Kunzi akapá Abhalama agɔmɛ
15
1 Kumbuso wa masyɛ, Yawe apuponilyo ndɨ Abhalama ko nziki, abɨkya bɛ : « Abhalama, wakobongonitɔgʉ ! Ɨmɨ nɨ kɔpɨ kakʉ. Nʉpá ndɛkɛ mʉkalya makpʉ kʉgbɛ. » 2-3 Luki limoti, Abhalama asikisyo bɛ : « Mombukwono dhamɨ Yawe, a na ɨzangɨya tino kɛpá luki ? Nakɛgʉ no miki, wɛkɛpágʉ gɔnɨ lɨvananza. Bemoti ka bagya ligubho kamɨ bɛyɔ ka Eliezeli nɨnɔ mʉtʉ wa Dhamasi nɔ otigolo ndɛkɛ na lisimo kamɨ. » 4 Kʉwa wa, Yawe asikisyo ndɨ bɛ : « Kalɨ, kɛgʉ Eliezeli nɔ otigolo ndɛkɛ na lisimo kakʉ, luki limoti iko miki yi nɨnɔ wabʉkʉta ndɛkɛ bɨkpɛ. » 5 Yawe apupiso ndɨ Abhalama kunzi, abɨkya bɛ : « Wanda kʉgʉ wa lɨsyɛ, wakwananatʉ katanga mangʉtʉ mi nɨma ? Kɨgyananɨgʉ ! Ka lɨngʉnʉ, lɨvananza kakʉ iko ndɛkɛ yidhingi mʉdɔngɔnɨ abhɛ imu. » 6 Abhalama ɨgʉmya ndɨ ka Yawe, na Yawe amɨna ndɨ mʉtʉ wo ngbingbili.7 Yawe abɨkya Abhalama bɛ : « Ɨmɨ nɨ Yawe nɨnɔ nunyoku ndɨ katʉkya ka gʉdʉ wa Uli ka Bakalidheya bɛkyɛ nʉpɨ́ mugi mi nɨmana wa mino ma ɨɨtɨ kʉwa ma kakʉ. » 8 Abhalama amuuso ndɨ bɛ : « Mombukwono dhamɨ Yawe ! Nibho lɨkɨ bɛ mugi mi nɨma iko kʉwa banʉ ma kamɨ ? » 9 Yawe asikisyo bɛ : « Ipoku mʉsɨka wa ngɔmbɛ, mʉsɨka wa mɛmɨ nɨbɔ biko na byanga bɨsaa, kɔndɔlɔ mumu yi wa byanga bɨsaa gɔnɨ, nzuo na mikya likpondi. » 10 Abhalama adhulyoku ndɨ na banyama bi nɨbɔ basɨ. malanaga ndɨ yɨkaka-yɨkaka lugo na obhisogo bapanga bi ka mʉdɔngɔ mɨba banandanana buwobhi-buwobhi. mwɔgɔ ndɨ gɔnɨ bombu, luki limoti nɨ kumolonogigʉ. 11 Bombu nɨbɔ balyaga makɔlɔ papʉnga ndɨ kosyoku kʉgʉ ka banyama bi nɨbɔ, luki limoti Abhalama ukpumyo.
12 Nɨyɔ mɔnɨ ogwo, Abhalama alala ndɨ bɨpɛ. Ko ngbingo bemoti, kʉbangakʉ no bhiti nɨyɔ yopi bipi aumo ndɨ. 13 Yawe abɨkya Abhalama bɛ : « Wibho bɨnza bɛ bɛvananza kakʉ biko ndɛkɛ ka mugi nɨmɔ kɛgʉ ma kabʉ. Bɨɨta ndɛkɛ bosunzu na bugyogyiso ndɛkɛ kʉsɔ wa byanga bamɨya bakwanganya. 14 Gʉtʉgʉ bɛyɔ, nakɔtʉ ndɛkɛ mʉkɔmbʉ ma mugi mi nɨnɔ ugyogyiso ndɨ mɔ. Kumbuso yi, bopupoku kʉwa ndɛkɛ kʉ bɛyɔ na lɨngama lidhingi. 15 Luki limoti, ɨwɛ, ɔbɨlɨ kakʉ iko ndɛkɛ mʉnda, wokwo kʉsɔ wa mazɨyɔ, wɨnda ndɛkɛ kaʉtakanya batɨtakʉ. 16 Lɨvananza kakʉ ya yɨkwanganya yɔ igoku ndɛkɛ wanʉ ka Kanana. Ka lɨngʉnʉ, bʉnyɛ ka Baamoli kanebheduligʉ mbɛyɨ bɛ nukpumyi ka mugi mi nɨma. »
17 Kumbuso mɔnɨ kogwo, bhiti oumo ndɨ. Ko ngbingo bemoti aka, fulu wo muki na lɨdada lo buku akɨtanaga ndɨ lugo wa bapanga ba ya banyama bi nɨbɔ. 18 Lɨsyɛ li nɨlɔ aka lɔ, Yawe apá ndɨ Abhalama agɔmɛ. Abɨkya bɛ : « Mugi mi nɨma, nakaʉpá bomikakʉ na bomiko-mikakʉ, katʉkya ko libo la mugi ma Misili,a kadhwɛ ko libo lidhingi Fulati. 19 A mugi ka Bakeni, Bakenizi, Bakadhimoni, 20 Bahiti, Bapelizi, Balefaimu, 21 Baamoli, Bakanana, Bagiligasi na Bayebhusi. »