Yakɔbɔ apikitini Labhani
31
1 Yakɔbɔ ʉkana ndɨ bɛyɔ bomika Labhani ba ndɨ mino kayɨnzɨzɨnya, banabɨkya bɛ : « Makpʉmʉka masɨ nɨmɔ ka bhabha, Yakɔbɔ otuponi ndɨ na ongomikononi nomu kʉgbɛ. » 2 Yakɔbɔ ɨna ndɨ bɛ tɨtakɨ kɛgʉ bata kanda no miso manza abhɛ masyɛ nɨmɔ akɨtaga ndɨ. 3 Kʉwa wa, Yawe abɨkya Yakɔbɔ bɛ : « Wɨga ka mugi ka batɨtakʉ, ka lɨvananza kakʉ, niko banʉ pa imoti na ɨwɛ. »4 Yakɔbɔ a ndɨ kaubuulyogo banyama ka syʉngbʉ, ʉtɨka ndɨ bambanzʉ kamakɨlya Lakeli na Lɛya. 5 bɨkya bɛ : « Nakaɨna ambɛ obhonu kɛgʉ bata kɛnda no miso manza abhɛ masyɛ nɨmɔ akɨtaga ndɨ. Luki limoti, Kunzi nɨnɔ ka bhabha a pa imoti na ɨmɨ. 6 Makaibho bɨnza bɛ nagugubhyo ndɨ obhonu no ngu kamɨ yasɨ. 7 Obhonu ɛbɔbɔ ndɨ kogomosyono nganga tɛkɛbɛ mʉkalya kamɨ. Luki limoti Kunzi kasɨlyagʉ ndɨ ngbingo bɛ ɛgyɨlyɨ bʉnyɛ. 8 Nɨyɔ abɨkyaga ndɨ mino bɛ : " Nʉkalya ndɛkɛ na banyama nɨbɔ batɔnɨ-tɔnɨ ", banyama basɨ bʉbʉkʉtaga ndɨ bomiki batɔnɨ-tɔnɨ. Ngbingo yi nɨnɔ abɨkyaga ndɨ mino bɛ : " Nʉkalya ndɛkɛ na banyama bambala-mbala ", banyama basɨ bʉbʉkʉtaga ndɨ bomiki bambala-mbala. 9 Kunzi ʉva ndɨ banyama ka obhonu, ɛpá kʉwa ndɨ ɨmɨ.
10 « Ngbingo yi nɨnɔ banyama bɨnaga ndɨ mino bangʉ, nalʉtaga nziki. Nʉmɨna bogbungulu nɨbɔ bambala-mbala, batɔnɨ-tɔnɨ na ba mabhalanga. 11 Malaika ko Kunzi ɛmaka ndɨ ko nziki bɛ : " Yakɔbɔ ". Nasikisyo ndɨ bɛ : " Ɨmɨ nɨmʉ ". 12 Ɛbɨkya bɛ : " mɨna bogbungulu basɨ nɨbɔ bambala-mbala, batɔnɨ-tɔnɨ na ba mabhalanga nɨbana buumi banyama ba, kyɛ ninito bi nɨlɔ Labhani ugyilyi. 13 Ɨmɨ nɨ Kunzi nɨnɔ upupilyo ndɨ ka Bheteli, wa wogbodyo ndɨ mino molingo ka lɨtalʉ, wɛkʉlya silika. Mbɨya wanʉ, tʉkya ka mugi mi nɨma, wɨga ku kunu. " »
14 Kʉwa wa, Lakeli ɨbʉ na Lɛya basikisyo ndɨ Yakɔbɔ bɛ : « Tatʉ bata no luki lagɔgɔ ikanɨ lisimo ka ndabʉ ka bhabha ? 15 Katɨvagʉ mbɛyɨ ndɨ abhɛ bobhiko, kyɛ atɨgabha ndɨ na kumbuso yi, alya buyi kusu ? 16 Lɨngama lasɨ nɨlɔ Kunzi akʉpya ndɨ bhabha, a lo kusu na bomikusu. Mbɨya wanʉ, gya lasɨ nɨlɔ Kunzi ubikyi. »
17 Kʉwa wa, Yakɔbɔ udokisiso ndɨ bomikakɨ na bokakɨ kʉgʉ wa bangamia. 18 va ndɨ bambaza ba banyama kakɨ na mukumbo masɨ nɨmɔ inisono ndɨ na imu ka Padhani-Alamu, ɨga ka abhakɨ bɛyɔ ka Isaka ka Kanana. 19 Ngbingo yi nɨnɔ Labhani ɨnda ndɨ mino kaʉkɔ banyama kakɨ tukatʉ, Lakeli ubibo ndɨ bokunzia. ka abhakɨ.
20 Yakɔbɔ abulisyo ndɨ Mualamu bɛyɔ ka Labhani katʉkya bɨpɛlɛ nɨ kabikyigʉ. 21 Apɨkɨta ndɨ na mukumbo kakɨ masɨ, aga. Azabha ndɨ libo lidhingi la Fulati, aga miso ya bangʉpa ba ya Gileadhi.
Labhani akabyɛ Yakɔbɔ
22 Kumbuso wa masyɛ masaa, babɨkya Labhani bɛ Yakɔbɔ opikitini bi. 23 Kʉwa wa, Labhani ʉva ndɨ bamamakɨ, bapʉnga ndɨ kabyɛ Yakɔbɔ kʉsɔ wa masyɛ madɨya na ɨka, ba kʉwa ndɨ buwobhi katakanyaga ka bangʉpa ba ya Gileadhi. 24 Luki limoti, Kunzi apuponilyoku ndɨ Mualamu bɛyɔ ka Labhani ko nziki no bhiti, abɨkya bɛ : « Wibuulyotʉ ! Wakagyonitɔgʉ Yakɔbɔ bʉnyɛ gʉtʉgʉ bumoti aka. » b
25 Labhani atakanyaga ndɨ Yakɔbɔ nɨ opikini ngbangba ka ngʉpa. Labhani na bamamakɨ, bopiko ndɨ gɔnɨ ɨbʉ ka bangʉpa ba ya Galeadhi. 26 Kʉwa wa, Labhani amuuso ndɨ Yakɔbɔ bɛ : « Wogyi bi bʉnɨ bɛyɔ ? Kɛbɔ na waga na bomikamɨ boko bi abhɛ bosunzu ba lʉnga. 27 Ko bhulyo ɨkɨ yɔ wesumilyi bi mino lɨgʉndʉ kakʉ, watʉkya bɨpɛlɛ nɨ wakebikyigʉ ? Nakwanana bi kaʉsɨlya lɨgʉndʉ kʉsɔ wa mazɨyɔ na mambʉ, byɛmbɨ na dhʉma ! 28 Wakesilyigʉ bi ngbingo kauputito bomikamɨ na bomiko-mikamɨ. Ka lɨngʉnʉ, wogyi bi abhɛ wakɛgʉ na lɨmbɛngɨ ! 29 Nakwananatʉ bi kaʉgyɨlya bʉnyɛ. Luki limoti, Kunzi nɨnɔ ka abhakʉ epuponilyito bi no bhiti ya isyeku-bi, ɛbɨkya bɛ : " Wibuulyotʉ ! Wakagyonitɔgʉ Yakɔbɔ bʉnyɛ gʉtʉgʉ bumoti aka. " 30 Mbɨya wanʉ, nakaibho ambɛ wotukyiku bi bɨpɛlɛ kyɛ wa obi na mʉsasa kaɨga ka ndabʉ ka abhakʉ. Luki limoti, ko bhulyo ɨkɨ yɔ webibilyi bi bokunzi kamɨ ? » 31 Yakɔbɔ asikisyo tɨtakɨ bɛ : « Na obi na kʉbangakʉ, nanatamana ambɛ wakwananatʉ kɛkʉpya bomikakʉ. 32 Luki limoti, wakamɨna mʉtʉ bemoti lugo kusu na bokunzi kakʉ, mʉtʉ yi nɨnɔ okwatʉ. Kambwa ka bomomosu nɨbana, woniso mukumbo masɨ nɨmɔ kakʉ na wava. » Yakɔbɔ kɛgʉ ndɨ kaibho bɛ Lakeli ubibotʉ ndɨ bokunzi nɨbɔ.
33 Labhani ogulyo ndɨ ka ngbangba ka Yakɔbɔ, kumbuso yi ka nɨyɔ ka Lɛya na ka nɨyɔ ka bagya-ligubho boko bi baba, nɨ kinigʉ luki gʉtʉgʉ limoti aka. Ka mulibo, ogulyo ndɨ ka nɨyɔ ka Lakeli. 34 Lakeli a ndɨ nɨ uvini bokunzi, ʉsʉma kusili wa pa nɨyɔ bikogo mino kʉgʉ ka ngamiya, iko kʉgʉ yi. Labhani akɨsa ndɨ bɨkpɛkpɛkpɛ kʉsɔ wa ngbangba kʉ, nɨ kuminigʉ. 35 Lakeli abɨkya kʉwa ndɨ abhakɨ bɛ : « Yɛ bha, ɨpɨlyanɔ baka, nakakwananɨgʉ kaamaga kambwa kakʉ, kyɛ na ka masyɛ ma tɨmba kusu ka boko. » Labhani ʉkɨsa bokunzi, luki limoti nɨ kuminigʉ.
36 Lɨmbɛngɨ akandɨkanaga ndɨ Yakɔbɔ bɨsʉlʉ-sʉlʉ, apʉnga kasaana na Labhani, anabɨkya bɛ : « Nogyi ɨkɨ ? Namwi wanɨ, bɛyɔ wa mino kɛnyakɨlya yi ? 37 Woponzini makpʉmʉka kamɨ masɨ, winisonito no luki gʉtʉgʉ limoti aka la ndabʉ kakʉ ? Woniso kambwa ka bomika-mama na bamamakʉ, batɨkʉlyɨ mʉngɨmbɔ lugo kusu baba ! 38 Kʉsɔ wa byanga batɛkɛbɛ baba, tikogo na ɨwɛ. Ko ngbingo yi nɨnɔ wasɨ, mʉma kapʉkagʉ ndɨ kɔndɔlɔ ikani mɛmɨ kakʉ gʉtʉgʉ bemoti aka ! Nakʉlyagɨgʉ ndɨ bogbungulu ba bakɔndɔlɔ ba ambaza kakʉ. 39 Nakigokugʉ ndɨ gʉtʉtʉ lɨsyɛ limoti aka na manda ma nyama kakʉ nɨ nyama wo tutu amwini, luki limoti nakalyaga ndɨ nɨ ɨmɨ aka nɨlɔ lasɨ. Wɛmɨmɨlagatʉ ndɨ gɔnɨ ko bhulyo banyama nɨbɔ bubibogo ndɨ na lɨsyɛ ikanɨ no bhiti. 40 Na lɨsyɛ, nokibhyogo ndɨ mɔnɨ nɨnɔ wapʉ, no bhiti bʉdhɨ ɛlya bɨsʉsʉsʉ, na tɔtɔ ɛpɨkɨta byɨ ko miso. 41 Na ndɨ ka ndabʉ kakʉ kʉsɔ wa byanga batɛkɛbɛ baba, nugugubhyo ndɨ byanga tɛkɛbɛ na bɨkwanganya ko bhulyo basɨka kakʉ baba na byanga madɨya ko bhulyo ambaza ka banyama kakʉ ! Luki limoti, wogomosyono ndɨ mʉkalya kamɨ nganga tɛkɛbɛ. 42 Kiko ndɨ bɛ Kunzi nɨnɔ ka tɨtɛ Abhalahamu, Kunzi nɨnɔ bhabha bɛyɔ ka Isaka abangaga, kɛgʉ ndɨ ka nakpangbala kamɨ, ka lɨngʉnʉ wakwanana ndɨ kɛsa katʉkya mabɔkʉ papuyi. Luki limoti, Kunzi ɨnatʉ ndɨ yigyogyiso kamɨ kʉsɔ wa ligubho nɨlɔ nagya ndɨ lɔ. No bhiti ya isyeku-bi, owoniso bungbingbili kakɨ. »
43 Kʉwa wa, Labhani asikisyo muzyakɨ, abɨkya ndɨ bɛ : « Boko bi nɨbana ba bomikamɨ, bomikabʉ ba bomikamɨ, bakɔndɔlɔ bi nɨbana ba bakɔndɔlɔ kamɨ, masɨ nɨmana wakaɨna ma a ma kamɨ. Nakwanana kaʉgya bʉnɨ na lɨsyɛ li nɨlɨ ikani bomiki nɨbɔ bakaʉbʉkʉtaga ? 44 Kiko nɛkɨ nɨ a bɛyɔ, takʉ silika, ɨwɛ na ɨmɨ, na akwanana dhɛmʉ bemoti iki lugo kusu. »
45 Kumbuso yi, Yakɔbɔ ava lɨtalʉ, omoso ndɨ wa bɨgbʉ. 46 bɨkya ndɨ bamamakɨ bɛ : « Punogoni matamʉ », bapʉnaga ndɨ, bodukusilo liduku li bɨkyɔ. Balyalya ndɨ ka kpɔlɔ wa liduku la matamʉ lɔ. 47 Labhani alɨkya ndɨ pa nɨyɔ na Kihalamu bɛ Yegali-Sahadhuta, na Yakɔbɔ alɨkya ndɨ ɨyɨ na Kibhalania bɛ Galedhi.c 48 Labhani abɨkya ndɨ bɛ : « Liduku la matamʉ nɨlɨna a dhɛmʉ lugo kamɨ na ɨwɛ na lɨsyɛ nɨlɨ. » Kinili balɨkyaga bɛ Galedhi. 49 Pa nɨyɔ balɨkyagatʉ gɔnɨ bɛ Misipad kyɛ ɨyɨ Labhani abɨkya ndɨ bɛ : « Yawe iki mubuulyogi kusu ngbingo yi nɨnɔ takikigʉ mino kaɨnanana. 50 Wakiko kaugyogyiso bomikamɨ, na wakʉva boko bagɔgɔ, wibuulyotʉ, dhɛmʉ gʉtʉgʉ bemoti aka kɛgʉ lugo kusu kiki nɨ Kunzi aka. »
51 Kʉwa wa, Labhani abɨkya ndɨ Yakɔbɔ bɛ : « Wɨna liduku la matamʉ nɨlɨna nodukusili lɨ, na lɨtalʉ nɨlɨna nomosi lugo kusu. 52 Liduku la matamʉ li nɨlɨ na lɨtalʉ li nɨlɨ la kamaga lɨ a badhɛmʉ. Ɨmɨ, nakuni silika ambɛ nakasɨdɨgʉ liduku la matamʉ lɨna kaɨnda kʉ kakʉ na tamanaga yanyɛ, na ɨwɛ wakasɨdɨgʉ bɛgɛyɔ kodhoku kʉkamɨ. 53 Kunzi ka Abhalahamu na Kunzi ka Naholi biki nɨ ɨbʉ bazozi lugo kusu. »