Pɔlɔ ogoni ka Yelusalɛma
21
1 Nɨyɔ tasanana na ɨbʉ, tadaka ndɨ bata ka bhato, taga ngbingbili ko uzu nɨyɔ balɨkyaga bɛ Kosi. Bʉgala bi, tadhwɛ ndɨ ka mugi nɨmɔ balɨkyaga bɛ Lodho. Katʉkya ka Lodho, tadhwɛ ka Patala. 2 Kʉ bɛyɔ, tatakanya ndɨ bhato bemoti nɨ anaga ka Foinikia. Tadaka ndɨ mino, taga. 3 Nɨyɔ ta kʉwa ndɨ buwobhi na Kipulo, tasa ndɨ miso ya zebhu, taga ibusu ka Sulia. Tɨfʉma ka Tilo, ka pa yi nɨyɔ bhato osisogo ndɨ mino makpʉmʉka. 4 Kʉ bɛyɔ, tʉtakanya ndɨ babɨbya, tagya na ɨbʉ pɔsɔ yimoti. Lɨmbɛngɨ-Lotu ʉkpamya ndɨ kapakya Pɔlɔ kadaka ka Yelusalɛma. 5 Luki limoti, nɨyɔ pɔsɔ yi nɨyɔ akɨtaga, tidhukulogo ndɨ na lɨgʉndʉ kusu. Bambanzʉ basɨ, iki boko na bomiki bɨnda ndɨ katibhiso kunzi wa gʉdʉ. Kʉ bɛyɔ, ibusu basɨ tobuno ndɨ moli kubhi wa, talʉmba. 6 Nɨyɔ tasanana, tadaka ndɨ ka bhato, babɨbya bɨga kʉwa ndɨ ka ba kʉ-kabʉ. 7 Katʉkya ka Tilo, tomosisyo ndɨ kazabha, tadhwɛ ka Tolemai. Kʉ bɛyɔ, tɨnanana ndɨ na bamomosu bakilisito, tasyɛ ndɨ na ɨbʉ lɨsyɛ limoti. 8 Bʉgala bi, tatʉkyɨlya ndɨ lɨgʉndʉ, tadhwɛ ka Kaisalia. Tiko ndɨ ka ndabʉ ka Filipi nɨnɔ bamakaga ndɨ bɛ « Mʉbɨbɨkya wo Mongoni Manza ». Ɨyɨ Filipi a ndɨ bemoti ka bambanzʉ madɨya na ɨka nɨbɔ bʉpʉnaga ndɨ ka Yelusalɛma. 9 A ndɨ na basɨka bakwanganya nɨbɔ ba ndɨ nɨ bakanibhigʉ lɨkpʉmʉka ka balʉkʉ. Basɨka bi nɨbɔ ba ndɨ na bʉgyalandʉ bʉtʉmbʉlaga makpʉmʉka ko lino ko Kunzi. 10 Ibusu ta kʉwa ndɨ wa nɨ togyini masyɛ makpʉ. Mugyalandʉ bemoti nɨnɔ ina ndɨ Agabʉ, otukyoku ndɨ ka Yudhɛa, osiloku wa. 11 Odhoku katɨnda, ava mʉkaba ka Pɔlɔ, ɨkanda ndɨ nomu magʉ na mabɔkʉ. Ɨyɨ aka bɛ : « Lɨmbɛngɨ Lotu akabɨkya bɛ : ‹ Ka Yelusalɛma, Bayudha bakandaga banʉ mombukwono mʉkaba mi nɨma bɛyɔ, bagabha ka mabɔkʉ ka bapagani. › » 12 Nɨyɔ tʉkana lɨkpʉmʉka li nɨlɔ bɛyɔ, ibusu na batʉ ba Kaisalia tapakya ndɨ Pɔlɔ kadaka ka Yelusalɛma. 13 Luki limoti, Pɔlɔ osikisyo ndɨ bɛ : « Ko bhulyo ɨkɨ yɔ makagamana na kɛpá ombombo bɛyɔ ? Nawakɨtʉlya kaikondisiso gʉtʉgʉ kokwo aka ka Yelusalɛma ko lino ka Mombukwono-dhosu Yeso. 14 Nɨyɔ tɨna bɛ kɛgʉ katɨmʉkana, tasa kʉwa ndɨ. Tabɨkya bɛ : « Sɨpanasɨsɔ ka Mombukwono-dhosu igyonosi nɛkɨ ! »
15 Kumbuso wa masyɛ makɛdɛ, tibungusyogo ndɨ, tadaka ka Yelusalɛma. 16 Babɨbya ba Kaisalia bɨnda ndɨ katibhiso ka alʉkʉ bemoti ka Kipulo nɨnɔ ina ndɨ bɛ Munasoni. Ɨyɨ Munasoni a ndɨ mʉbɨbya wa ndɛlɨ, tasyɛ kʉwa ndɨ kʉ kakɨ.
Pɔlɔ ogoni kʉ ka
17 Nɨyɔ tosilo ka Yelusalɛma, bomomosu bakilisito batɨtɨlya ndɨ na magyagya. 18 Bʉgala bi, tɨnda ndɨ pa imoti na Bapɔlɔ kʉ ka Zaki. Kʉ bɛyɔ, bazɛɛ basɨ ba kanisa ba ndɨ bʉmʉmʉkana kʉ. 19 Nɨyɔ Pɔlɔ ama kaumuusogo, ʉtʉmbʉlyaga ndɨ buwobhi-buwobhi nɨlɔ Kunzi ʉgyɨlya ndɨ bapagani pisi ka ligubho kakɨ. 20 Nɨyɔ bazɛɛ bʉkana lɨkpʉmʉka li nɨlɔ, babhibhiso ndɨ Kunzi. Kumbuso yi, babɨkya ndɨ Pɔlɔ bɛ : « Mamakɨ, watʉkaɨna bɛyɔ Bayudha budhingi bobhoilyi mino bɛnɛ, ɨbʉ basɨ bakabyɛ mʉtʉʉ ka Musa lɨmbɛngɨ limoti. 21 Wɨna sɛ, bukoni bi bɛ a abhɛ wakaʉtɨwa Bayudha basɨ nɨbɔ bikogo lugo ka bɛvananza bayagɔgɔ bɛ basɨ kabyɛ mʉtʉʉ ka Musa. Upokyi bi gɔnɨ bɛ bakukusisonitɔgʉ bomikabʉ, bakobyonitɔgʉ yɨgya ya bʉndɛlɨ ka Bayudha. 22 Tagya sɛ kʉwa bʉnɨ kyɛ bibhatʉ aka bɛ wosiliniku wanʉ ? 23 Yɛkɨ a bɛyɔ, gya nɛkɨ nɨlɔ takaʉbɨkya. Ta wanʉ na balʉkʉ bakwanganya nɨbɔ bakoni silika kambwa ko Kunzi kaɨpá ko Kunzi. 24 Windoni pa imoti na ɨbʉ, mibubisoku. Kalyatʉ gɔnɨ nɨlɔ okwononi kyɛ biwisisi bamʉ. Kʉwa wa, bambazʉ basɨ bakwanana kaibho bɛ mongoni masɨ nɨmɔ bʉkana ndɨ ko bhulyo kakʉ a ma bangɔ. Luki limoti, bibho gɔnɨ bɛ ɨwɛ wagyagatʉ mʉtʉʉ. 25 Tukpikilyini bi batʉ nɨbɔ babhaya nɨ bakɛgʉ Bayudha nɨlɔ bakwanana kagya. Bakakwananɨgʉ kalya makɔlɔ nɨmɔ bopí bokunzi ka bapɛpɛ, ikanɨ kalya bangʉ gʉtʉgʉ nyama yi nɨnɔ bamwogo kanɨ badhulini basɔngʉ, bakogyonitɔgʉ gɔnɨ bɨlya.
26 Bʉgala bi, Pɔlɔ bɨnda ndɨ na balʉkʉ bi nɨbɔ, bibubiso ndɨ. Kumbuso yi, ingyo ndɨ ka ndabʉ ko Kunzi, ʉtʉmbʉlyaga ndɨ bɛ masyɛ ma kibubiso osyo ko ngbingo tino, isi yi bɛ bakwanana kaʉpɨ́lya bemoti-bemoti apɛpɛ ngbingo tino.
Bagwini Pɔlɔ
27 Nɨyɔ masyɛ madɨya na ɨka a kʉwa ndɨ buwobhi kosyo, Bayudha nɨbɔ ba Azia bamɨna ndɨ Pɔlɔ kʉsɔ wa ndabʉ ko Kunzi. Kʉwa wa, bavikimosogo ambaza wasɨ ka bambanzʉ, bagwi ndɨ Pɔlɔ. 28 Banapamɨkanaga bɛ : « Ibunu Bɛzɛlɛlɨ, singyoniku ! Alʉkʉ yi nɨmʉ nɔ akabɨkyaga ka bapa bayasɨ, akaʉpá bambanzʉ basɨ mʉtɨwɨ manyɛ ko bhulyo kusu, ko bhulyo mʉtʉʉ ka Musa na ko bhulyo ya ndabʉ ko Kunzi yi nɨyɨ. Umokyini gɔnɨ batʉ bi nɨbɔ bakɛgʉ Bayudha ka ndabʉ ko Kunzi, bapʉta pa Yotu yi nɨyɨ. » 29 A bɛyɔ, bamɨnatʉ ndɨ Pɔlɔ kambwa wa na Mʉɛfɛsɔ bemoti nɨnɔ ina ndɨ bɛ Tolofimo ka Yelusalɛma. Ɨbʉ ba ndɨ kasɨma bɛ Pɔlɔ amingisotʉ ndɨ ka ndabʉ ko Kunzi.
30 Gʉdʉ wasɨ avɨkɨmanaga ndɨ, bambanzʉ botinikoku ndɨ bingbufu. Bagwi Pɔlɔ, baluto ndɨ bikpwukpwukpwu kunzi wa ndabʉ ko Kunzi. Kumbuso yi, badhʉlaga ndɨ pumi yi. 31 Ba kʉwa ndɨ kakɨsa kamwɔ. Kʉwa wa, mongoni asilyo ndɨ ngama ka ambaza wa basʉdha bɛ gʉdʉ wasɨ wa Yelusalɛma ovikimonogini. 32 Ko ngbingo yi nɨnɔ aka nɔ, ʉva ndɨ basʉdha na bakʉmanda kabʉ baga ndɨ bangʉ kʉ bɛyɔ. Nɨyɔ bambanzʉ ʉmɨna, basa ndɨ kabhʉma Pɔlɔ. 33 Ngama ka basʉdha isisiloku kʉwa ndɨ buwobhi na ɨyɨ, agwisiso. Akpamya bɛ bakandɨ na baselegeni bayɨba. Kumbuso yi, uuso bɛ : « Wanɨ mʉ ? Ogyi ɨkɨ ? » 34 Luki limoti, lugo wa ambaza wa, bambanzʉ ba ndɨ kapamɨkana gbalɨ kanɨ ngama ka basʉdha kotombisyogʉ gʉtʉgʉ lɨkpʉmʉka limoti aka; kinili, akpamya kʉwa ndɨ bɛ baga na Pɔlɔ ka mʉkɔbɔ ka basʉdha. 35 Nɨyɔ Pɔlɔ osilo ka mupumi, basudha babhɨnɨka ndɨ kyɛ ambaza ka bambanzʉ a ndɨ nɨ ovikimonogini. 36 A bɛyɔ, batʉ basɨ ba ndɨ kabɨbya, banapamɨkanaga bɛ : « Mumwoni ! »
Pɔlɔ akozukogo lɨkpʉmʉka kakɨ
37 Ngbingo yi nɨnɔ ba ndɨ kʉwa mino buwobhi kamakya Pɔlɔ ka mʉkɔbɔ ka basʉdha, ɨyɨ aka ndɨ na ngama ka basʉdha bɛ : « Wakwananatʉ kɛsɨlya ngbingo kabɨkya lɨkpʉmʉka ? »
Ngama ka basʉdha amuuso ndɨ bɛ : « Wibhotʉ Ligiliki ? » 38 Kɛgʉ ɨwɛ nɨ Mumisili yi nɨnɔ opí bi ɨpʉmbʉ ka masyɛ mi nɨma, ʉva bonzikabʉ bɛlɔfʉ batɛkɛbɛ bakwanganya kaɨnda na ɨbʉ ka ɨsa ? »
39 Pɔlɔ asikisyo ndɨ bɛ : « Ɨmɨ, na Muyudha wa Taliso, kʉsɔ wa iwili ya Kilikia. Nɨbʉkʉta ka gʉdʉ wa kinisono. Kikiliki, ɨsɨlya mbɛyɨ mino ngbingo nanzɨnɨ na batʉ bi nɨba. » 40 Ngama asɨlya ndɨ mʉnzɨna. Pɔlɔ amaga kʉwa ndɨ ko miso ma mupumi, ʉgbʉma ndɨ bambanzʉ na kʉbɔkʉkɔ. Nɨyɔ badhaka, ʉbɨkya ndɨ na Libhɛlɛnia bɛ :