Yakɔbɔ obhongonini na Lakeli
29
1 Yakɔbɔ atʉkyɨlya ndɨ lɨgʉndʉ, aga ka batʉ ba mugi ma miso ya Ɨngɛngɛ. 2 Lɨsyɛ limoti, ɨna ndɨ lɨkɔ ka syʉngbʉ, bambanza basaa ka bakondolo na bamɛmɨ ba ndɨ bakangana ka kpɔlɔkpɔlɔ yi kyɛ bumwisisogo ndɨ libo wa. Lɨtalʉ lidhingi otikyogo ndɨ lɨkɔ. 3 Ngbingo yi nɨnɔ bambaza basɨ ka banyama bamʉmʉkanaga ndɨ mino, batɛ lɨtalʉ ka kpɔlɔ, bumuso libo na bigiso lɨtalʉ ka pa yi gɔnɨ. 4 Yakɔbɔ umuuso ndɨ bobubulyo ka banyama bɛ : « Ye wai, makapʉnya pɨyɛ yanɨ ? » Bosikisyo bɛ : « Takapʉnya ka Halani. » 5 Umuuso bɛ : « Mamibhatʉ Labhani, mika Naholi ? » Bosikisyo bɛ : « Iyo, tamibhatʉ. » 6 Amatɨla bɛ : « Atʉ bɨnza ? » Basikisyo bɛ : « Iyo, a bɨnza. Muminoni, mikakɨ mukoyi bɛyɔ ka Lakeli nɨnɔ okodhoku na bakondolo nɔ. » 7 Ɨgɨlya bɛ : « Winoni ! Lɨsyɛ a mbɛɨ lasɨ, kɛgʉ ngbingo kaʉmʉmʉla banyama. Windoni kaumuso bakondolo libo na kaulyolyiso. » 8 Bosikisyo ndɨ bɛ : « Takakwananɨgʉ kagya bɛyɔ nɨ bambaza basɨ ka banyama a ni mumuligʉ. Batɛ kʉwa lɨtalʉ ka kpɔlɔ, tumuso bakondolo libo. »9 Ngbingo yi nɨnɔ Yakɔbɔ a mbɛyɨ ndɨ bata mino aka kanzɨna na ɨbʉ, Lakeli osiloku ndɨ na bakondolo ka abhakɨ. Ɨyɨ Lakeli a ndɨ mububulyo ka banyama. 10 Nɨyɔ Yakɔbɔ amɨna ndɨ mino mika bʉgwakɨ bɛyɔ ka Lakeli byɨ, na bakondolo ka bʉgwakɨ bɛyɔ ka Labhani, atʉkya, atɛ ndɨ lɨtalʉ nɨlɔ botikyogo ndɨ nolu lɨkɔ ka kpɔlɔ. pá ndɨ bakondolo ka bʉgwakɨ bɛyɔ ka Labhani libo. 11 Kumbuso yi, Yakɔkɔ apututo ndɨ Lakeli na apʉnga ndɨ kagama. 12 Yakɔbɔ atʉmbʉlyaga ndɨ Lakeli bɛ a ɨyɨ ka bangʉ ka abhakɨ na a mika Lɛbhɛka. Lakeli ɨnda ndɨ mbangʉ kabɨkya abhakɨ.
13 Nɨyɔ Labhani ʉkana lɨkpʉmʉka ko mika mamakɨ bɛyɔ ka Yakɔbɔ, ɨnda ndɨ mbangʉ katɨlya. Atakanya, apututo, igoku ndɨ na ɨyɨ kʉ kakɨ. Kʉwa wa, Yakɔbɔ atʉmbʉlyaga ndɨ Labhani masɨ nɨmɔ igyonoso ndɨ. 14 Labhani abɨkya bɛ : « A lɨngʉnʉ, wa ka lɨvananza kamɨ, ta bangʉ imoti ! »
Yakɔbɔ uvini bomika Labhani
Yakɔbɔ asyɛ ndɨ tɨmba bemoti kʉ ka Labhani. 15 Lɨsyɛ limoti, Labhani abɨkya ndɨ bɛ : « Ɨwɛ wa bangʉ kamɨ, luki limoti wakɛgyɨlyɨgʉ ligubho payaya. Ɨbɨkya, luki tino lɔ nʉkalyɨ nolu. » 16 Labhani a ndɨ na basɨka baba. Nɨnɔ pʉta yi ina ndɨ bɛ Lɛya sɛ kʉwa nɨnɔ miki yi bɛ Lakeli. 17 Lɛya a ndɨ no miso bitombiii, luki limoti Lakeli a ndɨ wanza kamɨna na kanda. 18 Yakɔbɔ apa ndɨ Lakeli kʉgbɛ, abɨkya Labhani bɛ : « Nugugubhyotʉ kʉsɔ wa byanga madɨya na ɨka ko bhulyo ka Lakeli mikakʉ nɨnɔ miki yi. » 19 Labhani abɨkya bɛ : « Okwononi gʉtʉgʉ nʉpɨ ɨwɛ nɨ kɛgʉ mʉbyɨ. Wiko pa imoti na ɨmɨ wa kamɨ wa. » 20 Yakɔbɔ agugubhyo ndɨ Labhani kʉsɔ wa byanga madɨya na ɨka ko bhulyo ka Lakeli. Masyɛ mi nɨmɔ masɨ agyɨlya ndɨ makɛdɛ, kyɛ a ndɨ kapa Lakeli kʉgbɛ. 21 Kumbuso yi, Yakɔbɔ abɨkya tɨtakɨ bɛ : « Masyɛ kamɨ itulyonini. Ɨsɨlya kʉwa muko kamɨ, navɨ. »
22 Labhani ʉmaka ndɨ bambanzʉ basɨ ba pa yi nɨyɔ, alyisiso ndɨ dhumo mudhingi. 23 Nɨyɔ adhwɛ bʉgɔgɔ, Labhani ava mikakɨ nɨnɔ pʉta yi bɛyɔ ka Lɛya, apá Yakɔbɔ bɛ basyɨ na ɨyɨ. 24 Labhani a ndɨ nɨ apini mikakɨ Lɛya mʉgya-ligubho kakɨ nɨnɔ ina ndɨ bɛ Zilipa. Ɨyɨ Zilipa ɨɨta kʉwa ndɨ mʉgya-ligubho ka Lɛya. 25 Nɨyɔ lɨsyɛ asyɛ, Yakɔbɔ azʉkana, ibho bɛ a ndɨ Lɛya ! Amuuso tɨtakɨ bɛ : « Wegyi kʉwa bʉnɨ bɛyɔ ? Nakugugubhyagʉ mbɛyɨ ndɨ ko bhulyo ka Lakeli ? Wɛbɔ ndɨ ko bhulyo ɨkɨ ? » 26 Labhani asikisyo bɛ : « Ka mugi kusu takagyagɨgʉ bɛyɔ. Takakwananɨgʉ kapá miki ko vononi kambwa ka ya dhakɨ. 27 Mosisyonɔ pɔsɔ wo dhumo wo vononi ka Lɛya. Ko bhulyo ka Lakeli, nʉpátʉ gɔnɨ, kumbuso yi wegugubhyo bata kʉsɔ wa byanga madɨya na ɨka bagɔgɔ. » 28 Yakɔbɔ abhaɨlya ndɨ. Omosisyo pɔsɔ wo dhumo ka Lɛya, kumbuso yi Labhani apá mikakɨ bɛyɔ ka Lakeli bɛ iki mukakɨ. 29 Labhani a ndɨ nɨ apini Lakeli mʉgya-ligubho kakɨ nɨnɔ ina ndɨ bɛ Bhiliha. Ɨyɨ Bhiliha ɨɨta kʉwa ndɨ mʉgya-ligubho ka Lakeli. 30 Yakɔbɔ apa ndɨ Lakeli kakɨtaga Lɛya. Basyɛ kʉwa ndɨ gɔnɨ na ɨyɨ. Agugubhyo bata ndɨ tɨtakɨ kʉsɔ wa byanga madɨya na ɨka bagɔgɔ.
Bomika Yakɔbɔ
31 Nɨyɔ Yawe ɨna bɛ Yakɔbɔ kɛgʉ kapa Lɛya, amakya ndɨ kʉsɔ wa libukuti na asa Lakeli ndʉya.
32 Lɛya ava mʉma, abʉkʉta miki, alʉka bɛ Lubheni,a abɨkya bɛ : « Yawe inini bi yigyogyiso kamɨ. Mbɨya wanʉ mbʉnyamɨ ɛpatʉ. »
33 Ava bata mʉma, abʉkʉta miki mʉlʉkʉ yi, alʉka bɛ Simioni,b abɨkya bɛ : « Yawe epini miki mʉlʉkʉ yi wagɔgɔ kyɛ ibhatʉ bɛ bakɛpagɨgʉ ndɨ. »
34 Ava bata mʉma magɔgɔ, abʉkʉta miki mʉlʉkʉ yi, alʉka bɛ Lawi, cabɨkya bɛ : « Mbɨya wanʉ, mbʉnyamɨ ɨpátʉ kʉwa na ɨmɨ kyɛ nabukutilyini bomiki balʉkʉ bi basaa. »
35 Ava bata mʉma, abʉkʉta miki mʉlʉkʉ yi, alʉka bɛ Yudha, dabɨkya bɛ : « Mbɨya wanʉ, nabhibhiso Yawe ! » Kumbuso yi asa kabʉkʉta.