Pɔlɔ akabɨkyaga Mongoni Manza ka Ɛfɛsɔ
19
1 Ngbingo yi nɨnɔ Apolo a ndɨ mino ka Kolito, Pɔlɔ akɨtanaga ndɨ ka iwili ya bangʉpa, adhwɛ ka Ɛfɛsɔ. Kʉ bɛyɔ, ʉtakanya ndɨ babɨbya bemoti-bemoti; 2 ɨyɨ aka na ɨbʉ bɛ : « Ambɛ, minisonotʉ ndɨ na Lɨmbɛngɨ Lotu ngbingo yi nɨnɔ mabhaya ndɨ mino ? » Basikisyo ndɨ bɛ : « Kalɨ ! Takanukonigʉ ndɨ gʉtʉgʉ iki yi aka nɨ bananzɨna ko bhulyo ya Lɨmbɛngɨ Lotu. »3 Umuuso bata ndɨ bɛ : « Mogwo ndɨ ibatiso tino ? » Basikisyo bɛ : « Nɨyɔ ka Yuani. » 4 Pɔlɔ ʉbɨkya kʉwa ndɨ bɛ : « Yuani ubotisogo ndɨ batʉ nɨbɔ bapaga ndɨ kaikoso ɔbɨlɨ kabʉ. bɨkyaga ndɨ gɔnɨ bɛ babhalyɨ mʉtʉ yi nɨnɔ akodhoku kumbuso kakɨ. Mʉtʉ yi ndɨ nɨ Yeso. »
5 Nɨyɔ bʉkana bɛyɔ, bibotisiso ndɨ ko lino ka Mombukwono-dhosu Yeso. 6 Pɔlɔ ubhisilyo ndɨ mabɔkʉ, Lɨmbɛngɨ Lotu usilyo. Bapʉnga ndɨ kanzɨna ka masasʉ dhidhidhi na kabɨkyaga makpʉmʉka nɨmɔ kanigyonosigʉ. 7 Batʉ bi nɨbɔ basɨ ba ndɨ buwobhi tɛkɛbɛ na baba.
8 Kʉsɔ wa batɨmba basaa, Pɔlɔ ɨndaga ndɨ ka ndabʉ ya likungoni ka Bayudha, ananzɨna nɨ kɛgʉ na kʉbangakʉ. Agyaga ndɨ na ɨbʉ bodongoso ko bhulyo bʉngama ko Kunzi, anakɨsa bɛ batʉ bi nɨbɔ bikogo ndɨ kamʉkana babhaɨlyɨ. 9 Luki limoti, bagɔgɔ ba ndɨ mambɛngɨ muti, bakya ka bhaya, papʉnga kanzɨna yanyɛnyɛ ko bhulyo yo pisi ka Mombukwono-dhosu ka musilyoni wa. Kʉwa wa, Pɔlɔ ʉsa ndɨ, aga ndɨ pa imoti na babɨbya aka. Bikogo ndɨ kaɨnzɨnzɨnya na ɨbʉ masyɛ masɨ ka ndabʉ ya ɨkɔlɔ ka alʉkʉ bemoti nɨnɔ ina ndɨ bɛ Tilano. 10 Lɨkpʉmʉka li nɨlɔ igyonoso ndɨ kʉsɔ wa byanga bɨba. Batʉ basɨ nɨbɔ ba ndɨ ka iwili ya Azia, iki Bayudha na gʉtʉgʉ Bagiliki aka bʉkana ndɨ lɨkpʉmʉka ko Mombukwono-dhosu.
Bomika Sɛkɛva bakakɨngɨla kokpumyo malɨmba
11 Kunzi agyaga ndɨ makpʉmʉka mʉmbanga-mbanga pisi ka Pɔlɔ. 12 Kinili, bubhisilyogo ndɨ batʉ ba bokolobu botu na matambala nɨmɔ ikogo ndɨ nɨ odhundini nzʉyɨ ka Pɔlɔ. Batʉ bi nɨbɔ baʉkagatʉ ndɨ, malɨmba anupupo gɔnɨ. 13 Bayudha bemoti-bemoti bikogo ndɨ kaamama ka bapa dhidhidhi kakɨngɨla kokpumyo malɨmba ko lino ka Mombukwono-dhosu Yeso. Banabɨkya bɛ : « Nakamʉbɨkya ambɛ puponi ko lino ka Yeso nɨnɔ Pɔlɔ akabɨkyaga lɨkpʉmʉka kakɨ. »
14 Kumu-kumu bemoti Muyudha nɨnɔ ina ndɨ bɛ Sɛkɛva a ndɨ na bomiki madɨya na ɨka. Bomikakɨ bɔ bagyaga ndɨ lɨkpʉmʉka li nɨlɔ. 15 Luki limoti, lɨlɨmba usikisyo ndɨ bɛ : « Namibhotʉ Yeso, namibho gɔnɨ Pɔlɔ bɨnza. Luki limoti, ibunu ma ba wanɨ ? »
16 Alʉkʉ yi nɨnɔ a ndɨ na lɨlɨmba nɔ ubhumbukyoku bomika Sɛkɛva, ʉkʉkʉmilyaga, ʉgyagya ndɨ bɨnyɛ kadhwɛ kʉ kwa kʉ bomiki bɔ bopupoku ndɨ ka ndabʉ bondumbu na bevidi. 17 Batʉ basɨ Bɛfɛsɔ, iki Bayudha na gʉtʉgʉ Bagiliki aka bʉkana ndɨ mongoni mi nɨmɔ. Ɨbʉ basɨ babanga ndɨ, bobhibhiso lino ka Mombukwono-dhosu Yeso. 18 Batʉ budhingi nɨbɔ ba ndɨ nɨ bobhoilyini, bodhogoku ndɨ kabɨnɨkyana na kabɨkyaga bʉnyɛ kabʉ nɨbɔ bagyaga ndɨ bɨngbanganya ko miso ka bambanzʉ. 19 Lugo ka batʉ nɨbɔ bʉkɨmaga ndɨ banɛkɔ, budhingi bodhoku ndɨ na bakɨtabʉ kabʉ ba ya banɛkɔ kabhʉsya kambwa ka bambanzʉ basɨ. Bagya kʉwa ndɨ ɨsabʉ ya bakɨtabʉ bi nɨbɔ, apá buyi bambuma bɛlɔfʉ batɛkɛbɛ kubukumuti. 20 Kinili, pisi ko ngu ka Mombukwono-dhosu, lɨkpʉmʉka ko Kunzi ɨgbata ndɨ, ɨtʉlyana ka bapa bayasɨ.
Bambanzʉ bovikimonogini ka Ɛfɛsɔ
21 Kumbuso wa lɨkpʉmʉka li nɨlɔ, Pɔlɔ osisilyo ndɨ kaɨnda ka Yelusalɛma pisi ka iwili ya Makedhonia na nɨyɔ ya Akaya. Ɨyɨ aka ndɨ bɛ : « Nakadhwɛ kʉ, nakwananatʉ banʉ gɔnɨ kaaga ka Lʉma. » 22 tɨka kʉwa ndɨ ka Makedhonia batʉ baba lugo ka nɨbɔ bisingyogo ndɨ ka ligubho, a ndɨ nɨ Timotɛɔ ɨbʉ na Ɨlasito. Ɨyɨ mombukwono-dhakɨ otigolo mbɛyɨ ndɨ bata ka Azia aka.
23 Ko ngbingo yi nɨnɔ, bambanzʉ bavɨkɨmanaga ndɨ ka Ɛfɛsɔ ko bhulyo Pisi ka Mombukwono-dhosu. 24 Kʉ bɛyɔ, a ndɨ na mutwo-mabhɨsya bemoti nɨnɔ ina ndɨ bɛ Dhemitilio. Ɨyɨ Dhemitilio otwogo ndɨ ka bangwɛyɨ bekingyosi bayɨkɛkɛkɛ ba ya bandabʉ ko kunzi muko yi nɨnɔ ina ndɨ bɛ Alitemi. Ligubho li nɨlɔ ʉpága ndɨ botwo-mabhɨsya buyi budhingi. 25 Dhemitilio ʉmʉmʉla kʉwa ndɨ botwo-mabhɨsya na batʉ basɨ nɨbɔ bagyaga ndɨ bʉsɔlɔ ba ligubho li nɨlɔ. Ɨyɨ aka na ɨbʉ bɛ : « Bomika-mama, makaibho bɨnza bɛ talyalyaga ka ligubho li nɨlɨ. 26 Mbɨya wanʉ, makaɨna na kaʉkana bɛ kɛgʉ asɨ ka Ɛfɛsɔ aka, luki limoti a kʉwa buwobhi kaɨtʉlyana ka Azia wasɨ nɨlɔ Pɔlɔ akagya. Alutoni batʉ budhingi na uikoso tamanaga kabʉ bɛ bokunzi nɨbɔ bambanzʉ butwogo bakɛgʉ bokunzi. 27 Kɛgʉ asɨ ligubho kusu aka lɔ akakɨsa kapʉtɨkana, luki limoti, gʉtʉgʉ ɨbhɨbha ya ndabʉ ko kunzi mudhingi Alitemi aka. Ɨyɨ nɨnɔ babhibhisogo ba pa bayasɨ ka Azia na ka ɔbɨlɨ wasɨ ! »
28 Nɨyɔ bambanzʉ bʉkana lɨkpʉmʉka li nɨlɔ bɛyɔ, bavɨkɨmanaga ndɨ, banapamɨkanaga bɛ : « Alitemi wa Ɛfɛsɔ a mudhingi ! »
29 Kʉwa wa, gʉdʉ wasɨ avɨkɨmanaga ndɨ. Ɨbʉ basɨ bʉkanana ndɨ kaaga bɨgala-gala ka pa yangba nɨyɔ bamʉmʉkanaga ndɨ mino, bugwi ndɨ Gayo na Alisitalikɔ, Bamakedhonia baba bi nɨbɔ bakpakyana ndɨ na Bapɔlɔ. 30 Pɔlɔ a ndɨ wakɨtʉlya kaɨnda kambwa ka ambaza yi nɨnɔ, luki limoti babɨbya bapakya ndɨ. 31 Gʉtʉgʉ bangama bemoti-bemoti ba Azia nɨbɔ ba ndɨ bawai-dhakɨ, batɨkɨlya ndɨ bambanzʉ kabɨkya bɛ kipupisonitɔgʉ kʉ bɛyɔ. 32 Ko ngbingo yi nɨnɔ aka nɔ, bambanzʉ bapʉnga ndɨ kanzɨna gbalɨ, banzɨngɨmana ndɨ. Lugo kabʉ, bambanzʉ budhingi bakɛgʉ ndɨ kaibho gʉtʉgʉ bɛ bomumukoni ko bhulyo ɨkɨ. 33 Kʉwa wa, bambanzʉ bemoti-bemoti lugo wa ambaza batʉmbʉlyaga ndɨ Alikisi lɨkpʉmʉka li nɨlɔ. Bayudha bakpamya ndɨ bɛ akɨtagɨ kambwa. Kʉwa wa, Alikisi ʉgbʉma na mabɔkʉ bɛ badhakɨ kyɛ a ndɨ kapa kanzɨna. 34 Luki limoti, nɨyɔ bambanzʉ bibho bɛ Alikisi a Muyudha, ɨbʉ basɨ bapʉnga ndɨ kapamɨkanaga kʉsɔ wa basaa bhanda baba bɛ : « Alitemi wa Ɛfɛsɔ a mudhingi ! » 35 Ka mulibo, ndɔmbɛ mudhingi wa gʉdʉ yi nɨnɔ udhokiso ndɨ, ʉbɨkya bɛ : « Bunu Bɛfɛsɔ, bambazʉ basɨ bakaibho bɛ Ɛfɛsɔ a pa yi nɨyɔ obuulyogo ndabʉ ko kunzi Alitemi mudhingi na mulundu kakɨ nɨmɔ ogwoku ndɨ kʉgʉ wa lɨsyɛ. 36 Kɛgʉ na mʉtʉ gʉtʉgʉ bemoti aka nɨnɔ akwanana kaanganya. Kinili, okwononi mbɛyɨ kosiso lɨmbɛngɨ, nɨ makogyigʉ lɨkpʉmʉka bɨsɔsɔsɔ. 37 A bɛyɔ, balʉkʉ bi nɨbana modhuku na ɨbʉ ba bakibigʉ ka ndabʉ ko kunzi kusu ikanɨ katʉmbwa yi. 38 Kɨko nɨ Dhemetilio na batwo-mabɨsya nɨbɔ bagyaga na ɨbʉ ligubho bakɛgʉ kaʉkanana na mʉmbanzʉ, masyɛ mʉkɔ bangbanga atʉ, bazozi batʉ gɔnɨ, bakwanana kaaga kʉ bɛyɔ. 39 Makiko na lɨkpʉmʉka lagɔgɔ lɨbɨkya, nɨyɔ igyonoso kʉwa banʉ kambwa ka bangama. 40 A bɛyɔ, kabyɛnɛnɛ na lɨkpʉmʉka li nɨlɔ igyonosi na lɨsyɛ li nɨlɨ, bakwanana katɨpɨlyaga bangbanga bɛ tovikimonogini. Takɛgʉ no pisi yi nɨyɔ tatʉmbʉlaga mino mʉ ma musilyoni mi nɨma. v\ 41 Nɨyɔ ama kanzɨna bɛyɔ, bambanzʉ bomisikono ndɨ.