌokiꞌ. Kipohoko mpololeke alaꞌ ipahuliꞌra ropowutekika kopangkiꞌre malaꞌeka i petowua to mantiꞌi kotuwuꞌnamo huliꞌ hi Yesu. 24 Uko tiꞌo, haꞌumbora awangki nolou womohi pe petowua. Kohupaꞌra itoꞌo, roꞌokiꞌ bateꞌna hibali to rotiꞌi towoweꞌe hingkeꞌenia. Angkana wota lokaꞌna hi Yesu hawaꞌi uwaꞌ roꞌokiꞌ.”
25 Katoꞌo, hi Yesu mampatiꞌikihi, “Mahamporeꞌi hinaꞌ hawaꞌkei ibahaꞌ palaihane hapo to mewali? Hawaꞌreꞌi ipoꞌohikei lekiꞌ-lekiꞌna to rotiꞌi nabi hampiha? 26 Hieꞌemo to nipowutekikei nabi uluꞌana, Datu topohompoꞌ, hangangaa norumpa komapori', honiꞌi pahua pahura to manobaꞌ hei to niꞌadaꞌi.” 27 Katoꞌo, hi Yesu mampokonontokihi lekiꞌ-lekiꞌna to teꞌukiꞌ i lali Suraꞌ to Mangkolehi noniuꞌ i wotaNa, mepongka ka suraꞌna nabi Musa wute pe suraꞌna nabi to ntaniꞌna.
28 Kododungkuralu pe bolaꞌ to rotungkai, hi Yesu mampetoliu-liulu. 29 Angkana toaꞌ to roduo tiꞌo mokontoꞌI rotiꞌiki, “Maweomoki iseꞌe, alaꞌ hingkiꞌ winimoꞌi.” Mewaliꞌ maweomo mpuꞌu hi Yesu moꞌawa-awa hante iohi.
30 I tempora hingkiꞌ mangka moꞌawa-awa, hi Yesu moroa depa Nopekokaeki, Nokebiꞌ-kebiꞌmo hei Notandokihi. 31 Katoꞌo robahaꞌmo koꞌionamo hi Yesu. Uko tiꞌo, hangkaꞌ-hangkaꞌ romo moholi ka hinarora hamboaꞌmo roꞌokiꞌ. 32 Mowiharomohi, rotiꞌi, “I lumbu lala hingkeꞌenia, motanaꞌ mpololeke lalinte Nopololitaki hei Nopokonontokiki hapo to teꞌukiꞌ i lali Suraꞌ Mangkolehi noniuꞌ wotaNa!”
33 Tempo tiꞌo, kaliuꞌ mahuliꞌhi nolou pe Yerusale. Kohupaꞌralu inoꞌo, rohuamo topeguruNe hi Yesu to hampuluꞌ isaꞌ to kolentuꞌara mororampu hante awara. 34 TopeguruNa to hampuluꞌ isaꞌ mantiꞌi, “Tuꞌu mpololeke, Pueꞌ tuwuꞌmo huliꞌ. Io mampotongawamo wotaNa pe hi Simo!”
35 Mewaliꞌ, toaꞌ to roduo tiꞌo mampololitahi woꞌo lekiꞌ-lekiꞌna to mewali i lumbu lala hingkeꞌenia, hei mampowutemohi hapo to mewali i tempona hi Yesu mokebiꞌ-kebiꞌ roti, alaꞌ i tempo tiꞌo, hongkoꞌ robahaꞌ kohiYesunamo to uwaꞌ moꞌawa-awa hante iohi.
Hi Yesu mampopemombaha wotaNa pe topeguruNa
36 Kolentuꞌara tene mololita, hangkaꞌ-hangkaꞌ romo hi Yesu metotiꞌi i lumbura hei Notiꞌi, “Tabea.”
37 Ropohoko hei motehuꞌhi, alaꞌ rotiꞌireaꞌ lomoa. 38 Angkana hi Yesu mololita, “Mahamporeꞌi hinaꞌ motehuꞌkei hei bata-bata lalimi? 39 Iꞌelekei korawengKa hante kapuꞌKu. Akumola hieꞌe! IperoramaꞌAkei hei ipomoꞌeleꞌAkei, alaꞌ lomoa hawaꞌi uwaꞌ ohina hante wukuna hibali to iꞌokiꞌkei i Aku.”
40 Hi Yesu mololita watoꞌo liu mampetidoꞌki pe iohi koraweNa hante kapuꞌNa, 41 angkana handoaꞌi ropoꞌohi alaꞌ lemeniahi topeguruNe, hi Yesu meꞌitano pe iohi, “Uwaꞌ pangkamio?” 42 Katoꞌo liu ropaꞌani hamokuꞌ bouꞌ to lehaꞌmo. 43 Hi Yesu moroa bouꞌ tiꞌo liu Noꞌoka i hinarora.
44 Notiꞌi hi Yesu pe iohi, “To mewali hinewowoꞌena, iomo to Kutiꞌikimokikei i tempoKu tene moꞌawa-awa hante ingkei. Lekiꞌ-lekiꞌna to teꞌukiꞌ i lali Suraꞌna hi Musa hante suraꞌna nabi-nabi hante Suraꞌ Linga pepokodeꞌ noniuꞌ wotangKu, lekiꞌ-lekiꞌna hangangaa mewali.”
45 Uko tiꞌo, hi Yesu mampokononto hapo to i lali Suraꞌ Mangkolehi pe iohi, 46 Notiꞌi pe iohi, i lali Suraꞌ Mangkolehi teꞌukiꞌ waheꞌe, “Datu Topohompoꞌ hangangaa pahua komaporiꞌ hante komahi, hei ikotolu andona hingkiꞌ tuwuꞌ huliꞌ. 47 Hei lekiꞌ-lekiꞌna toaꞌ hangangaa mengkatobaꞌ ka dosara, hingkeꞌna dosara noꞌampuni Pueꞌ Ala, alaꞌ koNohompoꞌramo Datu topohompoꞌ. Hei kareba tiꞌo hangangaa nipekarebaiki pe lekiꞌ-lekiꞌna roboꞌ-roboꞌ i duniaꞌ, mepongka ka Yerusale. 48 Ingkeimola to mosobiꞌi lekiꞌ-lekiꞌna tiꞌo hei Kurumbaꞌkei mampowute.
49 Hei hingkiꞌ Kupokatukikei hapo to nodandi UmoꞌKu. Angkana ingkei hangangaa tontona mampekau i kota hieꞌe wute itorimokei kuasaꞌne Pueꞌ Ala.”
Hi Yesu mengkaꞌoreꞌ pe suruga
50 Uko tiꞌo, nopoꞌawamohi hi Yesu molai ka kota Yerusale, dodungku pe bolaꞌ Betania. Katoꞌo Nohinimo koraweNe hei mobarakatihi. 51 KolentuꞌaNa mobarakatihi, mengkaꞌoreꞌmo Io pe suruga. 52 Melingkotuꞌmohi menomba pe Io, honiꞌhi mahuliꞌ pe Yerusale hei motanaꞌ mpololeke lalire. 53 I Yerusale, ando-andona morampu i Tambina Pueꞌ Ala hei mampokodeꞌhi Pueꞌ Ala.