Pewaliana 14

Hi Abara mamperorui hi Lot

1 I tempona hi Abara meꞌohaꞌ dodungku Hebron, uwaꞌ iba duo datu to makuasaꞌ, iomo:

hi Amarapele datu i Sinereꞌ,

hi Ario datu i Elasaꞌ,

hi Kedorlaome datu i Elam,

hei hi Tidela datu i Gosi.

2 Iba datu tiꞌo mohaꞌanu moꞌewa limo datu, iomo:

hi Bera datuna toSodomo,

hi Birisa datu i Gomora,

hi Sinab datu i Adma,

hi Simebeꞌ datu i Seboim,

hei haduo datu ka Bela, biasa woꞌo nitiꞌi Soar.

3-4 Hampuluꞌ merontoꞌa komoruene, limo datu tiꞌo noparenta iomo datu Kedorlaome. Angkana i kohampuluꞌ tolu ntoꞌana, kalimo datu tiꞌo morampuhi i ngamba Sidim, to nitiꞌi woꞌo Tahiꞌ Mahi, alaꞌ iohi hingkiꞌ moꞌewa datu Kedorlaome. 5 I toꞌa kohampuluꞌ iba, datu Kedorlaome hei datu ntaniꞌna morampuhi moꞌewa limo datu tiꞌo. Iohi moꞌewa roboꞌ-roboꞌ ngkodeꞌ ntaniꞌna. Kaꞌisaꞌ-isa iohi monani toRepai i Asitero-Karanai, toSusi i Ham, toEmim i Siawe-Kiritai. 6 Uko tiꞌo iohi woꞌo modapaꞌ toaꞌ toHori to meꞌohaꞌ i biri Edom to nitiꞌi woꞌo Seir wute pe El-Paran, i popada woꞌoni. 7 Uko tiꞌo datu Kedorlaome hante datu-datu to morampu hante io mahuliꞌ pe En-Mispat, to hinewowoꞌena nikokeneꞌi Kades. Iohi woꞌo penani hei morompoꞌi lekiꞌna woiꞌ Amale hei toAmori to meꞌohaꞌ i Haseso-Tamar. 8-9 Ikopenanira i poponiꞌara tiꞌo, Kedorlaome hei datu to moꞌawa io nolouhi moponiꞌ moꞌewa limo datu iomo datu ka Sodomo, Gomora, Adma, Seboim hante Bela to morampu mampohaꞌanu i ngamba Sidim. Hatoꞌomola limo datu moꞌewa iba datu ntaniꞌna. 10 I ngamba Sidimi tiꞌo i umbo-umbo uwaꞌ bubu taru. I tempona datu Sodomo hei datu Gomora mehilai iohi monawuꞌ pe lali bubu-bubu aspal tiꞌo, angkana tolu duo datu to salamaꞌ mehilaihi pe biri-birina. 11 Hi Kedorlaome hei datu to moꞌawa io penani i poponiꞌara tiꞌo, honiꞌi iohi molai hei morompoꞌi lekiꞌna luma i Sodomo hei Gomora, noniuꞌ woꞌo kopongkona. 12 Iohi motawaniꞌhi woꞌo hi Lot pinoꞌanaꞌna hi Abara, hei mamperompoꞌi lumana, alaꞌ io meꞌohaꞌ woꞌo i Sodomo, katoꞌo molaimohi. 13 Katoꞌo mehupaꞌ haduo to mehilai hei mampololita hieꞌe pe hi Abara, toIbarani tiꞌo, to uwaꞌ meꞌohaꞌ dodungku nunuꞌ hanura toMamre, toaꞌ toAmori tiꞌo, halalina hi Eskol hante hi Anereꞌ, iomo bole-bolena hi Abara mohaꞌanu. 14 Ikonohorinalu hi Abara, pinoꞌanaꞌna nihuku hei niwuni, katoꞌo norumbaꞌhi lekiꞌna toaꞌ-toaꞌna to hingkaꞌ pobahaꞌ hei maroho, iomo iohi to nipoꞌanaꞌki i tambina, 318 duo toaꞌ koworiꞌna, katoꞌo akohi modapaꞌ poniꞌra wute pe Daneꞌ. 15 Hei i tempona wini nodolaꞌ-dolaꞌmohi hawiꞌne, hei akohi moꞌewa poniꞌra, penanihi hei rodapaꞌ poniꞌre wute pe Hobaꞌ i hambalina Damasi. 16 Nokomimo mahuliꞌ hinangkana lumane, hante hi Lot, anaꞌna halalina tiꞌo, hei hapo lumana nokomimo mahuliꞌ, watoꞌo woꞌo towoweꞌe-towoweꞌe hante toaꞌ-toaꞌna.

Pohidupaꞌna hi Abara hante hi Mekisedeꞌ

17 Ikopahuliꞌnamo hi Abara ka poponiꞌa monani hi Kedolaomer hante datu to moꞌawa-awa hante io, katoꞌo noloumo datu toSodomo mampohidupaꞌkiꞌi i ngamba Siawe, iomo ngamba Datu. 18 Hi Mekisedeꞌ, Datu i Salem, mangkomi depa hei anggoroꞌ, io haduo tadulako mpenombana Pueꞌ Ala to i womboꞌ kuasaꞌNa. 19 Katoꞌo io mobarakati hi Abara notiꞌi, “Hinamo Pueꞌ Ala to i Tanti, to mowali laniꞌ hante woiꞌ mobarakati hi Abara, 20 hei tepokodeꞌmo Pueꞌ Ala to i Tanti, to mampepaꞌanikimo poniꞌmu pe korawemu.” Katoꞌo hi Abara mampepaꞌaniki pe io hadolaꞌa isaꞌ ka to hampuluꞌ. 21 Mololitamo datu toSodomo tiꞌo pe hi Abara, “Luma iroamolu angkana toaꞌkuhi tiꞌo ipaꞌanikiꞌa mahuliꞌ.” 22 Angkana notiꞌi hi Abara pe datu i woiꞌ peꞌohaꞌa Sodomo tiꞌo, “Aku mosumpaꞌa pe Pueꞌ, Pueꞌ Ala to i Tanti, to mowali laniꞌ hei woiꞌ, 23 aku hawaꞌa hingkiꞌ moroa hapo-hapo ka lumamu tiꞌo, hamokuꞌ lori ba pohiluꞌ sapatuꞌ hawaꞌi, hingkeꞌna ingko hawaꞌko mololita, ‘Akumo to mampopewali hi Abara mewali sugiꞌ.’ 24 Ane aku, hawaꞌa mpuꞌu moroa hapo-hapo! Sangadina to roꞌokamo toaꞌ-toaꞌkuhi hieꞌe hante toaꞌ to nolou moꞌawa-awa hante aku, iomo hi Anereꞌ, hi Eskol hei hi Mamre, hinamo iohi tiꞌo moroahi dolaꞌra hori-hori.”