Hi Kai hante hi Abeli
4
1 Manusiaꞌ tiꞌo mohantambi hante hi Hewa, hei mohinonaꞌimo towoweꞌe tiꞌo, hei mampoꞌanaꞌki hi Kai. Notiꞌi towoweꞌe tiꞌo, “Aku pahuaꞌa anaꞌntomaꞌani alaꞌ pesulungina Pueꞌ Ala.” 2 Uko tiꞌo, nipoꞌanaꞌki womo hi Abeli, hineeꞌna hi Kai. Hi Abeli mewali topolambaꞌ bekeꞌ hei hi Kai mewali topokineteꞌ. 3 Hawaꞌi morue uko tiꞌo, hi Kai mampopenombamo hadolaꞌa rasiꞌna ka woiꞌ mewali pampeweina pe Pueꞌ Ala. 4 Noroamo woꞌo hi Abeli hambaꞌa uluꞌ anaꞌna gimbana norereꞌ hei lompoꞌ-lompoꞌna nopepenomba pe Pueꞌ Ala. Katoꞌo Pueꞌ Ala mampomotanaꞌ hei mantorimo popenombana hi Abeli, 5 angkana hi Kai hante popenombana hawaꞌi nitorimo. Katoꞌo molaho laline hi Kai hei moꞌuro lione. 6 PohawaꞌNa Pueꞌ Ala pe hi Kai, “Mahamporeꞌi hinaꞌ molaho lalima hante moꞌuro lioma? 7 Bateꞌna Kutorimoko ane mowaliko to moromiꞌ, angkana ane hawaꞌko mowali to moromiꞌ, dosa hingkiꞌ mokeloiko, hei hingkiꞌ mokuasaꞌiko, angkana ingko hangangaa makuasaꞌko ka io.”8 Notiꞌi hi Kai pe hi Abeli hineeꞌna, “Hoki nolouki pe popada.” Kolentuꞌaramo i popada, hampale hi Kai mokondo hi Abeli hineeꞌna tiꞌo, honiꞌi norokoꞌ.
9 Pohawaꞌna Pueꞌ Ala pe hi Kai, notiꞌi, “Imbomoꞌi hi Abeli, hineeꞌmu tiꞌo?”
Mehoniꞌ hi Kai, “Hawaꞌi kubahaꞌ! Akureꞌi to mampoꞌodaꞌ hineeꞌka?”
10 Pohawaꞌna Pueꞌ Ala, “Haporeꞌi to iwalio hieꞌe? Raꞌana hineeꞌmu tiꞌo meꞌoꞌando pe Aku ka woiꞌ. 11 Ingko morokoꞌmoko hineeꞌmu hei raꞌana moꞌili pe woiꞌ. Iomo horiana Kutundaꞌko horiana woi hamboaꞌmo hingkiꞌ mampomowuaꞌ kopongkonamu. 12 Ane maꞌintuꞌko woiꞌ tiꞌo, woiꞌ tiꞌo hawaꞌi hingkiꞌ mepaꞌani rasiꞌ kobuhaꞌana pe ingko. Ingko mewali haduo toaꞌ topolilo i duniaꞌ.”
13 Notiꞌi hi Kai pe Pueꞌ Ala, “Hukuangku tiꞌo meliu ka pebiaꞌangku. 14 Alaꞌ Ibueꞌa ka woiꞌ hieꞌe, aku hingkiꞌ tewowuniꞌa ka hinaroMu, haduo toaꞌ to mehilai hei to molausala i duniaꞌ, hei hihimo to hingkiꞌ mohidupaꞌ hante aku, monontomo hingkiꞌ morokoꞌa.”
15 Pohawaꞌna Pueꞌ Ala pe io, “Hawaꞌi! Hihimo to morokoꞌ hi Kai hingkiꞌ nihowoni pe io pitu mpiha lipaꞌ.” Katoꞌo Pueꞌ mampodokiꞌi tandaꞌ pe hi Kai, hingkeꞌna hihimo to mangkohidupaꞌkiꞌi hawaꞌi hingkiꞌ morokoꞌi. 16 Katoꞌo hi Kai molai ka hinarona Pueꞌ, hei io lebaꞌ i woiꞌ Nod i motoꞌando Eden.
Muleꞌna hi Kai, hi Set hante hi Eno
17 Hi Kai mohantambi hante hantambina hei mehinonaꞌimo towoweꞌe tiꞌo. Katoꞌo mampoꞌanaꞌki hi Henoꞌ. Katoꞌo io moꞌaro bolaꞌ ngkodeꞌ hei nokokeneꞌi kota tiꞌo Henoꞌ, motuntuni konaꞌna anaꞌna. 18 Hi Henoꞌ mampemuleꞌki hi Irat, hei hi Irat mampemuleꞌki hi Mehuyael. Hi Mehuyael mampemuleꞌki hi Metusael, hei hi Metusael mampemuleꞌki hi Lamek. 19 Hi Lamek hantambina meroduo, haduo konaꞌne hi Ada, to haduona hi Sila. 20 Hi Ada tiꞌo mampoꞌanaꞌki hi Abalaꞌ, iomo to mewali umoꞌ to meꞌohaꞌ i lali bambaruꞌ hei morewu pinatuwuꞌ. 21 Konaꞌna hineeꞌna iomo hi Yubala, iomo to mewali umoꞌ malekiꞌna toaꞌ to mangkadoꞌ katapi hante toaꞌ to motulali. 22 Hi Sila mampoꞌanaꞌki woꞌo hi Tubal-Kain, umoꞌna lekiꞌna topobahaꞌ molebu kala hei topokorohi. Hineeꞌ towoweꞌena hi Tubal-Kain iomo hi Naama.
23 Mololitamo hi Lamek pe roduo hantambina tiꞌo,
“Ada hante Sila, pehoromuamo lolitangku.
O, hantambi-hantambingku,
ipehoromuakei lolitangka hieꞌe.
Aku morokoꞌmoꞌa haduo anaꞌntomaꞌani
alaꞌ io mokondoꞌa wute mebangkaꞌ
kuwali hatoꞌo alaꞌ nobeloiꞌa.
24 Alaꞌ ane hi Kai pitu mpiha lipaꞌna nihowonikiꞌi,
hi Lamek pitu mpuluꞌ pitu mpiha lipaꞌ nihowonikiꞌi.”
25 Hi Adama mampohantambimo hantambina, horiana towoweꞌe tiꞌo mampoꞌanaꞌki tomaꞌani, hei nokokeneꞌi hi Set, alaꞌ notiꞌi, “Pueꞌ Ala mampaꞌanimoꞌa anaꞌ to hantaniꞌna pampohawana hi Abeli, alaꞌ norokoꞌi hi Kai.” 26 Nipoꞌanaꞌkimo haduo anaꞌntomaꞌani pe hi Set, hei anaꞌ tiꞌo nokokeneꞌi hi Eno. I tempo tiꞌomola toaꞌ mepongkamo mantiꞌi konaꞌ Pueꞌ hei menomba.