Bamamakɨ Yeso bakɛgʉ kabɨnɨkyana
7
1 Kumbuso yi, Yeso alingyo ndɨ Galilaya wasɨ. A bɛyɔ, kɛgʉ ndɨ kapa kalingyo Yudhɛa kyɛ bangama ka Bayudha ba ndɨ kakɨsa kamwisiso. 2 Wɨna sɛ, yɨnga bemoti ka Bayudha nɨnɔ bamakaga ndɨ bɛ yɨnga wa Bangbangba+\fr 7.2 \ft \fq yɨnga wa Bangbangba \ft a ndɨ yinga ka Bayudha nɨnɔ agyaga ndɨ pɔsɔ bemoti; balyaga ndɨ ka tɨmba wa kʉbɔmʉ na nɨnɔ wa tɛkɛbɛ kanɨ bomoni kanyɔ masɔlɔ. Batamanaga ndɨ ngbingo yi nɨnɔ bomikya-Baɨzalɛlɨ ba ndɨ mino ka ɨsa. Ko ngbingo wa yɨnga yi nɨnɔ, batʉ basɨ bikogo ndɨ ka bangbangba. Yelusalɛma a kʉwa ndɨ pa yidhingi kʉ balyaga ndɨ mino yɨnga yi nɨnɔ. Wanda gɔnɨ Balawi 23.34-36; Ɨgɨlya 16.13. a kʉwa ndɨ buwobhi. 3 Bamamakɨ Yeso babɨkya kʉwa ndɨ bɛ : « Tɨtʉkyɨlya ibusu wanʉ, waga ka Yudhɛa ibha babɨbya kakʉ nɨbɔ kʉ bɨnɨtɔ gɔnɨ ɨbʉ nɨlɔ wiko kagya. 4 Kɛgʉ na mʉmbanzʉ gʉtʉgʉ bemoti aka nɨnɔ agyaga lɨkpʉmʉka ko dhikidi, nɨ a sɛ kakɨsa kaimibhisisoko bɨngbanganya. Kiko nɨ wakagya makpʉmʉka mʉmbanga-mbanga, wiwoniso nɛkɨ ka bambanzʉ basɨ. » 5 A bɛyɔ, gʉtʉgʉ bamamakɨ bɨkpɛ bakɛgʉ ndɨ kabɨnɨkyana. 6 Yeso ʉbɨkya ndɨ bɛ : « Ngbingo yi nɨnɔ kamɨ wanza kanitulyonigʉ mbɛyɨ. Luki limoti, nɨnɔ kunu ikogo ɨyɨ asɨ wanza aka bongbingo basɨ. 7 Batʉ ba ɔbɨlɨ bakakwananɨgʉ kamʉmʉya ibunu. Luki limoti, bɛmʉyatʉ ɨmɨ kyɛ na dhɛmʉ kaʉbɨkyaga yɨgya kabʉ yanyɛ. 8 Windoni ibunu ka yɨnga. Nakɛgʉ mino ɨmɨ kaɨnda kyɛ ngbingo kamɨ kɛgʉ mbɛyɨ wakɨtʉlyana. » 9 Nɨyɔ abɨkya bɛyɔ, asɨkana ndɨ ɨyɨ ka Galilaya.Yeso akaaga ka yɨnga
10 Nɨyɔ bamamakɨ bɨnda ndɨ ka yɨnga, Yeso ɨnda ndɨ gɔnɨ ɨyɨ bɨpɛlɛ nɨ bambanzʉ bakibhigʉ. 11 Kʉwa wa, bangama ka Bayudha bapʉnga ndɨ kakɨsa bɨvaka-vaka, banuusogo bɛ : « Alʉkʉ yi nɨnɔ a yanɨ ? » 12 Kʉsɔ wa ambaza kʉ, bambanzʉ ba ndɨ kaɨnzɨnzɨnya yakpʉ kʉgʉ ka Yeso. Batʉ bagɔ ba ndɨ kabɨkya bɛ : « A mʉtʉ wanza. » Batʉ bi bɔ bɛ : « Haaa, akauluto bambanzʉ ko pisi yanyɛ. » 13 Luki limoti, kɛgʉ na mʉtʉ bemoti nɨnɔ abɨkyaga ndɨ lɨkpʉmʉka bɨngbanganya, kyɛ bʉbangaga ndɨ bangama ka Bayudha.
14 Ngbingo yi nɨnɔ dhumo a kʉwa ndɨ mino bɨkɔkpwɔ, Yeso aga ndɨ ka ndabʉ ko Kunzi, apʉnga kapá mʉtɨwɨ. 15 Bayudha bombomboyo ndɨ, banabɨkya bɛ : « Alʉkʉ mʉna apʉnya mbɛyɨ na yimibho yanɨ ? Wɨna sɛ, kɨndagʉ gʉtʉgʉ ndɨ ka ɨkɔlɔ bɛgɛyɔ. » 16 Yeso usikisyo ndɨ bɛ : « Mʉtɨwɨ nɨmɔ ɨmɨ napága, kikogigʉ makamɨ, luki limoti, ikogo ma ko Kunzi nɨnɔ etikoku ndɨ. 17 Mʉmbanzʉ kiko wakɨtʉlya kagya nɨlɔ Kunzi apaga, ibho pisi ka mʉtʉʉ mi nɨmɔ bɛ akotukyoku ka Bhabha ikanɨ kamɨ bɨkpɛ. 18 Mʉtʉ yi nɨnɔ anzɨnaga ko lino kakɨ bɨkpɛ, akɨsaga ɨbhɨbha kakɨ aka mombukwono dhakɨ yi. Luki limoti, nɨnɔ akɨsaga ɨbhɨbha ka nɨnɔ atikoku ndɨ, abɨkyaga lɨngʉnʉ nɨ kʉbɔbɔkʉ kɛgʉ kʉsɔ kakɨ. 19 Musa kamʉpágʉ mbɛyɨ ndɨ mʉtʉʉ ? Luki limoti, mʉmbanzʉ gʉtʉgʉ bemoti aka kɛgʉ kabyɛ mʉtʉʉ mi nɨmɔ. Mbɨya wanʉ, ko bhulyo ya ɨkɨ yɔ mo mino kakɨsa kemwisiso ? » 20 Ambaza asikisyo ndɨ bɛ : « Wa na lɨlɨmba ! Wanɨ mbɛyɨ nɔ akakɨsa kaumwisiso ? » 21 Yeso usikisyo ndɨ bɛ : « Nagya ndɨ lɨkpʉmʉka lɨmbanga limoti aka, amudhikiso ndɨ ibunu basɨ mʉnɔkʉ bɨdhɛ. 22 Ibunu mʉkɔgɔ bomiki gʉtʉgʉ ka lɨsyɛ la kimumbiso aka kyɛ Musa amʉpá ndɨ mʉtʉʉ kagyaga bɛyɔ. Ka lɨngʉnʉ, kodhokugʉ ndɨ ka Musa, luki limoti, ka batɨtonu. 23 Kiko nɛkɨ nɨ bʉkɔgɔtʉ bomiki ka lɨsyɛ la kimumbiso, a ko bhulyo yibuulyo mʉtʉʉ ka Musa. Ko bhulyo ɨkɨ sɛ kʉwa yɔ mambɛngɨ o mino kamʉkandɨkana wa nauukusi mino mʉmbanzʉ ka lɨsyɛ la kimumbiso ? 24 Makokogonitɔgʉ mʉkɔmbʉ kabyɛnɛnɛ na nɨyɔ mɨnaga no miso aka, luki limoti, kogoni ka bungbingbili. »
Ambɛ, Yeso nɨ Masiya* ?
25 Batʉ bagɔgɔ ba Yelusalɛma ba ndɨ kabɨkya bɛ : « Kɛgʉ mʉtʉ yi nɨnɔ bakakɨsa kamwisiso nɨmʉ ? 26 Wɨna sɛ, akanzɨna bɨngbanganya kambwa ka bambanzʉ na bakɛgʉ gʉtʉgʉ kabukyo aka. Bangama bibhito nɛkɨ bi lɨngʉnʉ bɛ ɨyɨ nɨ Masiya ? 27 Takaibho ambɛ mʉtʉ yi nɨmʉna apʉnya yanɨ. Luki limoti, ngbingo yi nɨnɔ Masiya odhoku ndɛkɛ mino, mʉmbanzʉ gʉtʉgʉ bemoti aka kibhigʉ ndɛkɛ bɛ apʉnya yanɨ. »
28 Ngbingo yi nɨnɔ Yeso a kʉwa ndɨ mino kapá mʉtɨwɨ ka ndabʉ ko Kunzi, abɨkya ndɨ na lɨyʉ lapʉ bɛ : « Matʉ kemibho bɨnza na mibhotʉ kʉ no mino kapʉnya ? Nakodhokugʉ ndɨ ko ngu kamɨ bɨkpɛ, luki limoti, nɨnɔ etikoku ndɨ abɨkyaga ɨyɨ asɨ lɨngʉnʉ aka. Ibunu, makamibhigʉ. 29 Ɨmɨ, namibhotʉ kyɛ notukyoku ndɨ kakɨ na ɨyɨ nɔ etikoku. »
30 Bakɨsa kʉwa ndɨ bɛ bagwi Yeso lɨkɨ, luki limoti, mʉmbanzʉ gʉtʉgʉ bemoti aka kakwananagʉ ndɨ kagwi, kyɛ ngbingo kakɨ kɛgʉ mbɛyɨ ndɨ wakɨtʉlyana. 31 Kʉsɔ wa ambaza, bambanzʉ babɨnɨkyana ndɨ, babɨkya bɛ : « Ngbingo yi nɨnɔ Masiya odhoku ndɛkɛ mino, agyatʉ ndɛkɛ gɔnɨ ɨyɨ makpʉmʉka mʉmbanga-mbanga makpʉ kakɨtaga alʉkʉ yi nɨmʉ ? »
Bafalisayɔ bakaʉtɨka bazamʉ kagwi Yeso
32 Bafalisayɔ bʉmʉkana ndɨ bambanzʉ nɨ banɨnzɨnzɨnya ko bhulyo ka Yeso kʉsɔ wa ambaza kʉ. Kʉwa wa, bokumu-kumu na Bafalisayɔ bʉtɨka ndɨ bazamʉ kagwi.
33 Yeso ʉbɨkya ndɨ batʉ nɨbɔ ba ndɨ wa bɛ : « Na mbɛyɨ bata pa imoti na ibunu ko ngbingo mʉkɛdɛ. Kumbuso yi, nɨgatʉ katakanya nɨnɔ etikoku ndɨ. 34 Mɛkɨsatʉ ndɛkɛ bɨvaka-vaka, luki limoti, makɛmɨnɨgʉ. Makakwananɨgʉ ndɛkɛ kosilo kʉ niko mino. » 35 Bayudha buusono ndɨ lugo kabʉ bɛ : « A sɛ kʉwa kaɨnda yanɨ, nɨyɔ takakwananɨgʉ mino kamɨna ? A sɛ kapa kaɨnda ka Bayudha bi nɨbɔ ba bumisikono lugo ka Bagiliki na kaʉpá Bagiliki mʉtɨwɨ kakɨ ? 36 Atibikyi bi bɛ : ‹ Mɛkɨsatʉ ndɛkɛ bɨvaka-vaka, luki limoti, makɛmɨnɨgʉ. Makakwananɨgʉ ndɛkɛ kosilo kʉ niko mino. › Isi ya mʉnzɨna mi nɨmɔ nɨ ɨkɨ ? »
Libo nɨlɔ apága ɔbɨlɨ
37 Lɨsyɛ la mulibo la yɨnga yi nɨnɔ a ndɨ lɨsyɛ lidhingi kʉgbɛ. Lɨsyɛ li nɨlɔ, Yeso amaga ndɨ bɨgba, abɨkya na lɨyʉ lapʉ bɛ : « Mʉmbanzʉ kiko na mʉsasa, odhuku komwo libo kʉnʉ no mino. 38 Ka mʉtʉ yi nɨnɔ, iko ndɛkɛ mʉdɔngɔnɨ bɛyɔ Mobiso Motu abɨkyaga mino bɛ : ‹ Mambɛngɨ mo mobo mudhingi-mudhingi nɨmɔ apága ɔbɨlɨ akɨka ndɛkɛ katʉkya ka lɨmbɛngɨ ka mʉtʉ nɨnɔ ɛbɨnɨkyana. › » 39 Yeso a ndɨ kanzɨna bɛyɔ ko bhulyo Lɨmbɛngɨ ko Kunzi nɨlɔ batʉ bi nɨbɔ babɨnɨkyana biko ndɛkɛ nolu. A bɛyɔ, Lɨmbɛngɨ li nɨlɔ kɛgʉ mbɛyɨ ndɨ lidhoku, kyɛ Kunzi a ndɨ nɨ kanapígʉ Yeso ɨbhɨbha.
Bambanzʉ bakaɨgbananaga ko bhulyo ka Yeso
40 Nɨyɔ bambanzʉ bagɔgɔ lugo wa ambaza bʉkana mino mʉnzɨna mi nɨmɔ, babɨkya ndɨ bɛ : « A lɨngʉnʉ aka Mugyalandʉ nɨnɔ bawanyaga ndɨ ! » 41 Bagɔgɔ babɨkya ndɨ bɛ : « Masiya nɔ ! » Luki limoti, bagɔgɔ bata bɛ : « Ambɛ, Masiya akwananatʉ kotukyoku ka Galilaya ? 42 Mobiso Motu kabɨkyagɨgʉ mbɛyɨ bɛ Masiya ɨbʉkʉta ndɛkɛ ka lɨvananza ka ngama Dhaudhi na ka Bhɛtɛlɛmʉ, mugi nɨmɔ Dhaudhi a ndɨ mino ? » 43 Kʉwa wa, ambaza ɨgbananaga ndɨ ko bhulyo ka Yeso. 44 Batʉ bagɔgɔ lugo kabʉ ba ndɨ kapa kagwi, luki limoti, mʉmbanzʉ gʉtʉgʉ bemoti aka kavɨlagʉ ndɨ.
Bangama ka Bayudha bakɛgʉ kabɨnɨkyana Yeso
45 Kumbuso yi, bazamʉ nɨbɔ bangama ko bokumu na Bafalisayɔ bʉtɨka ndɨ, bigoku. Bumuuso kʉwa ndɨ bazamʉ bɛ : « Ko bhulyo ɨkɨ yɔ makodhukugʉ mino na Yeso ? » 46 Busikisyo ndɨ bɛ : « A lɨmbanga ! Takanamukonigʉ ndɛkɛ mʉmbanzʉ ananzɨna abhɛ alʉkʉ yi nɨnɔ kʉ ! » 47 Bafalisayɔ bumuuso ndɨ bɛ : « Ambɛ, mogulyini kʉwa gɔnɨ ibunu kʉsɔ wa kʉbɔbɔkʉ kwi nɨkwɔ ? 48 Atʉ mbɛyɨ na mʉmbanzʉ gʉtʉgʉ bemoti aka lugo kusu ka bangama ikanɨ ka Bafalisayɔ nɨnɔ abɨnɨkyana ? 49 Luki limoti, batʉ bi nɨbɔ bakibhigʉ mʉtʉʉ ka Musa. Bovoni ndɨ ligbongoni. »
50 Nikodhimo a ndɨ bemoti ka Bafalisayɔ nɨbɔ ba ndɨ wa. Ɨyɨ nɔ odhoku ndɨ kamɨna Yeso kambwa, ʉbɨkya ndɨ bɛ : 51 « Mʉtʉʉ kusu, akɔgɔtʉ mʉkɔmbʉ ka mʉmbanzʉ nɨ bakanomukonigʉ ikanɨ bakanibhigʉ bɛ ogyi bi ɨkɨ ? » 52 Luki limoti, basikisyo ndɨ bɛ : « Wa kʉwa ɨwɛ mʉtʉ wa Galilaya gɔnɨ ? Kpɨma mbɛyɨ Mobiso Motu bɨnza ikanɨ wɨnatʉ gʉtʉgʉ bɛ mugyalandʉ bemoti opupotʉ ndɛkɛ ka Galilaya. »
Yeso na adanda bemoti