Pueꞌ Ala mampehohongkeꞌ pepoꞌohina hi Burahima
22
1 Hawaꞌi morue katoꞌo, Pueꞌ Ala mampehohongkeꞌ pepoꞌohina hi Burahima Notiꞌi, “Burahima”.Mehoniꞌ hi Burahima, “Hapo Pueꞌ.” 2 Notiꞌi womo Pueꞌ Ala, “Noloumoko pe woiꞌ Moria hante hi Isaki anaꞌmu to hadoduona, to ipotundeꞌ mpololeke. Inoꞌo uwaꞌ haꞌanu biri to hingkiꞌ Kutidoꞌkiko. Hangangaa irereꞌ anaꞌma honiꞌi idompuhi mewaliꞌ popenombamu pe Aku.” 3 Kopoꞌonina mehoꞌolu-olu, meꞌaromo hi Burahima honiꞌi molapiꞌi kalidena. Uko tiꞌo mobeho loti to hingkiꞌ nopetunui popenombana hei nopatekeꞌ i kalidena. Timomomo lekiꞌ-lekiꞌna honiꞌi noloumo hante hi Isaki hante meroduo hawiꞌna. Nolouhi pe biri to nopetiꞌiki Pueꞌ Ala. 4 Ikotolu andora matengkaꞌ noꞌokiꞌmo biri tiꞌo ka moꞌela. 5 Katoꞌo notiꞌi pe hawiꞌna to roduo, “Iseꞌemokei mampekau moꞌawa hante kalidenta, alaꞌ ingka ntoliꞌanaꞌ hingkiꞌ noloukaꞌo menomba pe Pueꞌ Ala, uko tiꞌo mahuliꞌluka humei.” 6 Katoꞌo hi Burahima moroa loti to hingkiꞌ nopodompui popenombana, noponokowaꞌiki hi Isaki, hei io mangkomi ladiꞌ hante api, katoꞌo matengkaꞌmohi nolou. 7 Notiꞌi hi Isaki pe umoꞌna “Umoꞌ!” Mehoniꞌ hi Burahima, “Haporeꞌi anaꞌku?” Meꞌitano hi Isaki, “Hinewowoꞌena uwaꞌmo loti hante api, angkana imbomoꞌi anaꞌ gimba to hingkiꞌ topopenomba?” 8 Mehoniꞌ hi Burahima “Pueꞌ Ala to hingkiꞌ mampoꞌuwaꞌ anaꞌ gimba tiꞌo,” Honiꞌi, ropololiu patengkaꞌare. 9 Kowuteralu i peꞌohaꞌa to nopotintoki Pueꞌ Ala pe hi Burahima, nohuntu-huntumo watuo, honiꞌi noꞌodoꞌ loti i womboꞌna. Uko tiꞌo nohiluꞌmo hi Burahima korawena hante kapuꞌna anaꞌna honiꞌi nohumboꞌaki i womboꞌ loti to roꞌodoꞌ. 10 Uko tiꞌo moroa ladiꞌ to hingkiꞌ nopoporereꞌ anaꞌna. 11 Angkana malaꞌekana Pueꞌ mewowoi ka laniꞌ notiꞌi, “Burahima, Burahima!” Mehoniꞌ hi Burahima, “Iheꞌeluꞌa Pueꞌ.” 12 Liu notiꞌi malaꞌekane Pueꞌ, “Inioꞌ irokoꞌi ba ipahampo-hampoꞌi anaꞌma tiꞌo. Hinewoꞌena Kubahaꞌmo pengkoruꞌma pe Aku, alaꞌ hawaꞌi ipekabohiꞌ anaꞌma to hadoduona, ipepaꞌaniki pe Aku.” 13 Uko tiꞌo mehahiliꞌ hi Burahima, noꞌoki hambaꞌa gimba laki to hikaiꞌkiꞌ tanduꞌne i wulaꞌi, noroa gimba tiꞌo norereꞌ honiꞌi nodompuhi nopopenomba pe Pueꞌ Ala, gimba tiꞌo to mampohawa anaꞌna. 14 Iomo horiana pebolaꞌa tiꞌo hinaꞌ nokokeneꞌi hi Burahima, “Pueꞌ mampoꞌuwaꞌ hapo to toparaluꞌi.” Wute hinewowoꞌena poko rotiꞌi “I womboꞌ birina Pueꞌ, Pueꞌ mampoꞌuwaꞌ hapo to niparaluꞌi.” 15 Korompihana malaꞌekana Pueꞌ meꞌoꞌando ka laniꞌ pe hi Burahima, 16 Notiꞌi, “Aku mosumpaꞌa i lali konaꞌKu hadoduongKu, waheꞌemola pohawaꞌne Pueꞌ, alaꞌ mampetuntuiko pohawaꞌKu hante hawaꞌi ipekabohiꞌ anaꞌma to hadoduona tiꞌo, 17 hingkiꞌ Kubarakatiko hingkeꞌna nomoromiꞌ kotuwuꞌmu hei pemuleꞌamu Kupopembiaꞌ hibali koworiꞌna betueꞌ i laniꞌ hante hibali woꞌoni to i bota ntahiꞌ hei pemuleꞌamu tiꞌo hingkiꞌ monanihi poniꞌra. 18 Ka pemuleꞌamu, Aku hingkiꞌ mobarakati lekiꞌ-lekiꞌna roboꞌ i duniaꞌ, alaꞌ ingko mampetuntuiko pohawaꞌKu.” 19 Uko tiꞌo hi Burahima hante hi Isaki mahuliꞌmohi pe hawiꞌra to roduo. Honiꞌi mahuliꞌmohi moꞌawa-awa pe bolaꞌ Baraseba meꞌohaꞌhi itoꞌo.
Muleꞌna hi Nahor
20 Kolentuꞌana hi Burahima inoꞌo, io pahori karebana hi Nahor kokaꞌna hante hi Milika hantambina to moꞌanaꞌ walu duo tomaꞌani, iomo: 21 hi Us tokokaꞌ, hi Bus hineeꞌna, hi Kemuel to hingkiꞌ mampemuleꞌki toAram, 22 hante hi Keset, hi Haso, hi Pilda, hi Yildaf hante hi Betuel 23 to mewali umoꞌna hi Rubeka. Walu duo hieꞌe nopoꞌanaꞌki hi Milika pe hi Nahor, halalina hi Burahima. 24 Hatoꞌo woꞌo hi Reuma to noropaꞌ hi Nahor, mampoꞌanaꞌki hi Tebah, hi Gaham, hi Taha hante hi Maꞌaka.