Hi Yesu morumbaꞌ pitu mpuluꞌ topeguruNa
10
1 Uko tiꞌo hi Yesu moꞌuwiꞌ pitu mpuluꞌ topeguruNa to ntaniꞌna hei Norumbaꞌhi roduo-roduo medulu ka Io, nolou pe lekiꞌ-lekiꞌna bolaꞌ to hingkiꞌ Nokonolouhi. 2 Notiꞌikihi, “Toaꞌ to woriꞌ nipandiriꞌ hibali kina to mangke. Woriꞌ kina to mangke, angkana topekina hangkokiuꞌ. Iomo hinaꞌ hangangaa niperapiꞌ pe tumpu kineteꞌ hingkeꞌna norumbaꞌhi toaꞌ nolou mekina pe kineteꞌna. 3 Noloumokei, angkana hangangaa ikororomiꞌikei. Alaꞌ Kurumbaꞌkei nolou pe lumbura to kodake. Ingkei hibalikei anaꞌ gimba i lumbura hulakuꞌ. 4 Inioꞌkei mebaku, mangkomi dompeꞌ ba mesanalaꞌ rompasa. Ane mohidupaꞌkei hante toaꞌ i lumbu lala, metabeꞌkei hawaꞌi rahi nipomorue.5 Ane mekahikei i lali tambi, hangangaa itiꞌikikei tumpu tambi, ‘Tabea hei romiꞌ ngkotuwuꞌ moꞌowonikei!’ 6 Ane moromiꞌi laline tumpu tambi mantorimokei, bateꞌna hingkiꞌ nobarakatihi Pueꞌ Ala. Angkana ane hakei notorimo tumpu tambi, hawaꞌhi hingkiꞌ pahua pebarakati ka Pueꞌ Ala. 7 Ane nitorimokei, inioꞌkei melimba-limba. Meꞌohaꞌkei i tambi tiꞌo wutekei mewotu nolou pe bolaꞌ ntaniꞌna. Hapo to nipaꞌanikikei iꞌokakei hante iꞌinukei alaꞌ topajama masipatoꞌ pahua howonina.
8 Ane mekahikei i lali haꞌanu bolaꞌ hante nitorimokei, iꞌokakei hapo to nipaꞌanikikei. 9 Ipokoꞌoriꞌkei to mohakiꞌ to uwaꞌ i lali bolaꞌ tiꞌo, hei itiꞌikihi tumpu bolaꞌ, ‘Hamboaꞌmo morue Pueꞌ Ala hingkiꞌ moparenta i lumbumi.’ 10 Angkana ane mekahikei i lali haꞌanu bolaꞌ hei hawaꞌkei rotorimo, noloumokei pe lala kota tiꞌo hei itiꞌikihi, 11 ‘Ngkoweꞌ awu ka bolaꞌmi to medokiꞌ i palaꞌna kapuꞌki, kikunta i hinaromi to mewali tandaꞌ pangkolowoi pe ingkei, hei hingkeꞌ ibahaꞌkei, hamboaꞌmo morue Pueꞌ Ala hingkiꞌ moparenta i lumbumi!’ 12 Hingkeꞌ ibahaꞌkei, i ando pebutusi i koꞌukoana duniaꞌ, hingkiꞌ makaja pehukune Pueꞌ Ala pe toaꞌ tiꞌohi ka konihukuna toSodomo hampiha.”
Pueꞌ Ala hingkiꞌ mohuku kota to hawaꞌi mantorimo hi Yesu
13 “Hurewuꞌmokei toKorasi! Hurewuꞌmokei to Besaida! Podo woriꞌmo tandaꞌ kuasaꞌ to Kuwali i bolaꞌmi, angkana hawaꞌkei mengkatobaꞌ ka dosami. Ane kerapaꞌna tandaꞌ kuasaꞌ tiꞌo Kuwali i kota Tiru hante i Sido, kemoruemohi mengkatobaꞌ ka dosara, kehapoꞌi handoꞌiohi toYahudi. Kemoroamohi baduꞌ mperorima ropobaduꞌ, hei moꞌawuihi tutuꞌra, tandaꞌ kotewolihinamo lalira. 14 I ando pebutusi i koꞌukoana duniaꞌ, hingkiꞌ makaja mpololeke pehukuna Pueꞌ Ala pe ingkei, ka konihukuna toTiru hante toSido.
15 Hei ingkei toKapenau! Ba ipekirikei hingkiꞌ nohinikei Pueꞌ Ala pe suruga hawaꞌi! Angkana hingkiꞌ nopelubaꞌkei pe naraka!”
16 Uko tiꞌo hi Yesu mololita womo pe topeguruNa notiꞌi, “Himo to mampehoromua lolitami, hibalimo woꞌo mampehoromua lolitangKu. Hei hihimo to mohohakei, hibalimo woꞌo Aku to nohoha, hei hihimo to mohohaꞌA, hibalimo woꞌo hante mohoha Pueꞌ Ala to morumbaꞌA.”
Pahuliꞌra topeguruNa to pitu mpuluꞌ duo
17 Hawaꞌi morue uko tiꞌo, mahuliꞌmohi topeguruNe to pitu mpuluꞌ duo hei motanaꞌ mpuꞌu lalire rotiꞌi pe hi Yesu, “Pueꞌ, ngkoweꞌ woꞌo lomoa, mengkoruꞌhi woꞌo pe ingka, alaꞌ kipopolaihi i lali konaꞌMu.”
18 Notiꞌi hi Yesu, “Kuꞌokiꞌmo Belisiꞌ monawuꞌ ka laniꞌ hibali wiaꞌ! 19 Ipehoromuakei lolitangKa, Kupaꞌanimokei kuasaꞌ modihaꞌ ule hante olupa hei kuasaꞌ monani lekiꞌ-lekiꞌna komarohona poniꞌta. Hawaꞌi uwaꞌ haduo to nobiaꞌ mampohorewuꞌkei. 20 Angkana kehapoꞌi watoꞌo, inioꞌ ipotanaꞌkei pengkoruꞌre lomoa pe ingkei. Moromiꞌ rahimo ipomotanaꞌkei koteꞌukiꞌnamo konaꞌmi i suruga.”
Hi Yesu moꞌawerasiꞌ pe Pueꞌ Ala
21 I tempo tiꞌo, hi Yesu nokuasaꞌi Inohaꞌ Mangkolehi, hei alaꞌ komotanaꞌna laliNa notiꞌi, “O Umoꞌ, Pueꞌ to mokuasaꞌi laniꞌ hante duniaꞌ! KupokodeꞌKo, alaꞌ lekiꞌ-lekiꞌna to tewowuni hampiha, Ipomombahamo pe toaꞌ to i wowoiꞌ tuwuꞌra, angkana Iwowuni ka toaꞌ to buhaꞌ pekiri hei toaꞌ to mapande, Alaꞌ iomo peleihaMa Umoꞌ.”
22 Uko tiꞌo notiꞌi hi Yesu, “Lekiꞌ-lekiꞌna nopaꞌanikiꞌA Umoꞌku. Hawaꞌi uwaꞌ haduo to pobahaꞌA, Aku anaꞌna Pueꞌ Ala, bateꞌnalu Umoꞌku to pobahaꞌA. Watoꞌo woꞌo, hawaꞌi uwaꞌ to pobahaꞌ Umoꞌku, bateꞌnalu Aku AnaꞌNa hei hihimolu to Kuponobahaꞌi.”
23 Katoꞌo hi Yesu mehahiliꞌ pe topeguruNa hingkeꞌna hawaꞌi rohori toaꞌ, hei notiꞌikihi, “Motanaꞌkei mpuꞌu, alaꞌ iꞌokiꞌmokei lekiꞌ-lekiꞌna hieꞌe. 24 Alaꞌ woriꞌhi nabi hante datu to dokoꞌhi pangkiꞌ hapo to iꞌokiꞌmokei, angkana hawaꞌi roꞌokiꞌ. Mangkodokoꞌihi mpololeke mampehoromua hapo to ihorikei, angkana hawaꞌi rohori.”
Kareba pandiri' noniuꞌ toSamaria to moromiꞌ lalina
25 Uwaꞌ haduo guru agama toYahudi to mangkodokoꞌi mohohongkeꞌi hi Yesu meꞌitano, “Guru, hapo to hangangaa kuwali hingkeꞌna pahuaꞌa kotuwuꞌ to wolaꞌ to hawaꞌi mokoꞌukoa?”
26 Notiꞌi hi Yesu, “Hapo to ibasa i lali suraꞌna hi Musa? Hapo to teꞌukiꞌ itoꞌo?”
27 Mehoniꞌ guru agama tiꞌo, “To kubasa waheꞌe,
‘Ipokarimakei Pueꞌ Ala Pueꞌmi,
hante kopopuhiꞌna lalimi mpololeke,
hante pekirimi mpololeke,
hante komapandemi mpololeke,
hei lekiꞌna rohomi.
Hei ipokarimakei toaꞌ ntaniꞌna hibali koꞌipokarimana wotami hadoduomi.’ ”
28 Notiꞌi hi Yesu, “Niuꞌmo pehoniꞌma. Iwalimo watoꞌo hingkeꞌna pahuako kotuwuꞌ to wolaꞌ.”
29 Angkana guru agama tiꞌo hantoniꞌ hawaꞌi nobahaꞌ. Iomo hinaꞌ notiꞌi, “Hihimohi toaꞌ ntaniꞌna to hangangaa kupokarima?”
30 Mehoniꞌ hi Yesu, “Uwaꞌ haduo tomaꞌani to matengkaꞌ ka Yerusale pe bolaꞌ Yeriko. I lumbu lala, toaꞌ tiꞌo mohidupaꞌ hante to masilaka, hei morompoꞌi lekiꞌna hapo to nokomi, wotana nikondo wute molimpu, hei ropolihi i hiri lala. 31 I tempo tiꞌo, uwaꞌ haduo tadulako mpenomba to moliu i lala. Konoꞌokiꞌna toaꞌ to marugi tiꞌo, noliulu i hambali lala. 32 Uwaꞌ woꞌo haduo topajama i Tambina Pueꞌ Ala to moliu itoꞌo. Konoꞌokiꞌna toaꞌ to marugi tiꞌo, nopempoliliꞌilu i hambali lala.
33 Hawaꞌi morue katoꞌo, moliu womo haduo toSamaria i lala tiꞌo. Konoꞌokiꞌnalu toaꞌ to marugi tiꞌo, marima mpololeke laline pe io. 34 Toloumo pe toaꞌ tiꞌo, mowaheꞌ belona mopakeꞌ bokaꞌ saitu hante anggoroꞌ honiꞌi nowiwiꞌ. Uko tiꞌo nopopelambaꞌmo i kalidena, nokomi nolou pe tambi peꞌohaꞌa, Hei norewahi itoꞌo. 35 Poꞌonina mihoꞌolu, noroamo rompepaꞌ doiꞌ peraꞌ, nopepaꞌaniki pe tumpu tambi notiꞌi, ‘Irewahi dulu toaꞌ hieꞌe, ane handoaꞌi ganaꞌ doiꞌ hieꞌe, kupoganaꞌi romoꞌi ane mahuliꞌa intu.’ ”
36 Uko tiꞌo, nopeꞌitanokimo hi Yesu pe guru agama tiꞌo notiꞌi, “Motuntuni pahuamu, tolu duo toaꞌ to hingkonia, hihimo to mewali awana toaꞌ to nipokarugiꞌ tiꞌo?”
37 Mehoniꞌ guru agama tiꞌo, “Toaꞌ to mampetidoꞌki rimana.”
Notiꞌi hi Yesu, “Niuꞌmo. Noloumoko hei hangangaa iwali woꞌo hatoꞌo.”
Hi Yesu mokadoroꞌ pe hi Maria hante hi Marta
38 Katoꞌo hi Yesu mampololiumo pantengkaꞌaNa moꞌawa hante topeguruNa, wute i haꞌanu bolaꞌ. I lali bolaꞌ tiꞌo, uwaꞌ haduo towoweꞌe to nikokeneꞌi hi Marta to mantorimo hi Yesu i tambina. 39 Uwaꞌ woꞌo haduo halalina hi Marta towoweꞌe, konaꞌna hi Maria. Hi Maria tiꞌo mahura i hinarona hi Yesu hei mampehoromua lolitaNa. 40 I tempo tiꞌo, hi Marta bukota pe hi Maria, alaꞌ woriꞌ jamane morewu tolori. Iomo hinaꞌ noloumo hi Marta pe hi Yesu notiꞌi, “Pueꞌ, halalingku hieꞌe hawaꞌa nopororui majama kopongkona, hadoduongku majama! Itiꞌiki hingkeꞌna io humei mampororuiꞌa.”