Agali abukutini Isimaeli
16
1 Salai a ndɨ nɨ kanabukutilyigʉ mbʉnyakɨ bɛyɔ ka Abhalama miki. Ɨyɨ Salai a ndɨ na mʉgya-ligubho bemoti Wabamisili, nɨnɔ ina ndɨ bɛ Agali. 2 Abɨkya kʉwa ndɨ mbʉnyakɨ bɛ : « Kikiliki, wakaibho bɨnza bɛ Yawe kanepigʉ miki. Mʉva nɛkɨ mʉgya-ligubho kamɨ, ngbingo wagɔgɔ nakwanana kainisono no miki ko pisi kakɨ. » Abhalama abhaɨlya ndɨ tamanaga ka mukakɨ.3 Kʉwa wa, Salai apá ndɨ Abhalama mʉgya-ligubho kakɨ Wabamisili bɛyɔ ka Agali bɛ iki gɔnɨ mukakɨ. Lɨkpʉmʉka li nɨlɔ igyonoso ndɨ kumbuso Abhalama kasyɛsyɛ ka mugi ma Kanana byanga tɛkɛbɛ. 4 Abhalama ava kʉwa ndɨ Agali, apá mʉma. Nɨyɔ Agali ɨmɨna bɛ a kʉwa na mʉma, apʉnga kamɨna amakɨ kʉwa asɨ payaya aka. 5 Salai abɨkya kʉwa ndɨ mbʉnyakɨ bɛ : « Ɨwɛ nɔ wakabhɨnɨka buti ba mosikoni kamɨ ! Ɨmɨ bɨkpɛ nɔ numomosyo ndɨ mʉgya-ligubho kamɨ bɨgbʉ, luki limoti katʉkya wa aka wa ovi bi mino mʉma, niitini luki la payaya ko miso kakɨ. Yawe iki zozi lugo kakʉ na ɨmɨ ! » 6 Kʉwa wa, Abhalama asikisyo ndɨ bɛ : « Mʉgya-ligubho kakʉ a kusili wa mʉtʉʉ kakʉ. Wakwanana kagya bɛyɔ aka yɔ wobhoilyi mino. » Salai apʉnga kʉwa ndɨ kagyagya Agali, na kʉ kwa kʉ apɨkɨta ndɨ mino.
7 Malaika ka Yawe atakanya ndɨ Agali buwobhi na lɨkɔ limoti ka ɨsa, ko pisi nɨyɔ ɨndaga ndɨ ka Suli. 8 Amuuso bɛ : « Agali, mʉgya-ligubho ka Salai, wapʉnya yanɨ na wakaɨnda yanɨ ? » Agali asikisyo ndɨ bɛ : « Napikitiku bi mama bɛyɔ ka Salai. » 9 Malaika ka Yawe abɨkya kʉwa ndɨ bɛ : « Wɨga ka amakʉ, wisiso kambwa kakɨ. » 10 Omotiloku bata bɛ : « Kunzi otundiso ndɛkɛ lɨvananza kakʉ lakpʉ na bakakwananɨgʉ katanga. »
11 Malaika ka Yawe opipiloku na ɨyɨ bɛ :
« kana ! Wa na mʉma, wabʉkʉta banʉ miki mʉlʉkʉ yi,
walʉka banʉ bɛ Isimaeli, a
kyɛ Yawe ukonito bi mʉgamʉ kakʉ mo kumbu.
12 Mikakʉ iko ndɛkɛ abhɛ punda wo tutu b
Abhumana ndɛkɛ na batʉ basɨ na batʉ basɨ babhʉmana ndɛkɛ na ɨyɨ.
Iko ndɛkɛ yɨkaka, wakɨtɛ na bamamakɨ. »
13 Kʉwa wa, Agali atamanaga ndɨ bɛ : « A lɨngʉnʉ bɛ wanʉ namini bi nɨnɔ akɛmɨna ? » Alʉka ndɨ Yawe nɨnɔ banzɨna ndɨ na ɨyɨ bɛ « Ɨwɛ nɨ Kunzi nɨnɔ Ɨnaga. » 14 Kinili lɨkɔ li nɨlɔ balɨkyaga bɛ : « Lɨkɔ ka nɨnɔ a na ɔbɨlɨ na akɛmɨna. » Lɨkɔ li nɨlɔ a lugo wa Kadhesi na Bheledhi.