ABHALAMA
Kunzi akpomyini Abhalama bɛ atʉkyɨ ka mugi kabʉ
12
1 Lɨsyɛ limoti, Yawe abɨkya ndɨ Abhalama bɛ : « Tʉkya ka mugi kunu, ka lɨvananza kakʉ na ka ndabʉ ka abhakʉ. Kumbuso yi, waga ka mugi nɨmɔ nʉwanya banʉ. 2 Katʉkya kʉ kakʉ, nobukutiso banʉ lɨbhabha lidhingi, nudukulyo bʉbʉnga na nibhisikoso lino kakʉ ka bambanzʉ bakpʉ. Na bambanzʉ bi nɨbɔ, binisono banʉ na bʉbʉnga ko pisi kakʉ. 3 Noduko banʉ bʉbʉnga kamɨ ka basɨ nɨbɔ biko kaudukulyo bʉbʉnga, luki limoti, nagbanga banʉ nɨnɔ iko kaʉgbanga. Ko pisi kakʉ, noduko ndɛkɛ bʉbʉnga ka bɛvananza bayasɨ ba ya ɔbɨlɨ. »4 Kʉwa wa, Abhalama aga ndɨ pa imoti na Lɔtɨ, mʉdɔngɔnɨ bɛyɔ Yawe akpamya ndɨ mino. A kʉwa ndɨ na byanga batɛkɛbɛ madɨya na ɨka na kubukumuti ngbingo yi nɨnɔ atʉkya ndɨ mino ka Halani. 5 Abhalama ava ndɨ mukakɨ bɛyɔ ka Salai, mika mamakɨ bɛyɔ ka Lɔtɨ, lɨngama kakɨ lasɨ na bosunzu nɨbɔ inisono ndɨ nobu ka Halani, baga ndɨ miso ya mugi ma Kanana.
Abhalama odhwini ka mugi ma Kanana
Abhalama osilo kʉwa ndɨ ka Kanana. 6 Bakɨtaga ndɨ lugo wa mugi, badhwɛ ka sɨbhʉkʉsɔ sotu ka Mole nɨsɔ bubhibhisogo ndɨ mino bokunzi, ka gʉdʉ wa Sekemu. Ko ngbingo yi nɨnɔ, Bakanana bɔ bikogo ndɨ ka iwili yi nɨyɔ. 7 Kʉwa wa, Yawe apuponilyo ndɨ Abhalama, abɨkya bɛ : « Nʉpá ndɛkɛ bomikakʉ na bomiko-mikabʉ mugi mi nɨma. » Kinili ka pa nɨyɔ aka yɔ, Abhalama apikilyo ndɨ Yawe gbɔgbɔ.
8 Kumbuso yi, Abhalama aga ndɨ ka iwili ya bangʉpa, miso ya ɨngɛngɛ wa gʉdʉ wa Bheteli. Opiko ndɨ bangbangba lugo wa Bheteli miso ya dhumbe na Ai miso ya ɨngɛngɛ. Wa bɛyɔ, apikilyo Yawe gbɔgbɔ yagɔgɔ, na akʉnga Kunzi anamaka bɛ Yawe. 9 Kʉwa wa, Abhalama ɨnda ndɨ asɨ syɛsyɛgɛ aka kadhwɛ miso ya iwili ya Negebhu.
Abhalamaa anaga ka Misili
10 Kumbuso yi, mufefenge ma nza ogulyo ndɨ ka mugi ma Kanana. A ndɨ mapʉ kʉgbɛ, kinili Abhalama atʉkya ndɨ, aga kaiko bongbingo bakɛdɛ ka Misili. 11 Ngbingo yi nɨnɔ ba ndɨ mino kogulyo ka Misili, abɨkya mukakɨ bɛyɔ ka Salai bɛ : « kana, nakaibho ambɛ wa wanza bizede. 12 Nɨyɔ Bamisili bʉmɨna banʉ, babɨkya banʉ bɛ wa muko kamɨ. Kumbuso yi, bɛmwɔ banʉ, bʉsa ɨwɛ ka ɔbɨlɨ. 13 Kikiliki, ʉbɨkya nɛkɨ ambɛ topupo na ɨwɛ, ko bhulyo kyɛ biki kɛgyɨlya bʉnza, basa ɔbɨlɨ kamɨ. »
14 Ngbingo yi nɨnɔ Abhalama osilo mino ka Misili, Bamisili bɨna bɛ mukakɨ a ndɨ wanza kʉgbɛ. 15 Bagʉgʉ ka ngama mudhingi wa Misili bamɨna ndɨ, bɨnda kabhɨbha kambwa ka ngama kabʉ. Bagulyiso kʉwa ndɨ Salai ka ndabʉ ka ngama mudhingi yi nɨnɔ. 16 Ko bhulyo kakɨ, ngama mudhingi wa Misili owoniso sɨpananɨsɔ kʉgʉ ka Abhalama. Apá ndɨ bakɔndɔlɔ, bamɛmɨ na bangɔmbɛ, bagya-ligubho balʉkʉ na boko bi, bapunda balʉkʉ na boko bi, sɛ kʉwa bangamiya.
17 Luki limoti, kaɨna bɛyɔ ngama ava ndɨ mino Salai, muka Abhalama bɛ mukakɨ, Yawe amakya ndɨ na lɨvananza kakɨ kʉsɔ wa bʉkpɛkɨ-kpɛkɨ budhingi. 18 Kʉwa wa, ngama amaka ndɨ Abhalama, amuuso bɛ : « Wegyi bi bɛyɔ ko bhulyo ɨkɨ ? Ko bhulyo ɨkɨ yɔ wakebikyigʉ bɛ a mukakʉ ? 19 Hu ! Ko bhulyo ɨkɨ yɔ wobikyi bi mino bɛ a mamakʉ ? Nava sɛ kʉwa ɨmɨ bɛ muko ? Ɛɛɛ ! Mbɨya wanʉ, mukakʉ nɨmʉ, mʉva, maga ! » 20 Ka mulibo, ngama ʉkpamya ndɨ batʉ kakɨ bɛ bapupisi ko pisi, ɨyɨ, mukakɨ na makpʉmʉka masɨ nɨmɔ ba ndɨ nomu.