Yɛzɛfʉ iitini mʉgya-ligubho ka Potifali
39
1 Baisimaeli ba kʉwa ndɨ na Yɛzɛfʉ ka Misili. Kʉ bɛyɔ bagabhɨlya ndɨ Mumisili bemoti nɨnɔ ina ndɨ bɛ Potifali. Ɨyɨ Potifali a ndɨ mʉtʉ wa ɨzangɨya kʉgbɛ ka ngama mudhingi wa Misili. Na a ndɨ gɔnɨ mbɔkʉ ka basʉdha nɨbɔ babuulyogo ndɨ ngama yi nɨnɔ. 2 Yɛzɛfʉ bikogo ndɨ pa imoti na mombukwono dhakɨ bɛyɔ ka Mumisili. Na Yawe a ndɨ kabuulyogo na angamɨkana ndɨ ko bopisi kakɨ bayasɨ. 3 Potifali ibho ndɨ bɛ Yawe a ndɨ pa imoti na Yɛzɛfʉ, na a ndɨ kangomikiso ka bopisi kakɨ bayasɨ. 4 Kʉwa wa, Potifali ogwo ndɨ magyagya na Yɛzɛfʉ, ava ndɨ bɛ iki mʉgya-ligubho kakɨ. Abhiso ndɨ ngama ka bagya-ligubho ba ndabʉ kakɨ na kaandaga lɨngama kakɨ lasɨ. 5 Katʉkya ko ngbingo yi nɨnɔ Potifali abhiso ndɨ mino Yɛzɛfʉ bɛ iki kobuulyogo ndabʉ kakɨ na kaandaga lɨngama kakɨ lasɨ, Yawe adukulyo ndɨ bʉbʉnga ko lino ka Yɛzɛfʉ. Kʉwa wa, bʉbʉnga bi nɨbɔ odukono ndɨ ka makpʉmʉka kakɨ masɨ, ka ndabʉ na ka botiko kakɨ. 6 Potifali asɨlya kʉwa ndɨ Yɛzɛfʉ kaanda lɨngama kakɨ lasɨ. Ɨyɨ kagyagɨgʉ ndɨ bata luki kiki asɨ kaanda malɨlɨ kakɨ aka.Muko Potifali apílyogini Yɛzɛfʉ bangbanga ba bɔngɔ
Yɛzɛfʉ a ndɨ mʉlʉkʉ wanza kʉgbɛ.
7 Kumbuso wo ngbingo bemoti bɛnɛ, mʉsasa ka Yɛzɛfʉ agwi ndɨ muko mombukwono dhakɨ bɛyɔ ka Potifali, abɨkya bɛ : « Dhoku, takpakyanɨ na ɨwɛ abhɛ mʉlʉkʉ na muko ! » 8 Luki limoti, Yɛzɛfʉ asikisyo ndɨ bɛ : « Kɨgyananɨgʉ, kyɛ katʉkya wa aka wa ningyoku mino wanʉ, mombukwono dhamɨ kandagɨgʉ bata luki, esilyoni lɨngama kakɨ lasɨ. 9 Na ka ndabʉ yi nɨyɨ, kɛgʉ na mʉtʉ yi nɨnɔ ekitogi. Kɛpakyagʉ luki gʉtʉgʉ limoti aka kiki nɨ ɨwɛ aka, kyɛ wa mukakɨ. Nakwanana pɨyɛ kagya bɨlya na kagyɨlya Kunzi bʉnyɛ lɨkɨ ? »
10 Masyɛ masɨ, muko Potifali ikogo ndɨ kadhomiso Yɛzɛfʉ bɛ bakpakyanɨ na ɨyɨ abhɛ mʉlʉkʉ na muko ! » Luki limoti, nɨ Yɛzɛfʉ kɛgʉ kapa.
11 Lɨsyɛ limoti, Yɛzɛfʉ ingyo ndɨ ka ndabʉ kagya ligubho kakɨ bɛyɔ aka yɔ agyaga ndɨ mino ka bʉndɛlɨ. Kʉ bɛyɔ, mʉgya-ligubho nagɔgɔ gʉtʉgʉ bemoti aka kɛgʉ ndɨ. 12 Kʉwa wa, muko Potifali agwi ndɨ Yɛzɛfʉ bɨkɔkɔkɔ ka kutuko, abɨkya bɛ : « Takpakyanɨ na ɨwɛ abhɛ mʉlʉkʉ na muko ! » Luki limoti, Yɛzɛfʉ ikupisogo, apɨkɨta ndɨ kunzi. 13 Nɨyɔ muko ɨna ndɨ bɛ Yɛzɛfʉ opikitini kunzi, asa na kutuko ka mabɔkʉ, 14 ʉmaka kʉwa ndɨ bagya-ligubho ba ndabʉ kakɨ, ʉbɨkya bɛ : « Winoni ! Mbʉnyamɨ odhoku ndɨ na Muebhalania bɛ atɨmɨnɨ payaya. Ekpudiku bi bɛ takpakyanɨ na ɨyɨ abhɛ mʉlʉkʉ na muko, luki limoti nakʉgwaga bi pʉlʉ. » 15 Nɨyɔ ukoni bi nɨ na nakʉgwaga pʉlʉ, ɛsa na kutuko kakɨ, apɨkɨta kunzi.
16 Kʉwa wa, muko yi nɨnɔ obuulyogo ndɨ kutuko ka Yɛzɛfʉ kadhwɛ kʉ kwa kʉ mbʉnyakɨ igoku ndɨ mino. 17 Atʉmbʉlyaga ndɨ lɨkpʉmʉka li nɨlɔ, abɨkya bɛ : « Muebhalania yi nɨmʉ watidhulyoku ndɨ na ɨyɨ mʉ, ekpudiku bi bɛ takpakyanɨ na ɨyɨ abhɛ mʉlʉkʉ na muko. 18 Luki limoti, nɨyɔ nokugwogi bi, ɛsa na kutuko kakɨ, apɨkɨta bi kunzi. »
19 Nɨyɔ mombukwono Yɛzɛfʉ ʉkana ndɨ mino mʉtʉmbʉlagɨ ka mukakɨ, lɨmbɛngɨ akandɨkanaga ndɨ bɨsʉlʉ-sʉlʉ. 20 Agwisiso ndɨ, bamakya ka ligbito kʉ bʉmakyaga ndɨ mino batʉ ba ligbito ka ngama mudhingi.
Yɛzɛfʉ a ka ligbito
Ngbingo yi nɨnɔ Yɛzɛfʉ a ndɨ mino ka ligbito, 21 Yawe a ndɨ kabuulyogo aka, anawoniso sɨpananɨsɔ. Agya ndɨ gɔnɨ bɛ ngama wa ligbito avɨ abhɛ mʉtʉ wa lɨngʉnʉ. 22 Kʉ bɛyɔ, ngama wa ligbito abhiso ndɨ Yɛzɛfʉ kaiko ngama ka batʉ ba ligbito basɨ. Ɨyɨ nɔ andaga kʉwa ndɨ gɔnɨ bopisi ba ya mogubho masɨ. 23 Ɨyɨ ngama wa ligbito yi nɨnɔ kandagɨgʉ bata ndɨ gʉtʉgʉ luki limoti aka ka nɨmɔ asɨlya ndɨ Yɛzɛfʉ. Ka lɨngʉnʉ,Yawe a ndɨ pa imoti na Yɛzɛfʉ na angomikiso ndɨ ka bopisi kakɨ bayasɨ.