Bambanzʉ ba ɔbɨlɨ bakopiko mʉnala ma Bhabheli
11
1 Ko ngbingo yi nɨnɔ, bambanzʉ basɨ ba ɔbɨlɨ banzɨnaga ndɨ lɨsasʉ limoti aka. 2 Lɨsyɛ limoti, bambanzʉ batʉkyɨlya ndɨ lɨgʉndʉ, bɨnda miso ya ɨngɛngɛ. Kʉ bɛyɔ, batakanya ndɨ pa bɨkpa ko dhidho wa bangʉpa kʉ, ka mugi ma Sinali na biko ndɨ wa. 3 Kumbuso wo ngbingo mʉkɛdɛ, bapʉnga kaɨbɨkya lugo kabʉ bɛ : « Ale ! Tadhwini bhiliki, tabhʉsya. » Ba ndɨ na bhiliki ka pa ya matamʉ na luki limoti abhɛ mʉkpʉndʉ mondodi-ndodi ka pa ya sɨmɛtɨ. 4 Kʉwa wa, babɨkya bɛ : « Ale ! Tipikilyini gʉdʉ na mʉnala manda nɨmɔ mʉ mi adhwɛ ka lɨsyɛ. Tiko kʉwa bakimibhisikoso na takakwananɨgʉ komisikono ka ɔbɨlɨ. »5 Ngbingo yi nɨnɔ bambanzʉ ba ndɨ mino kapiko gʉdʉ na mʉnala, Yawe osyoku ndɨ katʉkya ka lɨsyɛ, kaɨna ligubho nɨlɔ ba ndɨ kagya lɔ. 6 Kumbuso kaɨna, ɨga bata kʉgʉ wa lɨsyɛ, atamana bɛ : « Bakagya bɛyɔ kyɛ ɨbʉ basɨ ba batʉ bumoti na bakanzɨna lɨsasʉ limoti. Lipipiko la gʉdʉ yi nɨnɔ na mʉnala nɨmɔ a mʉpʉnganagɨ ma masɨ nɨmɔ batʉ nɨbɔ bakwanana ndɛkɛ kagya. Kumbuso yɨkɛdɛ, biko banʉ bakɨtʉlya kagya masɨ nɨmɔ bakatamanaga. 7 Ale ! Tosyini bata kʉ bɛyɔ, tobhunzi mʉnzɨna kabʉ kyɛ bakikonitogʉ bata kanzɨna lɨsasʉ limoti lugo kabʉ. » 8 Basa kʉwa ndɨ kapiko gʉdʉ, Yawe umisyo ndɨ bingbwi ka bapa bayasɨ ka ɔbɨlɨ. 9 Kinili balʉka ndɨ gʉdʉ yi nɔ bɛ Bhabheli, kyɛ Yawe obhunzoa ndɨ mʉnzɨna ka bambanzʉ wa bɛyɔ. Na katʉkya ka gʉdʉ yi nɨnɔ, umisyo ndɨ bambanzʉ bapa bayasɨ ka ɔbɨlɨ.
Lɨvananza nɨlɔ opuponogo ndɨ katʉkya ka Semu adhwɛ ka Abhalama
10 Puponogo ka Semu nɨyɨ : Byanga bɨba kumbuso wa tumo yidhingi, Semu a ndɨ na byanga mɨya bemoti. Abʉkʉta ndɨ Alipakisadhi. 11 Kumbuso kabʉkʉta Alipakisadhi, Semu agya bata ndɨ byanga bamɨya kubukumuti, ʉbʉkʉtaga bomiki balʉkʉ na boko bi.
12 Alipakisadhi a ndɨ na byanga batɛkɛbɛ basaa na kubukumuti ngbingo yi nɨnɔ abʉkʉta ndɨ mino Sela. 13 Kumbuso kabʉkʉta Sela, Alipakisadhi, agya bata ndɨ byanga bamɨya bakwanganya na basaa, ʉbʉkʉtaga bomiki balʉkʉ na boko bi.
14 Sela a ndɨ na byanga batɛkɛbɛ basaa ngbingo yi nɨnɔ abʉkʉta ndɨ mino Ebheli. 15 Kumbuso kabʉkʉta Ebheli, Sela agya bata ndɨ byanga bamɨya bakwanganya na basaa, ʉbʉkʉtaga bomiki balʉkʉ na boko bi.
16 Ebheli a ndɨ na byanga batɛkɛbɛ basaa na bɨkwanganya ngbingo yi nɨnɔ abʉkʉta ndɨ mino Pelegi. 17 Kumbuso kabʉkʉta Pelegi, Ebheli agya bata ndɨ byanga bamɨya bakwanganya na batɛkɛbɛ basaa, ʉbʉkʉtaga bomiki balʉkʉ na boko bi.
18 Pelegi a ndɨ na byanga batɛkɛbɛ basaa ngbingo yi nɨnɔ abʉkʉta ndɨ mino Leu. 19 Kumbuso kabʉkʉta Leu, Pelegi agya bata ndɨ byanga bamɨya baba na kʉbɔmʉ, ʉbʉkʉtaga bomiki balʉkʉ na boko bi.
20 Leu a ndɨ na byanga batɛkɛbɛ basaa na bɨba ngbingo yi nɨnɔ abʉkʉta ndɨ mino Selugi. 21 Kumbuso kabʉkʉta Selugi, Leu agya bata ndɨ byanga bamɨya baba na madɨya na ɨka, ʉbʉkʉtaga bomiki balʉkʉ na boko bi.
22 Selugi a ndɨ na byanga batɛkɛbɛ basaa ngbingo yi nɨnɔ abʉkʉta ndɨ mino Naholi. 23 Kumbuso kabʉkʉta Naholi, Selugi agya bata ndɨ byanga bamɨya baba, ʉbʉkʉtaga bomiki balʉkʉ na boko bi.
24 Naholi a ndɨ na byanga batɛkɛbɛ baba na kʉbɔmʉ ngbingo yi nɨnɔ abʉkʉta ndɨ mino Tela. 25 Kumbuso kabʉkʉta Tela, Naholi agya bata ndɨ byanga mɨya bemoti tɛkɛbɛ na kʉbɔmʉ, ʉbʉkʉtaga bomiki balʉkʉ na boko bi.
26 Ngbingo yi nɨnɔ Tela otulyoso mino byanga batɛkɛbɛ madɨya na ɨka, a ndɨ nɨ ubukutini bomiki basaa : Abhalama, Naholi na Alani.
Lɨvananza ka Tela
27 Puponogo ka Tela nɨyɨ : Tela abʉkʉta ndɨ Abhalama, Naholi sɛ kʉwa Alani. Alani abʉkʉta ndɨ Lɔtɨ. 28 Ɨyɨ Alani okwo ndɨ ka Uli ka Bakalidheya, mugi kakɨ ma kɨbʉkʉta. Luki limoti, abhakɨ bɛyɔ ka Tela a mbɛyɨ ndɨ ka ɔbɨlɨ aka. 29 Alani ʉsa ndɨ bomiki boko bi baba : Milika na Isika. Milika ava ndɨ bʉgwakɨ bɨkpɛ bɛyɔ ka Naholi, na bʉgwakɨ yi nɨnɔ wagɔgɔ bɛyɔ ka Abhalama ava ndɨ ɨyɨ Salai. 30 Salai kɛgʉ ndɨ no miki kyɛ a ndɨ ndʉya.
31 Tela ava kʉwa ndɨ mikakɨ bɛyɔ ka Abhalama, muzyakɨ bɛyɔ ka Salai no miko-mikakɨ bɛyɔ ka Lɔtɨ. Lɔtɨ a ndɨ ɨyɨ mika Alani. Ɨbʉ basɨ, batʉkya ndɨ ka gʉdʉ wa Uli ka Bakalidheya, baga ka mugi ma Kanana. Luki limoti, ngbingo yi nɨnɔ bosilo ndɨ mino ka gʉdʉ wa Halani, biko ndɨ wa. 32 Nɨyɔ Tela otulyoso ndɨ byanga bamɨya baba na kubukumuti, okwo kʉwa ndɨ ka Halani.