Duniaꞌ noliuꞌ uwai
7
1 Katoꞌo pohawaꞌna Pueꞌ Ala pe hi Nohoꞌ, “Mekahimoko pe lali duanga tiꞌo, ingkei hantino, alaꞌ ingkomo to Kuꞌokiꞌ maniuꞌ i hinarongKu ka lumbuna toaꞌ to tuwuꞌ hinewowoꞌena. 2 Ka lekiꞌna pinatuwuꞌ to wadi niꞌoka, hangangaa iroa pitu mpasa, laki hante lunarona, angkana ka pinatuwuꞌ to hawaꞌi wadi niꞌoka hampasalu. 3 Hei iroa woꞌo ka tinti-tinti i raoha pitu mpasa, bangkoilo hante towoweꞌe, hingkeꞌna noterewahi muleꞌre i duniaꞌ. 4 Alaꞌ pitu ando tene, Aku hingkiꞌ mampopengkohouꞌA ura pe womboꞌ duniaꞌ iba mpuluꞌ ando iba mpuluꞌ mini komoruene, hei Aku hingkiꞌ mopahi ka womboꞌ duniaꞌ lekiꞌna hinangkana to uwaꞌ, to Kupopewali tiꞌo.” 5 Katoꞌo hi Nohoꞌ motuntunimo mpuꞌu lekiꞌna to Nohowoꞌikiꞌi Pueꞌ Ala pe io.6 I tempona uwai molobuꞌi duniaꞌ, tinuwuꞌna hi Nohoꞌ 600 ntoꞌa. 7 Mekahimo hi Nohoꞌ pe lali duanga moꞌawa-awa hante anaꞌnahi hei hantambina, hei hantambina anaꞌnahi alaꞌ uwai liuꞌ tiꞌo. 8 Mepongka ka pinatuwuꞌ to wadi niꞌoka hei to hawaꞌi wadi niꞌoka, ka tinti-tinti hei hinangkana to mendae i wombo' duniaꞌ, 9 mehupaꞌmo hampasa-hampasa moduuꞌ hi Nohoꞌ i lali duanga tiꞌo, laki hante lunaro, hintotoꞌ hibali to nohowoꞌikiꞌi Pueꞌ Ala pe hi Nohoꞌ. 10 Ikopitu andonamo mpuꞌu hupaꞌmo uwai liuꞌ mobuhoꞌi duniaꞌ.
11 I tempona hi Nohoꞌ moꞌumuruꞌ 600 ntoꞌa, i wula to kadua, i ando to kohampuluꞌ pitu, wula tiꞌo, i ando tiꞌomola lintubuꞌ hinangkana mata uwai to monono hei woloꞌ-woloꞌ i laniꞌ moweaꞌ, 12 hei mengkohoumo ura ngkodeꞌ i duniaꞌ iba mpuluꞌ ando iba mpuluꞌ wini komoruene. 13 I ando tiꞌo woꞌo, mekahimo hi Nohoꞌ hante hantambina pe lali duanga moꞌawa hante anaꞌna iomo, hi Sem hi Ham hante hi Apeꞌ, hante hantambi-hantambira. 14 Hei hinangkana pinatuwuꞌ to moꞌilo, to mononara, to mendae hei hinangkana tinti, 15 ka lekiꞌna to tuwuꞌ mehupaꞌmo hampasa-hampasa mekahi i duangana hi Nohoꞌ. 16 Hei to mekahi tiꞌo iomo laki hante lunaro ka hinangkana pinatuwuꞌ, hitontoꞌ hante to nohowoꞌikiꞌi Pueꞌ Ala pe hi Nohoꞌ. Katoꞌo Pueꞌ Ala mowiti wambaꞌ duanga tiꞌo i tunduna hi Nohoꞌ.
17 Iba mpuluꞌ ando komoruena, uwai liuꞌ tiꞌo mobuhoꞌi duniaꞌ. Uwai tiꞌo mehendeꞌ hei mohini duanga tiꞌo, horiana mekononangko i wombo' duniaꞌ. 18 Uwai tiꞌo kotetambai-tambaia hei makaja mpuꞌu kopehindeꞌ-hendeꞌa i womboꞌ duniaꞌ, mekononangko mpuꞌu duanga tiꞌo i wombo' uwai. 19 Hei uwai tiꞌo monono kotetambaiane moholuꞌi duniaꞌ, hei notutuꞌi hinangkana biri to dingkaoꞌ i luaꞌna laniꞌ. 20 Uwai tiꞌo mehendeꞌ wute podongkeꞌ pitu meteꞌ molewua loloꞌ-loloꞌna biri. 21 Katoꞌo mahimo mpuꞌu mampopihana to tuwuꞌ, to mengkaduiꞌ i duniaꞌ, tinti-tinti, pinatuwuꞌ to manondoꞌ hei pinatuwuꞌ to moꞌilo hante hinangkana pinatuwuꞌ to mendae, to mengkaduiꞌ i duniaꞌ, hei lekiꞌna manusiaꞌ. 22 Mahimo hinangkana to meꞌinohaꞌ to tuwuꞌ i lerina. 23 Watoꞌomola konopahine Pueꞌ Ala hinangkana to uwaꞌ, hinangkana to i womboꞌ duniaꞌ, moromiꞌ manusiaꞌ ba rewua hei pinatuwuꞌ to mendae hante tinti-tinti i raoha, horiana lekiꞌna tiꞌo nopahi ka womboꞌ duniaꞌ, hi Nohoꞌ romo to tuwuꞌ hei lekiꞌna to moꞌawa-awa hante io i lali duanga tiꞌo. 24 Hei uwai tiꞌo mobuhoꞌi duniaꞌ 150 ando komoruena.