Yʉkanana kusu no Kunzi pisi ka Yeso
5
1 Kinili, tiitoni bongbingbili ko miso ko Kunzi pisi ka bhaya kusu. Mbɨya wanʉ, ta kʉwa na mazɨyɔ pa imoti no Kunzi pisi ka Mombukwono-dhosu Yeso-Kilisito. 2 Tinisono na bʉnza bi nɨbɔ pisi kʉ kakɨ na ko pisi ya bhaya. Ta kʉwa mbɨya wanʉ bakisulyo ka bʉnza bi nɨbɔ. Ta na magyagya ko bhulyo mʉtamanagɨ mi nɨmɔ ta na imu kaiko ka ɨbhɨbha ko Kunzi. 3 Na bata, togwogo magyagya gʉtʉgʉ kanɨ takaigyogyiso aka, kyɛ tibhogotʉ ambɛ igyogyiso apága lɨmbɛngɨ lɨnda, 4 lɨmbɛngɨ lɨnda apága kibyo, kibyo apága mʉtamanagɨ. 5 Mʉtamanagɨ mi nɨmɔ katɨsagɨgʉ kayɨtambya payaya. A bɛyɔ, Kunzi otumisoni mambɛngɨ kusu na sɨpananɨsɔ kakɨ pisi ka Lɨmbɛngɨ-Lotu nɨlɔ atɨpá.6 A bɛyɔ, ko ngbingo yi nɨnɔ takɛgʉ ndɨ mino ibusu no ngu, Yeso ukwilyogo ndɨ batʉ banyɛ ko ngbingo yi nɨnɔ Kunzi abhiso ndɨ. 7 A yapʉpʉ kakwilyogo mʉtʉ wo ngbingbili. Yagɔgɔ, mʉmbanzʉ akwananatʉ kaiko wakɨtʉlya kakwilyogo mʉtʉ wanza. 8 Luki limoti, Kunzi atiwoniso bɨngbanganya bɛyɔ atɨpaga mino kʉgbɛ : Kilisito atikwilyogo mbɛyɨ ndɨ kanɨ ta asɨ batʉ banyɛ aka. 9 Pisi ka kukwakʉ kakɨ, tinisononi bongbingbili ko miso ko Kunzi; akowoniso bɛ atiukusogo ndɛkɛ ka ngbʉta ko Kunzi. 10 Ta ndɨ bomuyoniso ko Kunzi, luki limoti atɨpá kʉwa ndɨ yʉkanana na ɨyɨ pisi ka kukwakʉ ko Mikakɨ. Yɛkɨ tinisononi na yʉkanana na ɨyɨ, taʉkaga kʉwa ndɛkɛ pisi ka ɔbɨlɨ ko Mikakɨ. 11 Kɛgʉ asɨ nɨyɔ aka yɔ, togwogo magyagya ko Kunzi ko bhulyo ka Mombukwono-dhosu Yeso-Kilisito nɨnɔ atiukulyo pisi mbɨya wanʉ kaʉkanana no Kunzi.
Adhamʉ na Kilisito
12 Bʉnyɛ ogulyo ndɨ ka ɔbɨlɨ ko bhulyo ka mʉtʉ bemoti, bʉnyɛ bi nɨbɔ ogulisoku kʉwa ndɨ kukwakʉ. Kinili, kukwakʉ kwi nɨkwɔ ʉdagba kʉwa batʉ basɨ kyɛ batʉ basɨ bogyoni bʉnyɛ. 13 A bɛyɔ, kambwa wa Mʉtʉʉ, bʉnyɛ a kʉwa ndɨ ka ɔbɨlɨ aka. Luki limoti, yɛkɨ Mʉtʉʉ kɛgʉ mbɛyɨ ndɨ imu, Kunzi kandagɨgʉ ndɨ gɔnɨ bhulyo bʉnyɛ. 14 Luki limoti, katʉkya ko ngbingo ka Adhamu kadhwɛ ka nɨnɔ ka Musa, kukwakʉ a ndɨ kʉgʉ ka batʉ basɨ, gʉtʉgʉ nɨbɔ aka bɔ bakagyagʉ ndɨ bʉnyɛ abhɛ Adhamʉ nɨnɔ obuno ndɨ Mʉtʉʉ ko Kunzi.
Adhamʉ a ndɨ likingyosi ka mʉtʉ yi nɨnɔ a ndɨ kodhoku. 15 Luki limoti, bʉnyɛ ka Adhamʉ kɛgʉ mʉdɔngɔnɨ na apɛpɛ nɨnɔ Kunzi apá ndɨ ka ɨzɨyɔ. A bɛyɔ, batʉ budhingi bolumwogo ndɨ ko bhulyo bʉnyɛ ka mʉtʉ bemoti, luki limoti ɨzɨyɔ ko Kunzi a yidhingi kʉgbɛ na apɛpɛ nɨnɔ apá ndɨ ka ɨzɨyɔ ka batʉ budhingi, pisi ka mʉtʉ bemoti nɨnɔ ino bɛ Yeso-Kilisito. 16 Masɔlɔ ma apɛpɛ nɨnɔ Kunzi apá a dhi na bʉnyɛ ka mʉtʉ bemoti. A bɛyɔ, ngbanga nɨnɔ ogwo ndɨ na mʉtʉ bemoti apá kʉwa mʉngɨmbɔ. Luki limoti, nɨlɔ Kunzi apá ka ɨzɨyɔ kumbuso wa bʉnyɛ budhingi ka bambanzʉ lɔ uitiso bongbingbili ko miso kakɨ. 17 A bɛyɔ, kiko kanɨ kukwakʉ inisono ndɨ no ngu a ko bhulyo bʉnyɛ ka mʉtʉ bemoti, a ko bhulyo ka mʉtʉ bemoti yi nɨnɔ. Luki limoti, bambanzʉ binisononi kʉwa na mukumbo mudhingi kʉgbɛ pisi ka Yeso-Kilisito ɨyɨ mʉkaka. Batʉ basɨ nɨbɔ Kunzi ʉpá ɨzɨyɔ yidhingi, uitiso bongbingbili, biko ndɛkɛ na ɔbɨlɨ, balya ndɛkɛ bʉngama pisi ka mʉtʉ bemoti yi nɨnɔ, Yeso-Kilisito.
18 Kinili, bʉnyɛ ka mʉtʉ bemoti ʉmakya ndɨ batʉ basɨ ka mʉngɨmbɔ. A mʉdɔngɔnɨ bɛgɛyɔ yɨgya ya bungbingbili ka mʉtʉ bemoti ʉkʉlaga ndɨ mino batʉ basɨ ka mʉngɨmbɔ, ʉpá ɔbɨlɨ. 19 A bɛyɔ, ko bhulyo mʉ mapʉ ka mʉtʉ bemoti, ambaza mudhingi ka bambanzʉ ogulyo ndɨ ka bʉnyɛ. A bɛgɛyɔ, pisi ka mʉtʉ bemoti nɨnɔ amʉkana ndɨ Kunzi, ambaza mudhingi ka bambanzʉ ɨɨta ndɨ wobungbingbili ko miso ko Kunzi.
20 Nɨyɔ Mʉtʉʉ odhoku, bʉnyɛ obhwo. Luki limoti, kʉ bʉnyɛ obhwo mino, ɨzɨyɔ ko Kunzi obhwo kʉwa bata iyu kugbɛ gɔnɨ. 21 Kinili, bɛgɛyɔ bʉnyɛ owoniso ndɨ mino ngu kakɨ pisi ka kukwakʉ, a bɛgɛyɔ ɨzɨyɔ ko Kunzi owoniso ndɨ mino ngu kakɨ pisi ka bungbingbili katiguliso ka ɔbɨlɨ wa bɛnzɛ na bɛnzɛ, pisi ka Mombukwono-dhosu bɛyɔ ka Yeso-Kilisito.